Kpee Krɛdɛɛ Gbi He Gbɛjianɔtoo Hee
1 Yɛ be mli ni adafitswaa woji kɛ redio nɔ saji kɛ je lɛŋ tsɔɔlɔi woɔ heloo naa ninámɔ hiɛ nyam lɛ, Nyɔŋmɔ Wiemɔ lɛ woɔ wɔ hewalɛ koni ‘Wɔtsɔmɔ Niiatsɛmɛi yɛ Ejurɔfeemɔi Agbɛfaŋ.’ (1 Tim. 6:18) No ji kpee krɛdɛɛ gbi he gbɛjianɔtoo ni jeɔ shishi yɛ July 2003 mli lɛ saneyitso. Mɛɛ hewalɛwoo wɔnine baashɛ nɔ yɛ kpee nɛɛ shishi?
2 Kpokpaa nɔkwɛlɔ lɛ baatsɔɔ nɔ ni ‘Niiatsɛmɛi ni Aaatsɔmɔ yɛ Nyɔŋmɔ Gbɛfaŋ’ lɛ tsɔɔ lɛ mli, ni ebaabi mɛi ni bɔɔ mɔdɛŋ waa ni amɛná nii yɛ mumɔŋ lɛ saji. Wielɔ ni baasara kpee lɛ baatsɔɔ nɔ ni Nyɔŋmɔ webii feɔ yɛ “Nitsumɔi Kpakpai Amli yɛ Ŋmaakpamɔ Be Nɛɛ Mli” lɛ mli, yɛ eklɛŋklɛŋ wiemɔ lɛ mli. Ebaawo wɔteŋ mɔ fɛɛ mɔ hewalɛ koni wɔsusu bɔ ni wɔɔfee ni wɔkɛ wɔhe awo ŋmaakpamɔ nitsumɔ ni Nyɔŋmɔ efã ni atsuɔ ŋmɛnɛ lɛ mli babaoo kɛmɔ shi lɛ he.
3 Kwɛ bɔ ni wɔmii shɛɔ wɔhe wɔhaa, kɛji akɛ wɔna bɔ ni Kristofoi oblahii kɛ oblayei bibii diɔ mumɔŋ ninámɔ sɛɛ lɛ! Enɛ woɔ Yehowa hiɛ nyam ni eyeɔ ebuaa oblahii kɛ oblayei bibii nɛɛ koni amɛná shishitoo kpakpa kɛha sɔɔmɔ hegbɛi ni baaba wɔsɛɛ lɛ. Wiemɔ lɛ fã ni ji “Oblahii kɛ Oblayei Bibii ni Akafoɔ Amɛ yɛ Nitsumɔi Kpakpai Amli yɛ Yehowa Yijiemɔ Mli” lɛ baama nitsumɔi kpakpai ni Kristofoi oblahii kɛ oblayei bibii tsuɔ yɛ asafo lɛ mli lɛ anɔ mi.
4 Mɛni jɛɔ nitsumɔi kpakpai ni adiɔ sɛɛ lɛ amli kɛbaa? Wielɔ ni baasara kpee lɛ baawie enɛ he yɛ enaagbee wiemɔ ni ji, “Yaa Nɔ yɛ Nitsumɔi Kpakpai Amli Koni Onine Ashɛ Yehowa Jɔɔmɔi Anɔ” lɛ mli. Ebaawie hei srɔtoi ejwɛ ni wɔnine shɛɔ mumɔŋ jɔɔmɔi babaoo nɔ kɛjɛɔ lɛ ahe: (1) ákɛ aŋkroaŋkroi, (2) ákɛ wekui, (3) ákɛ asafo, kɛ (4) ákɛ jeŋ muu fɛɛ gbɛjianɔtoo.
5 Mɛi ni amɛjɔɔ amɛhe nɔ amɛha Yehowa lɛ baaná hegbɛ koni abaptisi amɛ. Kɛji akɛ ófee klalo akɛ oookɔ gbɛ ni tamɔ nɛkɛ lɛ, belɛ ha ni onukpai asɛinɔtalɔ lɛ ale amrɔ nɔŋŋ.
6 Kɛji akɛ atswa kpee be lɛ he adafi yɛ he ni oyɔɔ lɛ, ha ohe afee oya ni oto gbɛjianɔ kpakpa koni oya shishi. Bɔɔ mɔdɛŋ ni oshɛ jɛmɛ mra bɔni afee ni oná lala kɛ sɔlemɔ ni akɛjeɔ shishi lɛ mli gbɛfaŋnɔ. Ba ni wɔɔba kɛ toiboo ni wɔɔfee kɛha kpee krɛdɛɛ gbi lɛ shishi wiemɔ he gbɛjianɔtoo lɛ fɛɛ lɛ baawo wɔ hewalɛ koni wɔya nɔ wɔtiu gbɛ ni haa wɔfeɔ niiatsɛmɛi lɛɛlɛŋ yɛ Yehowa Nyɔŋmɔ gbɛfaŋ lɛ sɛɛ.