Yitso 36

Asraafonyo Nukpa ko Hemɔkɛyeli Kpele

BENI Yesu haa e-Gɔŋ nɔ Shiɛmɔ lɛ, no mli lɛ etsu emaŋ sɔɔmɔ nitsumɔ lɛ mli fa pɛpɛɛpɛ. Enɛ tsɔɔ akɛ eshwɛ aaafee afi kɛ nyɔji nɛɛhu loo nɔ ni ebaagbe enitsumɔ lɛ naa yɛ shikpɔŋ nɔ.

Agbɛnɛ Yesu bote Kapernaum maŋtiase, ni etsɔ tamɔ shia yɛ enitsumɔi lɛ amli lɛ mli. Biɛ ji he ni Yudafoi lɛ ateŋ onukpai lɛ ba amɛbabi lɛ sane yɛ. Roma asraafoi lɛ anɔ onukpa ko ni ji Jeŋmajiaŋnyo, ni jɛ maŋ ko ni jeee Yudafoi anɔ mli lɛ tsu amɛ eŋɔɔ.

Asraafonyo nukpa lɛ tsulɔ ni esumɔɔ esane waa lɛ miigbo kɛ hela wulu ko, ni eetao ni Yesu atsa etsulɔ lɛ. Ni Yudafoi lɛ ba amɛbakpa fai amɛha asraafonyo nukpa lɛ ni amɛkɛɛ: “Mɔ ni obaafee enɛ oha lɛ lɛ, esa lɛ; ejaakɛ esumɔɔ wɔmaŋ lɛ, ni kpeehe lɛ, lɛ nɔŋŋ ema eha wɔ.”

No hewɔ lɛ Yesu shashaooo shi kwraa, ni ekɛ hii lɛ shi kɛtee. Shi kɛlɛ, beni amɛbɛŋkɛ jɛmɛ lɛ, asraafonyo nukpa lɛ tsu eshieŋtsɛmɛi koni amɛbakɛɛ akɛ: “Nuŋtsɔ, kaagba ohe naa; ejaakɛ esaaa mi akɛ oboteɔ mikpata lɛ shishi; no hewɔ hu ni mibuuu mihe akɛ esa mi akɛ mibaa oŋɔɔ lɛ.”

Mɛɛ heshibaa wiemɔ ni jɛ asraafonyo ni ale lɛ akɛ mɔ ko ni famɔɔ mɛi lɛ ŋɔɔ enɛ ji nɛkɛ! Shi ekolɛ, lɛ hu eejwɛŋ Yesu he, ni eyoo akɛ mla eŋmɛɛɛ gbɛ ni Yudanyo kɛ mɔ ko ni jeee Yudanyo ana sharamɔ yɛ nɔ ko feemɔ mli. Petro tete po kɛɛ: “Nyɛ diɛŋtsɛ nyɛle bɔ ni Yudanyo bɛ hegbɛ akɛ ekɛ mɔ ko ni ji maŋ kroko nɔ nyo bɔɔ aloo ebaa eŋɔɔ.”

Akɛni ekolɛ esumɔɔɔ ni Yesu ana toigbalamɔ ko kɛjɛ mla nɛɛ mli ni eeeku lɛ hewɔ lɛ, asraafonyo nukpa lɛ tsu eshieŋtsɛmɛi ni amɛyakɛɛ lɛ akɛ: “Wiemɔ wiemɔ kɛkɛ, ni aaatsa miwenuu lɛ. Ejaakɛ mi po ni mi ji gbɔmɔ ni ayeɔ minɔ lɛ, miyɛ asraafoi yɛ mishishi, ni kɛ mikɛɛ mɔ kome akɛ: ‘Yaa!’ lɛ, eyaa; ni kɛ mikɛɛ mɔ kroko hu akɛ: ‘Ba!’ lɛ, ebaa; ni kɛ mikɛɛ mitsulɔ lɛ akɛ: ‘Feemɔ enɛ!’ lɛ, efeɔ.”

Ojogbaŋŋ, beni Yesu nu enɛ lɛ, enaa kpɛ ehe. Ekɛɛ: “Miikɛɛ nyɛ akɛ, Israel mli tete, minako hemɔkɛyeli ni da tamɔ enɛ da.” Beni Yesu tsa asraafonyo nukpa lɛ tsulɔ lɛ, ekɛ hegbɛ lɛ tsu nii ni etsɔɔ bɔ ni akɛ Yudafoi ni bɛ hemɔkɛyeli lɛ ajɔɔmɔi lɛ baaha mɛi ni jeee Yudafoi ni jieɔ hemɔkɛyeli kpo lɛ.

Yesu kɛɛ: “Mɛi pii aaajɛ boka kɛ anai aba, ni amɛkɛ Abraham kɛ Isak kɛ Yakob aaabatara shi yɛ ŋwɛi maŋtsɛyeli lɛ mli; shi maŋtsɛyeli lɛŋ bii lɛ, aaafa amɛ awo gbɛ sɛɛ duŋ lɛ mli; jɛi yaafo kɛ nyanyɔji ashishikpemɔ aaahi.”

“Shi maŋtsɛyeli lɛŋ bii . . . [ni] aaafa amɛ awo gbɛ sɛɛ duŋ lɛ mli” lɛ ji heloonaa Yudafoi ni ekpɛlɛɛɛ hegbɛ ni akɛha amɛ tsutsu koni amɛkɛ Kristo aye maŋtsɛ lɛ nɔ lɛ. Abraham, Isak, kɛ Yakob damɔ shi kɛha Nyɔŋmɔ Maŋtsɛyeli gbɛjianɔtoo lɛ. No hewɔ lɛ Yesu miitsɔɔ bɔ ni abaafɔ nine atsɛ Jeŋmajiaŋbii lɛ koni amɛbaye nii yɛ ŋwɛi okpɔlɔ lɛ he, taakɛ eji lɛ, “yɛ ŋwɛi maŋtsɛyeli lɛ mli.” Luka 7:1-10; Mateo 8:5-13; Bɔfoi lɛ Asaji 10:28.

▪ Mɛni hewɔ ni Yudafoi ba amɛbakpa fai yɛ Jeŋmajiaŋnyo asraafonyo nukpa ko hewɔ lɛ?

▪ Mɛni abaanyɛ akɛɛ akɛ no hewɔ ni asraafonyo nukpa lɛ efɔɔɔ Yesu nine kɛbaaa eshia lɛ?

▪ Mɛni ji nɔ ni Yesu kɛ enaagbee wiemɔi lɛ tsɔɔ?