Okɛ Ohe Aha Kɛye Obua O-Biblia Kaselɔi Lɛ
1. Mɛni he baahia ni wɔfee kɛye wɔbua Biblia kaselɔ ko?
1 Bɔni afee ni wɔye wɔbua Biblia kaselɔ ko ní ejɔ́ɔ ehe nɔ lɛ, babaoo he miihia fe Biblia lɛ pɛ kɛkɛ ni wɔkɛ lɛ baakase daa. Bɔfo Paulo kɛ wekukpãa ni kã ekɛ mɛi ni etsɔɔ amɛ nii lɛ teŋ lɛ to bɔ ni bii anyɛ hiɛɔ ebii dɔdɔɔdɔ lɛ he. Wɔ hu wɔyɛ he miishɛɛ akɛ wɔkɛ “wɔ diɛŋtsɛ wɔwala” baaha kɛye wɔbua wɔ-Biblia kaselɔi lɛ ni amɛya amɛhiɛ yɛ mumɔŋ.—1 Tes. 2:7-9.
2. Mɛni hewɔ esa akɛ wɔná mɛi ahe miishɛɛ lɛ, ni mɛɛ gbɛ nɔ wɔbaanyɛ wɔtsɔ wɔfee enɛ?
2 Ná Ehe Miishɛɛ: Beni Biblia kaselɔ ko kɛ nɔ ni ekaseɔ lɛ tsuɔ nii lɛ, ehenilee baatsirɛ lɛ ní ekɛ mɛi ni kɛ Biblia mli shishitoo mlai tsuuu nii lɛ akabɔ gbagbalii. (1 Pet. 4:4) Ekolɛ eweku baakpoo lɛ. (Mat. 10:34-36) Wɔbaanyɛ wɔye wɔbua kɛtsu shoofeemɔ ni baanyɛ aba lɛ he nii kɛtsɔ ehe miishɛɛ ní wɔɔná lɛ nɔ. Maŋsɛɛ sanekpakpa jajelɔ ko ni yɔɔ niiashikpamɔ lɛ wie akɛ: “Kaaye oyai ni oshi kɛ́ nyɛgbe nikasemɔ lɛ naa nɔŋŋ. Kɛ́ ebaahi lɛ, mɛɛ ni okɛ lɛ agba sane fioo.” Kwɛmɔ ni okɛ yelikɛbuamɔ ni sa ni he baahia o-Biblia kaselɔ lɛ aha lɛ. Ákɛ nɔkwɛmɔnɔ lɛ, ani obaanyɛ otswa lɛ tɛlifoŋ loo oyasara lɛ kɛ́ ehe miiye? Ani obaanyɛ okɛ o-Biblia kaselɔ lɛ ata shi kɛ́ atee kpee, ní oye obua lɛ kɛkwɛ ebii lɛ kɛ́ ebaahi ni ofee nakai?
3. Mɛɛ gbɛ nɔ wɔbaanyɛ wɔye wɔbua wɔnikaselɔ lɛ ní enine ashɛ hewalɛwoo nɔ kɛjɛ asafoŋbii lɛ adɛŋ?
3 Yelikɛbuamɔ ni Asafo lɛ Kɛhaa: Kɛ́ ooshiɛ yɛ he ni bɛŋkɛ o-Biblia kaselɔ lɛ shĩa lɛ, mɛni hewɔ otsɔɔɔ jɛmɛ ni okɛ mɛi ni fata ohe lɛ aŋa lɛ kuku? Kɛ́ ebaahi lɛ, fɔ̃ɔ shiɛlɔi srɔtoi ní asafoŋ onukpai fata he lɛ nine ni amɛfata ohe kɛ́ ooya okɛ lɛ ayakase nii. Agbɛnɛ hu lɛ, kɛ́ oto nikasemɔ ko shishi nɔŋŋ lɛ, wo o-Biblia kaselɔ lɛ hewalɛ ni eba kpee yɛ Maŋtsɛyeli Asa lɛ nɔ. Enɛ baaha ekɛ asafoŋbii ni baanyɛ abatsɔmɔ emumɔŋ wekumɛi lɛ aná naanyobɔɔ ni tswaa mɔ emaa shi mli ŋɔɔmɔ.—Mar. 10:29, 30; Heb. 10:24, 25.
4. Mɛɛ gbɛ nɔ wɔmɔdɛŋbɔɔ lɛ he baanyɛ aba sɛɛnamɔ?
4 Fɔlɔ ni bɔɔ mɔdɛŋ waa koni eye ebua ebii yɛ mumɔŋ lɛ náa miishɛɛ babaoo kɛ́ ebii lɛ jɔɔ amɛhe nɔ amɛha Yehowa ni amɛhi anɔkwale lɛ mli. (3 Yoh. 4) Wɔbaanyɛ wɔná miishɛɛ ni tamɔ nakai nɔŋŋ beni wɔkɛ wɔhe haa kɛyeɔ buaa wɔ-Biblia kaselɔi lɛ.