Yitso 19

Etsɔɔ Samaria Yoo ko Nii

BENI amɛnyiɛ gbɛ kɛjɛ Yudea kɛyaa Galilea lɛ, Yesu kɛ ekaselɔi lɛ tsɔ Samaria kpokpaa lɛ nɔ gbɛ. Akɛni gbɛfaa lɛ eha etɔ amɛ hewɔ lɛ, aaafee shwane ŋmɛlɛ nyɔŋma-kɛ-enyɔ mli lɛ, amɛwa yɛ nu bu ko ni bɛŋkɛ Sikar lɛ he koni amɛjɔɔ amɛhe. Afii ohai abɔ nɛ ni Yakob tsa nu bu nɛɛ, ni eyɛ lolo aahu kɛbashi ŋmɛnɛ po, yɛ ŋmɛnɛŋmɛnɛ beaŋ Nablus maŋtiase lɛ masɛi.

Beni Yesu jɔɔ ehe yɛ biɛ lɛ, ekaselɔi lɛ tee maŋ lɛ mli koni amɛyahe niyenii. Kɛkɛ ni beni Samaria yoo ko ba ni ebayɛ nu lɛ, ebi lɛ nu lɛ eko ni ekɛɛ: “Ha mi nu lɛ eko ni manu.”

Yudafoi kɛ Samariabii bɛ nɔ ko kwraa feemɔ yɛ jwɛŋmɔ fɔŋ ko ni mli wa waa ni amɛhiɛ yɛ amɛhe lɛ hewɔ. No hewɔ lɛ, yoo lɛ naa kpɛ ehe, ni ebi lɛ akɛ: “Te tɛŋŋ ni bo Yudanyo lɛ, obaa mi Samaria yoo lɛ nu ni onu lɛ?”

Yesu ha lɛ hetoo akɛ: “Eji ole Nyɔŋmɔ nɔkeenɔ lɛ kɛ mɔ ni kɛɔ bo akɛ: ‘Ha mi eko manu’ lɛ kulɛ, bo moŋ oooba lɛ, ni eeehao wala nu.”

Ni yoo lɛ here lɛ nɔ akɛ: “Nuŋtsɔ, obɛ nɔ ni oooŋɔyɛ, ni bu lɛ hu mli kwɔ; nɛgbɛ ooona wala nu lɛ yɛ mɔ? Ani ofe wɔtsɛ Yakob ni ha wɔ nu bu lɛ, ni lɛ diɛŋtsɛ enu mli nu, kɛ ebii kɛ ekooloi lɛ?”

Yesu kɛɛ lɛ akɛ: “Mɔ fɛɛ mɔ ni nuɔ nu nɛɛ eko lɛ, kumai baaye lɛ ekoŋŋ; shi mɔ ni nuɔ nu ni mi maha lɛ lɛ eko lɛ, kumai yeŋ lɛ dɔŋŋ kɛaatee naanɔ; shi moŋ, nu ni maha lɛ lɛ aaatsɔ nu hiŋmɛi ni baa kɛyaa naanɔ wala mli.”

Ni yoo lɛ here lɛ nɔ akɛ: “Nuŋtsɔ, ha mi nu nɛɛ eko, koni kumai akaye mi, ni miba biɛ mibayɛ nu dɔŋŋ.”

Agbɛnɛ Yesu kɛɛ yoo lɛ akɛ: “Yaa ni oyatsɛ owu, ni okɛ lɛ aba biɛ.”

Yoo lɛ ha hetoo akɛ: “Mibɛ wu.”

Ni Yesu ma ewiemɔ lɛ nɔ mi. “Ojogbaŋŋ okɛɛ akɛ: ‘Mibɛ wu’ lɛ; ejaakɛ ogbã wumɛi enumɔ, ni mɔ ni ogbaa agbɛnɛ nɛɛ, jeee owu ji lɛ.”

Kɛkɛ ni yoo lɛ naa kpɛ ehe ni ekɛɛ: “Nuŋtsɔ, mina akɛ gbalɔ jio.” Beni etsɔɔ bɔ ni enyaa mumɔŋ nibii ahe lɛ, yoo lɛ tsɔɔ akɛ “gɔŋ nɛɛ [Gerizim, ni bɛŋkɛ jɛmɛ lɛ] nɔ” Samariabii lɛ “sɔle yɛ, ni nyɛ [Yudafoi] lɛ nyɛkɛɛ akɛ Yerusalem ji he ni sa akɛ asɔle yɛ.”

