Kɛ́ omia ohiɛ otsu otii ni okɛmamɔɔ ohiɛ lɛ ahe nii lɛ, obaanyɛ oshɛ amɛhe
KƐHÃ OBLAHII KƐ OBLAYEI
12 Okɛ Otii Amamɔ Ohiɛ
NƆ NI ETSƆƆ
Kɛ́ okɛ oti ko ma ohiɛ lɛ, ebiɔ babaoo fe ni obaashwe ni nɔ ko aba mli kɛkɛ. Etsɔɔ akɛ, esa akɛ oto nibii ahe gbɛjianɔ jogbaŋŋ, okafee kpɛŋŋ, ni omia ohiɛ waa otsu he nii ni onyɛ oshɛ he.
Otii komɛi yɛ ni kɛ́ okɛmamɔ ohiɛ lɛ, ebaahe bo gbii fioo loo otsii fioo dani obaanyɛ oshɛ he. Ekomɛi baahe bo nyɔji abɔ, ekomɛi hu baanyɛ ahe bo afi loo nɔ ni fe nakai. Dani obaashɛ otii ni baahe bo be babaoo lɛ ahe lɛ, ebaabi ni oshɛ otii bibii komɛi ahe dã.
NƆ HEWƆ NI EHE HIAA
Kɛ́ okɛ oti ko mã ohiɛ ni onyɛ oshɛ he lɛ, ehãa onuɔ he akɛ obaanyɛ ofee nibii krokomɛi hu, okɛ mɛi krokomɛi ateŋ naanyobɔɔ lɛ mli waa, ni ehãa omii shɛɔ ohe waa.
Onuɔ he akɛ obaanyɛ otsu nibii krokomɛi ahe nii: Kɛ́ okɛ oti bibioo ko ma ohiɛ, ni onyɛ otsu he nii lɛ, ehãa onuɔ he akɛ obaanyɛ okɛ oti wulu ko ama ohiɛ ni onyɛ otsu he nii. Agbɛnɛ hu, ehãa onuɔ he akɛ obaanyɛ odamɔ naagbai ni okɛkpeɔ daa gbi, tamɔ tipɛŋfoi anɔnyɛɛ lɛ anaa.
Okɛ mɛi ateŋ naanyobɔɔ mli baawa: Kɛ́ okɛ otii ni obaanyɛ oshɛ he mamɔ ohiɛ, ni otsu amɛhe nii lɛ, mɛi baasumɔ ni amɛkɛ bo abɔ naanyo. Kɛ́ oosumɔ ni okɛ mɔ ko teŋ naanyobɔɔ mli awa waa lɛ, gbɛ kome ni hi fe fɛɛ ni obaanyɛ otsɔ nɔ ofee nakai ji, ni nyɛbaafee ekome kɛtsu oti ko he nii.
Obaaná miishɛɛ: Kɛ́ okɛ oti ko ma ohiɛ ni onyɛ oshɛ he lɛ, otsui nyɔɔ omli waa.
“Misumɔɔ ni mikɛ otii amamɔ mihiɛ, ejaakɛ be fɛɛ be lɛ, nɔ ko yɛ ni esa akɛ matsu he nii. Ni kɛ́ minyɛ mishɛ oti lɛ he lɛ, ehãa mimii shɛɔ mihe waa ni mitsui nyɔɔ mimli waa, ejaakɛ minyɛ mitsu oti ni mikɛma mihiɛ lɛ he nii.”—Christopher.
BIBLIA MLI SHISHITOO MLA: “Mɔ ni kwɛɔ kɔɔyɔɔ lɛ, eduŋ nii, ni mɔ ni kwɛɔ atatui lɛ hu kpaŋ nii.”—Jajelɔ 11:4.
NƆ NI OBAANYƐ OFEE
Nibii ni nyiɛ sɛɛ nɛɛ baaye abua bo ni okɛ otii amamɔ ohiɛ ni oshɛ amɛhe.
Susumɔ otii komɛi ahe. Ŋmalamɔ otii ni obaasumɔ ni oshɛ he, ni oto naa kɛjɛ klɛŋklɛŋ nɔ ni obaasumɔ ni otsu he nii lɛ nɔ, kɛ nɔ ni ji enyɔ nɔ, aahu kɛyashi naagbee nɔ lɛ nɔ.
Too gbɛjianɔ. Feemɔ nibii ni nyiɛ sɛɛ nɛɛ koni onyɛ oshɛ otii lɛ eko fɛɛ eko he:
Too be ni okɛbaatsu he nii ogbe naa.
Too nibii ni obaafee ni onyɛ otsu he nii lɛ ahe gbɛjianɔ.
Susumɔ naagbai ni obaanyɛ okɛkpe lɛ ahe, ni okwɛ nɔ ni obaanyɛ ofee kɛtsu amɛhe nii.
Bɔimɔ he nitsumɔ. Kaamɛ kɛyashi ona nɔ fɛɛ nɔ naa dani obɔi he nitsumɔ. Bi ohe akɛ, ‘Mɛni ji nɔ klɛŋklɛŋ ni esa akɛ mafee dani manyɛ mashɛ oti nɛɛ he?’ Kɛ́ ona nɔ ni esa akɛ ofee lɛ, tsu he nii. Yɛ be kɛ beiaŋ lɛ, kwɛmɔ akɛ ooshɛ oti lɛ he lo.
BIBLIA MLI SHISHITOO MLA: “Mɔdɛŋbɔlɔ gbɛjianɔtoi baaye omanye kɛ̃.”—Abɛi 21:5.