Ani Otadewoo kɛ Ohesaamɔ Woɔ Yehowa Hiɛ Nyam?
1. (a) Mɛni Maleaki 3:18 lɛ kɛɔ yɛ Nyɔŋmɔ webii ahe? (b) Mɛni ji gbɛ kome ni wɔbaanyɛ wɔtsɔ nɔ wɔtsɔɔ akɛ esoro wɔ yɛ je lɛŋ bii lɛ ahe?
1 Ale Yehowa Odasefoi yɛ je lɛŋ fɛɛ akɛ esoro amɛ kwraa yɛ mɛi krokomɛi ni kɛɔ akɛ amɛle Nyɔŋmɔ lɛ ahe. (Mal. 3:18) Mɛni hewɔ? Yiŋtoo kome ji akɛ, wɔkɛ Ŋmalɛ naa ŋaawoo akɛ ‘wɔkɛ atade ni sa kɛ hiɛ ni gboɔ nɔ̃ kɛ jwɛŋmɔ ni sa awula wɔhe bɔ ni sa mɛi ni tsɔɔ amɛhe akɛ Nyɔŋmɔ jálɔi lɛ’ tsuɔ nii. (1 Tim. 2:9, 10) Mɛɛ gbɛ nɔ wɔbaanyɛ wɔkɛ shishitoo mla nɛɛ atsu nii yɛ wɔtadewoo kɛ wɔhesaamɔ mli?
2. (a) Mɛni atadei ni wɔwoɔ lɛ kɛɔ yɛ wɔhe? (b) Mɛɛ saji esa akɛ wɔbi wɔhe yɛ wɔtadewoo kɛ wɔhesaamɔ he?
2 Yehowa naa nɔ ni yɔɔ tsui lɛ mli. Shi bei pii lɛ adesai damɔɔ ‘kponɔgbɛ nii ni amɛkwɛɔ’ lɛ nɔ amɛmuɔ sane naa. (1 Sam. 16:7) Atadei ni wɔwoɔ lɛ tsɔɔ mɛi ni wɔji—wɔhemɔkɛyelii, jeŋbai, kɛ wɔsusumɔi. Ákɛ Yehowa Odasefoi lɛ, egbɛi krɔŋkrɔŋ lɛ kã wɔnɔ. No hewɔ lɛ esa akɛ wɔteŋ mɔ fɛɛ mɔ abi ehe akɛ: Ani atade ni miwoɔ kɛyaa skul, nitsumɔ, nɔ ni miwoɔ yɛ shiɛmɔ nitsumɔ lɛ mli, kɛ nɔ ni mikɛ yaa Kristofoi akpeei lɛ sa mɔ ni tsɛɔ ehe Nyɔŋmɔ sɔɔlɔ lo?—1 Pet. 2:12.
3. (a) Mɛɛ ŋaawoo Paulo kɛha yei ni ji Kristofoi? (b) Mɛɛ je lɛŋ susumɔi nyɛmimɛi yei Kristofoi sumɔɔ ni amɛkwa?
3 Bɔfo Paulo kɛ ŋaawoo nɛɛ ha akɛ: “Yei hu, amɛkɛ atade ni sa kɛ hiɛ ni gboɔ nɔ̃ kɛ jwɛŋmɔ ni sa awula amɛhe, jeee kɛ yigbɔɔ loo shika loo adiagbai loo atade ni jara wa, shi moŋ kɛ nitsumɔi kpakpai ni sa yei ni tsɔɔ amɛhe akɛ Nyɔŋmɔ jálɔi lɛ.” (1 Tim. 2:9, 10) Yei ni ji Kristofoi ni edara yɛ mumɔŋ lɛ kɛ ŋaawoo nɛɛ tsuɔ nii. Amɛkaseee yei ni yɔɔ je lɛ mli ni woɔ atadei ni baaha mɛi ana amɛ loo atadei ni téɔ bɔlɛnamɔ akɔnɔi ashi lɛ kɔkɔɔkɔ. Yɛ anɔkwale mli lɛ, Kristofonyo yoo loo obalayoo fioo ko bɛ ní baaje gbɛ efee nii ni baaha mɔ kɛ ehe awo shihilɛ ni Yesu wie he yɛ Mateo 5:28 lɛ mli.
