Namɔ Diɛŋtsɛ Yeɔ Je Lɛ Nɔ?

Mɛi pii kɛ wiemɔ kome baaha sanebimɔ ni yɔɔ yiteŋgbɛ nɛɛ hetoo—Nyɔŋmɔ. Shi nɔ ni sa kadimɔ jogbaŋŋ ji akɛ, he ko he ko bɛ ni Biblia lɛ kɛɔ yɛ akɛ Yesu Kristo loo e-Tsɛ ji je nɛŋ nɔyelɔ diɛŋtsɛ. Nɔ ni tamɔɔɔ nakai lɛ, Yesu kɛɛ akɛ: “Abaafã je nɛŋ lumɔ [loo nɔyelɔ] lɛ ashɛ afɔ.” Ni ekɛɛ kɛfata he akɛ: “Je lɛŋ lumɔ [loo nɔyelɔ] lɛ miiba, ni ebɛ nɔ ko yɛ mimli.”—Yohane 12:31; 14:30; 16:11.

No hewɔ lɛ je nɛŋ nɔyelɔ lɛ teɔ shi ewoɔ Yesu. Namɔ baanyɛ afee nɛkɛ mɔ nɛɛ?

Anaa Hetoo lɛ Kɛjɛɔ Jeŋ Shihilɛi Amli

Yɛ mɔdɛŋ ni adesai ni hiɛ jwɛŋmɔ kpakpa lɛ bɔɔ lɛ fɛɛ sɛɛ lɛ, je lɛ ena nɔ waa yɛ yinɔsane be fɛɛ mli. Enɛ haa gbɔmɛi ni susuɔ saji ahe lɛ biɔ, taakɛ tsutsu niŋmalɔ David Lawrence bi lɛ, akɛ: “‘Shikpɔŋ nɔ toiŋjɔlɛ’—etamɔ nɔ ni mɔ fɛɛ mɔ miisumɔ. ‘Ana gbɔmɛi ahe tsuijurɔ’—etamɔ nɔ ni gbɔmɛi ni yɔɔ je lɛŋ lɛ fɛɛ nuɔ he nakai kɛhaa amɛhe. Belɛ mɛni etɔtɔ loo ejaaa lɛ mɔ? Mɛni hewɔ tawuu woɔ wɔhe gbeyei yɛ nɔ ni gbɔmɛi shweɔ yɛ amɛfɔmɔ su naa lɛ fɛɛ sɛɛ?”

Etamɔ sane ko ni kɛ ehe kpãaa gbee, aloo jeee nakai? Yɛ be mli ni adebɔɔ su ni gbɔmɛi hiɛ ji ni amɛkɛ amɛhe ahi shi yɛ toiŋjɔlɛ mli lɛ, amɛnyɛɔ amɛhe ni amɛgbeɔ amɛhe moŋ—kɛ hiɛdɔɔ diɛŋtsɛ. Susumɔ yiwalɛ kpelei ni tamɔ kooloi anifeemɔ ni henumɔ bɛ mli ni yaa nɔ lɛ he okwɛ. Adesai kɛ kɔɔyɔɔ ni ebɔɔ yɔɔ mli ni ji gas ni gbeɔ mɔ, gboklɛfoi aŋsaraŋ, ofɛ̃lai, napalm okplɛmii ni tamɔ mu ni tsoɔ, kɛ yiwalɛ gbɛ̀i krokomɛi etsu nii ni amɛkɛfee gbɔmɛi niseniianii ni amɛkɛgbe amɛhe ni mɔbɔnalɛ bɛ mli.

Ani oheɔ oyeɔ akɛ adesai ni tsui shweɔ toiŋjɔlɛ kɛ miishɛɛ lɛ baanyɛ ni amɛjɛ amɛsuɔmɔ mli ni amɛfee efɔŋ kpeteŋkpele ni tamɔ nɛkɛ amɛshi mɛi krokomɛi? Mɛɛ hewalɛi tsirɛɔ gbɔmɛi ayisɛɛ kɛyaa nyaŋemɔ nitsumɔ ni tamɔ nɛkɛ he loo amɛkudɔɔ amɛ kɛyaa shihilɛi ni haa amɛnuɔ he akɛ esa akɛ amɛfee efɔŋ ni tamɔ nɛkɛ mli lɛ? Ani osusu he pɛŋ akɛ ani benɛ hewalɛ fɔŋ ko ni anaaa lɛ miitsirɛ gbɔmɛi koni amɛye awui ni tamɔ nɛkɛ?

