Yitso 84

Kaselɔfeemɔ He Gbɛnaa Nii Lɛ

BENI Yesu shi Farisifonyo ni ale lɛ jogbaŋŋ, ni eka shi faŋŋ akɛ efata Sanhedrin lɛ mlibii lɛ ahe lɛ shia lɛ, etsa nɔ lolo kɛmiiya Yerusalem. Gbɔmɛi asafoi babaoo nyiɛ esɛɛ. Shi mɛni ji amɛyiŋtoi? Ni akɛ mɔ ko aaafee enɔkwa sɛɛnyiɛlɔ lɛ biɔ mɛni diɛŋtsɛ?

Beni amɛnyiɛ gbɛ kɛyaa lɛ, Yesu tsɔ ehiɛ ni ekɛ mɛi babaoo lɛ wie ni ekolɛ amɛnaa kpɛ amɛhe beni ekɛɛ akɛ: “Kɛji mɔ ko miiba miŋɔɔ ni enyɛɛɛ etsɛ kɛ enyɛ kɛ eŋa kɛ ebii kɛ enyɛmimɛi hii kɛ enyɛmimɛi yei kɛ lɛ diɛŋtsɛ esusuma tete lɛ, enyɛŋ etsɔ mikaselɔ.”

Mɛni ji nɔ ni Yesu tsɔɔ lɛ? Yesu ekɛɛɛ yɛ biɛ akɛ esɛɛnyiɛlɔi lɛ anyɛ amɛwekumɛi diɛŋtsɛ. Shi moŋ, amɛnyɛ amɛ kɛ shishinumɔ akɛ amɛbaasumɔ lɛ babaoo fe bɔ ni amɛsumɔɔ amɛ. Akɛɔ akɛ Yesu blematsɛ Yakob “sumɔɔɔ” Lea, shi esumɔɔ Rahel, ni tsɔɔ akɛ esumɔɔ Rahel babaoo fe bɔ ni esumɔɔ Lea.

Agbɛnɛ hu, susumɔ he okwɛ, akɛ Yesu kɛɛ akɛ esa akɛ kaselɔ lɛ anyɛ “lɛ diɛŋtsɛ esusuma tete,” loo ewala. Nɔ ni Yesu tsɔɔ ekoŋŋ ji akɛ esa akɛ anɔkwa kaselɔ lɛ asumɔ Lɛ fe bɔ ni esumɔɔ lɛ diɛŋtsɛ ewala tete po. No hewɔ lɛ Yesu miima nɔ mi akɛ kaselɔ ni mɔ ko aaatsɔ lɛ ji gbɛnaa nii ni hiɛdɔɔ yɔɔ he. Ejeee nɔ ni aafee ni asusuuu he jogbaŋŋ.

Jaramɔi kɛ yiwaai yɛ Yesu kaselɔ ni mɔ ko aaafee lɛ mli, taakɛ etee nɔ etsɔɔ mli lɛ: “Ni mɔ fɛɛ mɔ ni wooo esɛŋmɔtso etere ni enyiɛ misɛɛ lɛ, enyɛŋ mikaselɔ etsɔ.” Enɛ hewɔ lɛ, esa akɛ anɔkwa kaselɔ lɛ ajɛ etsui mli ekpɛlɛ nɔ akɛ eeekpee heguɔgbee ni Yesu kɛkpe lɛ naa, ni kɛ ehe miihia po lɛ, ni egbo yɛ Nyɔŋmɔ henyɛlɔi lɛ adɛŋ tamɔ bɔ ni etsɛŋ ni Yesu baafee lɛ.

No hewɔ lɛ, Kristo kaselɔ ni mɔ ko aaafee lɛ ji sane ko ni esa akɛ mɛi pii ni nyiɛ esɛɛ lɛ asusu he jogbaŋŋ. Yesu ma anɔkwale nɛɛ nɔ mi kɛtsɔ abɛbua ko nɔ. Ekɛɛ: “Ejaakɛ nyɛteŋ namɔ ni kɛ eetao mɔɔ ema lɛ ni etaŋ shi, ni ebu naa ekwɛ dã akɛ eyɛ nii bɔ ni aaashɛ naagbee lo? Koni ekaba akɛ, beni eje shishi ni eyanyɛɛɛ naa egbe lɛ, mɛi fɛɛ ni naa lɛ miibabɔi ehe fɛoyeli akɛ: ‘Nɛkɛ gbɔmɔ nɛɛ bɔi mɔɔ maa, shi enyɛɛɛ naa egbe.’ ”

