Nikasemɔ 6
Mɛni Hewɔ Amanehulu Kɛ Jalɛsane Ni Ayeee Efa Babaoo Nɛkɛ?
1, 2. Yɛ adesai aniiashikpamɔ hewɔ lɛ, mɛɛ sanebimɔi abaanyɛ abi?
1 Shi, kɛji Mɔ ni Fe Fɛɛ lɛ to eyiŋ akɛ gbɔmɛi ni eye emuu ahi shikpɔŋ lɛ nɔ kɛya naanɔ yɛ paradeiso shihilɛi amli, ni no nɔŋŋ ji eyiŋtoo lolo lɛ, mɛni hewɔ paradeiso bɛ amrɔ nɛɛ mɔ? Mɛni hewɔ ni yɛ no najiaŋ lɛ, adesai kɛ afii ohai abɔ ena amanehulu kɛ jalɛsane ni ayeee lɛ?
2 Ŋwanejee ko bɛ he akɛ, adesai ayinɔsane eyi obɔ kɛ awerɛho ní tawuu, shihemɔ maji anɔ kunimyeli, shishiumɔ, jalɛsane ni ayeee, ohia, oshara, hela, kɛ gbele kɛbaa lɛ. Mɛni hewɔ nibii fɔji babaoo eba mɛi babaoo anɔ nakai lɛ? Kɛ́ Nyɔŋmɔ he wa fe fɛɛ lɛ, mɛni hewɔ eŋmɛ nɛkɛ amanehulu babaoo nɛɛ fɛɛ gbɛ ni etee nɔ afii akpei abɔ lɛ? Akɛni Nyɔŋmɔ fee ni eto jeŋ muu lɛ fɛɛ he gbɛjianɔ jogbaŋŋ hu hewɔ lɛ, mɛni hewɔ ni ebaaŋmɛ basabasa feemɔ kɛ hiɛkpatamɔ gbɛ yɛ shikpɔŋ lɛ nɔ?
Nɔkwɛmɔ Nɔ Ko
3-5. (a) Mɛɛ nɔkwɛmɔ nɔ ko baanyɛ aye abua wɔ ni wɔnu nɔ hewɔ ni Nyɔŋmɔ ni ji gbɛjianɔtolɔ kpakpa lɛ eŋmɛ basabasa feemɔ gbɛ yɛ shikpɔŋ nɔ lɛ shishi? (b) Te yiŋtoi etɛ nɛɛ ateŋ nɔ ni sa shihilɛ ni shikpɔŋ lɛ yɔɔ mli lɛ?
3 Nyɛhaa wɔkɛ nɔkwɛmɔ nɔ ko atsua nii ni wɔkɛfea nɔ hewɔ ni Nyɔŋmɔ ni ji gbɛjianɔtolɔ kpakpa lɛ baaŋmɛ basabasa feemɔ gbɛ yɛ shikpɔŋ nɔ lɛ he mfoniri. Bo diɛŋtsɛ feemɔ ohe mfoniri akɛ onyiɛ koo ko mli, aahu kɛkɛ ni obanina shia ko. Beni okwɛ shia lɛ mli fɛɛ kɛkpe lɛ, ona akɛ shia lɛ mli fɛɛ efee basaa. Samfɛji lɛ ekumɔ, tsũ lɛ yiteŋ fɛɛ egbulɔ, tso ni akɛfee ablanaa lɛ hu fɛɛ mli egbulɔ fɔji, ni dadei ni hiɛ shinaa lɛ ekome ekpɔ, ni nu he gbɛjianɔtoo ni yɔɔ shia lɛ mli lɛ tsuuu nii.
