Maŋtsɛyeli Asai Ahe Ebahia Waa yɛ Yifalɛ ni Yaa nɔ Daa Iɛ Hewɔ
1 Yehowa Nyɔŋmɔ egba efɔ̃ shi jeeŋmɔ kɛtsɔ egbalɔ lɛ nɔ akɛ “jeŋmaji lɛ fɛɛ anii ni jara wa lɛ aaaba.” (Hag. 2:7) Eka shi faŋŋ akɛ ŋmɛnɛ, wɔmiina odaseyeli ni tsɔɔ bɔ ni ŋwɛi nitsɔɔmɔ yeɔ ebuaa mɛi babaoo koni amɛkase anɔkwale lɛ ni amɛtsɔmɔ Yehowa jálɔi. Kwɛ bɔ ni eji mlifilimɔ diɛŋtsɛ akɛ aaale akɛ abaptisi mɛi 4,761 yɛ afi 1998 sɔɔmɔ afi lɛ mli, ni yɛ nakai beaŋ nɔŋŋ lɛ áto asafoi heei 72 shishi. Yɛ yifalɛ babaoo nɛɛ hewɔ lɛ, ebɛ naakpɛɛ akɛ Maŋtsɛyeli Asai babaoo ahe miihia waa diɛŋtsɛ.
2 Niiamlipɛimɔi ni afee nyɛsɛɛ nɛɛ etsɔɔ akɛ esa akɛ amamɔ Maŋtsɛyeli Asai heei kɛjɛ 60 kɛmiishɛ 80 daa afi bɔni afee ni etsu hiamɔ lɛ he nii. Asafoi babaoo kpeɔ yɛ tsũi ni ahai amli lolo, tamɔ akutso lɛŋ kpeehei kɛ skultsũi amli. Kpee be lɛ baanyɛ atsake, aloo eeenyɛ eba lɛ akɛ tsũ lɛ nɔkwɛlɔi lɛ kɛhaŋ dɔŋŋ yɛ sɛɛ mli kɛ́ amɛmiisumɔ ni amɛfee nakai. Nitsumɔ nibii kɛ sɛii ni yɔɔ tsũi ni tamɔ nɛkɛ ni ahai mli lɛ ji nibii ni akɛtsuɔ nii yɛ be kuku mli, ni ebiɔ koni ato he gbɛjianɔ amamɔ shi kɛha kpee fɛɛ kpee koni ajie yɛ sɛɛ mli. Yɛ shihilɛi ni tamɔ enɛɛmɛi amli lɛ, akutsoŋ bii lɛ baanyɛ abu asafo lɛ akɛ amɛbɛ tsũ ni amɛkpeɔ yɛ mli, ni ekolɛ enɛ haŋ amɛná mɛi babaoo.
3 Mɛni hewɔ ni Maŋtsɛyeli Asa ni amaa lɛ faaa bɔ ni baashɛ asafoi heei ni atoɔ shishi lɛ? Nɔ̃ diɛŋtsɛ ni kɛ naagba lɛ baa ji shika sane. Shikpɔŋ jara etee hiɛ oyayaayai yɛ maŋtiasei babaoo mli aahu akɛ asafoi wuji po nyɛɛɛ ahe shikpɔŋ ni amɛkɛbaama Maŋtsɛyeli Asa. Yɛ yiŋtoo nɛɛ nɔŋŋ hewɔ lɛ, nyɛmimɛi lɛ náaa tsũi ni yɔɔ ni abaanyɛ atsake lɛ afee Maŋtsɛyeli Asai. Bɔ ni ewa akɛ aaaha shikpɔŋ atsɔ̃ mɔ nɔ̃ yɛ mla naa yɛ hei komɛi lɛ hu fata he. Bɔni afee ni aye abua ni amamɔ Maŋtsɛyeli Asai oyayaayai koni etsu hiamɔ lɛ he nii lɛ, Asafo lɛ eto Asafo Maŋtsɛyeli Asa Tsũmaa He Fotro lɛ he gbɛjianɔ, ni éhala Kpokpaa Tsũmaa Ajinafoi.