Ni kɛlɛ, Yesu fee lɛ faŋŋ akɛ, jeee he ni asɔleɔ yɛ lɛ ji nɔ ni he hiaa. Ekɛɛ: “Shi kɛlɛ ŋmɛlɛtswaa lɛ miiba ni eshɛ agbɛnɛ, beni anɔkwa jalɔi lɛ aaaja Tsɛ lɛ yɛ mumɔ kɛ anɔkwale mli, ejaakɛ mɛi ni jaa lɛ nɛkɛ lɛ, Tsɛ lɛ hu taoɔ. Nyɔŋmɔ lɛ mumɔ ni, ni mɛi ni jaa lɛ lɛ, ja amɛja lɛ yɛ mumɔ kɛ anɔkwale mli.”

Yoo lɛ na he miishɛɛ waa diɛŋtsɛ. Ekɛɛ akɛ: “Mile akɛ Mesia ni atsɛɔ lɛ Kristo lɛ miiba; kɛ eba lɛ, eeegba wɔ nii fɛɛ.”

Ni Yesu jaje akɛ: “Mi ni mikɛo wieɔ nɛɛ, mi ni.” Susumɔ he okwɛ! Yesu eduro nɛkɛ yoo nɛɛ ni ba akɛ ebaayɛ nu kɛjɛ shwane ŋmɛlɛ nyɔŋma-kɛ-enyɔ, ekolɛ koni ekɛ maŋ lɛ mli yei krokomɛi ni ebuuu lɛ yɛ eshihilɛ hewɔ lɛ akana sharamɔ lɛ waa yɛ naakpɛɛ gbɛ ko nɔ. Ekɛɛ lɛ nɔ ni ekɛko mɔ ko mɔ ko yɛ faŋŋ mli lɛ kpeŋ akɛ lɛ ni. Ni mɛni jɛ mli ba?

Samariabii Pii he Ye

Beni kaselɔi lɛ kɛ niyenii lɛ ku amɛsɛɛ kɛjɛ Sikar lɛ, amɛna Yesu yɛ Yakob nu bu lɛ he yɛ he ni amɛshi lɛ yɛ, he ni amrɔ nɛɛ ekɛ Samaria yoo lɛ wieɔ yɛ lɛ. Beni kaselɔi lɛ bashɛ shi lɛ, yoo lɛ shi etee, ni eshi enu gbɛ lɛ, ni eyiŋ etee maŋ lɛ mli.

Akɛni ena nibii ni Yesu kɛɛ lɛ lɛ ahe miishɛɛ waa hewɔ lɛ, yoo lɛ kɛɛ maŋ lɛ mli hii lɛ akɛ: “Nyɛbaa ni nyɛbakwɛa nuu ko ni ejaje nii fɛɛ ni mifee etsɔɔ mi.” Kɛkɛ ni ebi sane nɛɛ yɛ gbɛ ko nɔ koni ekɛtee amɛmiishɛɛ shi: “Jeee Kristo lɛ nɛ lo?” Sanebimɔ lɛ tsu eyiŋtoo lɛ he nii—hii lɛ tee koni amɛ diɛŋtsɛ amɛyakwɛ.

Yɛ nɛkɛ be nɛɛ mli lɛ, kaselɔi lɛ wo Yesu hewalɛ ni eye niyenii ni amɛkɛjɛ maŋ lɛ mli kɛba lɛ. Shi eha amɛ hetoo akɛ: “Miyɛ ŋmaa ni miyeɔ, ni nyɛleee.”

Kɛkɛ ni kaselɔi lɛ bibii amɛhe akɛ: “Ani mɔ ko ebaha lɛ nɔ ko eye?” Ni Yesu tsɔɔ mli akɛ: “Miŋmaa ji akɛ mafee mɔ ni tsu mi lɛ suɔmɔnaa nii, ni magbe enitsumɔ lɛ naa. Ani nyɛkɛɛɛ akɛ: Eshwɛ nyɔji ejwɛ ni abele kpamɔ be lɛ shɛɔ?” Shi, beni ewieɔ mumɔŋ nikpamɔ lɛ he lɛ, Yesu kɛɛ: “Nyɛholea nyɛhiŋmɛi anɔ ni nyɛkwɛa ŋmɔji lɛ bɔ ni amɛgba futaa momo ni sa kpamɔ. Ni mɔ ni kpaa lɛ naa enyɔmɔwoo, ni ebuaa yibii anaa etoɔ naanɔ wala, koni mɔ ni duɔ lɛ kɛ mɔ ni kpaa lɛ fɛɛ anya shikome.”

