“Wɔnyɛŋ akɛ Ja Wɔwie”
1 Yesu Kristo miikwɛ bɔ ni shiɛmɔ nitsumɔ lɛ yaa nɔ ehaa lɛ jogbaŋŋ diɛŋtsɛ. (Mat. 28:20; Mar. 13:10) Eyɛ mli akɛ ayɛ sanekpakpa jajelɔi aaafee akpekpei ekpaa ni kɛ ekãa yeɔ odase yɛ shikpɔji 234 nɔ moŋ, shi esaaa akɛ wɔsusuɔ akɛ wɔ odaseyeli nitsumɔ lɛ eba naagbee. “Wɔnyɛŋ akɛ ja wɔwie” nibii ni wɔkase lɛ wɔtsɔɔ kɛyashi beni Nyɔŋmɔ aaakɛɛ akɛ nitsumɔ lɛ eba naagbee.—Bɔf. 4:20.
2 Okɛ Ohe Afɔ̃ Nyɔŋmɔ Mumɔ lɛ Nɔ: Satan kɛ nɔnyɛɛ ni mli wa baa wɔnɔ koni wɔnijiaŋ aje wui. (Kpoj. 12:17) Wɔ diɛŋtsɛ wɔheloo ni yeee emuu lɛ hu kɛ naagbai babaoo baa wɔnɔ. Nibii ni tamɔ nɛkɛ lɛ baanyɛ agbala wɔjwɛŋmɔ kɛjɛ shiɛmɔ nitsumɔ ni he hiaa fe fɛɛ lɛ nɔ. Yɛ fɛɛ sɛɛ lɛ, kɛ́ wɔkɛ wɔhiɛ fɔ̃ Yehowa nɔ lɛ, emumɔ lɛ baaye abua wɔ koni wɔdamɔ gbɛtsii nii fɛɛ naa.
3 Beni akɛ yiwaa ni naa wa ba klɛŋklɛŋ afii oha lɛ mli Kristofoi asafo lɛ nɔ lɛ, nyɛmimɛi lɛ sɔle koni Nyɔŋmɔ aye abua amɛ ni amɛya nɔ amɛkɛ ekãa babaoo awie ewiemɔ lɛ. Yehowa ha amɛsɔlemɔ lɛ hetoo, ekɛ emumɔ lɛ wo amɛmli ni eha amɛná ekãa kɛ faishitswaa ni he hiaa koni amɛya nɔ amɛshiɛ. No hewɔ lɛ, amɛtee nɔ amɛkɛ ekãa shiɛ sanekpakpa lɛ ni amɛfɔ̃ɔɔ.—Bɔf. 4:29, 31; 5:42.
4 Kaashe Nijiaŋwujee Wiemɔ Gbeyei: Ekolɛ jwɛŋmɔ ni mɛi hiɛ loo wɔhe guɔ ni agbeɔ yɛ maŋbii ahiɛ lɛ baaha wɔshe gbeyei. Shi kɛlɛ, kaimɔ nɔ ni Petro kɛ bɔfoi krokomɛi lɛ wie yɛ Akuashɔŋ lɛ hiɛ taakɛ aŋma yɛ Bɔfoi lɛ Asaji 5:29-32 lɛ. Taakɛ Mla tsɔɔlɔ Gamaliel kpɛlɛ nɔ lɛ, anyɛŋ afo Nyɔŋmɔ nitsumɔ lɛ sɛɛ. Jeee wɔhewalɛ naa akɛtsuɔ he nii. Nyɔŋmɔ ji mɔ ni fĩɔ nitsumɔ kpeteŋkpele nɛɛ sɛɛ, ni lɛ pɛ ji mɔ ni baanyɛ atsu he nii!—Zak. 4:6.
5 Nyɛhaa wɔkpaa Yehowa fai daa gbi koni emumɔ lɛ aye abua wɔ ni wɔkɛ ekãa ajaje sanekpakpa lɛ. Eba akɛ, wɔɔkɛɛ taakɛ Yeremia kɛɛ lɛ, ákɛ, Maŋtsɛyeli shɛɛ sane lɛ tamɔ la ni tsoɔ yɛ wɔwui amli. (Yer. 20:9) Wɔnyɛŋ wɔfee dioo!