Ghana Betel Mligbelemɔ Nɔyaa He Amaniɛbɔɔ
1 Yehowa tsɔ egbalɔ anɔkwafo ni hi shi yɛ blema beaŋ lɛ nɔ egba bɔ ni eshia lɛ baayi kɛ jálɔi, ni ekɛɛ: “Mahoso jeŋmaji fɛɛ kwa, ni jeŋmaji lɛ fɛɛ anii ni jara wa lɛ aaaba, ni mikɛ anunyam sɔŋŋ aaawo shia nɛɛ obɔ.” (Hag. 2:7) Kwɛ bɔ ni nakai wiemɔi lɛ eba mli anɔkwale eha! Ajɔɔ Ghana nitsumɔhe nine ni yɔɔ amrɔ nɛɛ nɔ aha Yehowa yɛ January 30, 1988 mli. Yɛ afii 13 sɛɛ lɛ, “nii ni jara wa” lɛ efa kɛjɛ shiɛlɔi ayibɔ ni fa fe fɛɛ ni ji 34,537 kɛyashɛ 68,165 yɛ September 2001 mli.
2 Bɔni afee ni anyɛ akɛ gbɛtsɔɔmɔ kɛha shiɛmɔ nitsumɔ lɛ aha, ní atsɔɔ woji ashishi, koni aja woji ni yɔɔ wiemɔi srɔtoi amli yɛ hiɛyaa kpele nɛɛ he nitsumɔ hewɔ lɛ, ehe ehia koni alɛɛ amrɔ nɛɛ Betel tsũi lɛ amli. Taakɛ ole lɛ, aje tsumaa nitsumɔ lɛ shishi yɛ October 2, 2000 lɛ mli beni Nɔyeli Kuu lɛ kɛ nɔkpɛlɛmɔ eha sɛɛ. Mɛni baafata tsũi ni alɛɛɔ mli lɛ ahe? Te atsuɔ tsumaa nitsumɔ lɛ he nii ahaa tɛŋŋ? Mɛni ji nɔ ni shiɛlɔi aŋkroaŋkroi baanyɛ amɛfee kɛye abua Yehowa shia lɛ maa? Mɛi babaoo ebi saji nɛɛ? Wɔyɛ he miishɛɛ akɛ wɔbaabɔ nyɛ amaniɛ ni kɔɔ nitsumɔ lɛ he.
3 Te Betel Hee lɛ Baatamɔ Eha Tɛŋŋ? Nibii ni baafata tsũi lɛ amli ni agbeleɔ kɛ ma ni amaa lɛ ekroko lɛ he beni agbe naa sɛɛ ji, nsɔɔdo kome wɔɔhe tsũi heei etɛ. Kɛji akɛfata wɔɔhe tsũi ni yɔɔ momo lɛ ahe lɛ, ebaafee tsũi 88 ni Betelbii 176 baanyɛ awɔ̀ mli. Abaasaa ama wɔɔhe tsũi ni yɔɔ momo lɛ shishigbɛ lɛ fɛɛ ekroko ni abaalɛɛ nihoomɔhe hee lɛ mli kɛfata he. Abaalɛɛ niyelihe lɛ hu mli koni ewo mɛi 190. Abaamamɔ nitsumɔhe ni kwɛɔ Betel Shia lɛ nɔ, niiahefɔmɔhe, tsofafeemɔhe, kɛ hei krokomɛi yɛ nɛkɛ hé nɛɛ. Akɛni tsũi nɛɛ amli etɛ ji wɔɔhei ni ekɛ yelikɛbuamɔi krokomɛi hu haa hewɔ lɛ, akɛ tsɔne ni holeɔ mɛi kɛyaa ŋwɛitsu nɔ lɛ eko baafata he yɛ bokagbɛ. Abaama heni amɔmɔɔ drama wiemɔi awoɔ kpãa nɔ yɛ hu ehee.
4 Abaasaa ama nitsumɔhe tsũ lɛ ekroko, ni abaalɛɛ mli bɔni afee ni etsu wɔhiamɔ nii lɛ ahe nii. Ákɛ nɔkwɛmɔnɔ lɛ, abaatsake Maŋtsɛyeli Asa ni yɔɔ amrɔ nɛɛ kɛ heni ahereɔ gbɔi yɛ lɛ afee lɛ nitsumɔhe tsũi heei. Abaasaa ama Woji Amajemɔ Nitsumɔhe lɛ ekroko, ni nibii ni baafata he ji sɛndo kɛ nitsumɔhe tsũi babaoo. Abaama Maŋtsɛyeli Asa hee ní baanyɛ awo mɛi 227, kɛ asa bibioo ko loo Heni Ahereɔ Gbɔi yɛ kɛbaabɛŋkɛ agbo wulu lɛ naa gbɛ. Enɛ haŋ nɔ ko agbala Betelbii ni kɛ amɛhe eha lɛ ajwɛŋmɔ, ni mɛi ni baa Betel lɛ hu anine baashɛ yelikɛbuamɔ ni mɔɔ shi jogbaŋŋ ni yɔɔ oya nɔ.
