Yitso 16

Bo Ŋaawoo Toi, Kpɛlɛmɔ Tsɔsemɔ

1. (a) Ani wɔteŋ mɛi komɛi yɛ ni ŋaawoo kɛ tsɔsemɔ he ehiaaa wɔ? (b) Mɛɛ sanebimɔi ebaahi jogbaŋŋ akɛ wɔɔsusu he?

WƆTEŊ mɛi pii kɛ ŋmalɛ nɛɛ kpaa gbee akɛ: “Wɔ fɛɛ wɔtɔ̃ɔ babaoo.” (Yak. 3:2) Ewaaa akɛ wɔɔsusu shii abɔ ni wɔnyɛɛɛ wɔtamɔ gbɔmɔ ni Nyɔŋmɔ Wiemɔ lɛ woɔ wɔ hewalɛ ni wɔtamɔ ni wɔsumɔɔ akɛ wɔtamɔ hu lɛ he. No hewɔ lɛ wɔkpɛlɛɔ nɔ akɛ Biblia lɛ ja beni ekɛɔ wɔ akɛ: “Bo ŋaawoo toi, ni okpɛlɛ tsɔsemɔ, koni wɔsɛɛ ni ole nii” lɛ. (Abɛi 19:20) Wɔle akɛ yelikɛbuamɔ ni tamɔ nɛkɛ he miihia wɔ. Ŋwanejee ko bɛ he akɛ wɔfee tsakemɔi yɛ wɔshihilɛ mli koni ekɛ nɔ ni wɔkase yɛ Biblia lɛ mli lɛ akpa gbee. Shi te wɔfeɔ wɔnii wɔhaa tɛŋŋ yɛ be mli ni naanyo Kristofonyo ko woɔ wɔ ŋaa diɛŋtsɛ yɛ sane pɔtɛɛ ko ni wɔfeee wɔnii yɛ nilee mli yɛ he lɛ? Aloo kɛji akɛ ekɛ ŋaawoo ko ha kɛkɛ yɛ bɔ ni wɔɔfee wɔya hiɛ yɛ nitsumɔ ko mli lɛ, te wɔfeɔ wɔnii wɔhaa tɛŋŋ?

2. (a) Mɛni hewɔ esa akɛ wɔjie hiɛsɔɔ kpo wɔha ŋaa ni awoɔ wɔ lɛ? (b) Mɛni esaaa akɛ wɔfeɔ?

² Yɛ bɔ ni wɔbaanu he wɔha amrɔ nɔŋŋ yɛ wɔmli gbɛ yɛ emuu ni adesa yeee lɛ fɛɛ sɛɛ lɛ, esa akɛ wɔjie hiɛsɔɔ kpo wɔha ŋaawoo yɛ anɔkwale mli ni wɔbɔ ehe nitsumɔ he mɔdɛŋ. Nɔ ni baajɛ mli aba lɛ baafee sɛɛnamɔ aha wɔ. (Heb. 12:11) Shi ekolɛ, wɔbɔɔ mɔdɛŋ ni wɔbu wɔhe bem, wɔba hiɛdɔɔ ni yɔɔ shihilɛ lɛ mli lɛ shi, aloo wɔkɛ tɔmɔ lɛ afɔ mɔ kroko nɔ yɛ be mli ni awoɔ wɔ ŋaa lɛ. Ani ofee onii yɛ nɛkɛ gbɛ nɔ pɛŋ? Yɛ be mli ni wɔkuɔ wɔsɛɛ wɔsusuɔ shihilɛ ni ba nɛɛ he ekoŋŋ lɛ, ani wɔmli fuɔ mɔ ni kɛ ŋaawoo lɛ ha wɔ lɛ? Ani wɔbaasumɔ ni wɔtsɔɔ mɔ ni kɛ ŋaawoo lɛ haa wɔ lɛ tɔmɔi aloo gbɛ ni etsɔ nɔ ekɛ ŋaawoo lɛ ha, tamɔ nɔ ni wɔfatɔɔi nɛɛ jeee nɔ ko? Ani Biblia lɛ baanyɛ aye abua gbɔmɛi ni amɛye sui ni tamɔ nɛkɛ lɛ anɔ kunim?

NƆKWƐMƆ NII NI AŊMALA ASHWIE SHI KƐHA WƆŊAAWOO

3. (a) Mɛni yɔɔ Biblia lɛ mli ni baanyɛ aye abua wɔ ni wɔna jwɛŋmɔ ni ja yɛ ŋaawoo kɛ tsɔsemɔ he? (b) Okɛ sanebimɔi ni yɔɔ yiteŋgbɛ nɛɛ atsu nii ni okɛtsɔɔ bɔ ni Saul kɛ Uzia fee amɛnii yɛ ŋaawoo he lɛ mli.

