SANE 78
Ninenaa Niŋmaa Yɛ Gbogbo Lɛ He
MƐNI yaa nɔ yɛ biɛ lɛ? Gbɔmɛi lɛ eŋmɛ okpɔlɔ wulu ko. Babilon maŋtsɛ lɛ efɔ̃ nine etsɛ gbɔmɛi akpe ni he hiaa kɛba shishi. Amɛkɛ shika kpuji kɛ jwiɛtɛi kpuji kɛ tsɛŋsii krokomɛi ni amɛloo kɛjɛ Yehowa sɔlemɔtsu lɛ mli yɛ Yerusalem lɛ miiye nii. Shi, trukaa kɛkɛ ni ana gbɔmɔ nine waobii yɛ kɔɔyɔɔ lɛ mli ni ebɔi niŋmaa yɛ gbogbo lɛ he. Mɔ fɛɛ mɔ tsui fã.
Nebukadnezar nabi Belshazar ji maŋtsɛ amrɔ nɛɛ. Ebo waa akɛ aha enilelɔi lɛ aba mli. Maŋtsɛ lɛ kɛɛ amɛ akɛ: ‘Mɔ fɛɛ mɔ ni baanyɛ akane niŋmaa nɛɛ ni etsɔɔ mi shishi lɛ, mibaha lɛ nikeenii babaoo, ni mafee lɛ nɔyelɔ ni ji etɛ, ni he hiaa fe fɛɛ yɛ maŋtsɛyeli lɛ mli.’ Shi nilelɔi lɛ ateŋ mɔ ko mɔ ko nyɛɛɛ akane niŋmaa lɛ yɛ gbogbo lɛ he, aloo ni eeetsɔɔ shishi po.
Maŋtsɛ lɛ mami nu bolɔmɔ lɛ he ni eba niyeli tsũ agbo lɛ mli. Ekɛɛ maŋtsɛ lɛ akɛ: ‘Ofainɛ, otsui akafã. Nuu ko yɛ omaŋtsɛyeli lɛ mli ni le nyɔŋmɔi krɔŋkrɔŋi lɛ. Beni onii Nebukadnezar yeɔ maŋtsɛ lɛ, efee lɛ nilelɔi lɛ fɛɛ anɔ onukpa. Egbɛi ji Daniel. Tsu ni ayatsɛ lɛ kɛba, ni ebaatsɔɔ bo nɔ ni enɛɛmɛi fɛɛ tsɔɔ.’
No hewɔ lɛ, amrɔ nɔŋŋ ni akɛ Daniel ba. Beni ekpɛlɛɛɛ ni eheɔ nikeenii ko kwraa sɛɛ lɛ, Daniel je shishi etsɔɔ nɔ hewɔ ni be ko lɛ Yehowa jie Belshazar nii Nebukadnezar, ni ekpa lɛ maŋtsɛyeli lɛ. Daniel kɛɛ lɛ akɛ: ‘Ewó ehe nɔ waa. Ni Yehowa gbala etoi.’
Daniel kɛɛ Belshazar akɛ: ‘Shi ole nɔ fɛɛ nɔ ni ba enɔ lɛ, ni kɛlɛ owoɔ ohe nɔ tamɔ Nebukadnezar fee lɛ pɛpɛɛpɛ. Oyaloo kpuji kɛ tsɛŋsii kɛjɛ Yehowa sɔlemɔwe lɛ ni obanu dãa yɛ amɛmli. Ojie nyɔŋmɔi ni akɛ tsei kɛ tɛi fee lɛ ayi, ni owooo wɔ-Bɔlɔ Kpeteŋkpele lɛ hiɛ nyam. No hewɔ ni Nyɔŋmɔ tsu nine lɛ koni ebaŋma wiemɔi nɛɛ.’
Daniel kɛɛ lɛ akɛ: ‘Nɔ ni aŋma lɛ nɛ: MENE, MENE, TEKEL kɛ UFARSIN.’
‘MENE shishi ji, Nyɔŋmɔ ekane omaŋtsɛyeli gbii lɛ ni egbe naa. TEKEL shishi ji, aŋmɛ bo yɛ ŋsɛnii mli ni ana akɛ oshɛɛɛ. UFARSIN shishi ji, aja omaŋtsɛyeli lɛ mli aha Mediabii kɛ Persiabii.’
Beni Daniel wieɔ lolo po lɛ, no mli lɛ Mediabii kɛ Persiabii lɛ eje shishi amɛmiitutua Babilon. Amɛŋɔ maŋ lɛ ni amɛgbe Belshazar. Ninenaa niŋmaa ni yɔɔ gbogbo lɛ he lɛ ba mli anɔkwale nakai gbɛkɛ lɛ nɔŋŋ! Shi mɛni baaba Israelbii lɛ anɔ agbɛnɛ? Etsɛŋ ni wɔbaale, shi klɛŋklɛŋ lɛ ha wɔkwɛ nɔ ni ba Daniel nɔ.