Wolo Ni Jɛ Nɔyeli Kuu lɛ Dɛŋ
Suɔmɔ Nyɛmimɛi Yehowa Odasefoi:
Eŋɔɔ wɔnaa waa akɛ wɔɔŋma nyɛ Yehowa tsuji anɔkwafoi ni wɔsumɔɔ, ní yi fa fe akpekpei kpawo amrɔ nɛɛ lɛ wolo. Kɛ́ okɛ Yehowa jálɔ ko ni jɛ maŋ kroko nɔ kpe lɛ, amrɔ nɔŋŋ lɛ onuɔ he akɛ suɔmɔ wekukpãa krɛdɛɛ ko kã okɛ lɛ teŋ. (Yoh. 13:34, 35) Agbɛnɛ hu, ŋwanejee ko bɛ he akɛ obaana suɔmɔ nɛɛ faŋŋ kɛ́ okane afi 2012 Yearbook lɛ mli amaniɛbɔi ni taa mɔ tsuiŋ ni kɔɔ hemɔkɛyeli kɛ anɔkwayeli ni wɔnyɛmimɛi hii kɛ yei ni yɔɔ maji krokomɛi anɔ lɛ jieɔ lɛ kpo lɛ he lɛ.
Amaniɛbɔi ni wɔnine shɛɔ nɔ kɛjɛɔ je lɛŋ he fɛɛ he lɛ tsɔɔ akɛ nyɛteŋ mɛi babaoo kɛ hiɛdɔɔ miifee nyɛ-Weku Jamɔ lɛ. Nyɛteŋ mɛi ni yɔɔ gbekɛbii bibii lɛ hu kɛ gbɛi srɔtoi ni yɔɔ miishɛɛ miitsu nii koni no aha nyɛbii lɛ ajwɛŋmɔ ahi nikasemɔ lɛ nɔ be fɛɛ be. (Efe. 6:4) Gbɛjianɔtoo nɛɛ ni gbalashihilɛ mli hefatalɔi kɛtsuɔ nii lɛ miiha amɛgbalashihilɛ lɛ miisɔ waa. (Efe. 5:28-33) Eji anɔkwale akɛ, aŋkroaŋkroi kɛ wekui fɛɛ miiná gbɛjianɔtoo ni akɛkaseɔ Nyɔŋmɔ Wiemɔ lɛ jogbaŋŋ nɛɛ he sɛɛ waa diɛŋtsɛ.—Yosh. 1:8, 9.
Wɔnuɔ he waa wɔhaa nyɛ mɛi fɛɛ ni adebɔɔ naa osharai kpata nyɛnibii ahiɛ nyɛsɛɛ nɛɛ. Wɔmiiŋɔ hegbɛ nɛɛ koni wɔkɛda mɛi fɛɛ ni kɛ amɛhe ha oya nɔŋŋ kɛyaye amɛbua kɛfɛne mɛi nɛɛ yɛ fimɔ be nɛɛ mli lɛ ashi waa. (Bɔf. 11:28-30; Gal. 6:9, 10) Kɛfata he lɛ, yɛ asafo fɛɛ asafo mli lɛ, nyɛteŋ mɛi komɛi yɔse heloonaa nibii ni he hiaa wɔnyɛmimɛi lɛ, ni nyɛŋɔ hegbɛ lɛ kɛye nyɛbua amɛ. Taakɛ Dorka ni hi shi yɛ blema lɛ fee lɛ, nyɛyimɔ obɔbɔ kɛ ‘nitsumɔi kpakpai kɛ ejuji ni nyɛfeɔ’ lɛ. (Bɔf. 9:36) Nyɛnáa nɔmimaa akɛ Yehowa yɔseɔ enɛ, ni ákɛ eeeto nyɛ najiaŋ pɛpɛɛpɛ.—Mat. 6:3, 4.
Yɛ maji komɛi anɔ lɛ, mɛi tsɔmɔɔ mlai ahiɛ koni ‘amɛkɛye nyɛ sane fɔŋ.’ (Lala 94:20-22) Akɛni nyɛle akɛ Yesu gba akɛ yiwaa ni tamɔ nɛkɛ baaba hewɔ lɛ, nyɛkɛ ekãa miaa nyɛhiɛ kɛdamɔɔ naa, ni nyɛkwɛɔ Yehowa gbɛ kɛha hebuu. (Yoh. 15:19, 20) Nyɛmimɛi ni wɔsumɔɔ nyɛ, nyɛnáa nɔmimaa akɛ wɔtsĩɔ nyɛtã daa yɛ wɔsɔlemɔi amli koni nyɛya nɔ “nyɛná hetoo nyɛha mɔ fɛɛ mɔ ni biɔ nyɛ hiɛnɔkamɔ ní yɔɔ nyɛmli lɛ shishi lɛ.”—1 Pet. 3:13-15.