4 Ani obaamu sane naa yɛ nɛkɛ tɔmɔi nɛɛ ahewɔ akɛ jeee ŋaalɔ ko ni yɔɔ nilee eeenyɛ efee akɛ eto nakai shia lɛ he gbɛjianɔ? Ani bɔ ni shia lɛ mli efee basaa lɛ baakɔne oyiŋ akɛ heniianaa kɛkɛ ni shia lɛ ba? Aloo kɛ omu sane naa akɛ mɔ ko to he gbɛjianɔ ni ema lɛ, ani obaanu he akɛ nɛkɛ mɔ nɛɛ bɛ nilee ni esusuuu nii ahe jogbaŋŋ hu?
5 Kɛ oje gbɛ okwɛ tsu lɛ jogbaŋŋ kɛmɔ shi lɛ, onaa akɛ kɛjɛ shishijee lɛ, aje gbɛ ama lɛ jogbaŋŋ, ni eyeɔ odase hu akɛ mɔ lɛ susuɔ nii ahe waa. Shi amrɔ nɛɛ efite waa, ni ehiɛ miihe akpata kwraa. Mɛni nɛkɛ tɔmɔi kɛ naagbai ni yɔɔ he nɛɛ tsɔɔ? Amɛbaanyɛ amɛtsɔɔ akɛ (1) mɔ ni tsũ ni lɛ egbo; (2) eji tsumalɔ ni he esa waa, shi ebɛ shia lɛ he miishɛɛ dɔŋŋ; aloo (3) ekɛ eshia lɛ eha mɛi komɛi akɛ amɛhi mli kɛyashi be ko, shi amɛjieee hiɛsɔɔ kpo yɛ he. Sɛɛkpee nɔ lɛ tamɔ shihilɛ ni kɔɔ shikpɔŋ nɛɛ he lɛ pɛpɛɛpɛ.
Nɔ ni Tɔ̃tɔ̃
6, 7. Mɛni ba Adam kɛ Hawa nɔ beni amɛku Nyɔŋmɔ mla mli lɛ?
6 Wɔnaa wɔleɔ kɛjɛɔ Biblia mli shishijee niŋmaa lɛ mli akɛ ejeee Nyɔŋmɔ yiŋtoo akɛ gbɔmɛi ana amanehulu loo amɛgboi. Wɔ klɛŋklɛŋ fɔlɔi, Adam kɛ Hawa gboi akɛni amɛgbo Nyɔŋmɔ nɔ toi lɛ hewɔ. (1 Mose, yitso 2 kɛ 3) Beni amɛgbo toi lɛ, amɛyaaa nɔ amɛfeee Nyɔŋmɔ suɔmɔnaa nii dɔŋŋ. Amɛgbala amɛhe shi kɛjɛ Nyɔŋmɔ kwɛmɔ shishi. Nɔ ni amɛfee kɛkɛ ji akɛ, amɛtse amɛhe kɛjɛ Nyɔŋmɔ, ni ji “wala nu bu” lɛ he.—Lala 36:10.
7 Taakɛ tsɔne ko he jɔɔ fiofio ni ewaa kwraa kɛ afo ehewalɛ jɛɛhe lɛ mli lɛ, nakai nɔŋŋ amɛgbɔmɔtsei kɛ jwɛŋmɔ bɔi fitemɔ. Nɔ ni jɛ mli ba ji akɛ, Adam kɛ Hawa gbɔmɔtso bɔi shibaa, amɛgbɔlɔ, ni naagbee lɛ amɛgboi. Mɛni ba yɛ nakai beaŋ? Amɛku amɛsɛɛ kɛtee he ni amɛjɛ kɛba lɛ: “Sũ jio, ni sũ mli oooku osɛɛ kɛaatee.” Nyɔŋmɔ ebɔ amɛ kɔkɔ akɛ gbele ji nɔ ni baajɛ toigbele ni amɛaafee amɛha emlai lɛ mli aba: “Gbo ooogbo!”—1 Mose 2:17; 3:19.