³ Kɛfata ŋaawoo babaoo ni akɛaaha tɛɛ yɛ nɛkɛ sane nɛɛ he lɛ, aŋkroaŋkroi ni awo amɛ ŋaa diɛŋtsɛ lɛ ashihilɛ mli niiashikpamɔi yɛ Nyɔŋmɔ Wiemɔ lɛ mli. Yɛ be babaoo mli lɛ, ŋaawoo lɛ bafeɔ tsɔsemɔ, ni ji akɛ ehe miihia ni mɔ ni nine shɛɔ nɔ lɛ atsake esubaŋ loo ejeŋba. Yɛ be mli ni okɛ sanebimɔi ni yɔɔ shishigbɛ nɛɛ pɛiɔ nɔkwɛmɔ nii nɛɛ ekomɛi amli lɛ, obaana akɛ babaoo yɛ ni wɔ fɛɛ wɔbaana he sɛɛ kɛjɛ mli:

SAUL, KISH BINUU LƐ: Ebooo Yehowa toi yɛ saji lɛ fɛɛ mli, yɛ be mli ni ewuɔ eshiɔ Amalek lɛ, ni ebaa maŋtsɛ lɛ kɛ kooloi ni hi lɛ ayi. (1 Sam. 15:1-11)

Mɛni tsɔɔ akɛ Saul miibɔ mɔdɛŋ ni eba etɔmɔ lɛ shi yɛ bɔ ni eha kamɔ kɛ ŋaawoo ni Samuel kɛha lɛ lɛ hetoo eha lɛ hewɔ? (Kk. 20) Ebɔ mɔdɛŋ ni ekɛ tɔmɔ lɛ afɔ namɛi anɔ? (Kk. 21) Yɛ be mli ni yɛ naagbee lɛ ekpɛlɛ tɔmɔ lɛ nɔ lɛ, mɛɛ naajiemɔ ekɛha? (Kk. 24) Mɛni bafeɔ akɛ no moŋ esusuɔ he waa yɛ nɛkɛ be nɛɛ po mli lɛ? (Kk. 25, 30)

UZIA: Etee Yehowa sɔlemɔ we lɛ koni eyasha tsofa-kɛ-ŋma, eyɛ mli akɛ osɔfoi lɛ pɛ yɔɔ hegbɛ akɛ amɛfeɔ nakai. (2 Kron. 26:16-20)

Beni osɔfonukpa lɛ bɔ mɔdɛŋ ni etsi Maŋtsɛ Uzia naa lɛ, mɛni hewɔ maŋtsɛ lɛ mli fu lɛ? (Okɛto kuku 16 he.) Mɛni jɛ mli ba? (Kk. 19-21)

4. (a) Mɛni hewɔ ewa kɛha Saul kɛ Uzia fɛɛ akɛ amɛaakpɛlɛ ŋaawoo nɔ lɛ? (b) Mɛni hewɔ enɛ hu ji naagba ko ni hiɛdɔɔ yɔɔ mli ŋmɛnɛ lɛ?

⁴ Mɛni hewɔ ebawa kɛha aŋkroaŋkroi ni yɔɔ sane nɛɛ eko fɛɛ eko mli lɛ akɛ amɛaakpɛlɛ nɔ akɛ ŋaawoo he miihia amɛ lɛ? Shishijee naagba lɛ ji henɔwomɔ, ni mɔ ko aaasusu ehe akɛ enɔ kwɔ tsɔ. Mɛi pii kɛ awerɛho baa amɛ diɛŋtsɛ amɛnɔ yɛ nɛkɛ su nɛɛ hewɔ. Akɛni amɛyashɛ he ko ni amɛsusuɔ gbɛhe loo hegbɛ ni amɛna lɛ he hewɔ lɛ, yɛ amɛ afii ni amɛye loo gbɛhe lɛ hewɔ lɛ, amɛbooo ŋaawoo ni akɛhaa amɛ lɛ toi dɔŋŋ. Amɛsusuɔ akɛ no tsɔɔ akɛ amɛshɛɛɛ yɛ nɔ ko mli aloo efiteɔ gbɛi ni amɛhiɛ lɛ. Shi nɔ ni tsɔɔ gbɔjɔmɔ nɛɛ diɛŋtsɛ ji henɔwomɔ. Enɛ jeee nɔ ko ni mɔ ko baajie enaa yɛ mli akɛni eji tɔmɔ ni afɔɔ tɔmɔ hewɔ. Eji tsɔne ni Satan kɛtsuɔ nii koni ekɛha gbɔmɔ lɛ jwɛŋmɔ nɔ, koni ete shi ewo yelikɛbuamɔ ni suɔmɔ yɔɔ mli ni Yehowa kɛhaa kɛtsɔɔ e-Wiemɔ lɛ kɛ gbɛjianɔtoo ni anaa lɛ nɔ lɛ. Yehowa bɔɔ kɔkɔ akɛ: “Hewoo nyiɛɔ hiɛkpatamɔ hiɛ, ni hetsɔɔmɔ mumɔ nyiɛɔ shigbeemɔ hiɛ.”—Abɛi 16:18; kwɛmɔ Romabii 12:3; Abɛi 16:5 hu.

