Nyɔŋmɔ Nanemɛi Kpooɔ Efɔŋ

Satan kaa gbɔmɛi koni amɛfee nibii fɔji. Ehe miihia ni mɔ ni sumɔɔ ni etsɔ Nyɔŋmɔ naanyo lɛ anyɛ̃ nɔ ni Yehowa nyɛ̃ɛɔ lɛ. (Lala 97:10) Naa nibii komɛi ni Nyɔŋmɔ nanemɛi lɛ kpooɔ:

Bɔlɛnamɔ mli eshai. “Kaabɔ ajwamaŋ.” (2 Mose 20:14) Bɔlɛnamɔ mli ni akɛ he woɔ dani aboteɔ gbalashihilɛ mli lɛ hu ji tɔmɔ.—1 Korintobii 6:18.

Dãatɔɔ. “Dãatɔlɔi . . . anine shɛŋ Nyɔŋmɔ maŋtsɛyeli lɛ nɔ kwraa.”—1 Korintobii 6:10.

Gbɔmɔgbee, Musufitemɔ. “Kaagbe gbɔmɔ.”—2 Mose 20:13.

Juu. “Kaaju.”—2 Mose 20:15.

Malemɔ. Yehowa nyɛ̃ɛɔ “apasa lilɛi.”—Abɛi 6:17.

Yiwalɛ kɛ Mlifu ni Anyɛɛɛ Aye Nɔ. “Mɔ ni sumɔɔ yiwalɛ lɛ, [Yehowa] susuma nyɛ̃ɛɔ amɛ.” (Lala 11:5) ‘Mlilawoi fata heloo lɛ nitsumɔi ahe.’—Galatabii 5:19, 20.

Asɔshwɛmɔ. ‘Nyɛkɛ mɔ ni ji hiɛjoolɔ lɛ akabɔ.’—1 Korintobii 5:11.

Weku kɛ Hewolonɔ Su Mli Hetsɛ̃i. “Nyɛsumɔa nyɛhenyɛlɔi, . . . ni nyɛsɔlea nyɛhaa mɛi ni haoɔ nyɛ ni amɛwaa nyɛ yi lɛ.”—Mateo 5:43, 44.

Nibii ni Nyɔŋmɔ kɛɔ wɔ lɛ yɛ kɛha wɔhilɛ-kɛhamɔ. Jeee be fɛɛ be eyɔɔ mlɛo akɛ aaakwa nibii fɔji afeemɔ. Yɛ Yehowa yelikɛbuamɔ kɛ e-Dasefoi lɛ ayelikɛbuamɔ naa lɛ, obaanyɛ okwa nibii ni esaaa Nyɔŋmɔ hiɛ lɛ afeemɔ.—Yesaia 48:17; Filipibii 4:13; Hebribii 10:24, 25.