4. Mɛni ji atadei komɛi ni je lɛŋ bii lɛ woɔ ni esa akɛ Kristofoi akwa?
4 Akpɛɔ atadei komɛi bɔ ni kɛ́ awo kɛdamɔ shi lɛ efeɔ tamɔ eyɛ hiŋmɛi nɔ, shi kɛ́ awo kɛmiinyiɛ loo awo kɛta shi lɛ anaa gbɔmɔtso lɛ hei komɛi ni esaaa ni anaa. Agbɛnɛ hu lɛ, jeans loo trɔza ni awoɔ ni emɔɔ mɔ kpɛŋŋ, ní bei pii lɛ ehaa anaa hɛ sɛɛ loo musu nɔ lɛ ebafee nɔ ni mɛi fɛɛ woɔ. Ajeɔ gbɛ akpɛɔ yei atadei pii ni ahaa ebaa shi bɔ ni baaha ana amɛfufɔ loo amɛmusu nɔ. Gbii etɛ nɛɛ anaa oblahii bibii komɛi ni woɔ atadei kɛ trɔzai wuji, ni amɛhaa amɛtrɔzai lɛ ahɛ baa shi bɔ ni bɛ hiŋmɛi nɔ.
5. Mɛɛ saji esa akɛ wɔ fɛɛ wɔbibii wɔhe, ni kɛ wɔjɛ anɔkwayeli mli wɔpɛi wɔmli lɛ, mɛɛ sɛɛ wɔbaaná?
5 Beni Kristofonyo ko halaa atade ni ebaawo lɛ, esa akɛ ebi akɛ: Ani mihesaamɔ haa awieɔ Nyɔŋmɔ ni mijaa lɛ he ekpakpa? Ani atadei ni miwoɔ lɛ tsɔɔ akɛ miyɛ bulɛ kɛha minanemɛi heyelilɔi lɛ ahenumɔi? Ani mihesaamɔ lɛ baagbala mɛi krokomɛi ajwɛŋmɔ loo ebaawo amɛ mlila? Ani mitadewoo kɛ bɔ ni misaa mihe mihaa lɛ haa mifeɔ tamɔ mɛi ni bɛ bulɛ kɛha Kristofoi ajeŋba kpakpai lɛ eko? Nɛkɛ shishitoo mlai ni ji hesaamɔ ni yɔɔ hiŋmɛi nɔ nɛɛ kɔɔ bɔ ni hii kɛ yei ni ji Kristofoi lɛ sáa amɛhe amɛhaa lɛ he. Ni nakai nɔŋŋ hu ekã shi faŋŋ akɛ ebaakɔ atadei ni bɛ hiŋmɛi nɔ, nɔ ni wɔwoɔ kɛnyiɛɔ shĩa, kɛ nɔ ni téɔ bɔlɛnamɔ akɔnɔi ashi ní amɛbu yɛ je lɛŋ ŋmɛnɛ lɛ ahe. Anɔkwayeli mli ni wɔɔjɛ wɔpɛi wɔmli jogbaŋŋ lɛ baaye abua wɔ ní wɔsaa wɔhe bɔ ni baaha awie Yehowa gbɛi lɛ kɛ ewebii lɛ ahe ekpakpa.—2 Kor. 13:5; Rom. 14:13.
