Fã 5
Naakpɛɛ Nikeenii Ni Ji Nihalamɔ Mli Heyeli
1, 2. Mɛɛ nikeenii ko ni yɔɔ naakpɛɛ fata wɔbɔɔ su he?
KƐJI wɔɔnu nɔ hewɔ ni Nyɔŋmɔ eŋmɛ amanehulu gbɛ kɛ nɔ ni ebaafee yɛ he lɛ shishi lɛ, belɛ ehe miihia ni wɔhiɛ asɔ bɔ ni efee wɔ aha lɛ waa. Efee nibii babaoo fe bɔ ni ebɔ wɔ kɛ gbɔmɔtso kɛ aŋsɔ kɛkɛ. Ebɔ wɔ kɛ jwɛŋmɔŋ kɛ henumɔŋ sui krɛdɛɛi komɛi hu.
2 Jwɛŋmɔ kɛ henumɔŋ su ni akɛbɔ wɔ lɛ mli nɔ titri ko ji nihalamɔ mli heyeli. Hɛɛ, Nyɔŋmɔ kɛ jwɛŋmɔŋ hewalɛ ni wɔkɛaahala nɔ ni wɔsumɔɔ bɔ wɔ. Lɛlɛŋ, eji edɛŋ nikeenii ko ni yɔɔ nyam waa.
Gbɛ ni Atsɔ nɔ Afee Wɔ
3-5. Mɛni hewɔ wɔhiɛ sɔɔ heyeli waa lɛ?
3 Nyɛhaa wɔsusua bɔ ni heyeli ni akɛfeɔ nɔ ni asumɔɔ lɛ kɔɔ nɔ hewɔ ni Nyɔŋmɔ eŋmɛ amanehulu gbɛ lɛ he lɛ he wɔkwɛa. Klɛŋklɛŋ kwraa lɛ, susumɔ enɛ he okwɛ: Ani ohiɛ sɔɔ heyeli ni oyɔɔ ni okɛaahala nɔ ni obaafee kɛ nɔ ni obaakɛɛ, nɔ ni obaaye kɛ nɔ ni obaawo, nitsumɔ ni osumɔɔ ni otsu, kɛ he ni obaahi kɛ bɔ ni obaahi shi oha lɛ waa? Aloo obaasumɔ ni mɔ ko atsɔɔ bo nɔ ni okɛɛ kɛ nɔ ni ofee yɛ owala be fɛɛ mli?
4 Mɔ ko bɛ ni ejwɛŋmɔ mli ka shi jogbaŋŋ ni ebaasumɔ ni mɔ ko akudɔ eshihilɛ bɔ ni esumɔɔ. Mɛni hewɔ? Yɛ bɔ ni Nyɔŋmɔ fee wɔ lɛ hewɔ. Biblia lɛ kɛɔ wɔ akɛ Nyɔŋmɔ bɔ gbɔmɔ yɛ ‘esubaŋ nɔ, tamɔ ehenɔ,’ ni jwɛŋmɔŋ hewalɛi ni Nyɔŋmɔ diɛŋtsɛ yɔɔ lɛ ekome ji heyeli ni ekɛhalaa nɔ ni esumɔɔ. (1 Mose 1:26; 5 Mose 7:6) Beni ebɔ adesai lɛ, eha amɛ nakai jwɛŋmɔŋ nyɛmɔ ni yɔɔ naakpɛɛ lɛ—nikeenii ni ji heyeli ni ekɛaafee nɔ ni esumɔɔ. No ji yiŋtoo kome hewɔ ni wɔnijiaŋ jeɔ wui kɛji nɔyelɔi yiwalɔi miiye wɔnɔ nyɔŋ lɛ.
5 No hewɔ lɛ, suɔmɔ ni asumɔɔ heyeli lɛ jeee nɔ ni ba trukaa, ejaakɛ Nyɔŋmɔ lɛ, heyeli Nyɔŋmɔ ni. Biblia lɛ kɛɔ akɛ: “He ni Yehowa mumɔ lɛ yɔɔ lɛ, jɛmɛ heyeli yɔɔ.” (2 Korintobii 3:17, NW) No hewɔ lɛ, Nyɔŋmɔ bɔ wɔ kɛ heyeli ni wɔkɛaafee nɔ ni wɔsumɔɔ. Akɛni ele bɔ ni wɔjwɛŋmɔi kɛ henumɔi baatsu nii aha hewɔ lɛ, ele akɛ nihalamɔ mli heyeli baaha wɔna miishɛɛ ni fe fɛɛ.
