“Wɔtsu Wɔshikpɔŋkuku lɛ Mli Nii Shii Abɔ!”

¹ Ani onu he pɛŋ akɛ atsu oshikpɔŋkuku lɛ mli nii shii abɔ aahu akɛ anáaa gbɔmɛi ni tamɔ gwantɛŋi lɛ yɛ mli dɔŋŋ? Ekolɛ osusu he akɛ: ‘Mile bɔ ni gbɔmɛi lɛ baafee amɛnii amɛha. Mɛni hewɔ esa akɛ maya mɛi ni bɛ wiemɔ lɛ he miishɛɛ lɛ aŋɔɔ aahu nɛkɛ?’ Eyɛ mli anɔkwale akɛ atsuɔ shikpɔŋkukuji babaoo amli nii aahu shii abɔ. Shi kɛlɛ, esa akɛ akɛ jwɛŋmɔ ni ja asusu anɔkwale ni enɛ ji lɛ he, shi jeee jwɛŋmɔ ni ejaaa. Mɛni hewɔ? Kwɛmɔ yiŋtoi ejwɛ ni akɛha yɛ shishigbɛ nɛɛ.

² Aha Wɔsɔlemɔi lɛ Ahetoo: Yesu kɛɛ akɛ: “Nikpamɔ lɛ fa, shi nitsulɔi lɛ faaa; no hewɔ lɛ nyɛkpaa nikpamɔ nuntsɔ lɛ fai, koni etsu nitsulɔi kɛba enikpamɔ lɛ mli.” (Luka 10:2) Wɔkɛ afii nyɔŋmai abɔ ekpa Yehowa fai koni wɔná edɛŋ yelikɛbuamɔ babaoo. Amrɔ nɛɛ, wɔná nitsulɔi babaoo ni he hiaa wɔ lɛ yɛ hei babaoo, ni wɔmiitsu shikpɔŋkuku lɛ fɛɛ mli nii kpitiokpitio fe tsutsu ko. Ani esaaa akɛ anɔkwale ni eji akɛ Yehowa eha wɔsɔlemɔi ahetoo lɛ haa wɔmli filiɔ wɔ?

³ Shifimɔ Woɔ Yibii Kpakpai: Yɛ shikpɔŋkukuji ni afɔɔ mli nitsumɔ kpitiokpitio po lɛ, gbɔmɛi miihere Maŋtsɛyeli shɛɛ sane lɛ nɔ, ni amɛmiiná anɔkwale lɛ he nilee babaoo fiofio. No hewɔ lɛ, esa akɛ wɔya amɛŋɔɔ aahu shii abɔ kɛ hiɛnɔkamɔ akɛ wɔbaaná mɛi babaoo ni hiɛ tsui ni ja. (Yes. 6:8-11) Taakɛ Yesu mra be mli kaselɔi lɛ fee lɛ, ‘yaa’ mɛi ni yɔɔ shikpɔŋkuku ni akɛha bo lɛ mli lɛ ‘aŋɔɔ shii abɔ,’ ni obɔ mɔdɛŋ ni okanya miishɛɛ ni amɛyɔɔ yɛ Nyɔŋmɔ Maŋtsɛyeli lɛ mli lɛ.—Mat. 10:6, 7.

⁴ Asafoi babaoo tsuɔ amɛshikpɔŋkuku lɛ fɛɛ mli nii shii abɔ otsi fɛɛ otsi yɛ Portugal, shi amɛmiiná mɛi ni tamɔ gwantɛŋi lɛ lolo. Nyɛmi yoo ko je gbɛ ená jwɛŋmɔ ni ja jogbaŋŋ. Ekɛɛ akɛ: “Dani maya shiɛmɔ daa leebi lɛ, misɔleɔ mihaa Yehowa koni eye ebua mi ni maná mɔ ko ni yɔɔ he miishɛɛ akɛ eeekase Biblia lɛ.” Gbi ko lɛ, ekɛ yitsɔifeelɔi ashwapo ko mli nitsulɔi to gbɛjianɔ kɛha nikasemɔ. Shi yɛ sɛɛ mli lɛ, mɔ kome pɛ jie ehe kpo kɛha nikasemɔ. Nakai mɔ lɛ kɛɛ akɛ: “Mɛi krokomɛi lɛ bɛ he miishɛɛ, shi mi lɛ, miyɛ he miishɛɛ.” Yɛ nyɔŋ kome pɛ mli lɛ, lɛ diɛŋtsɛ eefee Biblia mli nikasemɔi enyɔ. No sɛɛ lɛ, etsɛɛɛ ni abaptisi lɛ, ni sɛɛ mli lɛ, ekɛ ehe wo gbɛgbamɔ sɔɔmɔ nitsumɔ lɛ mli!

⁵ Aatsu Nitsumɔ lɛ Aagbe Naa: Aashiɛ sanekpakpa lɛ, taakɛ Yesu gba efɔ̃ shi akɛ abaafee lɛ. (Mat. 24:14) Yɛ hei ni gbɔmɛi “sumɔŋ akɛ [amɛaabo wɔ] toi” po lɛ, aatsɔ shiɛmɔ nitsumɔ lɛ nɔ aayɔse amɛ. Wɔmiikpa gbɛ akɛ mɛi komɛi boŋ wɔ toi loo amɛbaate shi amɛwo anɔkwale lɛ po. Ni kɛlɛ, esa akɛ abɔ mɔdɛŋ jogbaŋŋ koni abɔ Yehowa kojomɔ ni baa lɛ he kɔkɔ atsɔɔ nɛkɛ gbɔmɛi nɛɛ.—Ezek. 2:4, 5; 3:7, 8, 19.