Ayoo Mɛi ni Ji Je Lɛŋ Nɔyelɔi Lɛ

Ehe ehiaaa ni aka yiŋ asusu sane lɛ he, ejaakɛ Biblia lɛ tsɔɔ faŋŋ akɛ mɔ ko ni anaaa lɛ ni yɔɔ nilee ji mɔ ni kudɔɔ gbɔmɛi kɛ jeŋmaji fɛɛ. Ekɛɔ akɛ: “Jeŋ muu lɛ fɛɛ kã mɔ fɔŋ lɛ hewalɛ mli.” Ni Biblia lɛ haa aleɔ lɛ akɛ: “Mɔ ni . . . atsɛɔ lɛ . . . diabolo (naafolɔlɔ loo abonsam) lɛ kɛ satan (henyɛlɔ) lɛ ni shishiuɔ jeŋ muu lɛ fɛɛ lɛ.”—1 Yohane 5:19; Kpojiemɔ 12:9.

Be ko beni ‘Abonsam ka’ Yesu lɛ, Yesu biii sane yɛ Satan nitsumɔ akɛ je lɛ nɔyelɔ lɛ he. Biblia lɛ tsɔɔ nɔ ni ba lɛ mli akɛ: “Asaŋ abonsam lɛ ŋɔ lɛ kɛtee gɔŋ kpeteŋkpele ni kwɔ ko nɔ, ni eŋɔ jeŋ maŋtsɛyelihei fɛɛ kɛ amɛnunyam lɛ etsɔɔ lɛ; ni ekɛɛ lɛ akɛ: Maŋɔ enɛɛmɛi fɛɛ mahao, kɛji okula shi ojá mi lɛ. Kɛkɛ ni Yesu kɛɛ lɛ akɛ: Ho misɛɛ, satan!”—Mateo 4:1, 8-10.

Susumɔ enɛ he okwɛ. Abonsam ka Yesu kɛtsɔ “jeŋ maŋtsɛyelihei fɛɛ” ni ekɛaaha lɛ lɛ nɔ. Ni kɛlɛ, eji Satan jeee nɛkɛ maŋtsɛyelii nɛɛ anɔyelɔ diɛŋtsɛ kulɛ, ani nɔ ni Satan kɛhaa nɛɛ aaanyɛ afee kaa diɛŋtsɛ? Dabi, kulɛ enyɛŋ efee kaa. Ni kadimɔ akɛ, Yesu ekɛɛɛ akɛ nɛkɛ jeŋ nɔyelii nɛɛ fɛɛ jeee Satan nii, sane ni ebaanyɛ ewie eji Satan bɛ hewalɛ yɛ nɔ kulɛ. No hewɔ lɛ, Satan Abonsam ji je lɛ nɔyelɔ diɛŋtsɛ ni anaaa lɛ lɛ! Yɛ anɔkwale mli lɛ Biblia lɛ tsɛɔ lɛ “nibii agbɛjianɔtoo nɛɛ nyɔŋmɔ lɛ.” (2 Korintobii 4:4, New World Translation) Ni kɛlɛ, te fɛɛ tɛŋŋ ni nɛkɛ yiwalɔ nɛɛ ba hewalɛ gbɛhe ni tamɔ nɛkɛ mli lɛ?

Kulɛ mɔ ni batsɔ Satan lɛ ji ŋwɛibɔfo ni Nyɔŋmɔ bɔ lɛ, shi ehiɛ bakɔ̃ gbɛhe mli ni Nyɔŋmɔ yɔɔ lɛ nɔ. Etswa nɔyeli hegbɛ ni ja ni Nyɔŋmɔ yɔɔ lɛ mpoa. Nɔ ni jɛ mli ba ji onufu ko ni ekɛ lɛ tsu nii akɛ enaawielɔ koni ekɛlaka klɛŋklɛŋ yoo, ni ji Hawa, ni enɛ ha enine shɛ yoo lɛ kɛ ewu Adam nɔ koni amɛfee nɔ ni ekɛɔ amɛ lɛ moŋ fe nɔ ni amɛaafee toiboo amɛha Nyɔŋmɔ. (1 Mose 3:1-6; 2 Korintobii 11:3) Ekɛɛ hu akɛ ebaanyɛ egbala Adam kɛ Hawa shwiei ni afɔko amɛ lɛ fɛɛ kɛjɛ Nyɔŋmɔ he. No hewɔ lɛ Nyɔŋmɔ ha be koni Satan abɔ mɔdɛŋ ni eha nɔ ni ekɛɔ nɛɛ aba mli, shi Satan nyɛko afee nakai.—Hiob 1:6-12; 2:1-10.