6. Nyɔŋmɔ bɔ wɔjwɛŋmɔ ni ekɛ heyeli atsu nii kɛ gbeekpamɔ yɛ mɛɛ gbɛ nɔ?
6 Nyɔŋmɔ ha wɔ nyɛmɔ ni wɔkɛaajwɛŋ efata nikeenii ni ji nihalamɔ mli heyeli nɛɛ he, koni wɔkɛsusu saji ahe, ni wɔkpɛ wɔyiŋ, ni wɔle jalɛ yɛ nɔ ni ejaaa he. (Hebribii 5:14) Enɛ hewɔ lɛ, esa akɛ nihalamɔ mli heyeli lɛ adamɔ nilee mli ni wɔɔjɛ wɔhala nii lɛ nɔ. Afeee wɔ tamɔ tsɔnei ni bɛ jwɛŋmɔ ni akɛhalaa nɔ ni asumɔɔ. Ni nakai nɔŋŋ hu afeee wɔ ni wɔjɛ henumɔ ni tsirɛɔ mɔ kɛkɛ mli wɔfee nii, tamɔ afee kooloi lɛ. Shi moŋ, afee wɔ aŋsɔ ni yɔɔ naakpɛɛ lɛ ni ekɛ heyeli ni wɔkɛaahala nɔ ni wɔsumɔɔ lɛ atsu nii yɛ gbeekpamɔ mli.
Shishijee ni Hi Fe Fɛɛ
7, 8. Mɛɛ shishijee kpakpa Nyɔŋmɔ ha wɔ klɛŋklɛŋ fɔlɔi?
7 Bɔni afee ni Nyɔŋmɔ kɛtsɔɔ bɔ ni esusuɔ wɔ klɛŋklɛŋ fɔlɔi, Adam kɛ Hawa he ehaa lɛ, eha amɛ nɔ fɛɛ nɔ ni mɔ ko aaanyɛ ajɛ jwɛŋmɔ kpakpa mli atao lɛ eko, kɛfata nikeenii ni ji heyeli ni amɛkɛaafee nɔ ni amɛsumɔɔ lɛ he. Akɛ amɛ wo paradeiso agbo ko ni tamɔ abɔɔ mli. Amɛyɛ heloonaa nibii babaoo. Amɛyɛ jwɛŋmɔi kɛ gbɔmɔtsei ni eye emuu, no hewɔ lɛ ebaŋ lɛ akɛ amɛbaagbɔlɔ aloo hela baamɔmɔ amɛ loo amɛaagboi—amɛbaanyɛ amɛhi shi kɛya naanɔ. Kulɛ amɛbaafɔ bii ni eye emuu, ni amɛ hu amɛbaanyɛ amɛna wɔsɛɛ be ni yɔɔ miishɛɛ mli ŋɔɔmɔ kɛya naanɔ. Ni kulɛ gbɔmɛi ni amɛyi miifa kɛmiiya hiɛ nɛɛ baana nitsumɔ ni haa mɔ naa miishɛɛ ni ji shikpɔŋ muu lɛ fɛɛ ni amɛaaha etsɔ paradeiso.—1 Mose 1:26-30; 2:15.
8 Biblia lɛ wieɔ nɔ ni akɛha amɛ nɛɛ he akɛ: “Ni Nyɔŋmɔ kwɛ nibii fɛɛ ni efee lɛ, ni naa! ehi naakpa.” (1 Mose 1:31) Biblia lɛ hu wieɔ Nyɔŋmɔ he akɛ: “Enitsumɔi lɛ hi pɛ.” (5 Mose 32:4) Hɛɛ, Bɔlɔ lɛ ha adesai aweku lɛ shishijee ni eye emuu. Nɔ ko bɛ ni baaha ehi fe nakai. Mɛɛ Nyɔŋmɔ ni susuɔ mɔ he eji nɛkɛ!