No hewɔ lɛ Yesu miifee he mfoniri kɛmiiha mɛi babaoo ni nyiɛ esɛɛ lɛ akɛ dani amɛaatsɔmɔ ekaselɔi lɛ, esa akɛ amɛkpɛ amɛyiŋ jogbaŋŋ akɛ amɛbaanyɛ amɛwo nɔ ni ebiɔ lɛ obɔ, taakɛ bɔ ni nuu ni taoɔ ama mɔɔ lɛ buɔ naa jogbaŋŋ ni enaa akɛ eyɛ shika ni ekɛaagbe naa dani ejeɔ shishi lɛ. No hewɔ lɛ, Yesu tee nɔ ebu amɛ abɛ kroko akɛ:

“Aloo mɛɛ maŋtsɛ ni kɛji ekɛ maŋtsɛ kroko yaawuu lɛ ni etaŋ shi, ni eya ajina dã akɛ mɔ ni hiɛ mɛi akpei nyɔŋmai enyɔ kɛbaa eŋɔɔ nɛɛ eeenyɛ ekɛ lɛ ayakpe kɛ mɛi akpei nyɔŋma lo? Kɛ jeee nakai lɛ, beni mɔ kome lɛ nyiɛ shɔŋŋ kɛbaa lɛ, eeetsu ebɔfoi kɛya eŋɔɔ eyakpa kpatamɔ he fai.”

Kɛkɛ ni Yesu ma oti ni yɔɔ ebɛbua lɛ mli lɛ nɔ mi ni ekɛɛ: “Nakai nɔŋŋ kɛ̃ nyɛteŋ mɔ fɛɛ mɔ ni kwaaa nibii fɛɛ ni eyɔɔ lɛ, enyɛŋ mikaselɔ etsɔ.” Nakai esa akɛ mɛi babaoo ni nyiɛ esɛɛ lɛ, hɛɛ, kɛ mɛi fɛɛ ni nuɔ Kristo lɛ he sane lɛ ajɛ amɛsuɔmɔ mli amɛfee. Esa akɛ amɛfee klalo akɛ amɛkɛ nibii fɛɛ ni amɛyɔɔ lɛ baasha afɔle—amɛ nibii fɛɛ, kɛ amɛwala tete—kɛji amɛbaafee ekaselɔi lɛ. Ani obaajɛ osuɔmɔ mli ofee enɛ?

Yesu tee nɔ akɛ: “Ŋoo hi.” Ewie yɛ e-Gɔŋ nɔ Shiɛmɔ lɛ mli akɛ ekaselɔi lɛ ji “shikpɔŋ lɛ nɔ ŋoo,” ni tsɔɔ akɛ amɛyɛ hewalɛ ko yɛ mɛi anɔ ni baa amɛyi, tamɔ bɔ ni akɛ ŋoo baa nii ayi lɛ pɛpɛɛpɛ. Shi Yesu mu naa akɛ: “Shi kɛji ŋoo naanu gbo lɛ, mɛni akɛaawo lɛ ŋoo dɔŋŋ? Esaaa shikpɔŋ loo tumu nɔ tete; tsi atsiɔ ashwieɔ. Mɔ ni yɔɔ toi ni ekɛaanu lɛ, ha ni enu!”

No hewɔ lɛ Yesu tsɔɔ akɛ esaaa ni mɛi ni ebatsɔmɔ ekaselɔi yɛ be ko mli lɛ po gbɔjɔɔ amɛfaishitswaa akɛ amɛaaya nɔ lɛ mli. Kɛji amɛfee nakai lɛ, amɛbaafee mɛi ni he bɛ sɛɛnamɔ ko, mɛi ni ayeɔ amɛhe fɛo yɛ je lɛ mli kɛ mɛi hu ni esaaa Nyɔŋmɔ hiɛ, ni yɛ anɔkwale mli lɛ, ekɛ heguɔgbee baaba Nyɔŋmɔ nɔ. No hewɔ lɛ, abaashɛrɛ amɛ ashwie sɛɛ, hɛɛ, abaakpata amɛhiɛ tamɔ ŋoo ni hewalɛ ko bɛ mli loo nɔ ni mli ewo muji. Luka 14:25-35; 1 Mose 29:30-33; Mateo 5:13.

▪ Ni mɔ ko ‘aaanyɛ’ ewekumɛi kɛ lɛ diɛŋtsɛ ehe lɛ tsɔɔ mɛni?

▪ Mɛɛ abɛbuai enyɔ Yesu kɛha, ni mɛni amɛtsɔɔ?

▪ Mɛni ji oti ni yɔɔ Yesu naagbee wiemɔi ni kɔɔ ŋoo he lɛ mli?