⁶ Wɔgbeko Naa Lolo: Jeee wɔ ji mɛi ni baakpɛ yiŋ yɛ be ni akɛaakpa shiɛmɔ nitsumɔ lɛ he. Yehowa le be pɔtɛɛ ni esa akɛ eba naagbee. Ele kɛji ákɛ gbɔmɛi yɛ wɔshikpɔŋkuku lɛ mli ni baanyɛ akpɛlɛ sanekpakpa lɛ nɔ lolo lɛ. Ŋmɛnɛ, mɛi komɛi kɛɔ akɛ amɛbɛ wiemɔ lɛ he miishɛɛ, shi tsakemɔi wuji ni baa amɛshihilɛi amli—nitsumɔ ni efite, hela ni mli wa, suɔlɔ ko gbele—baanyɛ aha amɛbo toi waa be kroko. Yɛ hetsɛ̃ ni anáa loo dekã kɛkɛ ni gbɔmɛi babaoo bɛ kwraa ni akɛaabo toi hewɔ lɛ, amɛnuko nɔ ni wɔshiɛɔ lɛ he sane lɛ jogbaŋŋ pɛŋ. Amɛŋɔɔ ni ayaa shii abɔ yɛ naanyobɔɔ su mli lɛ baanyɛ aha amɛyɔse ni amɛbo toi.

⁷ Mɛi ni edara yɛ nyɛsɛɛ afii nɛɛ amli ni amrɔ nɛɛ amɛyɔɔ amɛ diɛŋtsɛ amɛwekui lɛ miisusu shihilɛ he waa kɛ hiɛdɔɔ, ni amɛmiibibii saji ni Nyɔŋmɔ Wiemɔ lɛ pɛ baanyɛ aha hetoo. Nyɛ ko ni edako lɛ fɔ̃ nine etsɛ Odasefoi enyɔ komɛi kɛba eshia, ni ekɛɛ akɛ: “Beni miji gbekɛ yoo bibioo lɛ, no mli lɛ minyɛɛɛ manu nɔ hewɔ ni mimami shwieɔ Odasefoi lɛ, ní ekɛɔ amɛ akɛ ebɛ he miishɛɛ lɛ shishi be mli ni nɔ̃ pɛ ni amɛtaoɔ ji ni amɛgba Biblia lɛ mli sane amɛtsɔɔ lɛ. Kɛkɛ ni mikpɛ miyiŋ yɛ nakai be lɛ mli akɛ, kɛ́ mida ni mibote gbalashihilɛ mli, ni miná mi diɛŋtsɛ mishia lɛ, maha Yehowa Odasefoi aba mishia ni amɛbagbála Biblia lɛ mli amɛtsɔɔ mi.” Nakai ji nɔ ni efee ní ha Odasefoi ni ba eŋɔɔ lɛ ná miishɛɛ waa.

⁸ Ani Obaanyɛ Oha Owiemɔ Amɔ Shi Jogbaŋŋ? Ekolɛ jeee gbɔmɛi ni wɔyaa amɛŋɔɔ lɛ haa efeɔ tamɔ nɔ ni shikpɔŋkuku lɛ mli nitsumɔ wa be fɛɛ be lɛ. Yɛ bei komɛi amli lɛ, wɔ diɛŋtsɛ wɔfeɔ. Ani wɔkɛ susumɔi ni ejaaa jeɔ shishi? Nakai feemɔ baanyɛ asa wɔnifeemɔ he, ni titri lɛ ebaanyɛ esa gbee ni wɔkɛwieɔ kɛ bɔ ni wɔfeɔ wɔhiɛ wɔhaa lɛ he. Jiemɔ nifeemɔ su ni ja kɛ hiɛ ni yɔɔ ŋmɔlɔŋmɔlɔ kpo otsɔɔ. Kaa gbɛ kroko hu okwɛ. Tsakemɔ oshiɛmɔ wiemɔ lɛ mli, ni obɔ mɔdɛŋ ni oha eya hiɛ. Ekolɛ obaanyɛ otsake sane ni obiɔ kɛjeɔ shishi lɛ mli, loo okɛ ŋmalɛ kroko atsu nii yɛ sanegbaa lɛ mli. Bi nyɛmimɛi hii kɛ yei krokomɛi lɛ ni amɛtsɔɔ nɔ ni amɛ́na akɛ no ji nɔ ni yeɔ omanye yɛ shikpɔŋkuku lɛ mli nitsumɔ mli lɛ. Okɛ shiɛlɔi kɛ gbɛgbalɔi srɔtoi babaoo atsu nii, ni oyɔse nɔ ni haa amɛshiɛmɔ nitsumɔ lɛ mɔɔ shi jogbaŋŋ lɛ.

⁹ Yehowa kpɛlɛɔ Maŋtsɛyeli shiɛmɔ nitsumɔ lɛ nɔ, ni ejɔ́ɔ nɔ, ni wɔhe ni wɔkɛwoɔ mli lɛ tsɔɔ suɔmɔ ni wɔyɔɔ kɛha lɛ kɛ wɔnaanyo gbɔmɔ. (Mat. 22:37-39) No hewɔ lɛ, nyɛhaa wɔtsua wɔnitsumɔ lɛ kɛyagbea naa kwraa, ní ekatɔ wɔ akɛ wɔmiitsu shikpɔŋkuku lɛ mli nii yɛ be kɛ bei amli.