Ani Ole?
Mɛni hewɔ ehi waa akɛ Yehowa kpɛlɛ ni Israelbii lɛ kɛ ŋa mli okpoi kɛ shĩa okpoi fɛɛ ashã afɔle lɛ?
YƐ Mose Mla lɛ mli lɛ, Yehowa kpɛlɛ ni akɛ ŋa mli okpoi kɛ shĩa okpoi fɛɛ ashã afɔle. Anɔkwa, yɛ mlai ni kɔɔ afɔleshai ahe lɛ amli lɛ, be ko bɛ ni abaatsĩ ŋa mli okpo tã ni atsĩii shĩa okpo tã, ni afɔle ni akɛ enɛ shãa lɛ, abaanyɛ akɛ enɛ hu ashã. (3 Mo. 1:14; 12:8; 14:30) Mɛni hewɔ ehi waa akɛ Yehowa fee nakai? Yiŋtoo kome ji akɛ, jeee be fɛɛ be anáa ŋa mli okpoi yɛ Israel. Mɛni hewɔ?
Ŋa mli okpo
Ŋa mli okpoi ehiii he kome. Yɛ latsa beiaŋ lɛ, amɛhiɔ Israel. Shi daa afi yɛ October mli lɛ, amɛyaa maji ni yɔɔ Israel wuoyi lɛ koni amɛkɛjo fɛi lɛ naa foi, kɛkɛ lɛ amɛku amɛsɛɛ amɛba Israel kɛ́ fɛi be lɛ ho. (Sol. 2:11, 12; Yer. 8:7) No hewɔ lɛ kɛ́ eshɛ fɛi beiaŋ lɛ, ewa akɛ abaaná ŋa mli okpoi akɛshã afɔle yɛ Israel.
Shĩa okpo
Shi shĩa okpoi bɛ nakai. No hewɔ lɛ, latsa beiaŋ jio, fɛi beiaŋ jio lɛ, abaanyɛ aná eko ni akɛshã afɔle. Agbɛnɛ hu, mɛi pii lɛɔ shĩa okpoi. (Okɛto Yohane 2:14, 16 lɛ he.) Wolo ko ni atsɛɔ lɛ Bible Plants and Animals lɛ wie akɛ: “No mli lɛ alɛɔ shĩa okpoi yɛ akrowai kɛ maji fɛɛ ni yɔɔ Palestina lɛ. Mɔ fɛɛ mɔ yɛ okpotsu loo fɔlɔ yɛ egbogbo lɛ mli ni loofɔji lɛ baanyɛ ahi mli.”—Okɛto Yesaia 60:8 lɛ he.
Shĩa okpo yɛ okpotsu mli
No hewɔ lɛ, kpɛlɛmɔ ni Yehowa kpɛlɛ ni akɛ ŋa mli okpoi kɛ shĩa okpoi fɛɛ ashã afɔle lɛ hãa wɔnaa akɛ esumɔɔ ewebii lɛ ni esusuɔ amɛhe.