Wɔtswa Maŋtsɛyeli lɛ He Adafi Afii 100!
1. Aaafee afii 100 ni eho nɛ lɛ, mɛni awo Yehowa webii lɛ hewalɛ ni amɛfee?
1 “Naa, Maŋtsɛ lɛ miiye nɔ! Nyɛji enajiaŋdamɔlɔi sanejajelɔi. No hewɔ lɛ, nyɛtswaa, nyɛtswaa, nyɛtswaa Maŋtsɛ lɛ kɛ emaŋtsɛyeli lɛ he adafi.” Wiemɔi ni kanyaa mɔ nɛɛ ni Nyɛminuu Rutherford wie aaafee afii 100 ni eho nɛ lɛ wo Yehowa webii lɛ hewalɛ ni amɛshiɛ Maŋtsɛyeli lɛ he sane lɛ yɛ jeŋ fɛɛ. Ni nakai pɛpɛɛpɛ wɔfee! Taakɛ mra be mli Kristofoi lɛ fee lɛ, wɔshiɛ Maŋtsɛyeli lɛ he sane kpakpa lɛ wɔtsɔɔ “bɔɔ nii fɛɛ ní yɔɔ ŋwɛi shishi lɛ.” (Kol. 1:23) Mɛni wɔnyɛ wɔfee kɛtswa Nyɔŋmɔ Maŋtsɛyeli lɛ he adafi yɛ afii 100 ni eho nɛɛ mli? Amrɔ nɛɛ ni eshwɛ fioo ni Maŋtsɛyeli lɛ baaná afii 100 pɛpɛɛpɛ lɛ, mɛɛ gbɛ nɔ wɔbaanyɛ wɔya nɔ wɔtswa he adafi?
2. Mɛɛ gbɛ nɔ wɔwoji lɛ ewie Nyɔŋmɔ Maŋtsɛyeli lɛ he?
2 Nɔ ni Wɔnyɛ Wɔfee yɛ Be ni Eho lɛ Mli: Wɔkɛ afii nyɔŋmai abɔ ewie Nyɔŋmɔ Maŋtsɛyeli lɛ he yɛ wɔwoji lɛ amli. Kɛjɛ afi 1939 kɛbaa nɛɛ, saneyitso ni tere wolo titri ni wɔkalaa lɛ ji: Buu-Mɔɔ Eetswa Yehowa Maŋtsɛyeli He Adafi. Wolo tɛtrɛɛ nɛɛ fɔɔ Maŋtsɛyeli lɛ kɛ nɔ ni ebaafee lɛ he wiemɔ. Awake! wolo tɛtrɛɛ lɛ hu wieɔ Nyɔŋmɔ Maŋtsɛyeli lɛ he akɛ no pɛ ji nɔ ni baatsu adesai anaagbai ahe nii. Belɛ, kwɛ bɔ ni esa jogbaŋŋ akɛ woji tɛtrɛbii enyɔ nɛɛ ji woji ni atsɔɔ shishi kɛtee wiemɔi babaoo mli ni aja fe fɛɛ yɛ je lɛ mli!—Kpoj. 14:6.
3. Mɛɛ gbɛi anɔ wɔtsɔ wɔtswa Maŋtsɛyeli lɛ he adafi?
3 Yehowa webii lɛ etsɔ gbɛi srɔtoi anɔ amɛtswa Maŋtsɛyeli lɛ he adafi. Yɛ be ni eho lɛ mli lɛ, wɔtsɔ adafitswaa tsɔji, redio nɔ nifeemɔi, kɛ gramafon nɔ wɔshiɛ. Gbɛi ni wɔtsɔ nɔ wɔshiɛ nɛɛ ye ebua wɔ ni wɔnyɛ wɔjaje sane kpakpa lɛ wɔtsɔɔ mɛi babaoo be ni Maŋtsɛyeli shiɛlɔi lɛ ayi faaa tamɔ bɔ ni eji ŋmɛnɛ lɛ. (Lala 19:5) Yɛ nyɛsɛɛ afii nɛɛ amli lɛ, wɔtsɔ saji ni wɔkɛwo jw.org lɛ nɔ lɛ nɔ wɔhã mɛi akpekpei abɔ ele Maŋtsɛyeli lɛ he sane—ni mɛi ni yɔɔ maji ni atsi wɔnitsumɔ lɛ naa yɛ jɛmɛ lɛ anɔ lɛ hu fata he.