4 Asafo Maŋtsɛyeli Asa Tsũmaa He Fotro: Akɛ Asafo Maŋtsɛyeli Asa Tsũmaa He Fotro lɛ etsu nii yɛ maŋ nɛɛ mli aahu kɛjɛ afi 1988 kɛbaa. Akɛ shika ni abuaa naa awoɔ fotro nɛɛ mli koni akɛye abua asafo fɛɛ asafo lɛ faa asafoi kɛha amɛ Maŋtsɛyeli Asa tsũmaa nitsumɔi. Kɛ asafoi ni tamɔ nɛkɛ lɛ yaa nɔ amɛwoɔ fotro lɛ mli shika ni akɛfaa amɛ Iɛ he nyɔmɔ lɛ, enɛ haa anyɛɔ akɛ shika faa asafoi krokomɛi lolo.
5 Wɔ akɔntaabuu Iɛ tsɔɔ akɛ, kɛ́ aja mli lɛ, asafoi 188 (yɛ asafoi 978 teŋ Iɛ) kɛ aaafee ¢1,280,000 woɔ Asafo Maŋtsɛyeli Asa Tsũmaa He Fotro lɛ mli daa nyɔɔŋ. Agbɛnɛ hu, kɛ́ aja mli Iɛ aŋkroaŋkroi ejwɛ kɛ aaafee ¢13,234 woɔ fotro lɛ mli daa nyɔɔŋ. Nikee ni jɛɔ aŋkroaŋkroi kɛ asafoi nɛɛ aŋɔɔ lɛ sa kadimɔ waa diɛŋtsɛ. Wɔmiisumɔ ni wɔtsɔɔ hiɛsɔɔ babaoo ni wɔyɔɔ kɛha mɔdɛŋ ni amɛyaa nɔ amɛbɔɔ daa lɛ —2 Kor. 8:1. 2.
6 Taakɛ amrɔ nɛɛ nibii ajara tsɔɔ lɛ, Maŋtsɛyeli Asa ni yɔɔ akrowa ko mli Iɛ jara he akɔntaabuu baanyɛ ashɛ ¢33,000,000. Shi kɛlɛ, Maŋtsɛyeli Asa ni yɔɔ maŋtiase ko mli lɛ jara baanyɛ afee ¢71,000,000. No hewɔ lɛ, yɛ shika ni akɛhaa bianɛ lɛ naa lɛ, ebaaŋɔ aaafee afii enyɔ kɛ fã dani abaanyɛ aná shika saŋŋ koni akɛye abua asafo bibioo ko kɛha Maŋtsɛyeli Asa maa! Akɛni kɛ́ aja mli lɛ, atoɔ asafoi heei ekpaa shishi daa nyɔɔŋ nɔ hewɔ lɛ, ebafee faŋŋ akɛ ehe miihia waa diɛŋtsɛ akɛ aaaná shika kɛha Maŋtsɛyeli Asa tsũmaa nitsumɔi.
7 Nihamɔ mumɔ lɛ jɛ Yehowa Nyɔŋmɔ ŋɔɔ mɔ ni kɛ nibii kpakpai babaoo Hãa fe mɛi fɛɛ lɛ. (Yak.1:17) No hewɔ lɛ be mli ni okaseɔ wɔtsɛ ni keɔ nii babaoo lɛ, ani bo kɛ oweku lɛ baanyɛ akpɛ nyɛyiŋ akɛ nyɛkɛ shika baawo Asafo Maŋtsɛyeli Asa Tsũmaa He Fotro lɛ mli daa? Asafoi kɛ kpokpai babaoo baanyɛ aye abua daa kɛtsɔ yiŋkpɛi ni akɛaaha ni kɛ famɔ haa koni akɛ shika awo Asafo Maŋtsɛyeli Asa Tsũmaa He Fotro mli lɛ nɔ. Ehe miihia ni asafoi krokomɛi akwɛ yiŋ ni amɛkpɛ lɛ mli ekoŋŋ koni amɛkɛ eko afata he yɛ nibii ajara ni yaa hiɛ lɛ hewɔ.