6. Mɛni hewɔ ehe hiaa waa ni mɛi ni shiɛɔ sanekpakpa lɛ awo atade ni yɔɔ hiŋmɛi nɔ, ní he tse hu lɛ?
6 Atade ní Yɔɔ Hiŋmɛi nɔ ní Wɔɔwo yɛ Shiɛmɔ Nitsumɔ lɛ Mli: Kɛ́ wɔkɛ wɔhe wo shiɛmɔ nitsumɔ lɛ mli lɛ, wɔdamɔɔ Yehowa kɛ ebi Kristo Yesu najiaŋ. Kɛ́ wɔsaa wɔhe jogbaŋŋ lɛ, ehaa awieɔ asafo ni wɔdamɔɔ enajiaŋ lɛ he ekpakpa, ni ehaa wɔtoibolɔi lɛ náa Nyɔŋmɔ ni wɔjáa lɛ he jwɛŋmɔ kpakpa hu. Kɛ́ wɔhe tsé ni wɔsaa wɔhe jogbaŋŋ lɛ, ekã shi faŋŋ akɛ mɛi krokomɛi baamu sane naa akɛ esoro wɔ, ni no baaha amɛbo sane ni wɔhiɛ lɛ toi.—1 Kor. 14:25.
7. (a) Mɛni hewɔ esaaa akɛ wɔgbalaa mɛi ajwɛŋmɔ kɛbaa wɔnɔ yɛ shiɛmɔ nitsumɔ lɛ mli lɛ? (b) Mɛni 1 Timoteo 2:10 lɛ tsɔɔ, ni té ekɔɔ bɔ ni wɔsaa wɔhe wɔhaa lɛ he ehaa tɛŋŋ?
7 Esa akɛ wɔkai akɛ bɔ ni wɔsaa wɔhe wɔhaa lɛ diɛŋtsɛ po yeɔ mɛi odase. Mɛi babaoo enya Yehowa webii lɛ ahesaamɔ ni yɔɔ hiŋmɛi nɔ, ni sa hu lɛ he waa. Kɛ́ wɔfee wɔyitsɔi haŋtsii loo wɔkɛ nibii ni akɛkpaa hiɛ saa wɔhe fe nine loo wɔwo atadei ni mɔɔ mɔ kpɛŋŋ kɛ nɔ ni haa anaa gbɔmɔtso lɛ hei ni esaaa akɛ anaa kɛtee shiɛmɔ lɛ, egbalaa mɛi ajwɛŋmɔ kɛbaa wɔnɔ moŋ fe shɛɛ sane ni wɔhiɛ lɛ. No hewɔ lɛ, kɛ́ wɔhesaamɔ kɛ kɛɛmɔ ni wɔkɛɔ akɛ anɔkwa Kristofoi ji wɔ lɛ kpãaa gbee, ni kɛlɛ wɔkɛ wɔhe wo shĩa kɛ shĩa nitsumɔ lɛ mli, wɔye gbɛjegbɛ he odase, loo wɔye odase yɛ mɔ ko shĩa lɛ, ebaafee nɔ ni esaaa kwraa, ni ebaatsɔɔ akɛ wɔbɛ bulɛ kɛha Yehowa.—1 Tim. 2:10.
8. (a) Mɛɛ atadei esaaa akɛ wɔwoɔ kɛyaa shiɛmɔ, ni mɛni hewɔ? (b) Te shishitoo mla ni yɔɔ 2 Korintobii 6:3 lɛ kɔɔ hesaamɔ ni wɔkɛyaa shiɛmɔ lɛ he ehaa tɛŋŋ?
