Sɔlemɔ Obi Yehowa Dɛŋ Yelikɛbuamɔ
1 Yesu ha bɔ ni ehe hiaa ni Yehowa jɔɔmɔ ahi amɛsɔɔmɔ nitsumɔ lɛ nɔ lɛ hi ekaselɔi lɛ ajwɛŋmɔi amli. (Mat. 9:37, 38) Wɔtsuiŋ shidaa kɛ yijiemɔ sɔlemɔi, ni faikpamɔi babaoo fata he lɛ tsɔɔ bɔ ni wɔkɛ wɔhe fɔ̃ɔ Yehowa nɔ kwraa kɛha edɛŋ yelikɛbuamɔ (Fil. 4:6, 7) Ŋmalɛi lɛ woɔ wɔ hewalɛ koni ‘wɔkɛ sɔlemɔ kɛ faikpamɔ fɛɛ asɔle’ daa, ni enɛ baakɔ sɔɔmɔ nitsumɔ lɛ he sɔlemɔi ahe.—Efe. 6:18.
2 Wɔjieɔ Yehowa yi yɛ sɔlemɔ mli yɛ esui ni anyɛŋ akɛ nɔ ko ato he kɛ enitsumɔi ni nɔ bɛ lɛ hewɔ. Wɔjieɔ eyi ejaakɛ lɛ ji sanekpakpa ni wɔshiɛɔ lɛ Hãlɔ. Esa wɔ yijiemɔ ejaakɛ lɛ pɛ ji mɔ ni haa wɔ sɔɔmɔ nitsumɔ lɛ yeɔ omanye.—Lala 127:1.
3 Wɔ shidaa sɔlemɔi lɛ tsɔɔ hiɛsɔɔ ni wɔyɔɔ kɛha Yehowa, akɛni eha wɔnu nɔ ni ji esuɔmɔnaa nii kɛ eyiŋtoo shishi lɛ hewɔ. Ani ejeee hegbɛ ni wɔná akɛ wɔkɛ mɛi krokomɛi aaagba Maŋtsɛyeli anɔkwalei lɛ ahe sane? Wɔdaa Yehowa shi yɛ nibii fɛɛ ni wɔnyɛɔ wɔtsuɔ yɛ sɔɔmɔ nitsumɔ lɛ mli lɛ hewɔ—Lala 107:8; Efe. 5:20.
4 Eja gbɛ akɛ wɔbiɔ Yehowa dɛŋ yelikɛbuamɔ koni eha wɔnine ashɛ gbɔmɛi ni baakpɛlɛ Biblia mli nikasemɔ ni wɔkɛɔ akɛ wɔkɛ amɛ baafee lɛ nɔ, kɛ agbɛnɛ hu ni eye ebua wɔ koni wɔha anɔkwale lɛ ashɛ amɛtsuii ahe. Faikpamɔi ni tamɔ enɛɛmɛi tsɔɔ akɛ, Nyɔŋmɔ pɛ baanyɛ aha wɔsɔɔmɔ nitsumɔ lɛ awo yibii.—1 Kor. 3: 5-7.
5 Nyɛmi yoo ko susu akɛ yoo ko ni ehaa lɛ woji tɛtrɛbii lɛ daa gbi Iɛ kaneee Buu-Mɔɔ kɛ Awake! lɛ. Akɛni esumɔɔɔ ni nɛkɛ woji ni jara wa waa nɛɛ afee efolo hewɔ lɛ, ekpa Yehowa fai akɛ, kɛ́ yoo lɛ kaneee lɛ, belɛ yoo Iɛ akpoo. Be kroko ni nyɛmi yoo lɛ tee jɛmɛ lɛ, yoo lɛ wu kɛɛ akɛ: “Oyiwaladɔŋŋ akɛ okɛ woji tɛtrɛbii nɛɛ bahaa wɔ daa gbi. Miikane, ni yɛ anɔkwale mli lɛ, misumɔɔ.”
6 Wɔbaanyɛ wɔjɛ heshibaa kɛ ekãa mli wɔkpa Yehowa fai ni eye ebua wɔ koni wɔnyɛ wɔdamɔ shikpilikpiifeemɔ kɛ hefɛoyeli ni maŋbii kɛbaa wɔnɔ lɛ naa koni wɔye gbɔmɔ gbeyeishemɔ nɔ kunim, bɔni afee ni wɔya nɔ wɔkɛ ekãa ashiɛ atsɔɔ mɛi krokomɛi (Bɔf. 4:31) Kɛ́ wɔtee nɔ ‘wɔkɛ sɔlemɔ kɛ faikpamɔ fɛɛ sɔle’ daa, yɛ be mli ni wɔkɛ bulɛ tsuɔ wɔsɔɔmɔ krɔŋkrɔŋ lɛ he nii lɛ, no Iɛ wɔbaanyɛ wɔná hekɛnɔfɔɔ akɛ Yehowa baaye ebua wɔ.—1 Yoh. 3:22.