Nɔ ni sa kadimɔ ji akɛ, jeee Satan kome pɛ yeɔ je lɛ nɔ lɛ. Enyɛ elaka ŋwɛibɔfoi lɛ ateŋ mɛi komɛi koni amɛbafata ehe yɛ atua ni etse eshi Nyɔŋmɔ lɛ mli. Mɛnɛɛmɛi batsɔmɔ daimonioi, emumɔŋ hefatalɔi yɛ efɔŋfeemɔ mli. Amɛhe Biblia lɛ wieɔ beni ewoɔ Kristofoi ahewalɛ akɛ: “Nyɛdamɔa shi shiŋŋ nyɛshia Abonsam ŋaatsɔɔi lɛ; ejaakɛ jeee heloo kɛ la wɔkɛna nɔmɔ lɛ, shi moŋ . . . wɔkɛ je nɛŋ nɔyelɔi ni yɔɔ duŋ nɛɛ mli lɛ, kɛ mumɔi fɔji asafoi ni yɔɔ ŋwɛiniiaŋ lɛ.”—Efesobii 6:11, 12, NW.

Tee Shi Owo Mumɔi Fɔji

Nɛkɛ je nɛŋ nɔyelɔi yiwalɔi ni anaaa amɛ nɛɛ etswa amɛfai shi akɛ amɛbaalaka adesai fɛɛ, ni amɛgbala amɛ kɛjɛ Nyɔŋmɔ jamɔ he. Gbɛ kome ni mumɔi fɔji nɛɛ tsɔɔ nɔ amɛfeɔ enɛ ji kɛtsɔ ha ni amɛhaa asusuɔ akɛ ahiɔ shi yɛ gbele sɛɛ lɛ nɔ, eyɛ mli moŋ akɛ Nyɔŋmɔ Wiemɔ lɛ tsɔɔ faŋŋ akɛ gbohii lɛ leee nɔ ko nɔ ko. (1 Mose 2:17; 3:19; Ezekiel 18:4; Lala 146:3, 4; Jajelɔ 9:5, 10) No hewɔ lɛ, mumɔ fɔŋ ko, ni miikase mɔ ni egbo lɛ gbee kɛ mɔ ni egbo lɛ wekumɛi loo nanemɛi ni yɔɔ wala mli baawie, kɛtsɔ mumɔi atsɛlɔ ko loo “gbee” ko ni jɛ shihilɛhe ni anaaa jɛmɛ lɛ nɔ. “Gbee” lɛ kwaa efeɔ ehe mɔ ni egbo lɛ, ni kɛlɛ eji daimonio diɛŋtsɛ!

No hewɔ lɛ, kɛ onu “gbee” ko he lɛ, kaaha alaka bo. Kpoomɔ nɔ fɛɛ nɔ ni ekɛɔ bo lɛ, ni ogba mli ojaje Yesu wiemɔi nɛɛ: “Ho misɛɛ, satan!” (Mateo 4:10; Yakobo 4:7) Kaaha nibii ni yaa nɔ yɛ mumɔi ashihilɛhe lɛ mli ni otaoɔ ole lɛ miiha okɛ ohe miibɔ mumɔi fɔji lɛ. Atsɛɔ ohe ni okɛwoɔ mli nɛkɛ lɛ akɛ mumɔi atsɛmɔ, ni Nyɔŋmɔ bɔɔ mɛi ni jaa lɛ lɛ kɔkɔ yɛ nibii ni kɔɔ enɛɛmɛi fɛɛ he lɛ ahe. Biblia lɛ buɔ “mɔ ko ni . . . kalaa, . . . aloo mɔ ni tsɛɔ sisa, aloo ayɛ, aloo mɔ ni biɔ gbohii anii” lɛ fɔ.—5 Mose 18:10-12; Galatabii 5:19-21; Kpojiemɔ 21:8.

