Ani Osɔɔmɔ Nitsumɔ lɛ Kɛ Yijiemɔ Bahaa Yehowa?

1. Mɛni esa akɛ efee nɔ titri ni shiɛlɔi fɛɛ susuɔ he yɛ amɛshiɛmɔ nitsumɔ lɛ mli?

¹ He ni akɛaawo shiɛmɔ nitsumɔ lɛ mli lɛ ji hegbɛi ni fe fɛɛ ni anɔkwa Kristofonyo ko baanyɛ ená lɛ ateŋ ekome. Yɛ shiɛmɔ nitsumɔ lɛ mli lɛ, anaa wɔ akɛ Yehowa, ni ji Nyɔŋmɔ ofe lɛ najiaŋdamɔlɔi. No hewɔ lɛ, nɔkwɛmɔnɔ kpakpa ni wɔɔfee yɛ nitsumɔ nɛɛ mli lɛ he miihia waa diɛŋtsɛ. Bɔfo Paulo ma enɛ nɔ mi beni ekɛɛ akɛ: “Ni asaŋ wɔtooo mɔ ko mɔ ko pampi yɛ nɔ ko nɔ ko mli, koni akagbe sɔɔmɔ lɛ he guɔ.” (2 Kor. 6:3) Mɛɛ gbɛ nɔ aaatsɔ afee enɛ?

2. Mɛni hewɔ esa akɛ wɔkwɛ jogbaŋŋ yɛ wɔgbɔmɔtsoŋ hesaamɔ he lɛ?

² Ní Wɔɔkwɛ Jogbaŋŋ yɛ Wɔgbɔmɔtsoŋ Hesaamɔ He: Mɛi ni naa wɔ lɛ naa akɛ wɔyɛ srɔto yɛ wɔgbɔmɔtsoŋ hesaamɔ mli. Yɛ jeŋ fɛɛ lɛ, gbɔmɛi naa akɛ anɔkwa Kristofoi ahe tse ni amɛhesaamɔ yɛ hiŋmɛi nɔ. Enɛ gbalaa mɛi ni hiɛ tsui kpakpa lɛ kɛbaa Nyɔŋmɔ ni wɔsɔmɔɔ lɛ lɛ ŋɔɔ kɛ shɛɛ sane ni wɔhiɛ lɛ he. Enɛ etsirɛ mɛi komɛi koni ‘amɛjá Nyɔŋmɔ,’ ni amɛjajeɔ akɛ: “Nyɔŋmɔ yɛ nyɛteŋ lɛɛlɛŋ.”—1 Kor. 14:24, 25.

3. Yɛ 1 Timoteo 2:9, 10 lɛ kɛ gbeekpãmɔ naa lɛ, te esa akɛ wɔsaa wɔhe wɔha tɛŋŋ yɛ shiɛmɔ nitsumɔ lɛ mli, ni mɛni hewɔ?

³ Ákɛ Yehowa Odasefoi lɛ, esa akɛ wɔtadewoo kɛ hesaamɔ ajie hiɛshikamɔ ni sa shɛɛ sane ni wɔhiɛ lɛ kpo. Ekaba kɔkɔɔkɔ akɛ bɔ ni wɔsaa wɔhe wɔhaa lɛ baajie je lɛŋ mumɔ kpo ni egbala jwɛŋmɔ kɛba wɔ diɛŋtsɛ wɔnɔ. Esaaa akɛ awoɔ atadei ni mɔɔ mɔ kpɛŋŋ ni tɛŋɔ gbɔmɔtso lɛ yɛ shiɛmɔ nitsumɔ lɛ mli kɔkɔɔkɔ, ejaakɛ ebaanyɛ egbala mɛi ajwɛŋmɔ kɛjɛ shɛɛ sane lɛ nɔ. Yɛ no najiaŋ lɛ, akɛni anɔkwa Nyɔŋmɔ lɛ gbɛi kã wɔnɔ hewɔ lɛ, esa akɛ wɔsaa wɔhe bɔ “ni sa yei ni tsɔɔ amɛhe akɛ Nyɔŋmɔ jálɔi lɛ.”—1 Tim. 2:9, 10.

