Hemɔkɛyeli he Odaseyeli!
1. Mɛɛ nibii ni jaraa Yesu gba efɔ̃ shi?
1 Beni Yesu wieɔ ebaa be lɛ kɛ nibii agbɛjianɔtoo nɛɛ naagbee lɛ he lɛ, ebɔfoi lɛ fee dioo kɛbo lɛ toi jogbaŋŋ. Nibii ni jaraa ni baaba adesai anɔ lɛ ekomɛi ji tai, hɔmɔ, shikpɔŋhosomɔ, kɛ tsɛŋemɔ helai. No sɛɛ lɛ, Yesu wie yɛ esɛɛnyiɛlɔi lɛ ahe akɛ abaanyɛ̃ amɛ, abaajie amɛ awo amanehulu mli, ni abaagbe amɛ. Amale gbalɔi baate shi ni amɛaalaka mɛi pii. Mɛi pii asuɔmɔ lɛ he aaajɔ.
2. Mɛni hewɔ sanekpakpa lɛ ni ashiɛɔ yɛ je lɛŋ fɛɛ lɛ sa kadimɔ waa lɛ?
2 Eeenyɛ efee akɛ beni Yesu ewie naagbai ni ebɔfoi lɛ kɛbaakpe lɛ ahe sɛɛ lɛ, amɛnaa kpɛ amɛhe beni ewie akɛ aaashiɛ Nyɔŋmɔ Maŋtsɛyeli lɛ he sanekpakpa nɛɛ atsɔɔ je nɛŋ fɛɛ lɛ. (Mat. 24:3-14) Ŋmɛnɛ, wɔnaa gbalɛ nɛɛ mlibaa ni yɔɔ miishɛɛ ni sa kadimɔ waa. Eyɛ mli akɛ wɔyɛ jaramɔ bei amli moŋ, shi Yehowa Odasefoi kɛ ekãa jajeɔ sanekpakpa lɛ. Suɔmɔ ni wɔyɔɔ lɛ yaa nɔ emli waa, beni suɔmɔ ni je lɛŋ bii lɛ yɔɔ lɛ he jɔɔ lɛ. Eye mli akɛ anyɛɔ wɔ yɛ ‘je lɛŋ fɛɛ’ moŋ, shi kɛ́ hoo kwraa lɛ wɔmiishiɛ yɛ maŋ fɛɛ maŋ mli.
3. Mɛɛ yibɔi ni woɔ mɔ hewalɛ onaa yɛ jeŋ muu fɛɛ akɔntaabuu lɛ mli?
3 Kɛ́ wɔkwɛ nɔ ni Yehowa Odasefoi nyɛ amɛtsu yɛ nyɛsɛɛ sɔɔmɔ afi lɛ mli, taakɛ akɛwo tao ni yɔɔ baafa 3 kɛyashi baafa 6 lɛ mli lɛ, ewoɔ wɔ hewalɛ waa diɛŋtsɛ! Yɛ afii 16 ni ho lɛ mli lɛ, daa afi lɛ akɛ nɔ ni fa fe ŋmɛlɛtswai akpekpe toi akpe kome tsuɔ nii yɛ shiɛmɔ kɛ kaselɔ feemɔ nitsumɔ lɛ mli. Mɛɛ hemɔkɛyeli he odaseyeli po nɛ! Gbɛgbalɔi ayibɔ tee hiɛ oha mlijaa 5.8, shiɛlɔi oha mlijaa 3.1, kɛ Biblia mli nikasemɔi oha mlijaa 4.4. Mɛi ni abaptisi lɛ tee hiɛ oha mlijaa 20.1 kɛ́ akɛto mɛi ni abaptisi yɛ nyɛsɛɛ sɔɔmɔ afi lɛ mli lɛ he. Eyɛ miishɛɛ akɛ aaana akɛ mɛi ni miihe ashɛ akpekpei kpawo kɛ anɔkwayeli miisɔmɔ Yehowa amrɔ nɛɛ fe be fɛɛ ni eho yɛ adesai ayinɔsane mli! Mɛni ji nɔ ni ona ni wo bo hewalɛ waa be mli ni okwɛɔ tao lɛ mli lɛ?
4. Mɛɛ naagbai nuu ko kɛkpe beni eyaa ehiɛ kɛshɛɔ baptisimɔ he lɛ?
4 Eyɛ mli akɛ yibɔi nɛɛ fa moŋ, shi esaaa akɛ wɔhiɛ kpaa nɔ kɔkɔɔkɔ akɛ yibɔi nɛɛ damɔ shi kɛha mɛi ni etsɔɔ akɛ amɛyɛ hemɔkɛyeli. Susumɔ nɔkwɛmɔnɔ nɛɛ he okwɛ. Guillermo ji mɔ ko ni da yɛ Bolivia. Afɔ́ lɛ yɛ afi 1935, ni beni eye afii nɛɛhu lɛ, ebɔi nitsumɔ yɛ ŋmɔ ko mli. Adũɔ baa ko ni atsɛɔ lɛ koka yɛ ŋmɔ nɛɛ mli. Kɛjɛ egbekɛbiiashi tɔɔ lɛ, ekpeɔ koka baai lɛ eko koni no aha ená hewalɛ kɛtsu nitsumɔ ni wa waa. Sɛɛ mli lɛ, ebɔi dãatɔɔ kɛ zigaretii shɛremɔ. Beni Guillermo bɔi nibii ni Yehowa taoɔ yɛ edɛŋ lɛ ahe nikasemɔ lɛ, ekpá zigareti shɛremɔ, ni ekpá dãatɔɔ hu. Koka baai ni ebɔi kpemɔ kɛjɛ egbekɛbiiashi lɛ bafee nɔ ni wa fe fɛɛ kɛha lɛ akɛ ebaakpa. Etee nɔ esɔle shii abɔ, ni no ha enyɛ eye su nɛɛ nɔ. Beni ekpá ejeŋba gbonyo lɛ sɛɛ lɛ, eha abaptisi lɛ. Ewie akɛ: “Amrɔ nɛɛ minuɔ he akɛ mihe etsé, ni miyɛ miishɛɛ waa.”
5. Mɛni ji oshwelɛ?
5 Yehowa yɛ gbɔmɛi ahe miishɛɛ diɛŋtsɛ. Eesumɔ ni mɛi fɛɛ atsake amɛtsui. (2 Pet. 3:9) Nakai nɔŋŋ ji bɔ ni wɔ hu wɔshweɔ. Eba akɛ wɔtsui aaatsirɛ wɔ ni wɔyanɔ wɔfee bɔ fɛɛ bɔ ni wɔɔnyɛ kɛye wɔbua mɛi ni yɔɔ tsuijurɔ lɛ ní amɛbale Yehowa, ni amɛsumɔ lɛ taakɛ wɔ hu wɔfeɔ lɛ.