5 Kɛfata nɔ ni yɔɔ yiteŋgbɛ lɛ he lɛ, abaama heni abaatsu nu mujimuji ahe nii yɛ, ni abaalɛɛ nubu ni yɔɔ amrɔ nɛɛ lɛ mli kɛyashɛ litai 170,000. Abaalɛɛ tsɔji amaamɔhe lɛ hu mli. Abaamamɔ tsũi bibii ni ataraa shishi yɛ hulutsoo be mli lɛ yɛ hei srɔtoi etɛ kɛha saralɔi kɛ Betel weku lɛ mli bii.
6 Nitsumɔ lɛ Nɔyaa: Agbe heni abaatsu nu mujimuji lɛ ahe nii yɛ lɛ naa momo. Amamɔ tsũi bibii 2 ni ataraa shishi yɛ hulutsoo be mli lɛ yɛ he kroko ni amrɔ nɛɛ ama ekome hu kɛfata he. Aje wɔɔhe tsũ lɛ diɛŋtsɛ mligbelemɔ kɛ ekroko ni asaa afeɔ lɛ shishi, ni agbe nihoomɔhe lɛ maa naa momo. Ahiɛ nutoohe lɛ he nitsumɔ lɛ mli ni agbe tsɔji amaamɔhe lɛ mligbelemɔ lɛ naa. Atsake tsutsu tsɔji amaamɔhe lɛ afee lɛ tsũ kɛha Betel niiahefɔmɔhe be kukuoo ko kɛyashi abaagbe heni ato kɛha amɛ lɛ ni abaama lɛ ekroko lɛ naa kɛha ekɛ nitsumɔ.
7 Akɛ nitsumɔ wo tsumaa nitsumɔ he nitsumɔhe ko dɛŋ koni amɛtsu shitsaa nitsumɔi kɛ shikpɔŋ lɛ nɔ saamɔ kɛha wɔɔhe tsũi etɛ lɛ, Maŋtsɛyeli Asa lɛ kɛ shitaramɔhe lɛ, kɛ agbɛnɛ gbɛjegbɛi lɛ fɛɛ he nii. Agbe gbɛjegbɛi ahe nitsumɔ lɛ naa ni atswa faneshii lɛ ni awo kɔnkret kɛha tsũi lɛ fɛɛ. Kɛbashi amrɔ nɛɛ, agbe akpale tsei ni akɛ baawo wɔɔhe tsũi lɛ ekome kɛ Maŋtsɛyeli Asa hee lɛ, kɛ Heni Ahereɔ Gbɔi yɛ lɛ naa, ni nitsumɔ ni atsuɔ yɛ emligbɛ lɛ miiya nɔ jogbaŋŋ.
8 Amɛjɛ Amɛsuɔmɔ Mli Amɛkɛ Amɛhe Miiha: Akɛ nitsumɔ lɛ ewo majimaji ateŋ sɔɔlɔi ni naa shɛɔ 43 ni jɛ maji srɔtoi 13 nɔ mli lɛ adɛŋ. Mɛi ni kɛ nyɛmimɛi ni jɛ maŋsɛɛ nɛɛ tsuɔ nii ji Ghanabii 60 ni amɛ hu amɛfata Betel weku lɛ he ni akɛ tsumaa nitsumɔi ewo amɛdɛŋ. Kɛfata he lɛ, nyɛmimɛi hii kɛ yei babaoo ni ji majimaji ateŋ mɛi ni kɛ amɛhe eha lɛ woɔ amɛ diɛŋtsɛ amɛgbɛfaa he nyɔmɔ koni amɛba ni amɛkɛ wɔ abatsu nii yɛ tsumaa nitsumɔ lɛ mli. Kwɛ bɔ ni nyɛmimɛi nɛɛ yɔɔ miishɛɛ ha be mli ni amɛkɛ hegbɛi fɛɛ ni amɛyɔɔ lɛ tsuɔ nii koni amɛkɛtsɔse tsumaa nitsulɔi lɛ ni amɛkɛ amɛ agba niiashikpamɔ ni amɛná afii babaoo yɛ tsumaa nitsumɔ mli lɛ he sane lɛ. Suɔmɔ ni mli wa ni wɔyɔɔ kɛha Nyɔŋmɔ akɛ wɔɔtsu nitsumɔ kpakpa ni hi jogbaŋŋ lɛ kanyaa enɛɛmɛi fɛɛ. Yɛ otsi lɛ mli kɛ otsi lɛ naagbee gbɛ lɛ, afɔ̃ɔ nine atsɛɔ nyɛmimɛi ni jɛ asafoi babaoo mli ni kɛ amɛhe eha, hii kɛ yei fɛɛ, koni amɛbaná gbɛfaŋnɔ yɛ nitsumɔ lɛ mli. Osuɔmɔ mli ni ojɛɔ akɛ obaaya nɔ ofi gbɛjianɔtoo nɛɛ sɛɛ kɛtsɔ obe kɛ ohewalɛ nɔ lɛ ji yelikɛbuamɔ diɛŋtsɛ, ni hiɛ sɔɔ enɛ jogbaŋŋ kɛjɛ tsui muu fɛɛ mli.
