Yitso 37
Yesu Ha Yoo Okulafo ko Awerɛho Laaje
BENI Yesu tsa asraafonyo nukpa lɛ tsulɔ lɛ sɛɛ etsɛɛɛ lɛ, eshi kɛtee Nain, yɛ maŋ ko ni jɛkɛmɔ aaafee shitoi 20 yɛ Kapernaum wuoyi-anaigbɛ lɛ mli. Ekaselɔi lɛ kɛ gbɔmɛi asafo babaoo fata ehe. Ekolɛ kɛmiibɛŋkɛ gbɛkɛnaashi mli dani amɛyashɛ Nain maŋ lɛ klotia. Amɛkɛ yarafeelɔi komɛi kpe yɛ biɛ. Akɛ obalanyo ko gbonyo miije kpo kɛmiijɛ maŋ lɛ mli kɛmiiya ayafu lɛ.
Enyɛ shihilɛ yɛ mɔbɔ waa, ejaakɛ yoo okulafo ji lɛ, ni ebi koome pɛ nɛ. Beni ewu gbo lɛ, ekɛ bi nuu ni eyɔɔ nɛɛ shɛje emii. Ehiɛnɔkamɔ, emiishɛɛ, kɛ otii ni mamɔ ehiɛ fɛɛ ka nɛkɛ obalanyo nɛɛ wɔsɛɛ nɔ. Shi amrɔ nɛɛ mɔ ko mɔ ko bɛ dɔŋŋ ni eeena miishɛjemɔ kɛjɛ eŋɔɔ. Ewerɛho lɛ da waa yɛ be mli ni maŋbii lɛ fata ehe kɛyaa fuu he lɛ.
Beni Yesu na yoo lɛ, bɔ ni ewerɛ eho ehe fe nine lɛ sa etsui he. No hewɔ lɛ ekɛ yoo lɛ wie kɛ mlihilɛ, shi kɛlɛ kɛ shifimɔ ni hekɛnɔfɔɔ yɔɔ mli ni ekɛɛ: “Kaafo!” Bɔ ni efee enii eha lɛ gbala asafo babaoo lɛ ajwɛŋmɔ. No hewɔ lɛ beni ebɛŋkɛ amɛ ni eyata adeka ni gbonyo lɛ ka mli lɛ he lɛ, kɛkɛ ni mɛi ni tere lɛ wa damɔ shi. Agbɛnɛ mɛi fɛɛ miikwɛ akɛ mɛni ebaafee.
Eji anɔkwale akɛ mɛi ni fata Yesu he lɛ ena ni etsa mɛi babaoo ahelai sɔrɔtoi yɛ naakpɛɛ gbɛ nɔ. Shi ekolɛ amɛnako ni etee mɔ ko shi kɛjɛ gbohii ateŋ da. Ani ebaanyɛ efee nɔ ko tamɔ nakai? Ni Yesu kɛ obalanyo lɛ wie, ni efã lɛ akɛ: “Obalanyo, miikɛɛo akɛ: Tee shi!” Ni nuu lɛ te shi eta shi! Ni ebɔi wiemɔ, ni Yesu kɛ lɛ ha enyɛ.
Beni gbɔmɛi lɛ na akɛ obalanyo lɛ hiɛ ka lɛlɛŋ lɛ, amɛbɔi kɛɛmɔ akɛ: “Gbalɔ kpeteŋkpele ete shi yɛ wɔteŋ.” Mɛi krokomɛi hu kɛɛ: “Nyɔŋmɔ ebasara emaŋ lɛ.” Amrɔ nɔŋŋ pɛ kɛkɛ ni naakpɛɛ nii nɛɛ he adafitswaa gbɛ eshwa Yudea kɛ kpokpai ni bɛŋkɛ jɛmɛ lɛ fɛɛ nɔ.
Yohane Baptisilɔ lɛ yɛ tsuŋ lolo, ni eetao ni ele nitsumɔi ni Yesu nyɛɔ etsuɔ lɛ he nii babaoo. Yohane kaselɔi lɛ bagba lɛ naakpɛɛ nii nɛɛ ahe sane. Te ehere nɔ eha tɛŋŋ? Luka 7:11-18.
▪ Mɛni yaa nɔ beni Yesu bɛŋkɛɔ Nain lɛ?
▪ Mɛɛ gbɛ nɔ nɔ ni Yesu na lɛ sa ehe yɛ, ni mɛni efee?
▪ Te gbɔmɛi lɛ fee amɛnii yɛ naakpɛɛ nii ni Yesu fee lɛ he amɛha tɛŋŋ?