4. Mɛni hewɔ esa akɛ wɔkwa ŋwanejeei kɛ naataamɔi yɛ shiɛmɔ nitsumɔ lɛ mli lɛ?

⁴ Kwa Ŋwanejeei kɛ Sane Naataamɔi: Bei komɛi lɛ wɔkɛ mɛi kpeɔ ni amɛkɛ wɔhemɔkɛyelii kpãaa gbee. Akɛni wɔle jogbaŋŋ akɛ amɛyɛ hegbɛ ní amɛjieɔ amɛsusumɔi akpo hewɔ lɛ, wɔjɛɔ suɔmɔ mli wɔboɔ amɛ toi. Ekolɛ mɛi komɛi ejieŋ bulɛ kpo kɛtsɔ wɔhemɔkɛyelii lɛ ni amɛaaye he fɛo ni amɛtutua lɛ nɔ. Kɛ́ ebalɛ nakai lɛ, esa akɛ wɔkwɛ jogbaŋŋ koni wɔkɛ wɔhe akawo naataamɔi ni naa wa mli yɛ mɛi ashinaai anaa. Taakɛ Yesu ji lɛ, wɔkɛ tsuishitoo haa hefɛoyeli kɛ tutuamɔ wiemɔi ahetoo yɛ mlijɔlɛ kɛ henɔyeli mli.—1 Pet. 2:23; 1 Tim. 2:8.

5. Mɛni ji nibii titrii ni wɔsusuɔ he beni wɔkɛ wɔhe ewo shiɛmɔ nitsumɔ lɛ mli lɛ ateŋ ekome?

⁵ Okɛ Mɛi ni Esoro Amɛbɔɔ Su Akafee Biblia Mli Nikasemɔ: Wɔyɛ jeŋ ko ni he tseee ni ŋmɛɔ nɔ fɛɛ nɔ feemɔ gbɛ, ni jeŋba he naatsĩi fioo pɛ yɔɔ mli lɛ mli. Esa akɛ anɔkwa Kristofoi akwɛ amɛhe nɔ jogbaŋŋ be fɛɛ be, koni amɛkwa jeŋbai fɛɛ ni esaaa ni baanyɛ ekɛ heguɔgbee aba Yehowa kɛ egbɛjianɔtoo lɛ nɔ. Mɛɛ gbɛ nɔ abaanyɛ akɛ enɛ ato wɔshiɛmɔ nitsumɔ lɛ he?

6. (a) Kɛ wɔ pɛ wɔnyiɛ shiɛmɔ nɔ ni wɔkɛ mɔ ko ni esoro ebɔɔ su kpe lɛ, mɛni esaaa akɛ wɔfeɔ? (b) Mɛɛ kɔkɔbɔɔ ni kɔɔ mɛi ni esoro amɛbɔɔ su ni jieɔ miishɛɛ kpo yɛ wɔ-Biblia mli shɛɛ sane lɛ he wɔnaa yɛ July 1, afi 1992 Buu-Mɔɔ lɛ baafa 31 lɛ mli?

⁶ Wɔkɛ mɛi ni esoro amɛbɔɔ su ni jieɔ anɔkwa miishɛɛ kpo yɛ anɔkwale lɛ he lɛ kpeɔ yɛ shiɛmɔ nitsumɔ lɛ mli. Kɛ wɔ kome pɛ wɔnyiɛ shiɛmɔ nɔ ni wɔyatswa mɔ ko ni esoro ebɔɔ su shinaa ni shiabii krokomɛi lɛ ateŋ mɔ ko mɔ ko bɛ shia lɛ, ebaahi jogbaŋŋ akɛ wɔɔye lɛ odase yɛ eshinaa lɛ naa fe nɔ ni wɔɔbote etsũ lɛ mli. Kɛ ejie miishɛɛ kpo lɛ, too gbɛjianɔ koni oku sɛɛ oyasara lɛ beni shiɛlɔ kroko fata ohe. Kɛ enɛ ehiii feemɔ lɛ, ebaafee nɔ ni nilee yɔɔ mli akɛ oooha shiɛlɔ ko ni kɛ shiatsɛ lɛ hiɛ bɔɔsu kome lɛ ayasara lɛ.—Kwɛmɔ Buu-Mɔɔ, July 1, 1992, baafa 31 lɛ mli.

