Yitso 105
Jaramɔ Gbi ko Shishijee
BENI Yesu shi Yerusalem yɛ Ju gbɛkɛ lɛ, eku esɛɛ kɛtee Betania yɛ Mu Gɔŋ lɛ bokagbɛ jɔɔ mli gbɛ. Egbe esɔɔmɔ nitsumɔ lɛ mli naagbee gbii enyɔ naa yɛ Yerusalem. Ŋwanejee ko bɛ he akɛ Yesu ye jenamɔ lɛ ekoŋŋ yɛ enaanyo Lazaro ŋɔɔ. Kɛjɛ be mli ni eku esɛɛ kɛjɛ Yeriko kɛba yɛ Sohaa lɛ, enɛ ji gbɛkɛ ni ji ejwɛ nɔ ni eyeɔ yɛ Betania.
Agbɛnɛ, Jufɔ leebi maŋkpa, Nisan 11, ni lɛ kɛ ekaselɔi lɛ nyiɛ gbɛ nɔ ekoŋŋ. Gbi nɛɛ bafee jaramɔ gbi ko yɛ Yesu sɔɔmɔ lɛ mli, kɛ nɔ ni etsu nii waa yɛ mli fe fɛɛ. No ji naagbee gbi ni etee sɔlemɔ we lɛ mli. Ni no nɔŋŋ hu ji enaagbee gbi yɛ emaŋ sɔɔmɔ nitsumɔ lɛ mli dani ekojomɔ kɛ egbele lɛ shɛ.
Yesu kɛ ekaselɔi lɛ tsɔ nakai gbɛ ni tsɔɔ Mu Gɔŋ lɛ nɔ kɛyaa Yerusalem lɛ nɔŋŋ nɔ. Beni amɛnyiɛ gbɛ lɛ nɔ kɛjɛ Betania kɛyaa lɛ, Petro na tso ni Yesu lomɔ yɛ gbi ni etsɔ hiɛ lɛ leebi lɛ. Ebo akɛ: “Rabi, naa, agbamitso lɛ ni olomɔ lɛ eŋala!”
Shi mɛni hewɔ ni Yesu gbe tso lɛ? Etsɔɔ nɔ hewɔ lɛ ni etee nɔ ewie akɛ: “Lɛlɛŋ, miikɛɛ nyɛ akɛ: Kɛji nyɛyɛ hemɔkɛyeli ni nyɛjeee ŋwane lɛ, jeee nɔ ni mifee agbamitso nɛɛ kɛkɛ nyɛaafee; shi kɛji nyɛkɛɛ gɔŋ nɛɛ [Mu Gɔŋ lɛ ni amɛdamɔ nɔ lɛ] akɛ: ‘Fãa ni oyagbee ŋshɔŋ lɛ,’ eeetee. Ni nɔ fɛɛ nɔ ni nyɛaasɔle nyɛbi kɛ hemɔkɛyeli lɛ, nyɛnine aaashɛ nɔ.”
No hewɔ lɛ Yesu kɛ nikasemɔ ni he hiaa miiha ekaselɔi lɛ yɛ bɔ ni ehe hiaa ni amɛna Nyɔŋmɔ mli hemɔkɛyeli lɛ he kɛtsɔ tso lɛ ni eha egbi lɛ nɔ. Taakɛ ejaje lɛ: “Nii abɔ fɛɛ ni nyɛkpaa he fai yɛ nyɛsɔlemɔ mli lɛ, nyɛhea nyɛyea akɛ nyɛaaná, ni aaaŋɔha nyɛ.” Mɛɛ nikasemɔ ni he hiaa ni esa akɛ amɛkase nɛ, titri lɛ yɛ kaai ni yɔɔ gbeyei ni etsɛŋ ni amɛbaaba lɛ ahewɔ! Shi kɛlɛ, tsakpaa kroko ko yɛ agbamitso lɛ ni gbi lɛ kɛ bɔ ni hemɔkɛyeli ji ha lɛ mli.
