‘Niyenii yɛ Be ni Sa Nɔ’
1. Mɛɛ gbɛ nɔ gbi kome kpee krɛdɛɛ ni afee nyɛsɛɛ nɛɛ nɔŋŋ lɛ eye ebua bo kɛ mɛi krokomɛi?
1 Bei pii lɛ, kɛ́ wɔtee gbi kome kpee krɛdɛɛ wɔgbe naa lɛ, wɔkɛɔ akɛ, “Enɛ nɔŋŋ ji nɔ ni wɔtaoɔ!” Kpokpaa nɔkwɛlɔ ko bɔ amaniɛ akɛ beni amɛgbe gbi kome kpee ni amɛfee nyɛsɛɛ nɛɛ nɔŋŋ lɛ naa lɛ, mɛi ni yɔɔ kpokpaa lɛ nɔ lɛ ateŋ mɛi komɛi tsɔɔ akɛ amɛmiisumɔ ni amɛfee babaoo yɛ shiɛmɔ nitsumɔ lɛ mli. Nɔkwɛlɔ gbɛfalɔ ko kɛɛ akɛ, “Eye ebua wɔ koni wɔsusu be ni wɔyɔɔ mli nɛɛ he jogbaŋŋ ni wɔnyɛ wɔkpɛ wɔyiŋ jogbaŋŋ yɛ wɔshihilɛ mli.” Nɔkwɛlɔ gbɛfalɔ kroko hu kɛɛ akɛ, “Shiɛlɔi babaoo tsɔɔ akɛ enɛ ehɛle amɛshi koni amɛya nɔ amɛkɛ amɛjwɛŋmɔ ama nɔ ni he hiaa fe fɛɛ ni ji sɔɔmɔ nitsumɔ lɛ nɔ.” Mɛɛ gbɛ nɔ gbi kome kpee krɛdɛɛ lɛ eye ebua bo?
2. Mɛni he abaasusu yɛ gbi kome kpee krɛdɛɛ ni abaafee yɛ sɔɔmɔ afi ni baa lɛ mli?
2 Gbi kome kpee krɛdɛɛ ni abaafee yɛ sɔɔmɔ afi ni baa lɛ mli lɛ hu baafee nɔ pɛ ni wɔtaoɔ. Eyitso ji “Baa Yehowa Abo,” ni ajie kɛjɛ Lala 118:8, 9. Saji ni abaasusu he lɛ ekomɛi ji: “Bɔ ni Yehowa ji Mɔɔ ni Wa yɛ Haomɔ Beaŋ,” “Ye Obua Mɛi ni Amɛba Abo yɛ Yehowa Fiji Ashishi,” “Tsɔ Abobaahe Oha Mɛi ni Okɛkase Yehowa,” “Oblahii kɛ Oblayei, Nyɛkɛ Nyɛhiɛ Afɔ̃a Yehowa Nɔ!” kɛ “Wɔmumɔŋ Paradeiso—Gbɛjianɔ ni Yehowa Eto Kɛha Abobaa.”
3. Kɛ́ wɔtee kpee lɛ, te wɔɔfee tɛŋŋ wɔná he sɛɛ jogbaŋŋ?
3 Bɔ ni Wɔɔfee Wɔná He Sɛɛ: Kɛ́ atswa gbi ni akɛbaaya kpee lɛ he adafi lɛ, too gbɛjianɔ kpakpa koni onyɛ oya, ni ofɔ̃ o-Biblia mli nikaselɔi lɛ anine ni amɛfata ohe kɛya. Bɔni afee ni wɔkɛ ‘hiɛmiamɔ awo yibii’ lɛ, esa akɛ wɔkɛ nibii ni wɔbaanu lɛ ato. (Luka 8:15) No hewɔ lɛ, bo kpee lɛ shishi nifeemɔi lɛ atoi jogbaŋŋ ni oŋmala saji otii kɛ gbɛtsɔɔmɔi srɔtoi ni obaasumɔ ni okɛtsu nii yɛ oshihilɛ mli kɛ sɔɔmɔ nitsumɔ lɛ mli lɛ oshwie shi. Kɛ́ agbe kpee lɛ naa lɛ, ŋɔɔ be ni okɛ oweku lɛ asusu kpee lɛ shishi nifeemɔi lɛ ahe, ni agbɛnɛ hu nyɛsusua gbɛi pɔtɛɛ ni nyɛbaatsɔ nɔ nyɛkɛ saji ni nyɛyanu lɛ atsu nii lɛ ahe.
4. Mɛni hewɔ esa akɛ wɔkpa gbi kome kpee krɛdɛɛ ni kã wɔhiɛ ni wɔbaaya lɛ gbɛ?
4 Taakɛ niyenii ni ŋɔɔ ni haa mɔ hewalɛ ji lɛ, atsɔ hiɛ asusu nii ahe jogbaŋŋ ni ajɛ suɔmɔ mli ato gbi kome kpee krɛdɛɛ ni abaafee yɛ afi ni baa lɛ mli lɛ he gbɛjianɔ. Eba akɛ Yehowa baajɔɔ mɔdɛŋ ni obɔɔ ni oya kpee lɛ nɔ koni oyaná ‘niyenii’ ni asaa ato “yɛ be ni sa nɔ” ni akɛtswa Kristofoi shiɛlɔi ama shi lɛ he sɛɛ jogbaŋŋ.—Mat. 24:45.