Ani Ohiɛ Sɔɔ Yehowa Tsuishitoo Lɛ?
1 Eji Yehowa tsɔɔɔ hiɛ etooo etsui shi afii 10, 20, kɛ nɔ ni fa fe nakai ni eho nɛ, koni akɛ be kakadaŋŋ aye odase kulɛ, ani obaakase anɔkwale lɛ? Kwɛ bɔ ni wɔdaa shi akɛ eŋmɛ gbɛ ni mɛi babaoo ‘etsake amɛtsui.’ Ni kɛlɛ, Yehowa kojomɔ gbi wulu lɛ “baaba tamɔ julɔ baa.” (2 Pet. 3:9, 10) No hewɔ lɛ, esaaa akɛ anuɔ Nyɔŋmɔ tsuishitoo lɛ shishi yɛ gbɛ ni ejaaa nɔ akɛ eha nibii agbɛjianɔtoo nɛɛ hiɛkpatamɔ lɛ sɛɛ etsɛ.—Hab. 2:3.
2 Ha Mɛi Anii Afee Bo Mɔbɔ: Yehowa tsuishitoo lɛ fa kwraa aahu fe bɔ ni wɔbaanyɛ wɔnu shishi. (Yona 4:1-4, 11) Esaaa akɛ wɔkuɔ wɔhiɛ wɔshwieɔ yiŋtoo ni yɔɔ sɛɛ lɛ nɔ. (Yona 4:1-4, 11) Yehowa naa adesai ashihilɛ ni yɔɔ mɔbɔ lɛ ni emusuŋ tsɔɔ lɛ yɛ amɛhewɔ. Yesu nuɔ he nakai nɔŋŋ. Akɛni gbɔmɛi asafoi ni eshiɛ etsɔɔ amɛ lɛ anii fee lɛ mɔbɔ hewɔ lɛ, eesumɔ ni sanekpakpa jajemɔ nitsumɔ lɛ ashɛ shɔŋŋ bɔni afee ni mɛi babaoo aná hegbɛ akɛ amɛaaná naanɔ wala.—Mat. 9:35-38.
3 Kɛ osharai kɛ nibii ahiɛkpatamɔ ba lɛ, ani wɔnuuu he wɔhaaa mɛi ni leee anɔkwale lɛ? Ŋmɛnɛ, gbɔmɛi ‘tamɔ tooi ni bɛ kwɛlɔ’ yɛ be mli ni amɛbɔɔ mɔdɛŋ ni amɛdamɔ basabasafeemɔ ni yaa nɔ yɛ je lɛŋ lɛ naa koni amɛnu shishi lɛ. (Mar. 6:34) Kɛ wɔkɛ ekãa shiɛ sanekpakpa lɛ, wɔshɛjeɔ mɛi ni hiɛ tsui ni ja lɛ amii, ni wɔjieɔ hiɛsɔɔ kpo wɔtsɔɔ Yehowa tsuishitoo lɛ.—Bɔf. 13:48.
4 Hiamɔ Eba Wɔnitsumɔ lɛ He: Nyɛsɛɛ afi lɛ, abaptisi mɛi 323,439, ni mɛi ni ba Kaimɔ lɛ fa fe 14,000,000. Kwɛ hegbɛ babaoo ni yɔɔ ni baanyɛ aha gbɔmɛi babaoo lolo anyɛ ajo gbɛjianɔtoo fɔŋ nɛɛ hiɛkpatamɔ lɛ naa foi! Wɔleee bɔ ni “asafo babaoo” lɛ ayifalɛ baaji aha. (Kpoj. 7:9) Wɔleee be ni famɔ ni akɛha wɔ koni wɔshiɛ lɛ baaye. Shi Yehowa le. Abaashiɛ sanekpakpa lɛ kɛyashi he ni etsui baanyɔ emli yɛ, “ni no dani naagbee lɛ aaaba.”—Mat. 24:14.
5 Be ni eshwɛ lɛ faaa dɔŋŋ, ni Nyɔŋmɔ gbi lɛ ebɛŋkɛ kwraa. (1 Kor. 7:29a; Heb. 10:37) Ŋwanejee ko bɛ he akɛ, “wɔyiwalaheremɔ lɛ ebɛŋkɛ fe tsutsu beni wɔhe wɔye lɛ.” (Rom. 13:11) Nyɛkahaa wɔfea mɛi ni nyɛɛɛ anu yiŋtoo ni yɔɔ ŋwɛi tsuishitoo lɛ sɛɛ lɛ shishi. Yɛ no najiaŋ lɛ, nyɛhaa wɔkɛ hehiamɔ henumɔ ashiɛa bɔni afee ni mɛi babaoo ni shweɔ jalɛ nifeemɔ lɛ nine ashɛ Yehowa mɔbɔnalɛ babaoo lɛ nɔ.