Yitso 68

Nii ni Etee nɔ Etsɔɔ yɛ Gbi ni ji Kpawo lɛ Nɔ

ASESEI Agbijurɔyeli lɛ naagbee gbi, gbi ni ji kpawo lɛ miiya nɔ lolo. Yesu miitsɔɔ nii yɛ sɔlemɔ tsu lɛ afa ko ni atsɛɔ jɛmɛ “shikatoo he” lɛ. Eka shi faŋŋ akɛ efee enɛ yɛ he ni atsɛɔ akɛ Yei Akpo lɛ masɛi yɛ he ni akɛ shikatoo he adekai ni mɛi kɛ shika woɔ mli lɛ mamɔɔ lɛ.

Daa gbɛkɛ yɛ gbijurɔyeli lɛ mli lɛ, asuɔ kane krɛdɛɛ ko ni ekpɛɔ yɛ sɔlemɔ tsu lɛ afa nɛɛ mli. Akɛ kanetsei wuji ejwɛ emamɔ shi yɛ biɛ, ni eko fɛɛ eko hiɛ bɛŋsin ejwɛ ni eyimɔ obɔbɔ kɛ mu. La ni kpɛɔ ni jɛ kanei ni tsoɔ kɛjɛɔ bɛŋsin 16 lɛ amli lɛ naa wa bɔ ni eeenyɛ ekpɛ ehewɔ kɛya shɔŋŋ kɛ je na. Nɔ ni Yesu kɛɛ agbɛnɛ lɛ baakai etoibolɔi lɛ yɛ nɔ ni amɛnaa nɛɛ he. Yesu jaje akɛ: “Mi ji je lɛ mli la lɛ. Mɔ ni nyiɛɔ misɛɛ lɛ, enyiɛŋ duŋ mli gbi ko gbi ko, shi moŋ eeena wala la lɛ.”

Farisifoi lɛ te shi wo lɛ akɛ: “Bo lɛ, bo diɛŋtsɛ ohe odase oyeɔ nɛɛ; odase lɛ bɛ mli.”

Ni Yesu ha amɛ hetoo ni ekɛɛ: “Kɛ miiye mi diɛŋtsɛ mihe odase hu jiŋŋ, midase lɛ yɛ mli, ejaakɛ mile he ni mijɛ kɛ he ni miyaa, shi nyɛ lɛ nyɛleee he ni mijɛ loo he ni miyaa.” Ekɛfata he akɛ: “Mi lɛ miyeɔ mi diɛŋtsɛ mihe odase, ni Tsɛ ni tsu mi lɛ hu yeɔ mihe odase.”

Farisifoi lɛ bi lɛ akɛ: “Nɛgbɛ o-Tsɛ lɛ yɔɔ?”

Yesu ha hetoo akɛ: “Nyɛleee mi ni nyɛsaa nyɛleee mi-Tsɛ; nyɛle mi jikulɛ, nyɛaale mi-Tsɛ hu.” Eyɛ mli akɛ Farisifoi lɛ miitao lolo ni amɔ Yesu moŋ, shi mɔ ko mɔ ko etaaa ehe.

Kɛkɛ ni Yesu kɛɛ ekoŋŋ akɛ: “Mi lɛ miiya, he ni miyaa lɛ, nyɛnyɛŋ jɛi nyɛba.”

Kɛkɛ ni Yudafoi lɛ bɔi susumɔ akɛ: “Ani eyaagbe ehe, hewɔ ekɛɔ akɛ, he ni miyaa lɛ, nyɛnyɛŋ jɛi nyɛba lɛ?”

Ni Yesu tsɔɔ mli akɛ: “Nyɛ lɛ nyɛjɛ shishi nɛɛ, mi lɛ mijɛ ŋwɛi; nyɛ lɛ nyɛjɛ je nɛɛ mli, mi lɛ mijɛɛɛ je nɛɛ mli.” Kɛkɛ ni ekɛfata he akɛ: “Ejaakɛ kɛ nyɛheee nyɛyeee akɛ mi nɛɛ ji lɛ lɛ, nyɛaagboi yɛ nyɛhe eshai lɛ amli.”

Yɛ anɔkwale mli lɛ, Yesu miiwie eshihilɛ dani ebatsɔ adesa kɛ bɔ ni eji Mesia ni awo ehe shi lɛ, Kristo lɛ he. Ni kɛlɛ, ŋwanejee ko bɛ he akɛ amɛbi lɛ akɛ: “Namɔ jio?”

