Te Ohemɔkɛyeli Yɛ Yehowa Shiwoi Amli Lɛ Mli Wa Hã Tɛŋŋ?

Yoshua kɛ Solomon fɛɛ wie akɛ, Yehowa shiwoi lɛ mli ekome folo po ekaaa shi. (Yos 23:14; 1Ma 8:56) Nibii ni mɛi enyɔ ni amuɔ afɔ̃ɔ amɛnɔ nɛɛ na ni Yehowa fee ni amɛwie he lɛ hãa wɔnáa nɔ ko ni wɔbaanyɛ wɔdamɔ nɔ wɔtswa wɔhemɔkɛyeli lɛ wɔma shi.​—2Ko 13:1; Tit 1:2.

Mɛɛ gbɛ nɔ Yehowa hã eshiwoi ba mli yɛ Yoshua beiaŋ? Okɛ oweku lɛ akwɛ vidio ni ji, “Ekome Folo Ekaaa Shi” lɛ. No sɛɛ lɛ, hã sanebimɔi ni nyiɛ sɛɛ lɛ ahetoo: (1) Te obaafee tɛŋŋ okase Rahab hemɔkɛyeli lɛ? (Heb 11:31; Yak 2:24-26) (2) Mɛɛ gbɛ nɔ Akan nɔkwɛmɔnɔ lɛ tsɔɔ akɛ, kɛ́ oje gbɛ ogbo Nyɔŋmɔ nɔ toi lɛ, obaayaje haomɔ mli? (3) Eyɛ mli akɛ Gibeon hii lɛ ji tabilɔi moŋ, shi mɛni hewɔ amɛlaka Yoshua ni amɛkɛ Israelbii lɛ fee toiŋjɔlɛ kpaŋmɔ lɛ? (4) Mɛɛ gbɛ nɔ Yehowa wiemɔ ba mli be ni Amorbii lɛ amaŋtsɛmɛi enumɔ lɛ ba koni amɛkɛ Israel abawu lɛ? (Yos 10:5-14) (5) Mɛɛ gbɛ Yehowa eye ebua bo yɛ Nyɔŋmɔ Maŋtsɛyeli lɛ kɛ ejalɛ lɛ ni okɛyeɔ klɛŋklɛŋ gbɛhe yɛ oshihilɛ mli lɛ hewɔ?​—Mat 6:33.

Kɛ́ wɔsusu nibii fɛɛ ni Yehowa efee, nibii ni efeɔ bianɛ, kɛ nibii ni ebaafee wɔsɛɛ lɛ ahe lɛ, hemɔkɛyeli ni wɔyɔɔ yɛ eshiwoi amli lɛ mli baawa.​—Ro 8:31, 32.