Bɔ ni Wɔɔfee Wɔshɛ Mɛi ni Wɔtsɔɔ Amɛ Nii lɛ Atsui He
1. Kɛ́ Yesu miitsɔɔ mɛi anii lɛ, te amɛnuɔ he amɛhãa tɛŋŋ?
1 Yesu Kristo shɛ etoibolɔi lɛ atsui he. Be ko lɛ, egbála Ŋmalɛi lɛ amli faŋŋ etsɔɔ ekaselɔi lɛ ni amɛtsuii ahe ‘dɔ la.’ (Luka 24:32) Esa akɛ mɛi ni wɔtsɔɔ amɛ nii lɛ ajɛ amɛtsui mli amɛbo Nyɔŋmɔ toi. No hewɔ lɛ, te wɔɔfee tɛŋŋ wɔtsɔɔ amɛ nii bɔ ni baakanya amɛ ni amɛ diɛŋtsɛ amɛfee tsakemɔi yɛ amɛshihilɛ mli?—Rom. 6:17.
2. Kɛ́ wɔkɛ hiɛshikamɔ kɛ sɛɛyoomɔ tsu nii lɛ, mɛɛ gbɛ nɔ ebaahã wɔshɛ mɛi atsui he?
2 Okɛ Hiɛshikamɔ kɛ Sɛɛyoomɔ Atsu Nii: Yɛ mɛi pii agbɛfaŋ lɛ, kɛɛmɔ ni wɔɔkɛɛ amɛ nɔ ni hi kɛ nɔ ni ehiii lɛ pɛ kɛkɛ kanyaŋ amɛ koni amɛtsake. Yɛ anɔkwale mli lɛ, kɛ́ wɔkane ŋmalɛi babaoo wɔtsɔɔ amɛ koni wɔkɛhã amɛna akɛ amɛjamɔŋ tsɔɔmɔi lɛ ejaaa lɛ, no moŋ baahã amɛkpa nii lɛ kasemɔ. Ja wɔyoo yiŋtoi ahewɔ ni mɔ ko heɔ nɔ ko eyeɔ loo efeɔ enii yɛ gbɛ pɔtɛɛ ko nɔ dani wɔbaanyɛ wɔkanya lɛ ni ejɛ etsui mli ekɛ nɔ ni wɔtsɔɔ lɛ lɛ atsu nii. Esa akɛ wɔkɛ hiɛshikamɔ atsu nii ni wɔbi lɛ saji ni sa jogbaŋŋ ní baahã ejɛ etsui mli etsɔɔ ejwɛŋmɔ yɛ saji ahe. (Abɛi 20:5) No sɛɛ lɛ, esa akɛ wɔhala Nyɔŋmɔ Wiemɔ lɛ mli saji ni baanyɛ ashɛ etsui he. No hewɔ lɛ, esa akɛ wɔfee nibii ni baahã mɔ lɛ ana akɛ wɔsusuɔ ehe, ní agbɛnɛ hu wɔto wɔtsui shi. (Abɛi 25:15) Kaimɔ akɛ esoro bɔ ni mɔ fɛɛ mɔ yaa hiɛ yɛ mumɔŋ ehãa. Too otsui shi ohã amɛ koni Yehowa mumɔ krɔŋkrɔŋ lɛ aná amɛsusumɔ kɛ amɛnifeemɔi anɔ hewalɛ.—Mar. 4:26-29.
3. Te wɔɔfee tɛŋŋ wɔye wɔbua mɛi ni wɔtsɔɔ amɛ nii lɛ koni amɛná sui kpakpai?
3 Ye Obua Amɛ ni Amɛná Sui Kpakpai: Biblia mli saji ni tsɔɔ akɛ Yehowa feɔ ejurɔ ni eyɛ suɔmɔ lɛ baanyɛ aye abua mɛi ni wɔtsɔɔ amɛ nii lɛ koni amɛná sui kpakpai. Wɔbaanyɛ wɔkɛ ŋmalɛi tamɔ Lala 139:1-4 lɛ loo Luka 12:6, 7 lɛ atsu nii kɛtsɔɔ amɛ bɔ ni Nyɔŋmɔ susuɔ wɔteŋ mɔ fɛɛ mɔ he. Kɛ́ amɛhiɛ sɔ Yehowa duromɔ lɛ lɛɛlɛŋ lɛ, suɔmɔ ni amɛyɔɔ kɛhã lɛ lɛ mli baaya nɔ awa ni amɛbaajá lɛ jogbaŋŋ. (Rom. 5:6-8; 1 Yoh. 4:19) Kɛfata he lɛ, kɛ́ amɛkase akɛ bɔ ni amɛbaa amɛjeŋ amɛhãa lɛ saa Yehowa he lɛ, ebaanyɛ ekanya amɛ koni amɛfee nibii ni esumɔɔ ni woɔ ehiɛnyam.—Lala 78:40, 41; Abɛi 23:15.
4. Kɛ́ wɔmiitsɔɔ mɔ ko nii yɛ shiɛmɔ nitsumɔ lɛ mli lɛ, mɛɛ gbɛ nɔ wɔɔtsɔ wɔjie bulɛ kpo wɔtsɔɔ hegbɛ ni eyɔɔ akɛ lɛ diɛŋtsɛ ehala nɔ ni esumɔɔ lɛ?
4 Yehowa enyɛɛɛ mɔ ko nɔ akɛ eye ekitai lɛ anɔ. Moŋ lɛ, ehãa mɛi naa nɔ hewɔ ni nilee yɔɔ mli akɛ amɛye ekitai lɛ anɔ, koni amɛ diɛŋtsɛ amɛmu saji anaa amɛhã amɛhe. (Yes. 48:17, 18) Esa akɛ wɔ hu wɔtsɔɔ mɛi anii yɛ gbɛ ni baahã amɛ diɛŋtsɛ amɛmu saji anaa amɛhã amɛhe lɛ nɔ, ni wɔkɛkase Yehowa. Kɛ́ wɔye wɔbua mɛi ni amɛ diɛŋtsɛ amɛna akɛ esa akɛ amɛfee tsakemɔi yɛ amɛshihilɛ mli lɛ, ewoɔ yibii waa. (Rom. 12:2) Kɛfata he lɛ, ehãa wekukpãa ni yɔɔ amɛ kɛ Yehowa, “mɔ ni kaa tsuii ekwɛɔ” lɛ teŋ lɛ mli waa jogbaŋŋ fe tsutsu lɛ.—Abɛi 17:3.