Yɛ kpoomɔ ni amɛkpoo lɛ lɛ fɛɛ sɛɛ lɛ, Yesu ha amɛ hetoo akɛ: “Mɛni hewɔ ni mikɛ nyɛ wieɔ lolo po?” Ni kɛlɛ etee nɔ ekɛɛ amɛ akɛ: “Mɔ ni tsu mi lɛ anɔkwafo ni, ni mi lɛ, nii ni minu yɛ enaa lɛ, nɛkɛ nii nɛɛ nɔŋŋ miwieɔ mitsɔɔ je lɛ.” Yesu tee nɔ akɛ: “Beni nyɛna nyɛwo gbɔmɔ Bi lɛ nɔ lɛ, no nyɛaale akɛ mi ni, ni akɛ mitooo miyiŋ mifeee nɔ ko, shi moŋ bɔ ni mi-Tsɛ tsɔɔ mi lɛ, nakai miwieɔ. Ni mɔ ni tsu mi lɛ kɛ mi yɛ, Tsɛ lɛ shiko mikome, ejaakɛ mi lɛ, nɔ ni sa ehiɛ mifeɔ daa nɛɛ.”

Beni Yesu wie wiemɔi nɛɛ, mɛi pii he enɔ amɛye. Kɛkɛ ni ekɛɛ amɛ akɛ: “Kɛji nyɛhi shi yɛ miwiemɔi lɛ amli lɛ, minɔkwa kaselɔi ji nyɛ, ni nyɛaale anɔkwale lɛ, ni anɔkwale lɛ aaaha nyɛye nyɛhe.”

Kɛkɛ ni mɛi ni teɔ shi woɔ lɛ lɛ fo ewiemɔ lɛ mli akɛ: “Abraham seshibii ji wɔ, ni wɔtsɔmɔko mɔ ko nyɔji pɛŋ; ni te tɛŋŋ ni bo okɛɔ akɛ: Nyɛaaye nyɛheŋ?”

Eyɛ mli akɛ yɛ bei babaoo mli lɛ Yudafoi lɛ bajeɔ gbɔi anɔyeli hewalɛ shishi moŋ, shi kɛlɛ amɛkpɛlɛɛɛ nɔyelɔ yiwalɔ ko nɔ akɛ amɛnuŋtsɔ. Amɛkpooɔ akɛ aaatsɛ amɛ nyɔji. Shi Yesu tsɔɔ yɛ faŋŋ mli akɛ nyɔji ji amɛ lɛlɛŋ. Yɛ mɛɛ gbɛ nɔ? Yesu kɛɛ akɛ: “Lɛlɛŋ, lɛlɛŋ, miikɛɛ nyɛ akɛ: Mɔ fɛɛ mɔ ni feɔ esha lɛ, esha lɛ nyɔŋ ji lɛ.”

Kpɛlɛmɔ ni Yudafoi lɛ ekpɛlɛɛɛ nɔ akɛ amɛji nyɔji kɛha esha lɛ kɛ amɛ woɔ oshara shihilɛ ko mli. Yesu tsɔɔ mli akɛ: “Nyɔŋ ehiii shia kɛyaaa naanɔ; shi bi hiɔ shi kɛyaa naanɔ.” Akɛni nyɔŋ bɛ gboshiniyeli hegbɛ ko hewɔ lɛ, oshara baanyɛ aba ehe akɛ abaanyɛ ashwie lɛ be fɛɛ be. Bi ni afɔ lɛ diɛŋtsɛ loo mɔ ni ahe lɛ awo weku lɛ mli lɛ hiɔ shi “kɛyaa naanɔ,” ni ji bei abɔ ni eyɔɔ wala mli lɛ.

Yesu tee nɔ akɛ: “No hewɔ lɛ, kɛji bi lɛ ha nyɛye nyɛhe lɛ, no nyɛaaye nyɛhe lɛlɛŋ.” No hewɔ lɛ, anɔkwale ni haa mɛi yeɔ amɛhe lɛ ji anɔkwale ni kɔɔ Bi lɛ, Yesu Kristo he lɛ. Ewala ni ekɛsha afɔle akɛ adesa ni eye emuu lɛ nɔ pɛ aaanyɛ atsɔ aha mɔ ko aye ehe kɛjɛ esha ni kɛ gbele baa lɛ mli. Yohane 8:12-36.

▪ Nɛgbɛ Yesu tsɔɔ nii yɛ, yɛ gbi ni ji kpawo lɛ nɔ? Mɛni ba yɛ jɛmɛ, yɛ gbɛkɛ mli, ni enɛ kɔɔ Yesu nitsɔɔmɔ lɛ he yɛ mɛɛ gbɛ nɔ?

▪ Mɛni Yesu kɛɛ yɛ he ni ejɛ eba lɛ he, ni mɛni esa akɛ enɛ aha eje kpo yɛ mɔ ni eji lɛ he?

▪ Mɛɛ gbɛ nɔ Yudafoi lɛ ji nyɔji yɛ, shi mɛɛ anɔkwale baaha amɛye amɛhe?