‘Kaashe Gbeyei’
1. Mɛɛ nibii komɛi baanyɛ aha wɔshe gbeyei tamɔ Yeremia she gbeyei lɛ?
1 Beni akɛ nitsumɔ wo Yeremia dɛŋ akɛ gbalɔ lɛ, enu he akɛ enyɛŋ etsu. Shi Yehowa kɛɛ lɛ akɛ, “kaashe . . . gbeyei,” ni ekɛwo lɛ hewalɛ koni enyɛ egbe nitsumɔ ni akɛwo edɛŋ lɛ naa. (Yer. 1:6-10) Yɛ wɔgbii nɛɛ amli hu lɛ, ekolɛ hiɛgbele loo ekãa ni wɔbɛ lɛ haŋ wɔnyɛ wɔkɛ wɔhe awo sɔɔmɔ nitsumɔ lɛ mli jogbaŋŋ. Kɛ́ wɔsheɔ bɔ ni mɛi baafee amɛnii amɛha yɛ wɔshɛɛ sane lɛ he loo bɔ ni amɛbaana wɔ amɛha lɛ gbeyei lɛ, bei komɛi lɛ, no baanyɛ atsi wɔnaa ni wɔkanyɛ wɔye odase. Te wɔɔfee tɛŋŋ wɔye gbeyeishemɔi ni tamɔ nɛkɛ lɛ anɔ, ni mɛɛ jɔɔmɔi wɔbaaná?
2. Mɛɛ gbɛ nɔ wɔhe ni wɔɔsaa lɛ baaye abua wɔ ni wɔkashe gbeyei yɛ sɔɔmɔ nitsumɔ lɛ mli?
2 Tsɔ Hiɛ Osaa Ohe: Kɛ́ wɔsaa wɔhe jogbaŋŋ lɛ, ebaaye ebua wɔ ni wɔkashe gbeyei. Ákɛ nɔkwɛmɔnɔ lɛ, kɛ́ wɔtsɔ hiɛ wɔsaa wɔhe kɛha mɛi ni tsiɔ sanegbaa naa lɛ, wɔbaanyɛ wɔjie mɛi ni wieɔ wiemɔi komɛi koni amɛkɛtsi wɔ gbɛ ni wɔkaye amɛ odase lɛ naa. (Abɛi 15:28) Kɛ́ nyɛmiifee Weku Jamɔ lɛ, mɛni hewɔ nyɛŋɔɔɔ be lɛ eko kɛkaseee bɔ ni nyɛaafee nyɛsaa nyɛhe koni nyɛnyɛ nyɛkpee shihilɛi ni mli wawai ni nyɛkɛkpeɔ yɛ skul kɛ sɔɔmɔ nitsumɔ lɛ mli lɛ anaa lɛ?—1 Pet. 3:15.
3. Mɛɛ gbɛ nɔ wɔhiɛ ni wɔkɛaafɔ̃ Yehowa nɔ lɛ baaye abua wɔ ni wɔye gbeyeishemɔ nɔ?
3 Okɛ Ohiɛ Afɔ̃ Yehowa Nɔ: Kɛ́ wɔkɛ wɔhiɛ fɔ̃ Yehowa nɔ lɛ, wɔsheŋ gbeyei kɔkɔɔkɔ. Yehowa ewo shi akɛ ebaaye ebua wɔ. (Yes. 41:10-13) Mɛɛ hebuu ni nɔ bɛ po nɛ? Kɛfata he lɛ, Yesu wo wɔ shi akɛ, kɛji wɔkɛ shihilɛi ni wɔkpaaa gbɛ po kpe lɛ, Nyɔŋmɔ mumɔ krɔŋkrɔŋ lɛ baaye abua wɔ ni wɔye odase jogbaŋŋ. (Mar. 13:11) No hewɔ lɛ, kpa Yehowa fai daa ni eha bo emumɔ krɔŋkrɔŋ lɛ.—Luka 11:13.
4. Kɛ́ wɔtee nɔ wɔtsu sɔɔmɔ nitsumɔ lɛ yɛ naagbai ni wɔkɛkpeɔ lɛ fɛɛ sɛɛ lɛ, mɛɛ jɔɔmɔi wɔbaaná?
4 Jɔɔmɔi: Kɛ́ wɔtee nɔ wɔtsu sɔɔmɔ nitsumɔ lɛ yɛ naagbai ni wɔkɛkpeɔ lɛ fɛɛ sɛɛ lɛ, ewajeɔ wɔ koni wɔnyɛ wɔkpee shihilɛi ni mli wawai ni wɔkɛbaakpe wɔsɛɛ lɛ anaa. Wɔnáa ekãa—su ni tsɔɔ akɛ mumɔ krɔŋkrɔŋ lɛ yɛ mɔ ko nɔ. (Bɔf. 4:31) Kɛfata he lɛ, kɛ́ wɔha Yehowa ye ebua wɔ ni wɔye wɔ diɛŋtsɛ wɔgbeyeishemɔi anɔ lɛ, wɔwajeɔ wɔhemɔkɛyeli kɛ hekɛnɔfɔɔ ni wɔyɔɔ yɛ emli lɛ. (Yes. 33:2) Agbɛnɛ hu, wɔnáa miishɛɛ ni wɔtsui nyɔɔ wɔmli akɛni wɔle akɛ wɔmiifee nɔ ni sa wɔŋwɛi Tsɛ lɛ hiɛ lɛ hewɔ. (1 Pet. 4:13, 14) Belɛ, nyɛkahaa wɔshea gbeyei akɛ wɔkɛ ekãa baajaje Maŋtsɛyeli shɛɛ sane lɛ, ni wɔná hekɛnɔfɔɔ be fɛɛ be akɛ Yehowa baaye ebua wɔ!