‘Abuɔ Nilee Bem yɛ Enitsumɔi lɛ Anaa’
1. Te mɛi komɛi buɔ wɔnitsumɔ lɛ amɛhaa tɛŋŋ?
1 Bei komɛi lɛ, ekolɛ wɔkɛ mɛi komɛi baakpe ni amɛboŋ wɔsane lɛ toi akɛni amɛnuuu wɔ shishi loo awie Yehowa Odasefoi ahe saji ni ejaaa atsɔɔ amɛ lɛ hewɔ. Ekolɛ adafitswaa saji ni ejaaa ni amɛnu lɛ ji nɔ ni eha amɛná susumɔi ni tamɔ nɛkɛ. Yɛ hei komɛi lɛ, abuɔ wɔ po akɛ “kuu ko ni he yɔɔ gbeyei.” Te esa akɛ wɔfee wɔnii tɛŋŋ kɛ awie wiemɔi ni tamɔ nɛkɛ ashi wɔ?
2. Mɛni baaye abua wɔ ni wɔnijiaŋ akaje wui kɛ́ awie ashi wɔ?
2 Ná Jwɛŋmɔ ni Ja: Akɛni mɛi komɛi nuuu Yesu kɛ Yehowa tsuji krokomɛi ni hi shi yɛ klɛŋklɛŋ afii 100 lɛ mli lɛ ashishi hewɔ lɛ, amɛwie amɛshi amɛ. (Bɔf. 28:22) Kɛlɛ, amɛhaaa wiemɔi ni awie ashi amɛ lɛ aha amɛhiɛ agbo ni amɛkpa amɛsɔɔmɔ nitsumɔ lɛ tsumɔ. Yesu kɛɛ akɛ: ‘Abuɔ nilee bem yɛ enitsumɔi lɛ anaa.’ (Mat. 11:18, 19, Ga Biblia hee) Etee nɔ ekɛ hiɛdɔɔ fee e-Tsɛ lɛ suɔmɔnaa nii, ejaakɛ ele akɛ mɛi ni taoɔ ale anɔkwale lɛ lɛɛlɛŋ lɛ baana sɛɛnamɔ ni yɔɔ sanekpakpa lɛ he. Kɛ́ wɔkai akɛ Nyɔŋmɔ diɛŋtsɛ Bi lɛ tsɔ shihilɛ ni tamɔ nɛkɛ mli lɛ, no haŋ wɔnijiaŋ aje wui.
3. Mɛni hewɔ esaaa akɛ adafitswaa saji ni ejaaa kɛ shiteekɛwoo ni wɔkɛkpeɔ lɛ feɔ wɔ naakpɛɛ lɛ?
3 Yesu tsɔɔ akɛ je lɛ baanyɛ̃ esɛɛnyiɛlɔi lɛ tamɔ bɔ ni enyɛ̃ lɛ lɛ. (Yoh. 15:18-20) No hewɔ lɛ, esaaa akɛ adafitswaa saji ni ejaaa kɛ shiteekɛwoo ni wɔkɛkpeɔ ŋmɛnɛ lɛ feɔ wɔ naakpɛɛ. Yɛ anɔkwale mli, esa akɛ wɔkpa gbɛ akɛ nibii ni tamɔ nɛkɛ lɛ amli baawo wu beni wɔbɛŋkɛɔ naagbee gbii lɛ anaagbee kwraa, ni agbɛnɛ hu Satan giriɔ waa ewoɔ wɔ lɛ. (Kpoj. 12:12) Wɔtsui baanyɛ anyɔ wɔmli, ejaakɛ nibii nɛɛ tsɔɔ akɛ etsɛŋ kwraa ni abaakpata Satan je lɛ hiɛ.
4. Kɛ́ wɔkɛ mɔ ko ni sumɔɔɔ akɛ ebo sanekpakpa lɛ toi kpe lɛ, te esa akɛ wɔfee wɔnii wɔha tɛŋŋ?
4 Jɛɛ Mlihilɛ Mli Owie: Be fɛɛ be ni wɔkɛ mɔ ko ni sumɔɔɔ akɛ ebo wɔsane lɛ toi baakpe lɛ, esa akɛ wɔjɛ mlihilɛ kɛ mlijɔlɛ mli wɔkɛ lɛ awie. (Abɛi 15:1; Kol. 4:5, 6) Kɛ́ shihilɛ lɛ baaŋmɛ gbɛ lɛ, wɔbaanyɛ wɔgbala mli wɔtsɔɔ shĩatsɛ ko ni miitao ele nɔ ko lɛɛlɛŋ lɛ akɛ nibii pii yɛ ni awie yɛ Yehowa Odasefoi ahe ni ejaaa loo wɔbaanyɛ wɔbi lɛ ni etsɔɔ wɔ nɔ hewɔ ni esumɔɔɔ ni eboɔ wɔ toi lɛ. Kɛ́ wɔjɛ mlijɔlɛ mli wɔkɛ shĩatsɛ ko wie lɛ, ebaanyɛ eha ebi wɔ nɔ ni enu yɛ Yehowa Odasefoi ahe lɛ he sane, ni no baaha ebo toi be kroko ni Odasefonyo ko baaya eŋɔɔ. Shi, kɛ́ wɔna akɛ shĩatsɛ lɛ mli efu waa lɛ, ebaahi akɛ wɔbaashi jɛmɛ kpoo. Wɔbaanyɛ wɔná nɔmimaa akɛ ekɔɔɔ he eko bɔ ni mɛi naa wɔ amɛhaa lɛ, Yehowa buɔ wɔsɔɔmɔ nitsumɔ lɛ akɛ ejara wa.—Yes. 52:7.