8. Mɛɛ gbɛ nɔ esha ni wɔ klɛŋklɛŋ fɔlɔi lɛ fee lɛ sa adesai aweku lɛ he yɛ?
8 Jeee gboimɔ kɛkɛ wɔ klɛŋklɛŋ fɔlɔi lɛ gboi, shi moŋ amɛ seshibii, ni ji adesai aweku muu lɛ fɛɛ hu eyaje gbele shishi. Mɛni hewɔ? Ejaakɛ taakɛ adebɔɔ naa fɔmɔ he mlai tsɔɔ lɛ, bii naa sui ni yɔɔ amɛfɔlɔi ahe lɛ kɛtsɔɔ fɔmɔ nɔ. Ni nɔ ni wɔ klɛŋklɛŋ fɔlɔi lɛ abii fɛɛ na kɛjɛ fɔmɔ mli ji emuu ni ayeee kɛ gbele. Romabii 5:12 kɛɔ wɔ akɛ: “Gbɔmɔ kome [Adam, adesai fɛɛ ablematsɛ lɛ] nɔ esha tsɔ kɛba je lɛŋ, ni gbele tsɔ esha nɔ kɛba, ni no ha gbele lɛ tsɛŋe gbɔmɛi fɛɛ, ejaakɛ amɛ fɛɛ amɛfee esha [kɛtsɔ emuu ni amɛyeee ni amɛna yɛ fɔmɔ mli, ni ji, esha henumɔi lɛ nɔ].” Ni akɛni esha, kɛ emuu ni ayeee, kɛ gbele pɛ ji nibii ni gbɔmɛi le hewɔ lɛ, mɛi komɛi buɔ nomɛi akɛ adebɔɔ mli nibii ni anyɛŋ he nɔ ko afee. Shi kɛlɛ, abɔ klɛŋklɛŋ adesai lɛ kɛ nyɛmɔ kɛ suɔmɔ akɛ amɛhi shi kɛya naanɔ. No hewɔ ni mɛi babaoo buɔ gbɛkpamɔ ni ka amɛhiɛ akɛ amɛwala sɛɛ baafo kuku kɛtsɔ gbele nɔ lɛ akɛ nijiaŋwujee sane lɛ.
Mɛni Hewɔ Esɛɛ Etsɛ Nɛkɛ?
9. Mɛni hewɔ ni Nyɔŋmɔ eŋmɛ amanehulu gbɛ ni etee nɔ aahu be kakadaŋŋ lɛ?
9 Mɛni hewɔ ni Nyɔŋmɔ eŋmɛ adesai agbɛ ni amɛkɔ amɛ diɛŋtsɛ amɛgbɛ aahu nɛkɛ? Mɛni hewɔ ni eŋmɛ amanehulu gbɛ ni ehi shi yɛ afii ohai abɔ nɛɛ mli fɛɛ lɛ? Yiŋtoo titri ko hewɔ ji akɛ, atee sane ko ni he hiaa waa shi: Namɔ yɔɔ hegbɛ akɛ eyeɔ nɔ? Ani esa akɛ Nyɔŋmɔ afee adesai a-Nɔyelɔ, aloo ani amɛbaanyɛ amɛye amɛhe nɔ yɛ omanyeyeli mli yɛ be mli ni amɛtsi amɛhe kwraa kɛjɛ ehe?
10. Mɛɛ nyɛmɔ akɛha adesai, ni mɛɛ gbɛnaa nii fata he?
10 Abɔ adesai kɛ nihalamɔ mli heyeli, ni ji, nyɛmɔ ni amɛkɛaahala nɔ ni amɛsumɔɔ. Afeee amɛ tamɔ tsɔnei aloo tamɔ kooloi, ní henumɔ kɛkɛ kudɔɔ amɛ. No hewɔ lɛ adesai baanyɛ ahala mɔ ni amɛbaasɔmɔ. (5 Mose 30:19; 2 Korintobii 3:17) Enɛ hewɔ lɛ, Nyɔŋmɔ Wiemɔ lɛ woɔ ŋaa akɛ: “[Nyɛfea] tamɔ odehei, shi jeee mɛi ni ŋɔɔ odeheyeli nɛɛ amɛfeɔ efɔŋ nɔhaa nɔ, shi moŋ tamɔ Nyɔŋmɔ tsuji.” (1 Petro 2:16) Shi kɛlɛ, eyɛ mli akɛ adesai yɛ nikeenii fɛfɛo ni ji heyeli ni amɛkɛaahala nɔ ni amɛsumɔɔ nɛɛ moŋ, shi esa akɛ amɛkpɛlɛ nɔ ni jɛɔ amɛnifeemɔ mli baa lɛ nɔ.