8 Wɔshiɛmɔ nitsumɔ lɛ ji nitsumɔ ni esa ákɛ akɛ bulɛ kɛ hesaamɔ ni sa atsu. Wɔsaŋ wɔhe bɔ ni ebɛ hiŋmɛi nɔ kɛyaŋ maŋ onukpai ahiɛ. No hewɔ lɛ esa akɛ wɔsaa wɔhe jogbaŋŋ beni wɔdamɔɔ Yehowa najiaŋ yɛ shiɛmɔ nitsumɔ lɛ mli lɛ. Ekã shi faŋŋ akɛ wɔnyɛŋ wɔwo atade ni bɛ hiŋmɛi nɔ, atade ni eba nɔ ni esaaa loo nɔ ni he tseee yɛ shiɛmɔ nitsumɔ lɛ fã ko kwraa mli. Esaaa akɛ awoɔ atadei ni awoɔ kɛnyiɛɔ shĩa kɛyaa shiɛmɔ. Esa akɛ wɔbaagii, Bibliai kɛ woji krokomɛi lɛ he atse ni efee falefale. Esa akɛ tokota ni wɔwoɔ lɛ afee nɔ ni hi kɛ nɔ ni he tse. Efeŋ nɔ ni hi akɛ hii aaawo aspaaterei ni amɛwooo sɔks. Eyɛ mli akɛ abaanyɛ asaa he nakai kɛje kpo loo akɛya hiɛtserɛjiemɔ ko shishi moŋ, shi efeŋ nɔ ni sa loo nɔ ni bulɛ yɔɔ he akɛ wɔɔsaa wɔhe nakai beni wɔdamɔɔ Ŋwɛi Flooflo Nyɔŋmɔ lɛ najiaŋ yɛ shiɛmɔ nitsumɔ lɛ ni ji nitsumɔ ni he hiaa fe fɛɛ lɛ mli lɛ.—2 Kor. 6:3; Ato Wɔhe Gbɛjianɔ, bf. 138, kk. 2.
9. (a) Mɛni hewɔ esa akɛ wɔsaa wɔhe jogbaŋŋ kɛ́ wɔmiiya kpeei lɛ? (b) Mɛɛ atadei esaaa akɛ wɔwoɔ kɛyaa kpeei? (d) Te esa akɛ wɔsaa wɔhe wɔha tɛŋŋ kɛ wɔmiiya Asafo Woloŋ Nikasemɔ?
9 Atade ní Yɔɔ Hiŋmɛi nɔ ní Wɔɔwo kɛya Kristofoi Akpee: Nɛkɛ shishitoo mla ni kɔɔ hesaamɔ he ni esa akɛ Maŋtsɛyeli shiɛlɔi kɛtsu nii yɛ shiɛmɔ nitsumɔ lɛ mli lɛ hu baakɔ bɔ ni wɔsaa wɔhe kɛbaaa Kristofoi akpeei lɛ he. Esa akɛ be fɛɛ be lɛ wɔsaa wɔhe yɛ gbɛ ni tsɔɔ akɛ wɔyɛ bulɛ kɛha Biblia mli tsɔsemɔ he gbɛjianɔtoo ni he hiaa nɛɛ. Esaaa akɛ wɔhesaamɔ kɛ bɔ ni wɔfeɔ wɔyitsɔi wɔhaa lɛ tsɔɔ akɛ ‘wɔmiisumɔ ni mɛi ana nibii ni wɔyɔɔ,’ loo egbala jwɛŋmɔ kɛba wɔnɔ. (1 Yoh. 2:15, 16) Enɛ kɔɔ kpeei enumɔ ni wɔfeɔ lɛ fɛɛ he, ní Asafo Woloŋ Nikasemɔ hu fata he lɛ he. Efeŋ nɔ ni hi akɛ wɔɔwo atadei ni wɔwoɔ kɛ́ wɔmiiya wɔyasara wɔnanemɛi loo wɔmiiya henaabuamɔ ko kɛkɛ shishi lɛ kɛyaa asafoŋ kpeei srɔtoi lɛ fɛɛ ashishi. Kpee fɛɛ kpee ni wɔyaa lɛ haa wɔbadamɔɔ wɔ-Nyɔŋmɔ lɛ hiɛ, no hewɔ lɛ esa akɛ wɔsaa wɔhe bɔ ni tsɔɔ akɛ Nyɔŋmɔ yɛ wɔteŋ.
10. Taakɛ Luka 6:40 lɛ tsɔɔ lɛ, mɛni esa akɛ wɔha ehi wɔjwɛŋmɔ mli akɛni wɔ-Biblia kaselɔi lɛ ateŋ mɛi babaoo baa kpeei lɛ hewɔ?