9 Yɛ heloonaa tsumaa lɛ sɛɛ lɛ, tsumaa henɔ kroko hu miiya nɔ. Enɛ ebafee majimaji ateŋ nyɛmifeemɔ lɛ tswaa kɛ shimaa, ní nɔ ni ejɛ mli kɛba ji hewalɛwoo kpele ni jɛ nyɛmimɛi babaoo ni jɛ shikpɔji srɔtoi anɔ lɛ aŋɔɔ. Wɔnaa ‘asafo babaoo ni jɛ jeŋmaŋ fɛɛ jeŋmaŋ,’ ni amɛfee ekome kɛmiitsu Yehowa suɔmɔnaa nii ahe nii yɛ gbɛ bibioo nɔ yɛ biɛ.—Kpoj. 7:9.
10 ‘Kɛ Onii ni Jara Wa Lɛ’: Ekolɛ mɛi komɛi baasusu he akɛ: ‘Te mafee tɛŋŋ mafi Yehowa shia ni ji Betel maa lɛ sɛɛ?’ Eji anɔkwale akɛ, jeee mɔ fɛɛ mɔ baanyɛ ekɛ ehewalɛ awo nitsumɔ lɛ mli yɛ gbɛ jɛkɛmɔ, gbɔmɔtsoŋ hewalɛnamɔ mli naagbai, loo shihilɛi krokomɛi ahewɔ. Shi kɛlɛ, mɔ fɛɛ mɔ baanyɛ aná gbɛfaŋnɔ yɛ gbɛ kome ko nɔ, ni ekɔɔɔ he eko heni amɛyɔɔ. No ji kɛtsɔ wɔsɔlemɔi kɛ tooyeli ni jɛ suɔmɔ mli ni wɔkɛaaha lɛ nɔ. Abɛi 3:9 kɛɔ akɛ: “Okɛ onii ni oyɔɔ kɛ onibaanii fɛɛ mli klɛŋklɛŋ nii awo Yehowa hiɛ nyam.”
11 Bɔfo Paulo kɛ ŋaawoo ko ni nɔ bɛ ha yɛ 1 Korintobii 16:2 lɛ, beni ekɛɛ akɛ: “Daa otsi mli klɛŋklɛŋ gbi lɛ nɔ lɛ, nyɛteŋ mɔ fɛɛ mɔ atĩa nɔ ko ato, yɛ bɔ ni enáa lɛ naa.” Kɛtsɔ enɛ kɛ nitsumɔ nɔ lɛ, asafoi babaoo nyɛɔ amɛkɛ tooyeli ni jɛ amɛtsui mli majeɔ akɛ shika ni amɛkɛmajeɔ lɛ ateŋ eko daa nyɔŋ nɔ. Kɛji oosumɔ ni bo hu oná gbɛfaŋnɔ yɛ Yehowa hiɛnyam ni oowo kɛ onibii ni jara wa lɛ mli lɛ, obaanyɛ okɛ otooyeli lɛ amaje kɛtsɔ asafo lɛ nɔ loo okɛba nitsumɔhe nine lɛ tɛ̃ɛ yɛ biɛ nɛɛ, yɛ Nungua.
12 Yɛ anɔkwale mli lɛ, nitsumɔ babaoo yɛ ni abaatsu dani abaagbe tsumaa nitsumɔ lɛ naa. Naagbai komɛi yɛ ni tamɔ nɔ ni anyɛɛɛ aye nɔ kunim bei komɛi. Shi kɛlɛ, wɔnáa hewalɛwoo yɛ anɔkwale ni eji akɛ Yehowa diɛŋtsɛ ji mɔ ni maa eshia lɛ hewɔ. (Lala 127:1) Eba akɛ wɔ fɛɛ wɔɔya nɔ wɔfee bɔ ni wɔbaanyɛ kɛfĩ nitsumɔ nɛɛ sɛɛ ni wɔsɔle kɛha Yehowa jɔɔmɔi babaoo kɛ gbɛtsɔɔmɔ kɛha shia nɛɛ naagbee yɛ omanyeyeli mli kɛha eyijiemɔ kɛ ehiɛnyamwoo kɛya naanɔ.−Zak. 4:6.
[Caption on page 3]
Betel, beni agbe emligbelemɔ lɛ naa
[Caption on page 4]
Tsũi bibii ni ataraa shishi yɛ hulutsoo be mli ni amamɔ yɛ he kroko, Nihoomɔhe lɛ mligbelemɔ, kɛ Maŋtsɛyeli Asa Hee/He ni Ahereɔ Gbɔi yɛ
[Caption on page 5]
Nitsulɔi ni yɔɔ nitsumɔhe lɛ miitsu nitsumɔ kpakpa ni hi jogbaŋŋ
Nihoomɔhe nitsulɔi kwɛɔ Betel nitsulɔi kɛ mɛi ni kɛ amɛhe eha kɛha Tsumaa nitsumɔ lɛ ni fa fe 250 ni hɔmɔ miiye amɛ lɛ
[Caption on page 6]
Majimaji ateŋ nyɛmifeemɔ lɛ miitsu nii yɛ tsumaa nitsumɔ lɛ mli