Israel maŋ lɛ, ni tamɔ nɛkɛ agbamitso nɛɛ su lɛ lakaa mɔ waa. Eyɛ mli akɛ maŋ lɛ kɛ Nyɔŋmɔ yɛ kpaŋmɔ tsakpaa ko mli ni anaa amɛ yɛ kponɔgbɛ tamɔ mɛi ni yeɔ ekpɔi lɛ anɔ moŋ, shi ebafee faŋŋ akɛ hemɔkɛyeli fataaa he, ni ewooo yibii kpakpai ko. Akɛni amɛbɛ hemɔkɛyeli hewɔ lɛ, amɛmiihe amɛkpoo Nyɔŋmɔ diɛŋtsɛ Bi lɛ po! No hewɔ lɛ, akɛni eha agbamitso ni wooo yibii lɛ ŋala hewɔ lɛ, Yesu miifee bɔ ni nɛkɛ yinɔ ni wooo yibii, ni amɛbɛ hemɔkɛyeli lɛ naagbee lɛ baaba aha lɛ he mfoniri yɛ faŋŋ mli.
No sɛɛ etsɛɛɛ lɛ, Yesu kɛ ekaselɔi lɛ bote Yerusalem, ni taakɛ bɔ ni amɛfɔɔ feemɔ lɛ, amɛtee sɔlemɔ we lɛ, ni Yesu bɔi nitsɔɔmɔ yɛ jɛmɛ. Ni ŋwanejee ko bɛ he akɛ akɛni osɔfonukpai lɛ kɛ maŋbii lɛ ateŋ onukpai lɛ kaiɔ nɔ ni Yesu fee shikatsakelɔi lɛ yɛ gbi ni tsɔ hiɛ lɛ mli lɛ hewɔ lɛ, amɛte shi amɛwo lɛ ni amɛkɛɛ: “Mɛɛ hegbɛ oyɔɔ hewɔ ofeɔ nɛkɛ nibii nɛɛ, ni namɔ hao nɛkɛ hegbɛ nɛɛ?”
Ni Yesu ha amɛ hetoo ni ekɛɛ: “Mi hu mabi nyɛ sane kome, ni kɛji nyɛtsɔɔ mi lɛ, mi hu matsɔɔ nɔ hegbɛ ni miyɔɔ hewɔ ni mifeɔ nɛkɛ nibii nɛɛ. Yohane baptisimɔ lɛ, nɛgbɛ ejɛ? Ŋwɛi ejɛ aloo gbɔmɛi adɛŋ?”
Ni osɔfoi lɛ kɛ maŋbii lɛ ateŋ onukpai lɛ bɔi ajinatoo yɛ amɛteaŋ yɛ bɔ ni amɛaaha lɛ hetoo lɛ he ni amɛkɛɛ: “Kɛji wɔkɛɛ ‘Ejɛ ŋwɛi’ lɛ, eeekɛɛ wɔ akɛ: ‘Mɛɛ hewɔ nyɛheee lɛ nyɛyeee mɔ?’ Ni kɛji wɔkɛɛ ‘Ejɛ gbɔmɛi adɛŋ’ lɛ, no hu wɔmiishe asafo lɛ gbeyei, ejaakɛ mɛi fɛɛ buɔ Yohane gbalɔ.”
Hiɛnyiɛlɔi lɛ leee hetoo ni amɛbaaha lɛ. No hewɔ lɛ amɛha Yesu hetoo akɛ: “Wɔleee.”
Kɛkɛ ni Yesu hu kɛɛ: “Belɛ mi hu mitsɔɔɔ nɔ hegbɛ ni miyɔɔ hewɔ ni mifeɔ nɛkɛ nibii nɛɛ mɔ.” Mateo 21:19-27; Marko 11:19-33; Luka 20:1-8.
▪ Mɛni sa kadimɔ waa yɛ Jufɔ, Nisan 11 he?
▪ Mɛɛ nikasemɔi Yesu kɛha yɛ be mli ni eha agbamitso lɛ ŋala lɛ?
▪ Te Yesu ha mɛi ni biɔ lɛ hegbɛ ni eyɔɔ ni ekɛfeɔ nibii nɛɛ lɛ hetoo eha tɛŋŋ?