8 Kpokpaa Tsũmaa Ajinafoi: Nyɛmimɛi hii ni edara yɛ mumɔŋ ni ená woloŋlee mli niiashikpamɔ yɛ tsũmaa, shikpɔji, jarayeli, shweshweeshwefeemɔ nibii, kɛ nitsumɔi krokomɛi ni tamɔ nakai mli lɛ ji mɛi ni yɔɔ ajinafoi akui ni Asafo lɛ hala nɛɛ amli. Asafo lɛ kɛ gbɛtsɔɔmɔi kɛ tsɔsemɔ kroko hu haa amɛ ekoŋŋ yɛ Maŋtsɛyeli Asa tsũmaa nitsumɔ mli. Nitsumɔhe Kɛha Maŋtsɛyeli Asa Maa ni yɔɔ nitsumɔhe nine lɛ kwɛɔ amɛnitsumɔi anɔ. No hewɔ lɛ, amɛji mɛi ni he esa waa akɛ amɛkɛ gbɛtsɔɔmɔ ni sɛɛnamɔ yɔɔ he aaaha kɛjɛ tsũmaa nitsumɔ lɛ shishijee mli aahu kɛyashi enaagbee, kɛ esa akɛ ama tsũ hee loo abaatsake tsũi koni akɛtsu nii akɛ Maŋtsɛyeli Asai. Akɛ nitsumɔ ewo ajinafoi akui nɛɛ eko fɛɛ eko dɛŋ koni amɛye amɛbua kɛha Maŋtsɛyeli Asa tsũmaa yɛ he ni atsɔɔ akɛ eji “tsũmaa kpokpaa” ni kpokpai babaoo yɔɔ jɛmɛ lɛ. Agbɛnɛ lɛ, asafo fɛɛ asafo ni yɔɔ Ghana lɛ yɛ ajinafoi akui nɛɛ ateŋ eko shishi.
9 Aawo shiɛlɔi ni abaptisi amɛ ni le ŋaa nitsumɔi jogbaŋŋ ni amɛyɔɔ jeŋba kpakpa yɛ asafo lɛ mli lɛ hewalɛ koni amɛkɛ amɛhe aha kɛha Maŋtsɛyeli Asa tsũmaa. Tsũmaa he ŋaa nitsumɔi kɛ nɔ ni kɔɔɔ tsũmaa he lɛ fɛɛ he miihia. Mɛi ni kɛ amɛhe haa lɛ anine baanyɛ ashɛ “Kingdom Hall Volunteer Worker Questionnaire” (S-82) woji nɛɛ anɔ kɛjɛ amɛ asafo lɛ mli onukpai asɛinɔtalɔ loo woloŋmalɔ lɛ dɛŋ ní amɛtsɔɔ nɔ̃ ŋaa nitsumɔ ni amɛle, ákɛ amɛji (tsumalɔi, paipi he nitsulɔi, kapintɛfoi, sarawa hewalɛ he nitsulɔi, kɛ ekrokomɛi) loo ŋaa nitsulɔi ni amɛji yɛ nitsumɔi krokomɛi amli, tamɔ shikpɔŋ hemɔ, shweshweeshwefeemɔ, tsũmaa nibii ni aŋmala ni abaahe, shika he akɔntaabuu, kɛ mla saji ni akɛbaawo woji amli. Wɔhe ni wɔkɛaaha yɛ nɛkɛ gbɛ nɔ lɛ ji odaseyeli ni tsɔɔ suɔmɔ ni wɔyɔɔ kɛha wɔnanemɛi ni bɛŋkɛ wɔ fe fee—wɔ nyɛmimɛi Kristofoi lɛ.—Mat. 7:12; 22:39; Yoh. 13:35.
10 Kɛ asafo ko miisusu nitsumɔ ko he ni ji tsũ ko saamɔ loo tsũ hee maa lɛ, esa akɛ jɛmɛ onukpai lɛ ayana Kpokpaa Tsũmaa Ajinafoi asɛinɔtalɔ Iɛ kɛjɛ tsũmaa nitsumɔ lɛ shishijee mli tɔ́ɔ. Yɛ tsɔsemɔ kɛ gbɛtsɔɔmɔi ni nyɛmimɛi hii ni tsuɔ nii yɛ Kpokpaa Tsũmaa Ajinafoi akui lɛ mli lɛ ena kɛjɛ Asafo Iɛ dɛŋ hewɔ lɛ, amɛyɛ niiashikpamɔi babaoo ni baaye ebua koni amɛkwa naagbai ni yɔɔ shikpɔŋ hemɔ mli kɛ beni amɛtoɔ tsũmaa nitsumɔ he gbɛjianɔ.
