Maŋtsɛ Fɔŋ Ko Ye Mizraim Nɔ

HII ni onaa yɛ biɛ lɛ miinyɛ gbɔmɛi lɛ anɔ koni amɛtsu nii. Kwɛmɔ nuu ni kɛ kpãa yiɔ nitsulɔi lɛ ateŋ mɔ kome lɛ! Nitsulɔi lɛ jɛ Yakob weku lɛ mli, ni atsɛɔ amɛ Israelbii. Ni hii ni nyɛɔ amɛnɔ koni amɛtsu nii lɛ ji Mizraimbii. Israelbii lɛ ebatsɔmɔ nyɔji amɛha Mizraimbii lɛ. Te fee tɛŋŋ ni eba lɛ nakai lɛ?

Yakob weku ni da lɛ hi Mizraim afii pii yɛ toiŋjɔlɛ mli. Yosef, ni yeɔ maŋtsɛ Farao sɛɛ ákɛ nuu ni yɔɔ hewalɛ fe fɛɛ yɛ Mizraim lɛ kwɛɔ amɛnɔ. Shi Yosef bagbo. Kɛkɛ ni Farao hee ko, ni sumɔɔɔ Israelbii lɛ asane bafee maŋtsɛ yɛ Mizraim.

No hewɔ lɛ, nɛkɛ Farao fɔŋ nɛɛ fee Israelbii lɛ nyɔji. Kɛkɛ ni eha hii gbohii ni yitsoŋ wa kwɛ amɛnɔ. Amɛnyɛ Israelbii lɛ anɔ koni amɛtsu nii waa ni amɛmamɔ tsũi ni amɛfee maji amɛha Farao. Shi Israelbii lɛ tee nɔ ni amɛyi fa babaoo. Yɛ be ko sɛɛ lɛ, Mizraimbii lɛ bashe gbeyei akɛ Israelbii lɛ ayi baafa tsɔ ni amɛhe baawa hu tsɔ.

Ani ole nɔ ni Farao fee? Ewie etsɔɔ yei ni yeɔ buaa Israel yeifɔyei yɛ amɛfɔmɔ mli lɛ akɛ: ‘Nyɛgbea gbekɛbii hii fɛɛ ni amɛaafɔ lɛ.’ Shi yei kpakpai ji mɛnɛɛmɛi, no hewɔ lɛ amɛgbeee gbekɛbii lɛ.

No hewɔ lɛ Farao wo ewebii lɛ fɛɛ mla akɛ: ‘Nyɛgbea Israel gbekɛbii hii fɛɛ. Shi gbekɛbii yei lɛ, nyɛkagbea amɛ.’ Ani jeee mla fɔŋ diɛŋtsɛ nɛ? Nyɛhaa wɔkwɛa bɔ ni afee ahere gbekɛbii hii lɛ ateŋ mɔ kome yiwala.