5. Okɛ sanebimɔ ni fata nɛkɛ kuku nɛɛ he lɛ atsɔɔ nii ni wɔbaanyɛ wɔkase kɛjɛ Mose kɛ David he saji lɛ amli lɛ mli.

⁵ Shi yɛ gbɛ kroko nɔ lɛ, gbɔmɛi ni kpɛlɛɔ ŋaawoo nɔ lɛ ahe nɔkwɛmɔ nii fɛfɛji babaoo yɛ Ŋmalɛi lɛ amli. Abaanyɛ akase nibii ni he yɔɔ sɛɛnamɔ kɛjɛ nɛkɛ nɔkwɛmɔ nii nɛɛ amli. Susumɔ he:

MOSE: Eshaanuu kɛ ŋaawoo ni anyɛɔ atsuɔ he nii ha lɛ yɛ gbɛ ni eeetsɔ nɔ etsu enitsumɔ ni tsii lɛ he nii koni ekaye egbɔmɔtsoŋ hewalɛnamɔ awui. Mose bo toi ni ekɛtsu nii amrɔ nɔŋŋ. (2 Mose 18:13-24)

Eyɛ mli akɛ Mose yɛ hegbɛ kpeteŋkpele ko moŋ, shi mɛni hewɔ ebo ŋaawoo toi lɛ? (Okɛto 4 Mose 12:3 he.) Nakai su lɛ he hiaa wɔ waa yɛ mɛɛ gbɛ nɔ? (Zef. 2:3)

DAVID: Eye gbalafitemɔ loo ajwamaŋbɔɔ he fɔ, kɛkɛ ni etsɔ ŋaa koni agbe yoo lɛ wu lɛ koni David anyɛ ekɛ lɛ abote gbalashihilɛ mli ni ekɛtsimɔ gbalafitemɔ lɛ nɔ. Nyɔji babaoo ho dani Yehowa tsu Natan koni eyakã David hiɛ. (2 Sam. 11:2–12:12)

Ani David mli fu yɛ kamɔ lɛ hewɔ, ni eba etɔmɔ lɛ shi aloo ebɔ mɔdɛŋ ni eshwa mɔ kroko? (2 Sam. 12:13; Lala 51:1-5) Ani anɔkwale ni eji akɛ Nyɔŋmɔ kpɛlɛ David tsuitsakemɔ lɛ nɔ lɛ tsɔɔ akɛ David kɛ eshiabii lɛ fɛɛ ye amɛhe kɛjɛ nɔ ni jɛ ejeŋba gbonyo lɛ mli ba lɛ mli? (2 Sam. 12:10, 11, 14; 2 Mose 34:6, 7)

6. (a) Te David nu mɛi ni kɛ ŋaawoo kpakpa ha lɛ lɛ he eha tɛŋŋ? (b) Kɛ wɔkpɛlɛ ŋaawoo ni tamɔ nɛkɛ nɔ amrɔ nɔŋŋ lɛ wɔnaa he sɛɛ yɛ mɛɛ gbɛ nɔ? (d) Mɛni esaaa akɛ wɔhiɛ kpaa nɔ kɛ akã wɔhiɛ waa lɛ?