11 Saji babaoo yɛ ni kɔɔ hé ko ni aaahala lɛ he fe ejara lɛ kɛkɛ, tamɔ akutsoŋ mlai, nitsumɔ babaoo ni abaatsu yɛ jɛmɛ koni akɛsaa hei ni yɔɔ jɔɔ mli ni nui ta jɛmɛ, nibii ni yɔɔ oshara loo ebɔɔ yɔɔ mli lɛ ajiemɔ, loo mla he saji ni baanyɛ afee naagba Iɛ ni abaajaje. No hewɔ lɛ asafoi baanyɛ aná saji ni nyɛmimɛi nɛɛ kɛbaaha amɛ lɛ he sɛɛ kɛji akɛ amɛyana amɛ kɛjɛ shishijee kɛtsɔ hiɛ kwraa dani amɛyahe shikpɔŋ lɛ. (Abɛi 15:22) Kɛ aha Kpokpaa Tsũmaa Ajinafoi lɛ le tsumaa nitsumɔi fɛɛ ni yɔɔ tsũmaa kpokpaa ni akɛha amɛ lɛ he sane jogbaŋŋ Iɛ, amɛbaanyɛ amɛto mɛi ni kɛ amɛhe eha Iɛ ahe gbɛjianɔ koni agbe nitsumɔi lɛ fɛɛ naa yɛ be mli ni ahaaa nitsulɔi ni yɔɔ hesaai lɛ atsu nii babaoo fe bɔ ni amɛbaanyɛ. Kpokpaa Tsũmaa Ajinafoi akuu fɛɛ kuu hiɛɔ woji ni nitsulɔi agbɛi yɔɔ mli ni amɛtoɔ mɛi ni kɛ amɛhe eha ni yɔɔ kpokpaa ni akɛ ehe nitsumɔ ewo amɛdɛŋ lɛ ahe gbɛjianɔ.
12 Maŋtsɛyeli Asa Tsũmaa He Mfoniri: Eyɛ mli akɛ asafo ko baanyɛ abua shika babaoo naa kɛha tsũmaa he nitsumɔ lɛ yɛ be mli ni ehe ehiaaa ni amɛfa shika moŋ, shi esa akɛ asusu wɔmaŋ nɛŋ tsũmaa mfonirii ni Asafo lɛ efee lɛ kɛ tsũ ni bɛ hwanyaŋŋ ni aaama lɛ he. Enɛ haa anáa shika kroko afɔ̃ɔ shi kɛhaa teokrase nitsumɔi krokomɛi. (om bf. 61; 2 Kor. 8:14) Kɛ asafo ko yɛ nyɛmimɛi hii ni yɔɔ tsũmaa he nilee loo amɛbɛ eko jio, dani amɛaahala tsũmaa he mfoniri ko lɛ, esa akɛ onukpai kɛ tsũmaa ajinafoi ni yɔɔ jɛmɛ asafo lɛ mli lɛ ayana Kpokpaa Tsũmaa Ajinafoi lɛ kɛ mɛi ni kɛ amɛ tsuɔ nii lɛ, koni amɛgba tsũmaa he gbɛjianɔtoo lɛ he sane yɛ be mli ni amɛkɛ gbɛjianɔtoi ni Asafo lɛ kɛha lɛ tsuɔ nii akɛ gbɛtsɔɔmɔ lɛ. Jeee akɛ enɛ baaha tsũmaa he shikafitemɔ aba shi kɛkɛ, shi ebaaye ebua asafo lɛ hu koni ehala tsũmaa ni bɛ hwanyaŋŋ ni kɛlɛ anyɛɔ akɛtsuɔ nii. Akɛni akɛ nibii ni hi jogbaŋŋ eha kɛha nitsumɔ lɛ hewɔ lɛ, ekomefeemɔ ni mli wa ni baakã jɛmɛ asafo lɛ mli nyɛmimɛi hii lɛ kɛ Kpokpaa Tsũmaa Ajinafoi Iɛ ateŋ kɛjɛ tsũmaa nitsumɔ lɛ shishijee mli aahu kɛyashi enaagbee lɛ baaha akwɛ koni akɛ nilee atsu nibii nɛɛ ahe nii.
