Yitso 33

Yesaia Gbalɛ lɛ Ni Eha Eba Mli

BENI Yesu na ele akɛ Farisifoi lɛ kɛ Herode kuu lɛ mlibii lɛ etee eyinɔ apãm akɛ amɛbaagbe lɛ lɛ, ekɛ ekaselɔi lɛ gbala amɛhe shi kɛtee Galilea Ŋshɔ lɛ naa. Ni gbɔmɛi asafoi babaoo ni jɛ Palestina niiaŋ fɛɛ, kɛ hei ni bɛ ehusui lɛ amli po ke yuu kɛba eŋɔɔ. Ni etsa mɛi pii, ni nɔ ni jɛ mli ba ji akɛ mɛi ni yeɔ helai ni mli wawai lɛ bɔ mɔdɛŋ waa koni amɛnyɛ amɛta ehe.

Shi akɛni mɛi lɛ ayi fa babaoo hewɔ lɛ, Yesu kɛɛ ekaselɔi lɛ koni amɛtao lɛlɛ ko amɛha lɛ be fɛɛ be. Kɛji eyata mli ni eshi amɛ yɛ shia lɛ nɔ lɛ, no lɛ ebaatsi mɛi lɛ anaa koni amɛkake yuu kɛmiishwie enɔ. Ebaanyɛ eta lɛlɛ lɛ mli ni etsɔɔ amɛ nii aloo efa gbɛ kɛya he kroko yɛ ŋshɔ lɛ naa ni eyaye ebua mɛi ni yɔɔ jɛmɛ lɛ.

Kaselɔ Mateo tsɔɔ akɛ Yesu nifeemɔi lɛ haa “nɔ ni gbalɔ Yesaia wie lɛ” baa mli. Kɛkɛ ni Mateo tsɛ nakai gbalɛ ni Yesu haa ebaa mli lɛ yisɛɛ akɛ:

“Naa, mitsulɔ ni mihala lɛ, misuɔlɔ ni misusuma naa ehe tsui lɛ; mikɛ mimumɔ lɛ aaato enɔ, ni eeejaje kojomɔ etsɔɔ jeŋmaji lɛ. Ebeŋ, ni ebolɔŋ hu, ni mɔ ko nuŋ egbee yɛ blohuiaŋ. Gãlã ni amia lɛ, ekuŋ, ni odoŋti hu ni tsoɔ sulii lɛ, egbeŋ, kɛyashi beyinɔ ni eeeha kojomɔ ashɛ kunimyeli mli. Ni egbɛi lɛ anɔ jeŋmaji lɛ aaaŋɔ amɛhiɛ amɛfɔ̃.”

Lɛlɛŋ, Yesu ji tsulɔ ni asumɔɔ esane ni Nyɔŋmɔ naa ehe tsui lɛ. Ni Yesu ha ale nɔ ni ji anɔkwa jalɛsaneyeli ni akɛ apasa jamɔ mli kusumii tsimɔɔ hiɛ lɛ yɛ faŋŋ mli. Akɛni Farisifoi lɛ kɛ Nyɔŋmɔ mla lɛ tsuɔ nii yɛ gbɛ ni ejaaa nɔ hewɔ lɛ, amɛyeee amɛbuaaa helatsɛ po yɛ Hejɔɔmɔ Gbi lɛ nɔ! Yesu ha ale Nyɔŋmɔ jalɛsaneyeli lɛ faŋŋ, ni eha gbɔmɛi lɛ ye amɛhe kɛjɛ jatsui ni tsii ni kusumii ni ejaaa lɛ kɛshwie amɛnɔ lɛ ashishi, ni enɛ hewɔ lɛ, jamɔ mli hiɛnyiɛlɔi lɛ tao ni amɛgbe lɛ.

Mɛni ji nɔ ni atsɔɔ akɛ ‘ebolɔŋ, ni ewoŋ egbee nɔ koni mɔ ko anu egbee yɛ blohuiaŋ’ lɛ? Kɛ Yesu miitsa gbɔmɛi lɛ, ‘ewoɔ amɛ kita koni amɛkaha mɛi miile lɛ.’ Esumɔɔɔ ni akɛ hoofeemɔ atswa ehe adafi yɛ gbɛjegbɛi anɔ aloo ni anu ehe saji ni awo he koni eŋɔɔ lɛ kɛjɛ mɛi anaa.

Agbɛnɛ hu, Yesu kɛ eshɛɛ sane ni shɛjeɔ mɔ mii lɛ yaha mɛi ni tamɔ mfonirifeemɔ mli gãlã ni amia, ni adɔ lɛ ni akɛ naji enaanaa nɔ lɛ. Amɛtamɔ odoŋti hu ni tsoɔ sulii, ni eshwɛ fioo ni enaagbee kpɛmɔ bibioo lɛ po baagbo lɛ. Yesu ekuuu gãlã ni amia lɛ lɛ, ni egbeee odoŋti ni tsoɔ sulii ni jeɔ lasu lɛ hu. Shi moŋ ejɛɔ suɔmɔ mli ni ekɛ ŋaa holeɔ mɛi ni he jɔ lɛ anɔ blɛoo. Lɛlɛŋ, Yesu ji mɔ ni jeŋmaji lɛ baanyɛ aŋɔ amɛhiɛ amɛfɔ enɔ! Mateo 12:15-21; Marko 3:7-12; Yesaia 42:1-4.

▪ Mɛɛ gbɛ nɔ Yesu tsɔ ni eha jalɛsaneyeli je kpo faŋŋ, ni ebolɔɔɔ aloo ewooo egbee nɔ yɛ blohuiaŋ?

▪ Namɛi tamɔ gãlã ni amia kɛ odoŋti ni tsoɔ lɛ, ni mɛɛ gbɛ nɔ Yesu kɛ amɛ ye hã yɛ?