Heyeli ni Husui Yɔɔ He
9, 10. Mɛni hewɔ esa akɛ akɛ heyeli atsu nii jogbaŋŋ lɛ?
9 Shi, ani Nyɔŋmɔ to eyiŋ akɛ husui akahi heyeli ni akɛaafee nɔ ni asumɔɔ lɛ he? Feemɔ maŋtiase wulu ko ni tsɔne kudɔmɔ he mlai bɛ mli, ni mɔ fɛɛ mɔ baanyɛ akudɔ etsɔne kɛnyiɛ he ni esumɔɔ, ni ewo lɛ foi bɔ ni esumɔɔ lɛ he mfoniri okwɛ. Ani obaasumɔ ni okudɔ otsɔne yɛ shihilɛi ni tamɔ nɛkɛ mli? Dabi, no baafee tsɔne kudɔmɔ mli basabasa-feemɔ, ni eka shi faŋŋ akɛ ekɛ osharai pii baaba.
10 Nakai nɔŋŋ eji yɛ Nyɔŋmɔ nikeenii ni ji heyeli lɛ he. Heyeli ni husu bɛ he lɛ baatsɔɔ shihilɛ mli basabasa-feemɔ. Esa akɛ mlai ni baakudɔ adesai anifeemɔ ahi shi. Nyɔŋmɔ Wiemɔ lɛ kɛɔ akɛ: “Nyɛfea nyɛnii tamɔ mɛi ni eye amɛhe, ni nyɛkɛ nyɛheyeli lɛ akatsua nii akɛ naajiemɔ kɛha efɔŋfeemɔ.” (1 Petro 2:16, JB) Nyɔŋmɔ miisumɔ ni akɛ heyeli atsu nii kɛha mɛi fɛɛ asɛɛnamɔ. Eyiŋtoo kɛha wɔ lɛ jeee ni wɔna heyeli kwraa, shi moŋ heyeli ni husu yɔɔ he, yɛ mla nɔ yeli shishi.
Namɔ Mlai?
11. Namɔ mlai afee wɔ ni wɔye nɔ?
11 Namɔ mlai afee wɔ ni wɔye nɔ? Ŋmalɛ ni yɔɔ 1 Petro 2:16 ( JB) lɛ fa kroko lɛ hu kɛɔ akɛ: “Jeee mɔ ko nyɔji ji nyɛ, ja Nyɔŋmɔ pɛ.” Enɛ etsɔɔɔ nyɔŋyeli ni anyɛɔ mɔ nɔ yɛ mli, shi moŋ, etsɔɔ akɛ afee wɔ bɔ ni wɔɔna miishɛɛ ni fe fɛɛ kɛji wɔba wɔhe shi wɔha Nyɔŋmɔ mlai. (Mateo 22:35-40) Emlai, ni hi kwraa fe mlai fɛɛ ni adesai ewo pɛŋ lɛ, kɛ gbɛtsɔɔmɔ ni hi fe fɛɛ haa. “Miji Yehowa, o-Nyɔŋmɔ lɛ, Mɔ ni tsɔɔ bo nii ni hi hao, Mɔ ni tsɔɔ bo gbɛ ni onyiɛ nɔ lɛ.”—Yesaia 48:17.
12. Mɛɛ heyeli ni wɔkɛaahala nɔ ni wɔsumɔɔ wɔyɔɔ yɛ Nyɔŋmɔ mlai amli?
12 Yɛ nakai beaŋ nɔŋŋ lɛ, Nyɔŋmɔ mlai haa heyeli babaoo ni akɛaahala nɔ ni asumɔɔ, yɛ amɛhusui lɛ amli. Nɔ ni jɛɔ mli baa ji nibii sɔrɔtoi pii, ni haa adesai aweku lɛ he feɔ miishɛɛ. Susumɔ niyenii sɔrɔtoi, atadei, lalai, nibii ni atɛŋ, kɛ shiai ni yɔɔ je lɛŋ fɛɛ lɛ he okwɛ. Eyɛ faŋŋ akɛ wɔbaasumɔ ni wɔhala nɔ ni wɔsumɔɔ yɛ nibii tamɔ enɛɛmɛi amli moŋ fe ni mɔ ko aaakpɛ eyiŋ eha wɔ.