13 Asafoi babaoo emamɔ Maŋtsɛyeli Asai heei yɛ shika ni nyɛmimɛi kɛfa lɛ hewɔ. Bei komɛi lɛ, shika ni nine shɛ nɔ kɛjɛ asa ko ni yɔɔ lɛ hɔɔmɔ mli lɛ eha anyɛ akɛtsu tsũ hee ni mli da ni amaa lɛ shikafitemɔ he nii. Kɛ ehe miihia ni ana shika kɛjɛ Asafo lɛ dɛŋ lɛ, Kpokpaa Tsũmaa Ajinafoi lɛ yɛ “Society Kingdom Hall Loan Survey” woji (S-83) lɛ eko ni amɛbaanyɛ amɛkɛye amɛbua asafoŋ onukpai koni amɛŋmala enɛɛmɛi anɔ nii.
14 Dani aaafa shika kɛjɛ Asafo lɛ dɛŋ lɛ, esa akɛ abu tsũmaa he shikafitemɔ he akɔntaa jogbaŋŋ kɛmɔ shi. Agbɛnɛ hu, onukpai lɛ apɛi saji amli yɛ he ni amɛyɔɔ lɛ koni amɛkɛle (1) shika ni abaanyɛ akɛke kɛjɛ shishijee koni akɛye abua kɛha shikpɔŋ hemɔ kɛ tsũmaa nibii ajara, (2) shika ni mɛi ni kɛ jɛmɛ asafo(i) ni ekɔɔ amɛhe lɛ bɔɔ lɛ baanyɛ amɛkɛfa, kɛ (3) shika ni akɛbaake daa nyɔɔŋ nɔ koni akɛwo asa ni asafo lɛ kɛtsuɔ nii lɛ shikafitemɔi ahe nyɔmɔ, ni akɛwo shika fɛɛ ni ayafa yɛ Asafo lɛ dɛŋ lɛ hu he nyɔmɔ. Esaaa akɛ mɔ ko ŋmaa egbɛi yɛ woji bibii ni akɛhaa ni akɛpɛiɔ saji amli lɛ anɔ. Ehe miihia ni mɛi fɛɛ aŋmala yibɔ okadii ni ja, ní amɛle shika ni amɛ diɛŋtsɛ amɛkɛbaake lɛ jogbaŋŋ kɛ shika ni ekolɛ amɛkɛbaafa, ejaakɛ onukpai lɛ kɛ yibɔ okadii nɛɛ baakpɛ yiŋ ni he baaba sɛɛnamɔ kɛha asafo lɛ.
15 Tsũmaa He Gbɛtsɔɔmɔi: Bei pii lɛ, Kpokpaa Tsũmaa Ajinafoi lɛ sumɔɔ nifeemɔ ni ji ‘tsũi ni akɛ oyaiyeli mamɔɔ’ lɛ waa yɛ sɛɛnamɔi babaoo ni yɔɔ nifeemɔ gbɛ nɛɛ he lɛ hewɔ. Yɛ niiashikpamɔ ni fa kɛ mɛi babaoo ni kɛ amɛhe eha lɛ atsɔsemɔ koni aye abua kɛha nitsumɔ lɛ hewɔ lɛ, abaanyɛ awo tsũmaa nitsumɔ lɛ foi waa agbɛnɛ. Gbɛtsɔɔmɔi nɛɛ ekomɛi ni afee lɛ mlɛo lɛ eha akɛ nitsulɔi fioo ko emamɔ tsũi yɛ be kuku mli. Ajinafoi ni ahala amɛ lɛ toɔ nitsulɔi ni he esa ni kɛ amɛhe eha lɛ ahe gbɛjianɔ koni amɛhi tsũmaahe lɛ yɛ be ni amɛ hesaai Iɛ ahe hiaa diɛŋtsɛ lɛ pɛ mli. Enɛ haaa nitsulɔi afa babaoo yɛ tsũmaahe lɛ be fɛɛ be, ni ehaa amɛnáa be babaoo amɛhaa amɛwekui kɛ asafoi lɛ.
