HII SHI AKƐ KRISTOFONYO
Bɔ Ni Ooofee Otsɔ Mɔ Ni Kaseɔ Ŋmalɛi Lɛ Jogbaŋŋ
Ani obaasumɔ ni onyɛ oye anɔkwa tamɔ Daniel kɛ́ aaka bo? Daniel kɛ hiɛdɔɔ kase Nyɔŋmɔ Wiemɔ lɛ, ni gbalɛi babaoo fata nibii ni ekase lɛ he. (Dan 9:2) Biblia lɛ ni okɛ hiɛdɔɔ baakase lɛ baaye abua bo ni oya nɔ oye anɔkwa. Yɛ mɛɛ gbɛ nɔ? Ebaanyɛ ehã hemɔkɛyeli ni oyɔɔ akɛ Yehowa shiwoi lɛ baaba mli lɛ mli baawa. (Yos 23:14) Ebaanyɛ eye ebua bo koni suɔmɔ ni oyɔɔ kɛhã Nyɔŋmɔ lɛ hu mli awa, ni no baatsirɛ bo ní ofee nɔ ni ja. (La 97:10) Shi nɛgbɛ obaaje shishi kɛjɛ? Susumɔ ŋaawoi ni nyiɛ sɛɛ lɛ ahe okwɛ.
Mɛni esa akɛ makase? He ní asaa kɛhã nibii ni abaakase yɛ asafoŋ kpeei ashishi lɛ fata nibii ni esa akɛ wɔkase be fɛɛ be lɛ he. Kɛ́ wɔhe be kɛtao nibii ni wɔnuuu shishi yɛ daa otsi Biblia kanemɔ lɛ mli lɛ amli lɛ, wɔbaaná he sɛɛ waa. Kɛfata he lɛ, mɛi komɛi eto akɛ amɛbaakase Biblia mli gbalɛi, mumɔ lɛ yibii lɛ fãi srɔtoi lɛ, bɔfo Paulo maŋsɛɛ gbɛfãi srɔtoi lɛ, loo Yehowa adebɔɔ nibii lɛ po ahe nii babaoo. Kɛ́ Biblia mli sanebimɔ ko ba ojwɛŋmɔ mli yɛ gbi lɛ mli lɛ, ŋmaa ofɔ̃ shi, koni otao mli yɛ nikasemɔ ni obaafee kɛnyiɛ sɛɛ lɛ mli.
Nɛgbɛ maná saji ni mitaoɔ lɛ yɛ? Kwɛmɔ vidio ni ji, Deŋdadei ni akɛ Taoɔ Mumɔŋ Jwetrii Amli lɛ kɛhã ŋaawoi komɛi. Akɛ nɔkwɛmɔnɔ lɛ, kwɛmɔ akɛ obaanyɛ otao nɔ ni jeŋ hewalɛi ni amaga ni awie he yɛ Daniel yitso 7 lɛ mli lɛ feɔ amɛhe mfoniri lɛ mli lo.
Be enyiɛ esa akɛ mikase nii? Kɛ́ wɔfɔɔ nikasemɔ lɛ, wekukpaa ni yɔɔ wɔ kɛ Nyɔŋmɔ teŋ lɛ mli waa. Obaanyɛ okɛ be fioo aje shishi, kɛ́ ebaahi, koni ohã be lɛ aya hiɛ fiofio. Abaanyɛ akɛ Nyɔŋmɔ Wiemɔ lɛ kasemɔ ato jwetritsaa he; babaoo ni onáa jwetrii lɛ, babaoo ni osumɔɔ ni otsa! (Abɛ 2:3-6) Shwelɛ ni oyɔɔ akɛ obaakase Nyɔŋmɔ Wiemɔ lɛ mli baawa, ni Biblia lɛ ni obaakase daa lɛ baafee oshihilɛ lɛ fã.—1Pe 2:2.
MƐNI AMAGA NI AWIE HE YƐ DANIEL YITSO 7 LƐ DAMƆ SHI KƐHÃ?
SANEBIMƆ KROKO:
Mɛɛ gbɛ nɔ Daniel 7:8, 24 lɛ ba mli?
NƆ KROKO NI OBAANYƐ OKASE SƐƐ MLI:
Mɛni amaga ni awie he yɛ Kpojiemɔ yitso 13 lɛ damɔ shi kɛhã?