Akɛni mumɔi atsɛmɔ haa mɔ ko bajeɔ daimonioi lɛ ahewalɛ shishi hewɔ lɛ, tee shi owo ehe nifeemɔi lɛ fɛɛ, ni bɔ ni etamɔ nɔ ni yɔɔ ŋmɔlɔ ha, aloo eyɔɔ miishɛɛ ha lɛ kɔɔɔ he eko. Nɔ ni fata nɛkɛ nifeemɔi nɛɛ ahe ji kulo mlikwɛmɔ, Ouija taoi kɛ nitsumɔ, ESP, dɛ-kwɛmɔ kɛ ŋulamiiaŋkwɛmɔ. Daimonioi lɛ haa anuɔ bolɔmɔi ahe ni akɛ hiŋmɛi naa nibii komɛi yɛ shiai komɛi ni amɛkɛfee amɛshihilɛhei lɛ amli.

Kɛfata he lɛ, mumɔi fɔji lɛ kɛ adesai eshafeemɔ su lɛ tsuɔ nii ni amɛkɛhaa woji, sinii, kɛ tɛlivishiŋ nɔ nibii ni jieɔ jeŋba shara kɛ bɔlɛnamɔ mli nifeemɔi ni jeee adebɔɔ naa nɔ shwereɔ. Daimonioi lɛ le akɛ kɛ ajieee susumɔi gbohii kɛjɛɛɛ jwɛŋmɔ lɛ mli lɛ, ebaaka jɛmɛ kwraa ni ebaaha gbɔmɛi aba jeŋba gbonyo—tamɔ daimonioi lɛ diɛŋtsɛ.—1 Mose 6:1, 2; 1 Tesalonikabii 4:3-8; Yuda 6.

Eji anɔkwale akɛ mɛi pii baaye jwɛŋmɔ ni ji akɛ mumɔi fɔji yeɔ je nɛɛ nɔ lɛ he fɛo. Shi he ni amɛheee amɛyeee lɛ bɛ naakpɛɛ, ejaakɛ Biblia lɛ kɛɔ akɛ: “Satan diɛŋtsɛ tsakeɔ ehe etsɔɔ la bɔfo.” (2 Korintobii 11:14) Eshishiumɔ ni fe fɛɛ lɛ ji bɔ ni eshwilaa mɛi ajwɛŋmɔ yɛ anɔkwale ni eji akɛ lɛ kɛ edaimonioi lɛ yɛ diɛŋtsɛ lɛ he lɛ. Shi kaaha aalaka bo! Abonsam kɛ edaimonioi lɛ yɛ diɛŋtsɛ, ni ehe miihia ni ote shi owo amɛ be fɛɛ be.—1 Petro 5:8, 9.

Miishɛɛ sane ji akɛ, eshwɛ fioo ni Satan kɛ esɛɛnyiɛlɔi lɛ fɛɛ baafee mɛi ni bɛ dɔŋŋ! Biblia lɛ maa nɔ mi akɛ: “Je lɛ [ni daimonioi nɔyelɔi lɛ fata he lɛ] hoɔ eyaa . . . ; shi mɔ ni feɔ Nyɔŋmɔ suɔmɔnaa nii lɛ hiɔ shi kɛyaa naanɔ.” (1 Yohane 2:17) Mɛɛ hejɔlɛ enɛ aaaji nɛkɛ akɛ aaajie nakai hewalɛ fɔŋ lɛ kɛaaya! No hewɔ lɛ, eba akɛ wɔɔfata mɛi ni feɔ Nyɔŋmɔ suɔmɔnaa nii ni náa wala mli ŋɔɔmɔ kɛyaa naanɔ yɛ Nyɔŋmɔ jalɛ jeŋ hee lɛ mli lɛ ahe.—Lala 37:9-11, 29; 2 Petro 3:13; Kpojiemɔ 21:3, 4.

Kɛ okadi ko etsɔɔɔ lɛ, belɛ Biblia mli ŋmalɛi ni atsɛ lɛ fɛɛ jɛ Ga Biblia lɛ mli.

[Mfoniri ni yɔɔ baafa 4]

Eji nɛkɛ jeŋ nɔyelii nɛɛ fɛɛ jeee Satan nii kulɛ ani eeenyɛ ekɛha Yesu?