Wɔmiiha nyɛ mɛi akpekpei abɔ ni yaa nɔ nyɛhiɛɔ jeŋba ni he tse mli be fɛɛ be yɛ mɔdɛŋ ni Satan bɔɔ daa akɛ ebaatsɔ gbɛi ni yɔɔ nigii nɔ ewo jeŋba sha he hewalɛ lɛ fɛɛ sɛɛ lɛ aekoo. Yɛ be mli ni mɛi babaoo ajeŋba yaa nɔ ekpɔtɔɔ kwraa yɛ je lɛŋ lɛ, nyɛ lɛ ‘nyɛhe miiwa yɛ Nuŋtsɔ lɛ kɛ ehewalɛ nyɛmɔ lɛ mli.’ (Efe. 6:10) ‘Nyɛwo Nyɔŋmɔ tawuu nii lɛ fɛɛ,’ ni no eha nyɛnyɛ “abonsam ŋaatsɔi lɛ anaa nyɛdamɔ.” (Efe. 6:11, 12) Nyɛkadia akɛ, Yehowa kɛ nɔkwɛmɔnɔ kpakpa ni nyɛfeɔ lɛ miiha Satan, mɔ ni bɔɔ lɛ ahora lɛ hetoo ni ja jogbaŋŋ!—Abɛi 27:11.
Wɔná miishɛɛ akɛ mɛi 19,374,737 ba wɔ-Nuŋtsɔ lɛ gbele lɛ Kaimɔ lɛ yɛ afi 2011. Nibii ni ha aná yibɔ kpele nɛɛ ateŋ ekome ji bɔ ni mɛi babaoo here ninefɔ̃ɔ kɛha gbɛgbalɔi awamɔ nitsumɔ lɛ nɔ yɛ nyɛsɛɛ afi lɛ April nyɔɔŋ lɛ nɔ lɛ. Enɛ ha mɛi akpekpei abɔ ni yɔɔ shikpɔŋ lɛ nɔ lɛ nu gbee kome ní Yehowa Odasefoi anɔkwafoi lɛ kɛjieɔ Yehowa yi lɛ! (Rom. 10:18) Kɛji ofata mɛi 2,657,377 ni kɛ amɛhe wo gbɛgbalɔi awamɔ nitsumɔ lɛ mli nakai nyɔɔŋ lɛ nɔ lɛ ahe, loo obɔ mɔdɛŋ olɛɛ osɔɔmɔ lɛ mli yɛ gbɛ ko nɔ jio lɛ, bɔ ni nyɛ fɛɛ nyɛkɛ hekɛafɔleshaa mumɔ kɛ hiɛdɔɔ tsu nitsumɔ lɛ ha wɔmii shɛ wɔhe naakpa.—Lala 110:3; Kol. 3:23.
Nyɛsɛɛ afi lɛ, mɛi 263,131 ha abaptisi amɛ kɛfee amɛhe nɔ ni amɛjɔɔ amɛha Yehowa lɛ he okadi. Wɔmiida Yehowa shi waa yɛ enɛ hewɔ, ni wɔmiida nyɛ fɛɛ hu shi akɛ nyɛfataa wɔhe kɛfɔ̃ɔ mɛi krokomɛi hu nine akɛ: “Ba! Ni mɔ ni nuɔ lɛ, ha ni ekɛɛ: Ba! Ni mɔ ni kumai yeɔ lɛ lɛ, ha ni eba, ni mɔ ni sumɔɔ lɛ, ha ni ebayɛ wala nu lɛ yaka.” (Kpoj. 22:17) Amrɔ nɛɛ ni wɔsusu Nyɔŋmɔ Maŋtsɛyeli ni ato shishi lɛ he nibii srɔtoi ahe yɛ afi 2011 kpokpaa wulu nɔ kpeei lɛ ashishi lɛ, wɔkɛ nɔmimaa diɛŋtsɛ miikɛɛ akɛ, “Nyɔŋmɔ Maŋtsɛyeli lɛ Aba!” Akɛni Yesu shiwoo akɛ, “Miiba oyá” lɛ woɔ wɔ hewalɛ hewɔ lɛ, wɔ hu wɔjɛɔ wɔtsui muu fɛɛ mli wɔkɛɔ taakɛ bɔfo Yohane kɛɛ lɛ, akɛ: “Amen. Hɛɛ, ba, Nuŋtsɔ Yesu!”—Kpoj. 22:20.
Be mli ni nyɛkwɛɔ nakai nifeemɔ ni yɔɔ miishɛɛ lɛ gbɛ lɛ, nyɛfainɛ nyɛnáa nɔmimaa akɛ wɔsumɔɔ nyɛteŋ mɔ fɛɛ mɔ waa diɛŋtsɛ, ejaakɛ nyɛmiiha aana akɛ nyɛsumɔɔ Yehowa yɛ “nitsumɔ kɛ anɔkwale mli”!—1 Yoh. 3:18.
Nyɛnyɛmimɛi,
Yehowa Odasefoi a-Nɔyeli Kuu