16 Nɔkwɛmɔnii babaoo yɛ nyɛsɛɛ nɛɛ ni tsɔɔ sɛɛnamɔi ni yɔɔ nifeemɔ gbɛ nɛɛ he. Akɛ gbii 23 ma Maŋtsɛyeli Asa hee fɛfɛo (kɛjɛ shishitoonɔ̃ lɛ nɔ aahu kɛyashi tsũ lɛ yiteŋwoo) yɛ Prestea. Ajɔɔ nɔ yɛ October 31, 1998. Kɛjɛ no beaŋ kɛbaa nɛɛ, akɛ oyaiyeli emamɔ Maŋtsɛyeli Asai krokomɛi yɛ Afiaman kɛ Kaneshie yɛ Accra, kɛ Wa yɛ Upper West Region.
17 Akɛ famɔ eha Kpokpaa Tsũmaa Ajinafoi koni amɛto nitsumɔhei bibii babaoo amɛwo onukpai ni sa lɛ anɔkwɛmɔ shishi. Abaanyɛ afɔ nyɛmimɛi hii ni sa ni yɔɔ jɛmɛ asafo lɛ mli lɛ nine koni amɛbaye amɛbua nitsumɔhei bibii nɛɛ. Esa akɛ Maŋtsɛyeli Asa tsũmaa ajinafoi lɛ kɛ Kpokpaa Tsũmaa Ajinafoi lɛ atsu nii yɛ ekomefeemɔ mli yɛ tsũ lɛ he gbɛjianɔtoo kɛ emaa be lɛ mli. Esa akɛ nine ashɛ amɛnɔ yɛ tsũmaa be lɛ fɛɛ mli. Kɛ esa akɛ akɛ nifeemɔi komɛi atsu nii koni akɛtsĩ naagbai wuji ni baanyɛ aba lɛ anaa lɛ, Kpokpaa Tsũmaa Ajinafoi lɛ baayana nyɛmimɛi hii nɛɛ. Esa akɛ jɛmɛ tsũmaa ajinafoi lɛ kɛ hiɛdɔɔ asusu saji ni Kpokpaa Tsũmaa Ajinafoi lɛ baawie koni akɛtsu nii lɛ he yɛ saji ni tsɔɔ tsũmaa he mfoniri, tsũmaa nifeemɔi, kɛ nihemɔ he, akɛni enɛɛmɛi ji nibii ni haa akɛ shika ni faaa tsɔ̃ maa tsũ hewɔ. Bɔni afee ni ale akɛ akɛ shika ni faaa tsɔ̃ baatsu nii bɔ ni abaanyɛ lɛ, esa akɛ Kpokpaa Tsũmaa Ajinafoi lɛ afee mɛi ni baakpɛlɛ shika wuji fɛɛ ni afiteɔ kɛjɛɔ tsũmaa fotro lɛ mli lɛ nɔ.
18 Kpokpaa Tsũmaa Ajinafoi lɛ sumɔɔ ni amɛkɛ ŋaa nitsulɔi ni yɔɔ asafoi ni baakpe yɛ Maŋtsɛyeli Asa hee lɛ mli loo nɔ ni asaa lɛ mli lɛ atsu nii. Amɛkɛ nyɛmimɛi hii nɛɛ tsuɔ nii, ni amɛtsɔseɔ amɛ yɛ ŋaa nitsumɔi babaoo mli. Beni nyɛmimɛi ni edara yɛ mumɔŋ nɛɛ ena hesaai ni he hiaa nɛɛ amɛgbe naa lɛ, amɛbaanyɛ amɛye amɛbua koni ama Maŋtsɛyeli Asai krokomɛi yɛ kpokpaa lɛ nɔ. No hewɔ lɛ ehe miihia ni nyɛmimɛi hii ni yɔɔ asafoi lɛ amli ni kɛ amɛhe ewo Maŋtsɛyeli Asa tsũmaa nitsumɔ lɛ mli lɛ ajie suɔmɔ kɛ ekomefeemɔ mumɔ kpo, ni amɛkakpa gbɛ akɛ Kpokpaa Tsũmaa Ajinafoi lɛ kɛ mɛi ni amɛkɛtsuɔ nii lɛ baakwɛ nitsumɔ fɛɛ ni atsuɔ yɛ amɛ Maŋtsɛyeli Asa lɛ he lɛ nɔ. (Neh. 3:38b) Beni nyɛmimɛi lɛ ena tsɔsemɔ amɛgbe naa lɛ, esa akɛ suɔmɔ atsirɛ amɛ koni amɛfata he kɛma Maŋtsɛyeli Asai amɛha asafoi krokomɛi ni tsũi heei ni hi jogbaŋŋ he hiaa amɛ waa lɛ hu.—Neh. 5:19; Fil. 2:3.
