Kpokpaa nɔ Kpee He Gbɛjianɔtoo Hee

Te aaafee tɛŋŋ akɛ ekãa adamɔ mɛi ni teɔ shi waa kɛwoɔ anɔkwa jamɔ lɛ ashitee-kɛwoo lɛ naa? Ani wɔbaanyɛ wɔye hewalɛi ni nyɛɔ wɔ nɔ ní wɔku wɔsɛɛ kɛya jeŋ fɔŋ nɛɛ mli lɛ anɔ kunim? Abaaha sanebimɔi ni he hiaa nɛɛ ahetoo yɛ kpokpaa nɔ kpee ni abaafee yɛ afi 2009 sɔɔmɔ afi lɛ mli lɛ shishi. Kpee lɛ saneyitso ji ‘Yaa Nɔ Okɛ Ekpakpafeemɔ Aye Efɔŋ Nɔ Kunim.’ (Rom. 12:21) Nibii ni baaya nɔ lɛ ekomɛi nyiɛ sɛɛ nɛɛ.

Kpokpaa wulu nɔkwɛlɔ lɛ baaha wiemɔi ni saneyitsei ji “Awaje Wɔ Koni Wɔkɛ Ekpakpafeemɔ Aye Efɔŋ nɔ Kunim,” “Kwɛmɔ Ohe nɔ Jogbaŋŋ ni Okɛ Ohe Akafɔ̃ Ohe Nɔ̃ Fe Nine!,” “Etsɛŋ ni Efɔŋfeemɔ Fɛɛ Sɛɛ Baafo!” kɛ “Awo Wɔhemɔkɛyeli lɛ Mli Hewalɛ Koni Wɔye Je lɛ Nɔ Kunim.” Kpokpaa nɔkwɛlɔ lɛ baaha wiemɔi ni saneyitsei ji “Amrɔ Nɛɛ Ji Be ni Esa Akɛ Wɔhiɛ Ahi Wɔhe Nɔ!,” ni damɔ Romabii 13:11-13 lɛ nɔ lɛ, kɛ “Kaatɔ Biti Yɛ Haomɔ Beaŋ,” ni damɔ Abɛi 24:10 lɛ nɔ. Agbɛnɛ hu wɔmiikpá wiemɔ ni kpokpaa nɔkwɛlɔ lɛ baaha ni saneyitso ji “Kpokpaa lɛ Mli Hiamɔ Nii lɛ Ahesusumɔ,” lɛ gbɛ. Wiemɔ kroko hu ni baawo wɔ hewalɛ waa lɛ saneyitso ji “Ani Obaanyɛ ‘Ohiɛ Sɔɔmɔ Nɛɛ Mli’ Kɛtsɔ Gbɛgbamɔ Nitsumɔ lɛ Nɔ?” Wiemɔi ni ahaa kɛtsaraa nɔ lɛ amli klɛŋklɛŋ nɔ lɛ saneyitso ji “Nyɛdamɔa Shi Shiŋŋ Nyɛshia Satan Ŋaatsɔi Lɛ.” Wiemɔ nɛɛ baaye abua wɔ ni wɔle Abonsam ŋaatsɔɔi ni kɔɔ tsɔji ahe nilee ni etee hiɛ, hiɛtserɛjiemɔ, kɛ skulyaa lɛ he, ni ebaatsɔɔ wɔ gbɛ̀i anɔ ni wɔɔtsɔ wɔdamɔ shi shiŋŋ wɔshi ŋaatsɔɔi nɛɛ. Wiemɔ ni ahaa kɛtsaraa nɔ ni hiɛ saneyitso akɛ “Ná Hewalɛ ni Okɛ Te Shi Owo Satan yɛ Nɛkɛ Gbi Fɔŋ Nɛɛ Mli” lɛ baaye abua wɔ koni wɔle bɔni wɔɔfee wɔkɛ ŋaawoo ni yɔɔ Efesobii 6:10-18 lɛ atsu nii yɛ gbɛ̀i ni mɔɔ shi nɔ.

Tsakpaa diɛŋtsɛ yɛ mɔ ni kɛ efɔŋfeemɔ ba lɛ nɔ kunimyeli kɛ Maŋtsɛyeli shɛɛ sane lɛ shiɛmɔ teŋ. (Kpoj. 12:17) Ebɛ naakpɛɛ mɔ akɛ Satan bɔɔ mɔdɛŋ akɛ ebaatutua Yehowa Odasefoi! (Yes. 43:10, 12) Shi Abonsam nine baanyɛ shi kwraa, ejaakɛ wɔtswa wɔfai shi akɛ ‘wɔbaaya nɔ wɔkɛ ekpakpafeemɔ aye efɔŋ nɔ kunim.’ Too gbɛjianɔ ni oya kpokpaa nɔ kpee nɛɛ fãi ejwɛ lɛ fɛɛ koni oná he sɛɛ kɛmɔ shi.