Su ni Fe Fɛɛ ni Esa akɛ Tsɔɔlɔ Kpakpa Aná
1. Mɛni ji su ni fe fɛɛ ni haa mɔ ko feɔ tsɔɔlɔ kpakpa?
1 Mɛni haa mɔ ko feɔ Biblia tsɔɔlɔ kpakpa? Ani je lɛŋ Wolokasemɔ? Niiashikpamɔ? Hesaa ni akɛfɔ́ mɔ? Yɛ anɔkwale mli lɛ, su ni haa mɔ feɔ tsɔɔlɔ kpakpa lɛ nɔŋŋ ji Mla lɛ nɔyeli, eji su ni kadiɔ Yesu kaselɔi lɛ, ni no ji Yehowa sui titrii ni nɔ bɛ lɛ ateŋ otu. (Yoh. 13:35; Gal. 5:14; 1 Yoh. 4:8) No ji suɔmɔ. Tsɔɔlɔi kpakpai jieɔ suɔmɔ kpo.
2. Mɛni hewɔ ehe hiaa ni wɔsumɔ mɛi lɛ?
2 Suɔmɔ Gbɔmɛi: Yesu, ni ji Tsɔɔlɔ Kpele lɛ jie suɔmɔ kpo etsɔɔ mɛi, ni no ha amɛbo lɛ toi. (Luka 5:12, 13; Yoh. 13:1; 15:13) Kɛ́ wɔsusuɔ mɛi ahe lɛ, wɔbaaŋɔ hegbɛ fɛɛ hegbɛ kɛye amɛ odase. Wɔhaŋ nibii tamɔ yiwaa kɛ wɔsane lɛ toi ni abooo lɛ atsĩ wɔnaa. Wɔbaajɛ wɔtsuiŋ wɔfó mɛi ni wɔshiɛɔ wɔtsɔɔ amɛ lɛ anɔ̃ mli, ni wɔbaaha wɔshiɛmɔ wiemɔi lɛ akɔ amɛhiamɔ nii ahe. Wɔbaasumɔ ni wɔná be wɔha Biblia mli nikaselɔ fɛɛ nikaselɔ beni wɔkɛ lɛ kaseɔ nii lɛ, kɛ agbɛnɛ hu beni wɔsaa wɔhe kɛhaa nikasemɔ fɛɛ nikasemɔ lɛ.
3. Mɛɛ gbɛ nɔ Biblia mli anɔkwalei lɛ ni wɔɔsumɔ lɛ baaye abua wɔ yɛ shiɛmɔ nitsumɔ lɛ mli?
3 Suɔmɔ Biblia mli Anɔkwalei Lɛ: Yesu sumɔ Biblia mli anɔkwalei lɛ hu ni ebu amɛ akɛ jwetrii. (Mat. 13:52) Kɛ́ wɔsumɔɔ anɔkwale lɛ, wɔkɛ miishɛɛ baawie he, ni no baanyɛ atsirɛ wɔtoibolɔi lɛ ni amɛná he miishɛɛ. Suɔmɔ ni tamɔ nɛkɛ lɛ baaye abua wɔ ni wɔkɛ wɔjwɛŋmɔ ama sane ni he hiaa ni wɔshiɛɔ lɛ nɔ moŋ fe nibii ni wɔnyɛɛɛ wɔfee lɛ anɔ, ni ekolɛ no haŋ wɔhe akpokpo tsɔ beni wɔshiɛɔ lɛ.
4. Te wɔɔfee tɛŋŋ wɔná suɔmɔ?
4 Ná Suɔmɔ: Te wɔɔfee tɛŋŋ wɔná suɔmɔ wɔha mɛi? Kɛtsɔ suɔmɔ ni Yehowa kɛ e-Bi lɛ jieɔ lɛ kpo, kɛ bɔ ni mumɔŋ hɔmɔ yeɔ mɛi ni yɔɔ wɔshikpɔŋkuku lɛ mli lɛ anɔ ni wɔɔjwɛŋ lɛ nɔ. (Mar. 6:34; 1 Yoh. 4:10, 11) Kɛ́ wɔfeɔ aŋkro nikasemɔ daa, ni wɔjwɛŋɔ nɔ ni wɔkaseɔ lɛ nɔ lɛ, ebaaha suɔmɔ ni wɔyɔɔ kɛha Biblia mli anɔkwalei lɛ mli awa waa. Suɔmɔ fata mumɔ lɛ yibii lɛ he. (Gal. 5:22) No hewɔ lɛ, wɔbaanyɛ wɔbi Yehowa ni eha wɔ mumɔ krɔŋkrɔŋ lɛ, ni wɔbi lɛ ni eye ebua wɔ ni wɔná suɔmɔ babaoo. (Luka 11:13; 1 Yoh. 5:14) Ekɔɔɔ he eko je lɛŋ wolokasemɔ ni wɔná, niiashikpamɔ ni wɔyɔɔ yɛ anɔkwale lɛ mli, loo hesai ni akɛfɔ́ wɔ lɛ, wɔbaanyɛ wɔfee Biblia tsɔɔlɔi kpakpai kɛtsɔ suɔmɔ kpo ni wɔɔjie lɛ nɔ.