⁶ Maŋtsɛ David le sɛɛnamɔ ni yɔɔ ŋaawoo toiboo he lɛ jogbaŋŋ, ni be ko lɛ eda Nyɔŋmɔ shi yɛ mɔ ni etsu lɛ ni ekɛbaha lɛ lɛ hewɔ. (1 Sam. 25:32-35; kwɛmɔ Abɛi 9:8 hu.) Ani wɔtamɔ nakai? Kɛji nakai ni lɛ, ebaabu wɔhe kɛjɛ wiemɔ loo nifeemɔ ni baaha wɔshwa wɔhe lɛ babaoo ahe. Shi kɛ wɔbote shihilɛi ni baaha akã wɔhiɛ waa lɛ mli, taakɛ David bote mli yɛ esha ni ekɛ Batsheba fee lɛ hewɔ lɛ, wɔhiɛ akaje anɔkwale ni eji akɛ tsɔsemɔ ji odaseyeli ni tsɔɔ akɛ Yehowa sumɔɔ wɔ ni eyɛ wɔnaanɔ hilɛ kɛhamɔ he miishɛɛ lɛ nɔ kɔkɔɔkɔ.—Abɛi 3:11, 12; 4:13.

SUI NI JARA WAWAI NI ABAANYƐ ANA

7. Mɛɛ su Yesu tsɔɔ akɛ esa akɛ gbɔmɛi ana dani amɛbote Maŋtsɛyeli lɛ mli?

⁷ Kɛ wekukpaa kpakpa baanyɛ aba wɔ kɛ Yehowa kɛ wɔnyɛmimɛi Kristofoi ateŋ lɛ, ehe baahia ni wɔna sui pɔtɛɛ komɛi wɔ diɛŋtsɛ. Yesu ma enɛɛmɛi ateŋ ekome nɔ mi beni ekɛ gbekɛ fioo ko badamɔ ekaselɔi lɛ ahiɛ ni ewie nɛkɛ lɛ: “Kɛji nyɛtsakeee ni nyɛtsɔmɔ tamɔ gbekɛbii bibii lɛ, nyɛboteŋ ŋwɛi maŋtsɛyeli lɛ mli kwraa. No hewɔ lɛ, mɔ fɛɛ mɔ ni baa ehe shi tamɔ gbekɛ nɛɛ lɛ, eji agbo yɛ ŋwɛi maŋtsɛyeli lɛ mli.” (Mat. 18:3, 4) Ehe miihia ni nakai kaselɔi lɛ afee tsakemɔi. Esa akɛ amɛjie henɔwomɔ su lɛ kɛjɛ amɛhe ni amɛtao heshibaa.

8. (a) Esa akɛ wɔba wɔhe shi yɛ namɔ hiɛ, ni mɛni hewɔ? (b) Kɛ wɔfee nakai lɛ, te wɔbaahere ŋaawoo nɔ wɔha tɛŋŋ?

⁸ Yɛ sɛɛ mli lɛ bɔfo Petro ŋma enanemɛi Kristofoi lɛ akɛ: “Nyɛ fɛɛ nyɛbaa nyɛhe shi nyɛhaa nyɛhe ni nyɛbumɔa heshibaa jwɛŋmɔ lɛ, ejaakɛ Nyɔŋmɔ kuɔ hewolɔi anaa, shi heshibalɔi eduroɔ.” (1 Pet. 5:5) Wɔle akɛ ehe miihia ni wɔba wɔhe shi yɛ Nyɔŋmɔ hiɛ, shi nɛkɛ ŋmalɛ nɛɛ miitsɔɔ akɛ ehe miihia ni wɔba wɔhe shi, aloo wɔba wɔjwɛŋmɔ shi, yɛ wɔnanemɛi heyelilɔi lɛ hu ahiɛ. Kɛ wɔfee nakai lɛ, wɔmli fuŋ ŋaawoo ni akɛhaa wɔ lɛ yakatswaa. Wɔbaafee mɛi ni sumɔɔ akɛ amɛaakase nii kɛjɛ amɛnanemɛi aŋɔɔ. (Abɛi 12:15) Ni kɛji wɔnyɛmimɛi lɛ na akɛ ehe miihia ni amɛkɛ ŋaawoo ni jajeɔ mɔ aha wɔ, ni wɔyoo akɛ Yehowa jɛɔ esuɔmɔ mli ekɛ enɛ tsuɔ nii koni ekɛjaje wɔ lɛ, wɔkuŋ wɔhiɛ wɔshwieŋ nɔ.—Lala 141:5.

9. (a) Mɛɛ su kroko ni he hiaa bɛŋkɛ heshibaa he kpaakpa? (b) Mɛni hewɔ esa akɛ wɔsusu bɔ ni wɔjeŋba saa mɛi krokomɛi ahe lɛ he?