7. (a) Mɛni esaaa akɛ wɔfeɔ kɛ́ wɔmiifee Biblia mli nikasemɔ? (b) Kɛ́ amrɔ nɛɛ okɛ mɔ ko ni esoro ebɔɔ su kaseɔ nii lɛ, mɛni esa akɛ ofee?

⁷ Nakai nɔŋŋ hu yɛ shia Biblia mli nikasemɔi afeemɔ mli lɛ, esaaa akɛ nyɛmimɛi yei kɛ hii kaseɔ nii, ni esaaa akɛ nyɛmimɛi hii hu kɛ yei kaseɔ nii. Yɛ shihilɛi babaoo amli lɛ, wɔnine baanyɛ ashɛ mɔ ko ni ekɛ mɔ ni yɔɔ wiemɔ lɛ he miishɛɛ lɛ hiɛ bɔɔsu kome nɔ koni ekɛ lɛ akase nii. (Mat. 10:16) Kɛ́ shiɛlɔ ko nu he akɛ enaŋ mɔ ko ni kɛ mɔ ni yɔɔ wiemɔ lɛ he miishɛɛ lɛ hiɛ bɔɔsu kome koni ekɛ lɛ akase nii lɛ, esa akɛ eyana sɔɔmɔ nitsumɔ nɔkwɛlɔ lɛ loo woloŋ nikasemɔ nɔkwɛlɔ lɛ kɛha yelikɛbuamɔ.

8. (a) Mɛɛ gbɛnaa nii bakãa sɔɔmɔ nitsumɔ nɔkwɛlɔ lɛ kɛ wolo nikasemɔ nɔkwɛlɔi lɛ anɔ kɛ́ mɔ ko kɛ mɔ ni esoro ebɔɔsu kaseɔ nii? (b) Te esa akɛ shiɛlɔi kɛ nɛkɛ nyɛmimɛi hii ni nyiɛɔ hiɛ nɛɛ afee ekome amɛha tɛŋŋ?

⁸ Esa akɛ sɔɔmɔ nitsumɔ nɔkwɛlɔ lɛ kɛ Asafoŋ Wolo Nikasemɔ nɔkwɛlɔi lɛ afee klalo koni amɛkɛ yelikɛbuamɔ aha shiɛlɔi fɛɛ ni yɔɔ asafo lɛ mli ni kɛ mɛi ni esoro amɛ bɔɔsu kaseɔ nii lɛ. Amɛbaanyɛ amɛto gbɛjianɔ koni nyɛmi nuu ko kɛ nuu ni yɔɔ wiemɔ lɛ he miishɛɛ lɛ akase nii loo koni nyɛmi yoo ko kɛ yoo ni yɔɔ wiemɔ lɛ he miishɛɛ lɛ akase nii. Nɔkwɛlɔi nɛɛ ni akɛ amɛ aaafee ekome lɛ kɛ Yehowa jɔɔmɔ baaba.—Heb. 13:17.

9. Wɔshiɛmɔ nitsumɔ lɛ baanyɛ ekɛ yijiemɔ abaha Yehowa yɛ mɛɛ gbɛ nɔ?

⁹ Belɛ, wɔtsɔɔ wɔhesaamɔ ni yɔɔ hiŋmɛi nɔ, mlijɔlɛ kɛ heshibaa mumɔ ni wɔjieɔ lɛ kpo, kɛ wɔhe ni wɔɔkwɛ jogbaŋŋ koni wɔkaŋmɛɛ saji ahe kɛsaa yɛ wɔ shiɛmɔ nitsumɔ lɛ mli lɛ anɔ wɔkɛ yijiemɔ kɛ woo bahaa Yehowa. Kɛtsɔ Biblia shishitoo mlai nɛɛ ni wɔkɛaatsu nii yɛ wɔshiɛmɔ nitsumɔ lɛ mli lɛ nɔ lɛ, wɔbaabu wɔ diɛŋtsɛ wɔhe, ni wɔbaatsi wɔhe kɛjɛ ‘mɔ ko pampi ni wɔɔto’ lɛ he.—2 Kor. 6:3.