4. Mɛɛ gbɛi krɛdɛi anɔ wɔtsɔ wɔye odase?
4 Yehowa webii lɛ etsɔ gbɛi krɛdɛi anɔ amɛshiɛ Maŋtsɛyeli lɛ he sane lɛ. Akɛ nɔkwɛmɔnɔ lɛ, yɛ afi 1994 kɛmiimɔ afi 1996 mli lɛ, wɔto gbɛjianɔ kɛhã odaseyeli yɛ shwɛmɔhei, tsɔji amaamɔhei, kɛ nitsumɔhei kɛfata shĩa fɛɛ shĩa shiɛmɔ nitsumɔ lɛ he. Nyɛsɛɛ nɛɛ, wɔto maŋtiasei wuji amli odaseyeli krɛdɛɛ he gbɛjianɔ yɛ jeŋ fɛɛ. Kɛfata he lɛ, asafoi babaoo eto maŋ odaseyeli he gbɛjianɔ yɛ amɛsafoi lɛ ashikpɔŋkukuji lɛ amli, kɛtsɔ shwiilii kɛ okpɔlɔi ni amɛtoɔ woji yɛ nɔ kɛmamɔɔ hei ni mɛi babaoo fɔɔ tsɔmɔ lɛ nɔ. Fɛɛ sɛɛ lɛ, shĩa fɛɛ shĩa shiɛmɔ nitsumɔ lɛ kã he eji gbɛ titri ni wɔtsɔɔ nɔ wɔshiɛɔ Maŋtsɛyeli lɛ he sane lɛ.—Bɔf. 20:20.
5. Yɛ sɔɔmɔ afi hee lɛ mli lɛ, mɛɛ hegbɛi wɔteŋ mɛi pii baaná?
5 Nɔ ni Wɔbaafee Wɔsɛɛ: Sɔɔmɔ afi lɛ baaje shishi yɛ September mli, ni mɛi babaoo kɛ amɛhe baawo gbɛgbamɔ nitsumɔ lɛ mli. Ani bo hu obaanyɛ ofee nakai? Kɛ́ onyɛŋ lɛ, ani obaanyɛ okɛ ohe awo gbɛgbalɔi awamɔ nitsumɔ lɛ mli yɛ be kɛ beaŋ? Kɛ́ obaanyɛ otsu gbɛgbamɔ nitsumɔ lɛ jio, onyɛŋ otsu jio lɛ, bɔ fɛɛ bɔ ni fee lɛ, Yehowa baajɔɔ bo yɛ afɔle fɛɛ afɔle ni obaashã koni onyɛ okɛ bei pii atswa Maŋtsɛyeli lɛ he adafi lɛ hewɔ.—Mal. 3:10.
6. Mɛni hewɔ October 2014 baafee nyɔɔŋ krɛdɛɛ lɛ?
6 October 2014 baafee afii 100 pɛpɛɛpɛ ni ato Maŋtsɛyeli lɛ shishi. Enɛ hewɔ lɛ, Buu-Mɔɔ ni ji maŋbii anɔ ni baaje kpo yɛ nakai nyɔɔŋ lɛ nɔ lɛ baawie Nyɔŋmɔ Maŋtsɛyeli lɛ he titri. Bɔɔ mɔdɛŋ ni oja wolo tɛtrɛɛ nɛɛ babaoo bɔ ni obaanyɛ. Be ni wɔkpaa nibii ni baaba wɔsɛɛ lɛ gbɛ lɛ, eba akɛ wɔteŋ mɔ fɛɛ mɔ baaya nɔ ‘ejaje Nyɔŋmɔ Maŋtsɛyeli lɛ he sanekpakpa lɛ’ etsɔɔ mɛi fɛɛ ni baabo toi lɛ.—Bɔf. 8:12.