⁹ Su kroko ni bɛŋkɛ heshibaa waa ji mɛi krokomɛi ahilɛ-kɛhamɔ he susumɔ. Wɔnyɛŋ wɔjo anɔkwalɛ ni eji akɛ nɔ ni wɔfeɔ lɛ saa mɛi krokomɛi ahe lɛ naa foi. Bɔfo Paulo wo klɛŋklɛŋ Kristofoi ni yɔɔ Korinto kɛ Roma lɛ ŋaa akɛ amɛsusu mɛi krokomɛi ahenilee he. Ekɛɛɛ akɛ amɛkɛ nibii ni amɛ diɛŋtsɛ lɛ amɛsumɔɔ fɛɛ ama afa, shi moŋ ewo amɛ hewalɛ ni amɛkafee nɔ ko ni baawo mɔ kroko hewalɛ koni efee nii ni ehenilee kɛɔ lɛ akɛ ejaaa ni baaha ehiɛ akpata yɛ mumɔŋ lɛ. Yɛ be mli ni etsɔɔ shishitoo mla lɛ diɛŋtsɛ mli faŋŋ lɛ, Paulo ŋma akɛ: “Mɔ ko mɔ ko akapele miiha ehe, shi moŋ mɔ fɛɛ mɔ apele aha enaanyo. . . . No hewɔ lɛ, kɛ nii nyɛyeɔ jio, nii nyɛnuɔ jio, aloo nɔ kroko ni nyɛfeɔ jio, nyɛfea fɛɛ nyɛkɛwoa Nyɔŋmɔ hiɛ nyam. Nyɛkatsɔmɔa pampii nyɛhaa Yudafoi kɛ Helabii yɛ Nyɔŋmɔ asafo lɛ mli.”—1 Kor. 10:24-33; 8:4-13; Rom. 14:13-23.

10. Mɛni baatsɔɔ kɛji akɛ wɔfɔɔ nakai Ŋmalɛ mli ŋaawoo lɛ kɛ nitsumɔ?

¹⁰ Ani oji mɔ ko ni okɛfee osubaŋ akɛ okɛ mɛi krokomɛi ahilɛ-kɛhamɔ aaaye bo diɛŋtsɛ nɔ ni osumɔɔ lɛ hiɛ? Gbɛi pii yɛ ni aaatsɔ nɔ afee enɛ, shi susumɔ nɔkwɛmɔ nɔ ko he: Kɛ aaawie lɛ, atadewoo kɛ hesaamɔ ji saji ni damɔ nɔ ni mɔ diɛŋtsɛ sumɔɔ nɔ, bei abɔ ni wɔkɛ hiɛshikamɔ feɔ enɛ, wɔhe tse ni wɔyɛ falefale hu lɛ. Shi kɛji akɛ ona ole akɛ yɛ bɔ ni gbɔmɛi ni yɔɔ akutsoŋ he ni oyɔɔ lɛ ji lɛ hewɔ lɛ, gbɛ ni otsɔɔ nɔ owoɔ atade loo osaa ohe lɛ tsiɔ mɛi krokomɛi agbɛ koni amɛkabo Maŋtsɛyeli sane lɛ toi lɛ, ani obaatsake mli? Ani mɔ kroko lɛ wala he hiaa bo fe ni ooosa bo diɛŋtsɛ ohiɛ?

11. Mɛni tsɔɔ akɛ ehe miihia ni wɔna nɛkɛ sui nɛɛ kɛ wɔmiisumɔ ni wɔtsɔmɔ Kristofoi diɛŋtsɛ?

¹¹ Kɛji akɛ sui kpakpa ni wɔsusu he yɛ yiteŋgbɛ nɛɛ tsɔ osu kɛ baŋ lɛ fa lɛ, eyeɔ odase akɛ wɔmiije shishi wɔmiina Kristo jwɛŋmɔ lɛ eko. Yesu to heshibaa he okadi ni yeɔ emuu efɔ shi eha wɔ. (Yoh. 13:12-15; Fil. 2:5-8) Yɛ be mli ni esusuɔ mɛi krokomɛi ahe lɛ, ni eeesa lɛ diɛŋtsɛ ehiɛ moŋ lɛ, eto okadi lɛ efɔ shi koni wɔnyiɛ sɛɛ.—Rom. 15:2, 3.

KAAKPOO YEHOWA TSƆSEMƆ

12. (a) Mɛɛ tsakemɔi komɛi ehe hiaa ni wɔ fɛɛ wɔfee koni wɔna su kɛ baŋ ni sa Nyɔŋmɔ hiɛ? (b) Mɛni baaye abua wɔ?

