Ani Obaanyɛ Okɛ Ohe Awo Shiɛmɔ Nitsumɔ lɛ Mli Daa Hɔgbaa?
1. Mɛni wɔbaanyɛ wɔkase kɛjɛ nɔ ni Paulo kɛ enanemɛi lɛ fee yɛ Filipi lɛ mli?
1 Yudafoi ni yɔɔ Filipi lɛ ateŋ mɛi babaoo jɔɔ amɛhe yɛ Hejɔɔmɔ Gbi lɛ nɔ. Paulo kɛ enanemɛi lɛ yasara maŋ nɛɛ yɛ amɛmaŋsɛɛ sanekpakpa shiɛmɔ he gbɛfãi lɛ ateŋ ekome mli yɛ Hejɔɔmɔ Gbi lɛ eko nɔ. Kulɛ amɛ hu amɛbaanyɛ amɛjɔɔ amɛhe nakai gbi lɛ ni amɛshiɛɛɛ, ni mɔ ko mɔ ko ewieŋ eshiŋ amɛ. Kɛlɛ, amɛle akɛ Yudafoi lɛ buaa amɛhe naa yɛ maŋ lɛ sɛɛ ni amɛsɔleɔ, no hewɔ lɛ, amɛŋɔ hegbɛ nɛɛ koni amɛkɛshiɛ amɛtsɔɔ amɛ. Kwɛ miishɛɛ ni Paulo kɛ enanemɛi lɛ ná beni Lidia bo amɛ toi ni abaptisi lɛ kɛ ewe lɛ fɛɛ lɛ! (Bɔf. 16:13-15) Akɛni mɛi babaoo jɔɔ amɛhe Hɔgbaa hewɔ lɛ, mɛni hewɔ oŋɔɔɔ gbi nɛɛ fã ko ni okɛshiɛ otsɔɔ amɛ?
2. Mɛɛ kai Yehowa webii lɛ eye nɔ koni amɛnyɛ amɛshiɛ daa Hɔgbaa ni agbaaa amɛnaa?
2 Bɔ ni Fee ni Hɔgbaa Shiɛmɔ Nyɛ Ehe Shi: Yɛ afi 1927 mli lɛ, awo Yehowa webii lɛ hewalɛ ni daa Hɔgbaa lɛ, amɛkɛ gbi lɛ fã ko aya shiɛmɔ. Etsɛɛɛ ni ate shi awo amɛ yɛ enɛ hewɔ. Awo mɛi babaoo tsuŋ yɛ United States akɛ amɛmiiku Hɔgbaa Hejɔɔmɔ Gbi lɛ he mlai amli, amɛhaaa mɛi atoiŋ ajɔ amɛ, ni amɛhɔɔ nibii be mli ni maŋ mla eŋmɛko amɛ gbɛ. Shi Yehowa webii lɛ anijiaŋ ejeee wui. Yɛ afi 1930 afii lɛ amli lɛ, amɛto nɔ ni atsɛɔ lɛ “divisional campaigns” (shiɛmɔ he tafãi yɛ kui amli) lɛ he gbɛjianɔ, ni tsɔɔ akɛ shiɛlɔi ni yɔɔ asafoi ni bɛŋkɛ amɛhe lɛ amli lɛ buaa amɛhe naa yɛ he ko kɛtsuɔ shikpɔŋkuku ko mli nii. Bei komɛi lɛ, maŋ nɔyelɔi lɛ mɔmɔɔ shiɛlɔi lɛ ekomɛi, shi shiɛlɔi lɛ ayi fa aahu akɛ nɔyelɔi lɛ nyɛɛɛ aha amɛkpa shiɛmɔ. Ani ohiɛ sɔɔ bɔ ni nyɛmimɛi ni yɔɔ United States lɛ kɛ amɛhe shã afɔle koni amɛnyɛ amɛshiɛ daa Hɔgbaa ni agbaaa amɛnaa lɛ lɛɛlɛŋ?
3. Mɛni haa Hɔgbaa bafeɔ gbi ni hi jogbaŋŋ kɛha shiɛmɔyaa lɛ?
3 Gbi ni Hi Jogbaŋŋ Kɛha Shiɛmɔ: Mɛi babaoo eyaaa nitsumɔ Hɔgbaa ni amɛhiɔ shĩa. Bei pii lɛ, amɛjɔɔ amɛhe yɛ gbi nɛɛ nɔ. Ekolɛ sɔlemɔyalɔi komɛi baasumɔ ni akɛ amɛ agba Nyɔŋmɔ he sane yɛ gbi nɛɛ nɔ. Kɛ́ wɔyaa asafoŋ kpee Hɔgbaa lɛ, no lɛ atadei ni wɔwoɔ kɛyaa lɛ sa jogbaŋŋ kɛha shiɛmɔyaa hu, no hewɔ lɛ mɛni hewɔ otooo gbɛjianɔ koni oya shiɛmɔ dani aje kpee lɛ shishi loo kɛ́ akpa? Kɛ́ oosumɔ lɛ, obaanyɛ okɛ niyenii fioo ko aya.
4. Mɛɛ miishɛɛ wɔbaanyɛ wɔná kɛ́ wɔkɛ gbi ni ji Hɔgbaa lɛ fã ko shiɛ?
4 Kɛ́ wɔkɛ gbi ni ji Hɔgbaa lɛ fã ko tee shiɛmɔ lɛ, wɔbaaná be lolo kɛjɔɔ wɔhe bɔ ni wɔtaoɔ. Ni beni wɔjɔɔ wɔhe lɛ, wɔtsui baatɔ akɛni wɔkɛ wɔhe ewo sɔɔmɔ krɔŋŋ mli lɛ hewɔ. (Abɛi 19:23, Ga Biblia hee) Ekolɛ wɔbaaná mɔ ko po tamɔ Lidia, ni no baaha wɔná miishɛɛ waa!