Nikasemɔ 7

Nyɔŋmɔ ni Aaabɛŋkɛ Lɛ yɛ Sɔlemɔ Mli

Mɛni hewɔ ehe hiaa ni asɔle daa? (1)

Namɔ esa akɛ wɔsɔle wɔha, ni yɛ mɛɛ gbɛ nɔ? (2, 3)

Mɛni nibii ni sa abaanyɛ asɔle yɛ he? (4)

Mɛɛ be esa akɛ osɔle? (5, 6)

Ani Nyɔŋmɔ boɔ sɔlemɔi fɛɛ toi? (7)

1. Sɔlemɔ ji wiemɔ ni akɛ Nyɔŋmɔ wieɔ yɛ heshibaa mli. Esa akɛ osɔle oha Nyɔŋmɔ daa. Kɛkɛ lɛ obaanyɛ onu he akɛ obɛŋkɛ lɛ tamɔ abɛŋkɛɔ naanyo ni yɔɔ suɔmɔ. Yehowa da ni ehe wa naakpa, ni kɛlɛ eboɔ wɔ sɔlemɔi atoi! Ani osɔleɔ ohaa Nyɔŋmɔ daa?—Lala 65:3; 1 Tes. 5:17.

2. Sɔlemɔ ji wɔjamɔ lɛ fa. No hewɔ lɛ, esa akɛ wɔsɔle wɔha Nyɔŋmɔ, Yehowa kome pɛ. Beni Yesu yɔɔ shikpɔŋ nɔ lɛ, esɔleɔ ehaa e-Tsɛ be fɛɛ be, shi jeee kɛha mɔ kroko. Esa akɛ wɔfee nakai nɔŋŋ. (Mat. 4:10; 6:9) Shi kɛlɛ, esa akɛ wɔkɛ wɔsɔlemɔi lɛ fɛɛ aha yɛ Yesu gbɛi amli. Enɛ tsɔɔ akɛ wɔbuɔ Yesu gbɛhe lɛ, ni wɔyɛ hemɔkɛyeli yɛ ekpɔmɔ afɔleshaa lɛ mli.—Yoh. 14:6; 1 Yoh. 2:1, 2.

3. Kɛ wɔmiisɔle lɛ, esa akɛ wɔkɛ Nyɔŋmɔ awie kɛjɛ wɔtsuiŋ. Esaaa akɛ wɔkɛ sɔlemɔi pɔtɛɛ komɛi woɔ wɔyitsoŋ wɔkɛɔ loo wɔkaneɔ kɛjɛɔ wolo ni aŋmala sɔlemɔi awo mli lɛ mli. (Mat. 6:7, 8) Wɔbaanyɛ wɔsɔle yɛ shihilɛ fɛɛ shihilɛ ni bulɛ yɔɔ mli nɔ, yɛ bei fɛɛ mli, kɛ he fɛɛ he. Nyɔŋmɔ baanyɛ anu sɔlemɔi ni anuuu ni wɔkɛɔ yɛ wɔtsui mli lɛ po. (1 Sam. 1:12, 13) Ehi akɛ wɔɔtao he ko ni yɔɔ dioo ni mɛi krokomɛi bɛ jɛmɛ ni wɔkɛɛ wɔsɔlemɔi lɛ.—Mar. 1:35.

4. Mɛɛ saji obaanyɛ osɔle yɛ he? Nɔ fɛɛ nɔ ni baanyɛ asa okɛ lɛ teŋ naanyobɔɔ lɛ he. (Fil. 4:6, 7) Sɔlemɔ he nɔkwɛmɔ nɔ lɛ tsɔɔ akɛ esa akɛ wɔsɔle yɛ Yehowa gbɛi kɛ yiŋtoo he. Wɔbaanyɛ wɔbi ni akɛ wɔ heloonaa hiamɔ nii hu aha wɔ, wɔbi ni akɛ wɔhe eshai ake wɔ, kɛ yelikɛbuamɔ ni wɔkɛaate shi wɔshi kaa. (Mat. 6:9-13) Esaaa akɛ wɔsɔlemɔi feɔ pɛsɛmkunya. Esa akɛ wɔsɔle wɔbi nibii pɛ ni kɛ Nyɔŋmɔ suɔmɔnaa nii kpaa gbee.—1 Yoh. 5:14.

5. Obaanyɛ osɔle be fɛɛ be ni otsui tsirɛɔ bo ni oda Nyɔŋmɔ shi loo ojie eyi. (1 Kron. 29:10-13) Esa akɛ osɔle beni oyɔɔ naagbai ni aaka ohemɔkɛyeli. (Lala 55:23; 120:1) Esa jogbaŋŋ akɛ osɔle dani oye oniyenii. (Mat. 14:19) Yehowa fɔ̃ɔ nine etsɛɔ wɔ ni wɔsɔle “daa.”—Efe. 6:18.

6. Ehe miihia ni wɔsɔle, titri lɛ kɛ wɔfee esha ni hiɛdɔɔ yɔɔ mli. Yɛ bei ni tamɔ nɛkɛ mli lɛ esa akɛ wɔkpa Yehowa mɔbɔnalɛ kɛ eshaifaa he fai. Kɛ wɔjaje wɔhe eshai wɔtsɔɔ lɛ, ni wɔfee bɔ fɛɛ bɔ ni wɔɔnyɛ ni wɔkafee nakai dɔŋŋ lɛ, Nyɔŋmɔ “ŋɔfaa mra.”—Lala 86:5; Abɛi 28:13.

7. Yehowa boɔ jalɔi asɔlemɔi pɛ toi. Kɛ Nyɔŋmɔ aaabo osɔlemɔi atoi lɛ, esa akɛ obɔ mɔdɛŋ waa ni ohi shi yɛ emlai anaa. (Abɛi 15:29; 28:9) Esa akɛ oba ohe shi kɛ oosɔle. (Luka 18:9-14) Esa akɛ otsu nɔ ni osɔleɔ yɛ he lɛ he nii. Okɛbaaye odase akɛ oyɛ hemɔkɛyeli, ni akɛ nɔ ni okɛɔ lɛ pɛpɛɛpɛ otsɔɔ. Ni nɛkɛ be nɛɛ mli pɛ Nyɔŋmɔ baaha osɔlemɔi lɛ ahetoo.—Heb. 11:6.