Nomŋɔɔ Mli yɛ Babilon Kɛyashi Beni Atswa Yerusalem Gbogboi lɛ Ekoŋŋ

Beni amɛyɔɔ nomŋɔɔ mli yɛ Babilon lɛ, Israelbii lɛ kɛ amɛ hemɔkɛyeli lɛ he kaai babaoo kpe. Ashɛrɛ Shadrak, Meshak kɛ Abednego ashwie la kɛ flɔnɔɔ ni tsoɔ grigri mli, shi Nyɔŋmɔ jie amɛ yɛ mli hiɛkalɔi. Yɛ sɛɛ mli, beni Mediabii kɛ Persiabii lɛ kpãta Babilon hiɛ lɛ, akɛ Daniel wo jatai abu mli, shi Nyɔŋmɔ ŋamɔ jatai lɛ anaabui ni ekɛbaa eyi hu.

Yɛ naagbee lɛ, Persia maŋtsɛ Koresh ha Israelbii lɛ ye amɛhe. Amɛku amɛsɛɛ kɛtee amɛshikpɔŋ nɔ yɛ be mli ni akɛ amɛ tee Babilon akɛ nomii lɛ sɛɛ afii 70 pɛpɛɛpɛ. Nibii ni amɛfee klɛŋklɛŋ beni amɛku amɛsɛɛ kɛtee Yerusalem lɛ ateŋ ekome ji akɛ, amɛbɔi Yehowa sɔlemɔtsu lɛ maa. Shi, etsɛɛɛ kɛkɛ ni henyɛlɔi ha akpa nitsumɔ lɛ. No hewɔ lɛ aaafee afii 22 yɛ be mli ni amɛku amɛsɛɛ kɛtee Yerusalem lɛ sɛɛ dani amɛgbe sɔlemɔtsu lɛ maa naa.

Yɛ no sɛɛ lɛ, wɔbaakase gbɛ ni Ezra fã kɛku esɛɛ kɛtee Yerusalem koni eyasaa sɔlemɔtsu lɛ he nii. Enɛ ba mli aaafee afii 47 yɛ be mli ni agbe sɔlemɔtsu lɛ naa lɛ sɛɛ. Kɛkɛ ni afii 13 yɛ Ezra gbɛfãa lɛ sɛɛ lɛ, Nehemia ye ebua ni atswa Yerusalem gbogboi ni ekumɔ eshwie shi lɛ ekoŋŋ. Fã ENUMƆ lɛ wieɔ afii 152 yinɔsane he kɛbashi nɛkɛ be nɛɛ mli.