19 Maŋtsɛyeli Asa tsũmaa nitsumɔ lɛ biɔ shikafitemɔ babaoo diɛŋtsɛ kɛjɛɔ asafoi lɛ adɛŋ. Esa akɛ onukpai lɛ akwɛ koni akɛ shika lɛ atsu nii yɛ gbɛ ni abaanyɛ abu he akɔntaa nɔ. Ehe miihia ni akɛ shikafitemɔ he saji ni ja ni yɔɔ fitsofitso atsu nii daa, ni esa akɛ akɛ ehe akɔntaabui kpakpa aha asafoi ni ekɔɔ amɛhe lɛ daa nyɔɔŋ nɔ. Esa akɛ Kpokpaa Tsũmaa Ajinafoi ní onukpai asɛinɔtalɔ(i) lɛ fata he lɛ aha akwɛ tsũmaa fotro lɛ kɛ shika kroko ni fata he lɛ mli daa nyɔji etɛ yɛ nakai nyɔɔŋ lɛ nɔŋŋ nɔ taakɛ akwɛɔ asafo lɛ shika mli lɛ. Esa akɛ asafo lɛ atsɔɔ amɛjwɛŋmɔ yɛ tsũmaa nitsumɔ lɛ fɛɛ he beni atsɔɔ amɛ emli saji fɛɛ kɛ shika ni amɛbaanyɛ amɛfite lɛ he sane jogbaŋŋ lɛ. Kɛ agbe tsũmaa nitsumɔ lɛ naa lɛ, esa akɛ abu shika fɛɛ ni afite lɛ he akɔntaa. Esa akɛ Kpokpaa Tsũmaa Ajinafoi lɛ ana nitsumɔ lɛ shika akɔntaabuu lɛ fɛɛ he wolo lɛ eko.
20 Mɔ Fɛɛ Mɔ Baanyɛ Aye Abua: Mɛi ni nyɛɛɛ amɛkɛ amɛhe aha lɛ hu baanyɛ amɛkɛ yelikɛbuamɔ ni sɛɛnamɔ yɔɔ he aha kɛtsɔ yelikɛbuamɔ ni amɛkɛaaha lɛ nɔ yɛ asafo lɛ hiamɔ nii ahe nitsumɔ mli yɛ be mli ni mɛi krokomɛi etee amɛyaasɔmɔ yɛ Maŋtsɛyeli Asa tsũmaa nitsumɔ lɛ mli. Kɛ aama Maŋtsɛyeli Asa ko yɛ he ko ni bɛŋkɛ lɛ, shiɛlɔi ni yɔɔ nyɛ asafo lɛ mli ni bɛ tsũmaa he nilee lɛ baanyɛ ana hegbɛ koni amɛye amɛbua yɛ nitsumɔ lɛ mli. Nɛkɛ nitsulɔi nɛɛ ŋmalaaa “Volunteer Questionnaires” lɛ nɔ nii. Kɛ ana ale hiamɔ lɛ, atoɔ gbɛjianɔ kɛtsɔɔ asafoi lɛ amli onukpai ni kɛ amɛhe ewo tsũmaa nitsumɔ lɛ mli lɛ kɛ onukpai ni yɔɔ asafoi ni bɛŋkɛ lɛ amli lɛ anɔ yɛ be kome mli. Kɛfata enɛ he lɛ, wɔ fɛɛ wɔyɛ hegbɛ akɛ wɔkɛ shika aaawo Asafo Maŋtsɛyeli Asa Tsũmaa Fotro lɛ mli yɛ bɔ ni wɔshihilɛi ŋmɛɔ gbɛ lɛ naa.