10 Mɛi ni wɔkɛkaseɔ Biblia lɛ ateŋ mɛi babaoo baa Kristofoi akpeei. Amɛkwɛɔ wɔjeŋba kɛ bɔ ni wɔsaa wɔhe wɔhaa lɛ. Beni Nyɔŋmɔ he nilee ni mɛi nɛɛ yɔɔ lɛ yaa hiɛ lɛ, amɛkpoɔ je lɛ atadewoo kɛ hesaamɔi lɛ, ni amɛwoɔ atadei ni yɔɔ hiŋmɛi nɔ ni sa Nyɔŋmɔ webii. Esaaa akɛ wɔhaa bɔ ni wɔsaa wɔhe wɔhaa lɛ tɔ̃tɔ̃ɔ mɛi ni tamɔ nɛkɛ lɛ anaji. (Luka 6:40; Fil. 1:9-10) Esa akɛ suɔmɔ ni wɔyɔɔ kɛha Nyɔŋmɔ kɛ wɔnanemɛi adesai lɛ atsirɛ wɔ ni wɔfee nibii ni baaha mɛi krokomɛi aya hiɛ yɛ mumɔŋ.—Rom. 15:1, 2.
11. (a) Te wɔbaafee tɛŋŋ wɔkase Yesu yɛ bɔ ni wɔsaa wɔhe wɔhaa lɛ he? (b) Taakɛ 2 Korintobii 6:3 lɛ tsɔɔ lɛ, mɛni esaaa akɛ wɔfeɔ?
11 Kɛ́ wɔmiihala atade ni wɔbaawo lɛ, esa akɛ wɔha ehi wɔjwɛŋmɔ mli akɛ “Kristo hu haaa ehe asa ehiɛ.” (Rom. 15:3) Oti titri ni ma Yesu hiɛ ji ni efee Nyɔŋmɔ suɔmɔnaa nii. Yesu kɛ mɛi krokomɛi ní eeeye ebua amɛ lɛ hu ye nɔ ni esumɔɔ hiɛ. Anɔkwa Kristofoi hu feɔ nakai nɔŋŋ. Esaaa akɛ atadei ni wɔwoɔ kɛ wɔhesaamɔ feɔ gbɛtsĩi nii ehaa wɔ kɛ mɛi ni yɔɔ wɔshikpɔŋkuku lɛ mli lɛ kɔkɔɔkɔ. Ni esaaa akɛ amɛŋmɛɔ gbɛ ni ‘atoɔ’ mɛi ni le nɔ ni Yehowa Odasefoi lɛ heɔ amɛyeɔ kɛ nɔ ni amɛtsɔɔ lɛ “pampi yɛ nɔ ko nɔ ko mli.”—2 Kor. 6:3.
12. Mɛni esa akɛ wɔbɔ mɔdɛŋ wɔfee akɛni mɛi krokomɛi miikwɛ wɔ lɛ hewɔ?
12 Yehowa webii lɛ “efee nikwɛmɔ nii aha je lɛ.” (1 Kor. 4:9) Enɛ hewɔ lɛ, nyɛhaa wɔyaa nɔ wɔkpooa je lɛ hesaamɔ ni bɛ hiŋmɛi nɔ ni mɛi ni heee yeee lɛ woɔ lɛ. Nyɛhaa wɔwoa atadei ni he tse, atadei ni sa, ni wɔtsi wɔhe kwraa kɛjɛ jeŋba shara he, ni wɔkawo atadei ni teeɔ bɔlɛnamɔ akɔnɔi ashi ni je lɛ hii kɛ yei lɛ sumɔɔ ni amɛwo koni amɛkɛtee mɛi krokomɛi abɔlɛnamɔ akɔnɔi ashi lɛ. Kɛtsɔ wɔhe ni wɔbaasaa akɛ Kristofoi sɔɔlɔi lɛ nɔ lɛ ‘wɔwulaa Nyɔŋmɔ ni ji wɔyiwalaherelɔ lɛ tsɔɔmɔi lɛ yɛ nibii fɛɛ mli’ ni wɔkɛ no feemɔ tsɔɔ akɛ wɔkɛ Biblia mli shishitoo mlai ni ji heshibaa kɛ hiɛshikamɔ tsuɔ nii yɛ wɔ diɛŋtsɛ wɔshihilɛi amli.—Tito 2:10.