Mɛni Tsirɛɔ Wɔ ní Wɔshiɛ?
1. Mɛɛ tsakpaa yɔɔ suɔmɔ kɛ wɔshiɛmɔ nitsumɔ lɛ teŋ?
1 Nyɔŋmɔ Maŋtsɛyeli lɛ he sanekpakpa ni wɔshiɛɔ lɛ ji nitsumɔ ni he hiaa fe fɛɛ ni wɔbaanyɛ wɔtsu ŋmɛnɛ. Yɛ anɔkwale mli lɛ, wɔkɛ nitsumɔ nɛɛ tsɔɔ akɛ wɔmiifee toi wɔmiiha kitãi wuji enyɔ ni ji asumɔ Yehowa ni asumɔ naanyo hu lɛ. (Mar. 12:29-31) Suɔmɔ ji hewalɛ ko ni baanyɛ atsirɛ wɔ koni wɔfee shiɛlɔi ni yɔɔ ekãa.—1 Yoh. 5:3.
2. Mɛɛ gbɛ nɔ wɔshiɛmɔ lɛ haa anaa akɛ wɔsumɔɔ Yehowa?
2 Suɔmɔ kɛha Yehowa: Suɔmɔ ni wɔyɔɔ kɛha Yehowa, ni ji wɔ-Naanyo ni fe fɛɛ lɛ tsirɛɔ wɔ ni wɔfãa ehe. Aaafee afii 6,000 nɛ ni Satan gbe ehe guɔ. (2 Kor. 4:3, 4) No hewɔ lɛ, mɛi heɔ amɛyeɔ akɛ Nyɔŋmɔ piŋɔ eshafeelɔi yɛ hɛl la mli, ni akɛ eji Triniti ko ni he yɔɔ gbeyei, ni esusuuu adesai ahe. Mɛi babaoo emu sane naa po akɛ ebɛ shihilɛ mli. Kwɛ bɔ ni wɔshweɔ ni mɛi ale anɔkwale ni kɔɔ wɔŋwɛi Tsɛ lɛ he! Mɔdɛŋ ni wɔbɔɔ ni wɔye Nyɔŋmɔ he odase lɛ haa enáa miishɛɛ babaoo ni enɛ haoɔ Satan.—Abɛi 27:11; Heb. 13:15, 16.
3. Mɛɛ gbɛ nɔ wɔshiɛmɔ nitsumɔ lɛ haa wɔjieɔ suɔmɔ kpo wɔtsɔɔ naanyo?
3 Suɔmɔ kɛha Naanyo: Be fɛɛ be ni wɔbaaye mɔ ko odase lɛ, wɔkɛtsɔɔ akɛ wɔsumɔɔ mɔ lɛ. Adesai miishwe waa ni amɛnu sanekpakpa lɛ yɛ bei ni jaraa nɛɛ amli. Mɛi babaoo tamɔ Ninivebii ni hi shi yɛ Yona beaŋ ni “leee amɛninejurɔ kɛ amɛbɛku” lɛ. (Yona 4:11) Wɔshiɛmɔ lɛ tsɔɔ mɛi bɔ ni ahiɛɔ shi jogbaŋŋ kɛ bɔ ni afeɔ anaa miishɛɛ yɛ shihilɛ mli. (Yes. 48:17-19) Ehaa amɛnáa hiɛnɔkamɔ. (Rom. 15:4) Kɛ́ amɛbo toi ni amɛkɛ nɔ ni amɛkaseɔ lɛ tsu nii lɛ ‘abaahere amɛyiwala.’—Rom. 10:13, 14.
4. Yehowa hiɛ kpaŋ mɛni nɔ kɔkɔɔkɔ?
4 Bii kpakpai ejieee suɔmɔ kpo amɛtsɔɔɔ amɛfɔlɔi yɛ gbii pɔtɛi komɛi pɛ amli. Amɛbɔɔ mɔdɛŋ ni amɛsumɔ mɛi be fɛɛ be. Nakai nɔŋŋ suɔmɔ ni mli wa ni wɔyɔɔ kɛha Nyɔŋmɔ kɛ naanyo lɛ tsirɛɔ wɔ kɛŋɔɔ hegbɛ kɛyeɔ odase be fɛɛ be, jeee yɛ be ni wɔnyiɛ shiɛmɔ nɔ pɛ. Wɔbaashiɛ ni wɔfɔ̃ɔɔ. (Bɔf. 5:42) Yehowa hiɛ kpaŋ nakai suɔmɔ lɛ nɔ kɔkɔɔkɔ.—Heb. 6:10.