21 Eka shi faŋŋ akɛ esa akɛ ajie mɛi ni sɔmɔɔ yɛ Kpokpaa Tsũmaa Ajinafoi lɛ mli lɛ kɛ agbɛnɛ mɛi ni kɛ amɛhe eha kɛ amɛwekui lɛ ayi yɛ nikee kɛ suɔmɔ mumɔ ni amɛyɔɔ yɛ bɔ ni amɛyeɔ amɛbuaa kɛtsuɔ tsũmaa nitsumɔ ni wa waa lɛ hiamɔ nii ahe nii yɛ Yehowa gbɛjianɔtoo ni mli gbeleɔ lɛ mli lɛ hewɔ. Wɔ fɛɛ wɔbaanyɛ wɔjie mlijɔlɛ yibii kpo ni wɔtsɔɔ hiɛsɔɔ yɛ ekome ni wɔkɛ nyɛmimɛi hii nɛɛ ni kwɛɔ tsũmaa nitsumɔ lɛ nɔ lɛ feɔ lɛ mli. Yɛ nɛkɛ gbɛ nɔ lɛ, akɛ mlifilimɔ tsuɔ nitsumɔ ni he hiaa lɛ he nii kɛmɔɔ shi, jeee kɛ mligbigbilimɔ (Bɔf. 14:26; Heb. 13:17) Hɛɛ, wɔ fɛɛ wɔyɛ nɔ ni wɔɔdamɔ nɔ wɔmli afili wɔ yɛ be mli ni wɔtsuɔ ŋmaakpamɔ lɛ hiamɔ nii ahe nii lɛ. Esa akɛ wɔná ekomefeemɔ mumɔ—ni wɔkɛ ekomefeemɔ atsu nii koni wɔkɛfi nitsumɔ ni he hiaa nɛɛ sɛɛ kɛmɔ shi.—Lala 133:1.
22 Maŋtsɛyeli Asai ahe miihia amrɔ nɛɛ fe tsutsu ko. Wɔmiida shi akɛ, Yehowa etsirɛ enɔkwa tsuji koni amɛkɛ amɛ hesaai kɛ nibii atsu nii yɛ Maŋtsɛyeli Asai amaa mli. Yɛ be mli ni wɔkpaa wɔsɛɛ be gbɛ lɛ, wɔmiisɔle kɛha Yehowa jɔɔmɔ ni yaa nɔ daa yɛ Maŋtsɛyeli Asa tsũmaa he gbɛjianɔtoo lɛ mli. Kɛtsɔ sɛɛfimɔ ni jɛɔ wɔtsui muu fɛɛ mli lɛ nɔ lɛ, wɔbaanyɛ wɔtsɔɔ hiɛsɔɔ ni wɔyɔɔ kɛha Maŋtsɛyeli Asa lɛ kɛ nɔ ni etsuɔ yɛ yelikɛbuamɔ ni ekɛhaa wɔ koni wɔkɛwowoo wɔhe hewalɛ ni “wɔhiɛ adɔ suɔmɔ kɛ nitsumɔi kpakpai ahe.”—Heb. 10:24, 25.
[Mfoniri kɛ ehe niŋmaa ni yɔɔ baafa 3]
PRESTEA
Akulashiŋi ni akɛ tsei ni wa fee, samfɛji ni akɛ blɔkii fee kɛ tsũwoo ŋtayaai hu
[Mfoniri kɛ ehe niŋmaa ni yɔɔ baafa 4]
WA
Akulashiŋi ni akɛ tsei ni wa fee, kɛ ziŋle
[Mfoniri kɛ ehe niŋmaa ni yɔɔ baafa 5]
KYEKYEWERE
Blɔkii ni afee kɛ tsũwoo ŋtayaai hu