¹² Akɛni wɔ fɛɛ wɔji eshafeelɔi hewɔ lɛ, ebiɔ ni wɔfee tsakemɔi yɛ wɔsubaŋ, wɔwiemɔ kɛ wɔjeŋba mli bɔni afee ni wɔjie wɔ-Nyɔŋmɔ lɛ su kɛ baŋ lɛ kpo. Ehe miihia ni wɔwo “gbɔmɔ hee” lɛ. (Kol. 3:5-14; Tito 2:11-14) Ŋaawoo kɛ tsɔsemɔ yeɔ ebuaa wɔ koni wɔyoo hei ni ehe hiaa ni wɔfee tsakemɔi yɛ koni wɔkwɛ gbɛi ni wɔɔtsɔ nɔ wɔfee nɛkɛ tsakemɔi nɛɛ.

13. (a) Mɛni nɔ Yehowa etsɔ ekɛ ŋaawoo kɛ tsɔsemɔ eha wɔ fɛɛ lɛ? (b) Mɛni esa akɛ wɔkɛfee?

¹³ He ni nakai famɔ lɛ jɛ ji Biblia lɛ diɛŋtsɛ. (2 Tim. 3:16, 17) Agbɛnɛ kɛtsɔ Biblia lɛ he woji kɛ kpeei ni Yehowa gbɛjianɔtoo ni anaa lɛ kɛhaa lɛ nɔ lɛ, eyeɔ ebuaa wɔ koni wɔna gbɛ ni wɔɔtsɔ nɔ wɔkɛtsu nii. Ani wɔkɛ heshibaa baayoo bɔ ni ehe hiaa wɔ diɛŋtsɛ lɛ—kɛji akɛ wɔnu he pɛŋ po—ni wɔkwɛ koni wɔya wɔhiɛ yɛ be fɛɛ mli?

14. Mɛɛ yelikɛbuamɔ kroko Yehowa kɛhaa wɔ akɛ aŋkroaŋkroi?

¹⁴ Yehowa shiii wɔ efolo koni wɔ diɛŋtsɛ wɔdamɔ saji ni baafee naagbai krɛdɛɛ aha wɔ lɛ naa. Ejɛɔ esuɔmɔ mli etoɔ gbɛjianɔ koni aye abua wɔ. Gbɔmɛi akpekpei abɔ ena yelikɛbuamɔ ni tamɔ nɛkɛ he sɛɛ kɛtsɔ shia Biblia mli nikasemɔi anɔ. Gbɛnaa nii krɛdɛɛ ko ka fɔlɔi anɔ akɛ amɛtsɔse amɛbii koni amɛkɛbu amɛhe kɛjɛ jeŋba fɔŋ ni baaha amɛna tsuiŋdɔlɛ yɛ sɛɛ mli afii amli lɛ he. (Abɛi 6:20-35; 15:5) Yɛ asafo lɛ mli hu lɛ, gbɛnaa nii ka mɛi ni yɔɔ mumɔŋ hesaai lɛ anɔ akɛ amɛkɛ Ŋmalɛi lɛ atsu nii koni amɛjaje mɛi krokomɛi kɛ amɛyoo akɛ ehe miihia ni amɛfee nakai, shi amɛfee enɛ yɛ mlijɔlɛ mumɔ mli. (Gal. 6:1, 2) Yehowa tsɔɔ nɛkɛ gbɛi anɔ ewoɔ wɔ ŋaa ni etsɔseɔ wɔ bɔni afee ni wɔja lɛ akɛ gbɔmɛi ni efee ekome.

Sanegbaa Ni Akɛtiɔ Mli

● Yehowa jɛɔ esuɔmɔ mli eyeɔ ebuaa wɔ koni wɔna hei ni ehe hiaa ni wɔfee tsakemɔi yɛ lɛ, yɛ mɛɛ gbɛ nɔ?

● Mɛni hewɔ ewa kɛha mɛi pii akɛ amɛaakpɛlɛ ŋaawoo nɔ lɛ? Mɛɛ hiɛdɔɔ yɔɔ enɛ mli?

● Mɛɛ sui ni hi fe fɛɛ baaye abua wɔ ni wɔkpɛlɛ ŋaawoo nɔ? Yesu fee nɔkwɛmɔ nɔ yɛ enɛ mli yɛ mɛɛ gbɛ nɔ?