11. Mɛni ji gbɛ pɛ ni aaatsɔ nɔ ale kɛji he ni aaatsi kwraa kɛjɛ Nyɔŋmɔ he lɛ baaye omanye?
11 Wɔ klɛŋklɛŋ fɔlɔi lɛ hala nii ni ejaaa. Amɛhala akɛ amɛaatsi amɛhe kwraa kɛjɛ Nyɔŋmɔ he. Lɛlɛŋ, kulɛ Nyɔŋmɔ baanyɛ akpata atuatselɔi enyɔ nɛɛ ahiɛ nɔŋŋ beni amɛkɛ amɛheyeli lɛ etsu nii yɛ gbɛ fɔŋ nɔ lɛ sɛɛ. Shi no haŋ ana sane ni kɔɔ hegbɛ ni Nyɔŋmɔ yɔɔ akɛ eyeɔ adesai anɔ lɛ he lɛ naa. Akɛni klɛŋklɛŋ mɛi enyɔ lɛ miitao heyeli kwraa kɛjɛ Nyɔŋmɔ shishi hewɔ lɛ, esa akɛ aha sanebimɔ nɛɛ hetoo: Ani nakai gbɛ lɛ baaha amɛshihilɛ afee miishɛɛ, ni eye omanye? Gbɛ pɛ ni aaatsɔ nɔ ale ji ni aŋmɛ wɔ klɛŋklɛŋ fɔlɔi lɛ kɛ amɛshwiei lɛ agbɛ ni amɛkɔ amɛ diɛŋtsɛ amɛgbɛ, ejaakɛ no ji nɔ ni amɛsumɔɔ. Be ji nɔ ni baatsɔɔ kɛji abɔ adesai ni amɛye omanye yɛ amɛ diɛŋtsɛ amɛhenɔyeli mli, ni amɛbɛ amɛ-Bɔlɔ lɛ shishi.
12. Te Yeremia wie adesa nɔyeli he ha tɛŋŋ, ni mɛni hewɔ nakai enɛ ji lɛ?
12 Biblia ŋmalɔ Yeremia le nɔ ni baajɛ mli aba. Akɛni Nyɔŋmɔ mumɔ krɔŋkrɔŋ ni yɔɔ hewalɛ, loo enitsumɔ hewalɛ lɛ kudɔɔ lɛ hewɔ lɛ, ekɛ anɔkwayeli ŋma akɛ: “Yehowa, mile akɛ gbɔmɔ gbɛ bɛ lɛ diɛŋtsɛ edɛŋ, ni adesa ni nyiɛ nɛɛ, bɔ ni eeetsɔ ejaje enajifaamɔi eha lɛ, ebɛ edɛŋ. Yehowa, kã mi.” (Yeremia 10:23, 24) Ele akɛ esa akɛ adesai ana gbɛtsɔɔmɔ kɛjɛ Nyɔŋmɔ nilee ni jɛ ŋwɛi lɛ mli. Mɛni hewɔ? Nɔ hewɔ ji akɛ, ejaakɛ Nyɔŋmɔ ebɔɔɔ adesai ni amɛtsi amɛhe kɛjɛ egbɛtsɔɔmɔ he ni amɛye omanye.
