Wolo Kɛha Bo?

Salomo wie aaafee afii 3,000 ni eho nɛ akɛ: “Woji babaoo feemɔ lɛ ebɛ naagbee.” (Jajelɔ 12:12) Nakai wiemɔ lɛ sa jogbaŋŋ ŋmɛnɛ taakɛ eji daa lɛ. Kɛfata blema woji ni akpɛlɛɔ nɔ lɛ ahe lɛ, akalaa woji heei akpei abɔ daa afi. Akɛni ayɛ woji babaoo hewɔ lɛ, mɛni hewɔ esa akɛ okane Biblia lɛ?

GBƆMƐI babaoo kaneɔ woji kɛhaa miishɛɛnamɔ loo koni amɛkase nɔ ko, loo ekolɛ yɛ yiŋtoi enyɔ lɛ fɛɛ hewɔ. Nakai nɔŋŋ ebaanyɛ efee anɔkwale yɛ Biblia lɛ kanemɔ he. Ebaanyɛ eha aya hiɛ, koni efee nikanemɔ ni haa mɔ náa miishɛɛ po. Shi Biblia lɛ yɛ babaoo fe nakai. Eji nilee jɛɛhe ni yɔɔ sɔrɔto kwraa.—Jajelɔ 12:9, 10.

Biblia lɛ haa saji ni adesai ejwɛŋ nɔ aahu lɛ ahetoo—sanebimɔi ni kɔɔ wɔbe ni eho, wɔ ŋmɛnɛŋmɛnɛ be, kɛ wɔ wɔsɛɛ be he. Mɛi babaoo susuɔ akɛ: Nɛgbɛ wɔjɛ kɛba? Mɛni ji yiŋtoo ni yɔɔ shihilɛ sɛɛ? Te wɔɔfee tɛŋŋ wɔná miishɛɛ yɛ shihilɛ mli? Ani wala baaya nɔ ahi shikpɔŋ lɛ nɔ be fɛɛ be? Mɛni wɔsɛɛ be yɔɔ kɛha wɔ?

Hewalɛ ni odaseyelii lɛ fɛɛ yɔɔ ni akɛhaa yɛ biɛ lɛ tsɔɔ faŋŋ akɛ Biblia lɛ ja ni eji anɔkwale. Wɔtsɔ hiɛ momo wɔsusu bɔ ni emli ŋaawoo kpakpa lɛ baanyɛ aye abua wɔ koni wɔhi shi yɛ gbɛ ni shishinumɔ kɛ miishɛɛ yɔɔ mli nɔ lɛ he. Akɛni ŋmɛnɛŋmɛnɛ be he saji ahetooi ni ekɛhaa lɛ haa mɔ tsui nyɔɔ emli hewɔ lɛ, eka shi faŋŋ akɛ esa akɛ asusu saji ahetooi ni ekɛhaa yɛ be ni eho lɛ kɛ emli gbalɛi ni kɔɔ wɔsɛɛ be he lɛ ahe jogbaŋŋ.

Bɔ ni Ooofee Ona He Sɛɛ Kɛmɔ Shi

Gbɔmɛi babaoo jeɔ Biblia lɛ kanemɔ shishi, shi amɛkpáa kɛ́ amɛna hei komɛi ni ewa akɛ amɛaanu shishi. Kɛ nakai efee oniiashikpamɔ lɛ, no lɛ nibii komɛi yɛ ni baanyɛ aye abua bo.

Halamɔ shishitsɔɔmɔ ko ni anyɛɔ akɛ he fɔ̃ɔ nɔ ni afee yɛ ŋmɛnɛŋmɛnɛ beaŋ wiemɔ mli, tamɔ New World Translation of the Holy Scripturesa lɛ. Mɛi komɛi jeɔ shishi kɛ Sanekpakpa lɛ ni Yesu shihilɛ, ni enitsɔɔmɔi ni nilee yɔɔ mli, tamɔ nɔ ni anaa yɛ Gɔŋ nɔ Shiɛmɔ lɛ mli lɛ jieɔ adesai asubaŋ ni esa akɛ ale jogbaŋŋ lɛ kɛ bɔ ni esa akɛ wɔha wɔshihilɛ aya hiɛ lɛ kpo etsɔɔ lɛ kanemɔ.—Kwɛmɔ Mateo yitso 5 kɛyashi 7.

Kɛfata Biblia muu lɛ fɛɛ kanemɔ he lɛ, saneyitsei ni ato naa lɛ kasemɔ lɛ baanyɛ aha nilee aya hiɛ waa. Enɛ kɔɔ nɔ ni Biblia lɛ kɛɔ yɛ sane pɔtɛɛ ko he lɛ mlipɛimɔ he. Ekolɛ ebaafee bo naakpɛɛ akɛ oookase nɔ ni Biblia lɛ kɛɔ diɛŋtsɛ yɛ saneyitsei tamɔ susuma, ŋwɛi, shikpɔŋ, wala, kɛ gbele he, kɛ Nyɔŋmɔ Maŋtsɛyeli lɛ hu he—nɔ ni eji kɛ nɔ ni ebaatsu.b Yehowa Odasefoi yɛ gbɛjianɔtoo kɛha Biblia lɛ kasemɔ kɛtsɔ saneyitsei anɔ, ni akɛhaa ni aheee shika. Obaanyɛ obi he sane kɛtsɔ mɛi ni fee wolo nɛɛ ni oooŋma amɛ lɛ nɔ, yɛ be mli ni okɛ adrɛs ni atsɔɔ yɛ baafa 2 lɛ mli nɔ ni sa tsuɔ nii.

Beni mɛi babaoo epɛi odaseyeli lɛ mli amɛgbe naa lɛ, amɛmu sane naa akɛ Biblia lɛ jɛ Nyɔŋmɔ, mɔ ni Ŋmalɛi lɛ tsɛɔ lɛ akɛ “Yehowa” lɛ ŋɔɔ. (Lala 83:19) Ekolɛ oyiŋ tsɔŋ akɛ ŋwɛi ajɛ aŋma Biblia lɛ. Shi mɛni hewɔ ni bo diɛŋtsɛ opɛiii mli? Wɔyɛ nɔmimaa akɛ beni bo diɛŋtsɛ otee nɔ okase, ojwɛŋ nɔ, ni ekolɛ oná emli nilee ni be hooo ni sɛɛnamɔ kpakpa yɔɔ mli lɛ, obaanu he akɛ Biblia lɛ ji wolo kɛha gbɔmɛi fɛɛ lɛɛlɛŋ, ni nɔ ni fe nakai lɛ—wolo kɛha bo.

[Shishigbɛ niŋmai]