Ekolɛ Yesu miinyɛ eena nɔ wulu ni baajɛ Samaria yoo lɛ ni ekɛkpe lɛ mli aba lɛ momo—akɛ mɛi pii miina hemɔkɛyeli yɛ emli yɛ yoo lɛ odaseyeli wiemɔi lɛ ahewɔ. Eeye maŋ lɛ mlibii lɛ odase, ni eekɛɛ: “Ekɛɛ mi nii fɛɛ ni mifee pɛŋ lɛ hewɔ.” No hewɔ lɛ, beni Sikarbii lɛ ba eŋɔɔ yɛ nu bu lɛ masɛi lɛ, amɛbi lɛ ni ekɛ amɛ ahi shi ni ewie etsɔɔ amɛ babaoo. Yesu kpɛlɛ ninefɔɔ lɛ nɔ ni ehi shi gbii enyɔ.

Beni Samariabii lɛ boɔ Yesu toi lolo lɛ, mɛi pii he lɛ amɛye. Kɛkɛ ni amɛkɛɛ yoo lɛ akɛ: “Agbɛnɛ, wɔmiihe wɔmiiye, jeee bo owiemɔ lɛ hewɔŋ dɔŋŋ; ejaakɛ wɔ diɛŋtsɛ wɔnu, ni wɔna wɔle akɛ, anɔkwale, mɔ nɛ ji je lɛ walaherelɔ ni ji Kristo lɛ.” Lɛlɛŋ, Samaria yoo lɛ feɔ nɔkwɛmɔ nɔ kpakpa ehaa wɔ yɛ bɔ ni wɔɔfee wɔye Kristo he odase kɛtsɔ mɛi amiishɛɛ shi ni wɔɔtee koni no aha toibolɔi lɛ atao nibii amli babaoo lɛ nɔ!

Kaimɔ akɛ eshwɛ nyɔji ejwɛ ni nikpamɔ be lɛ baashɛ—eka shi faŋŋ akɛ akoko kpamɔ, ni baa yɛ Palestina shikpɔŋ lɛ nɔ yɛ agbiɛnaa be mli lɛ. No hewɔ lɛ ekolɛ nɛkɛ be nɛɛ baafee November loo December mli. Enɛ tsɔɔ akɛ, yɛ afi 30 Ŋ.B. Hehoo lɛ sɛɛ lɛ, Yesu kɛ ekaselɔi lɛ ye nyɔji kpaanyɔ loo nɔ ni miihe ashɛ nakai yɛ Yudea ni amɛmiitsɔɔ nii ni amɛmiibaptisi mɛi. Agbɛnɛ amɛshi jɛmɛ kɛmiiba amɛmaŋ lɛ kpokpaa nɔ yɛ Galilea. Mɛni mɛɔ amɛ yɛ jɛmɛ? Yohane 4:3-43.

▪ Mɛni hewɔ Samaria yoo lɛ naa kpɛ ehe akɛ Yesu kɛ lɛ wie lɛ?

▪ Mɛni Yesu tsɔɔ lɛ yɛ wala nu lɛ kɛ he ni esa akɛ aja Nyɔŋmɔ yɛ lɛ he?

▪ Mɛɛ gbɛ nɔ Yesu tsɔ etsɔɔ lɛ mɔ ni eji, ni mɛni hewɔ enɛ ni ajie kpo atsɔɔ lɛ lɛ ha enaa kpɛ ehe lɛ?

▪ Mɛɛ odaseyeli nitsumɔ ko Samaria yoo lɛ tsu ni mɛni jɛ mli ba?

▪ Mɛɛ gbɛ nɔ Yesu niyenii lɛ kɔɔ nikpamɔ lɛ he yɛ?

▪ Mɛɛ gbɛ nɔ wɔɔtsɔ wɔna Yesu sɔɔmɔ nitsumɔ yɛ Yudea yɛ afi 30 Ŋ.B. Hehoo lɛ sɛɛ lɛ sɛɛ kɛlɛ?