13. Mɛni ejɛ afii akpei abɔ ni adesai anɔyeli kɛhi shi lɛ mli eba ni anyɛŋ aje he ŋwane?
13 Nɔ ni ejɛ afii akpei abɔ ni adesai kɛye amɛhe nɔ lɛ mli eba lɛ tsɔɔ ní ŋwanejee ko bɛ he akɛ ebɛ adesai ahewalɛ mli akɛ amɛaakudɔ amɛ diɛŋtsɛ amɛshihilɛ ni amɛ-Bɔlɔ lɛ he bɛ mli. Akɛni amɛka amɛkwɛ hewɔ lɛ, amɛnyɛŋ amɛshwa mɔ ko yɛ amanehului ni ejɛ mli eba lɛ he, fe amɛ diɛŋtsɛ amɛhe. Biblia lɛ feɔ enɛ faŋŋ, akɛ: “Tɛsaa ji [Nyɔŋmɔ], ni enitsumɔi hi pɛ; ejaakɛ egbɛi fɛɛ lɛ jalɛ ni. Anɔkwa Mawu ji lɛ, nɔ̃ sha bɛ lɛ; jalɔ ji lɛ, ni esa pɛ. Amɛye lɛ sane fɔŋ, jeee ebii ni, amɛ diɛŋtsɛ amɛhe kpa ni.”—5 Mose 32:4, 5.
Etsɛŋ ni Nyɔŋmɔ Kɛ Ehe Baawo Mli
14. Mɛni hewɔ ni Nyɔŋmɔ tsiŋ ehe ni ekɛaawo adesai asane mli lɛ etoŋ sɛɛ dɔŋŋ lɛ?
14 Akɛni eŋmɛ gbɛ ni be saŋŋ eho, ni akɛna bɔ ni adesai anɔyeli nine enyɛ shi yɛ afii ohai abɔ lɛ mli fɛɛ hewɔ lɛ, Nyɔŋmɔ baanyɛ ekɛ ehe awo adesai asaji amli agbɛnɛ ni ekɛfo amanehulu, awerɛho, helai, kɛ gbele fɛɛ sɛɛ. Akɛni eŋmɛ adesai agbɛ ni amɛtee amɛhiɛ fe fɛɛ bɔ ni amɛaanyɛ yɛ jeŋ nilee, nitsumɔi, tsofa feemɔi, kɛ nibii krokomɛi amli hewɔ lɛ, ehe ehiaaa ni Nyɔŋmɔ aha afii ohai abɔ kroko hu aho ekoŋŋ kɛha adesai ni etse amɛhe kɛjɛ amɛ-Bɔlɔ lɛ he lɛ ni amɛkɛka amɛkwɛ akɛ ani amɛbaanyɛ amɛkɛ toiŋjɔlɛ, kɛ paradeiso jeŋ aba lo. Amɛnyɛko amɛfee, ni amɛnyɛŋ hu. Nɔ ni ejɛ heyeli kɛmiijɛ Nyɔŋmɔ shishi lɛ mli eba ji, jeŋ ni yɔɔ taŋ, ni kɛ hetsɛ̃ kɛ gbele baa.
15. Mɛɛ Biblia mli ŋaawoo wɔɔfee jogbaŋŋ akɛ wɔɔbo toi?
15 Eyɛ mli akɛ ana nɔyelɔi anɔkwafoi ni miisumɔ ni amɛye amɛbua adesai pɛŋ moŋ, shi amɛmɔdɛŋbɔi lɛ yeee omanye. Aana odaseyeli yɛ he fɛɛ he ŋmɛnɛ ni miitsɔɔ bɔ ni adesai anɔyeli fiteɔ ehaa. No hewɔ ni Biblia lɛ woɔ ŋaa akɛ: “Nyɛkaŋɔa nyɛhiɛ nyɛfɔa lumɛi loo gbɔmɔ bi ko ni yelikɛbuamɔ ko bɛ edɛŋ lɛ nɔ.”—Lala 146:3.
[Mfoniri ni yɔɔ yɔɔ baafa 25]
Jeŋ nɔyelɔi anɔkwafoi lɛ po nyɛko amɛkɛ toiŋjɔlɛ, kɛ paradeiso shihilɛ aba je lɛ mli