13. Mɛɛ adebɔɔ mli mlai esa akɛ wɔye nɔ kɛha wɔ diɛŋtsɛ wɔhilɛ?
13 Enɛ hewɔ lɛ abɔ wɔ ni wɔna miishɛɛ fe fɛɛ kɛ wɔba wɔhe shi wɔha Nyɔŋmɔ mlai ni kɔɔ adesai anifeemɔi ahe. Nakai nɔŋŋ eji kɛ wɔba wɔhe shi wɔha Nyɔŋmɔ adebɔɔ mli mlai lɛ. Akɛ nɔkwɛmɔ nɔ lɛ, kɛ wɔku wɔhiɛ wɔfɔ graviti mla lɛ nɔ, ni wɔtu kɛjɛ ŋwɛi shɔŋŋ lɛ, wɔbaapila aloo wɔbaagbe wɔhe po. Kɛji wɔku wɔhiɛ wɔshwie wɔgbɔmɔtso lɛ mligbɛ mlai anɔ ni wɔkpa niyeli, kɛ nu numɔ, aloo kɔɔyɔɔ muu lɛ, wɔbaagboi.
14. Te wɔfeɔ tɛŋŋ wɔleɔ akɛ abɔɔɔ adesai ni amɛtsi amɛhe kɛjɛ Nyɔŋmɔ he hu?
14 Bɔ ni eka shi faŋŋ akɛ abɔ wɔ ni wɔba wɔhe shi wɔha Nyɔŋmɔ adebɔɔ mli mlai lɛ, nakai nɔŋŋ hu abɔ wɔ kɛ hiamɔ akɛ wɔba wɔhe shi wɔha Nyɔŋmɔ mlai ni kɔɔ jeŋba kɛ shihilɛ kpakpa he lɛ hu. (Mateo 4:4) Abɔɔɔ adesai ni amɛtsi amɛhe kɛjɛ amɛ-Feelɔ lɛ he ni amɛye omanye. Gbalɔ Yeremia wie akɛ: “Adesa ni nyiɛ nɛɛ, bɔ ni eeetsɔ ejaje enajifaamɔi eha lɛ, ebɛ edɛŋ. Yehowa, kã mi.” (Yeremia 10:23, 24) No hewɔ lɛ abɔ adesai ni amɛhi Nyɔŋmɔ nɔyeli shishi, yɛ gbɛ fɛɛ gbɛ nɔ, jeee amɛ diɛŋtsɛ amɛnɔyeli shishi.
15. Ani kulɛ Nyɔŋmɔ mlai lɛ baafee jatsu ko yɛ Adam kɛ Hawa nɔ?
15 Kulɛ toiboo ni wɔ klɛŋklɛŋ fɔlɔi lɛ aaafee amɛha Nyɔŋmɔ mlai lɛ efeŋ jatsu ko ni ka amɛnɔ. Kulɛ ebaatsu nii kɛha amɛ, kɛ adesai aweku muu lɛ fɛɛ hilɛ. Eji mɛi enyɔ lɛ hi shi yɛ Nyɔŋmɔ mlai lɛ ahusui amli kulɛ, nibii fɛɛ baaya nɔ jogbaŋŋ. Yɛ anɔkwale mli lɛ, kulɛ benɛ wɔyɛ miishɛɛ paradeiso fɛfɛo ko mli akɛ adesai aweku ni efee ekome yɛ suɔmɔ mli! Kulɛ helai, amanehului, kɛ gbele bɛ.
[Mfoniri ni yɔɔ baafa 11]
Bɔlɔ lɛ ha adesai shishijee ni eye emuu
[Mfoniri ni yɔɔ baafa 12]
Ani obaasumɔ ni okudɔ tsɔne yɛ tsɔnei pii ateŋ kɛji tsɔnei akudɔmɔ he mlai bɛ?