Oblahii Ejwɛ Yɛ Babilon

MAŊTSƐ Nebukadnezar ŋɔ Israelbii ni le woloŋ fe fɛɛ lɛ fɛɛ kɛtee Babilon. Sɛɛ mli lɛ maŋtsɛ lɛ hala amɛteŋ oblahii ni he yɔɔ fɛo ni amɛle nii waa lɛ eha ehe. Amɛteŋ mɛi ejwɛ ji oblahii ni onaa yɛ biɛ lɛ. Mɔ kome ji Daniel, ni mɛi etɛ ni eshwɛ lɛ, Babilonbii lɛ tsɛɔ amɛ Shadrak, Meshak kɛ Abednego.

Nebukadnezar kpɛ eyiŋ akɛ ebaatsɔse oblahii lɛ ni amɛsɔmɔ yɛ emaŋtsɛwe lɛ. Beni étsɔse amɛ afii etɛ sɛɛ lɛ, ebaahala mɛi ni le nii waa fe fɛɛ lɛ ni amɛwa lɛ kɛtsu naagbai ahe nii. Maŋtsɛ lɛ miitao ni oblahii lɛ ahe awa ni amɛna gbɔmɔtsoŋ hewalɛ beni atsɔseɔ amɛ lɛ. No hewɔ lɛ ewo mla akɛ etsuji lɛ aha amɛ fɛɛ niyenii kɛ wein kpakpa ni lɛ kɛ eweku lɛ náa lɛ nɔŋŋ eko.

Kwɛmɔ obalanyo Daniel. Ani ole nɔ ni ekɛɔ Nebukadnezar tsulɔ nukpa Ashpenaz lɛ? Daniel miikɛɛ lɛ akɛ esumɔɔɔ ni eye niyenii kpakpai ni jɛɔ maŋtsɛ lɛ okpɔlɔ lɛ nɔ lɛ eko. Shi enɛ hao Ashpenaz waa. Ekɛɛ amɛ akɛ: ‘Maŋtsɛ lɛ ekpɛ eyiŋ yɛ nɔ ni esa akɛ nyɛye ni nyɛnu lɛ he. Ni ekolɛ kɛji nyɛnaaa gbɔmɔtsoŋ hewalɛ tamɔ oblahii krokomɛi lɛ, ebaagbe mi.’

No hewɔ lɛ Daniel tee mɔ ni Ashpenaz kɛto amɛnɔ ni ekwɛ lɛ kɛ enanemɛi etɛ lɛ ŋɔɔ. Ekɛɛ lɛ akɛ: ‘Ofainɛ bo lɛ kaa wɔ okwɛ gbii 10 pɛ. Ha wɔ shwiebaa ni wɔye kɛ nu ni wɔnu. No sɛɛ lɛ okɛ wɔ ato oblahii krokomɛi lɛ ni yeɔ maŋtsɛ lɛ niyenii lɛ ahe okwɛ, ni okwɛ akɛ namɛi ahe yɔɔ fɛo.’

Amɛ nɔkwɛlɔ lɛ kpɛlɛ nɔ akɛ ebaafee nakai. Ni beni gbii 10 lɛ shɛ lɛ, Daniel kɛ enanemɛi etɛ lɛ agbɔmɔtso efee fɛo fe oblahii krokomɛi ni eshwɛ lɛ fɛɛ. No hewɔ lɛ amɛ nɔkwɛlɔ lɛ ha amɛtee nɔ amɛye shwiebaa lɛ yɛ nɔ ni maŋtsɛ lɛ haa lɛ najiaŋ.

Yɛ afii etɛ sɛɛ lɛ, akɛ oblahii lɛ fɛɛ tee Nebukadnezar hiɛ. Beni ekɛ amɛ fɛɛ ewie sɛɛ lɛ, maŋtsɛ lɛ na akɛ Daniel kɛ enanemɛi etɛ lɛ le nii waa fe fɛɛ. No hewɔ lɛ eha amɛhi emaŋtsɛwe lɛ koni amɛye amɛbua lɛ. Ni be fɛɛ be ni maŋtsɛ lɛ baabi Daniel, Shadrak, Meshak kɛ Abednego saji ni wa waa lɛ, amɛle fe bɔ ni esɔfoi kɛ enilelɔi lɛ le lɛ shii 10.