Sɛɛnamɔ ni Yɔɔ He lɛ ni Aaaha Efee Faŋŋ

KƐ́ OOWIE ootsɔɔ mɔ aŋkro jio, mɛi babaoo jio, efeŋ nilee gbɛ akɛ ooosusu akɛ otoibolɔ(i) lɛ baaná osane lɛ he miishɛɛ ejaakɛ oyɛ he miishɛɛ. Oshɛɛ sane lɛ he miihia, shi kɛ́ onyɛɛɛ oha sɛɛnamɔ ni yɔɔ he lɛ afee faŋŋ lɛ, no lɛ ekolɛ miishɛɛ ni otoibolɔi lɛ yɔɔ yɛ he lɛ sɛɛ etsɛŋ.

Enɛ ji anɔkwale yɛ toibolɔi ní yɔɔ Maŋtsɛyeli Asa lɛ nɔ lɛ po agbɛfaŋ. Amɛbaagbala amɛjwɛŋmɔ kɛba onɔ kɛji okɛ nɔkwɛmɔnɔ loo niiashikpamɔ ko ni amɛnuko dã lɛ tsu nii. Shi kɛ́ oowie nibii ni amɛle momo lɛ ahe, ni titri lɛ, onyɛɛɛ ogbala mli jogbaŋŋ kɛmɔ shi lɛ, ekolɛ amɛbaakpa toiboo. Ehe miihia ni oye obua amɛ ni amɛna nɔ hewɔ, kɛ bɔ ni nɔ ni okɛɔ amɛ lɛ he yɔɔ sɛɛnamɔ diɛŋtsɛ kɛha amɛ.

Biblia lɛ woɔ wɔ hewalɛ koni wɔsusu nii ahe yɛ gbɛ ni anyɛɔ atsuɔ he nii nɔ. (Abɛi 3:21) Yehowa kɛ Yohane Baptisilɔ lɛ tsu nii koni etsɔɔ gbɔmɛi lɛ agbɛ kɛba “jalɔi anilee mli.” (Luka 1:17) Enɛ ji nilee ní ehe shi yɛ Yehowa gbeyeishemɔ kpakpa mli. (Lala 111:10) Ayeɔ abuaa mɛi ni hiɛ sɔɔ nɛkɛ nilee nɛɛ bɔni afee ni amɛkpee shihilɛ ni yɔɔ bianɛ lɛ naa yɛ omanyeyeli mli, ní amɛmɔ anɔkwa wala lɛ, ni ji naanɔ wala ni baaba lɛ mli.—1 Tim. 4:8; 6:19.

Ní Aaaha Wiemɔ ko He Aba Sɛɛnamɔ. Kɛ́ sɛɛnamɔ baaba owiemɔ he lɛ, no lɛ jeee sane lɛ pɛ he esa akɛ osusu jogbaŋŋ, shi moŋ esa akɛ osusu toibolɔi lɛ hu ahe. Kaabu amɛ akɛ kuu ko kɛkɛ. Aŋkroaŋkroi kɛ wekui feɔ nakai kuu lɛ. Ekolɛ gbekɛbii bibii, mɛi ni eye afii nyɔŋma kɛ etɛ kɛyaa, onukpai, kɛ mɛi ni egbɔlɔ yɛ amɛteŋ. Mɛi heei ni yɔɔ wiemɔ lɛ he miishɛɛ kɛ mɛi hu ni je Yehowa sɔɔmɔ shishi dani afɔ bo lɛ yɛ toibolɔi lɛ ateŋ. Mɛi komɛi baanyɛ afee mɛi ni edara yɛ mumɔŋ; mɛi komɛi hu baanyɛ afee mɛi ni je lɛŋ sui kɛ nifeemɔi komɛi náa amɛnɔ hewalɛ lolo. Bi ohe akɛ: ‘Te sane ni miyawie he lɛ he baaba sɛɛnamɔ kɛha toibolɔi lɛ tɛŋŋ? Te mafee tɛŋŋ maye mabua amɛ ni amɛnu oti lɛ shishi?’ Ekolɛ obaasumɔ ni ogbala ojwɛŋmɔ titri kɛba kuu kome loo enyɔ ni atsĩ tã yɛ biɛ lɛ nɔ. Shi kɛlɛ, ohiɛ akakpa mɛi krokomɛi lɛ anɔ kwraa.

Kɛ́ akɛ nifeemɔ ha bo koni oyawie Biblia shishijee tsɔɔmɔ ko he hu? Te ooofee tɛŋŋ oha nakai wiemɔ lɛ he aba sɛɛnamɔ kɛha toibolɔi ní heɔ nakai tsɔɔmɔ lɛ amɛyeɔ momo lɛ? Bɔɔ mɔdɛŋ ni owaje hemɔkɛyeli ní amɛyɔɔ yɛ mli lɛ. Yɛ mɛɛ gbɛ nɔ? Kɛtsɔ Ŋmalɛ naa odaseyeli ní fiɔ sɛɛ lɛ he susumɔ nɔ. Obaanyɛ oha hiɛsɔɔ ni amɛyɔɔ kɛha nakai Biblia tsɔɔmɔ lɛ hu mli akwɔ. Obaanyɛ ofee enɛ kɛtsɔ ha ni oooha ana bɔ ni tsɔɔmɔ lɛ kɛ Biblia mli anɔkwalei krokomɛi kpãa gbee kɛ bɔ ni ekɛ Yehowa diɛŋtsɛ sui lɛ kpãa gbee lɛ nɔ. Okɛ nɔkwɛmɔnii—kɛ́ eeehi lɛ, shihilɛ mli nɔkwɛmɔnii ni ba mli diɛŋtsɛ—atsu nii ní okɛtsɔɔ bɔ ni nɛkɛ tsɔɔmɔ pɔtɛɛ nɛɛ shishinumɔ he eba sɛɛnamɔ eha mɛi kɛ bɔ ni ená bɔ ni amɛsusuɔ wɔsɛɛ he amɛhaa lɛ nɔ hewalɛ lɛ mli.

Kaawie ekɛ nitsumɔ lɛ he fioo pɛ yɛ owiemɔ lɛ naamuu wiemɔ lɛ mli. Ha otoibolɔi lɛ ateŋ mɔ fɛɛ mɔ anu he kɛjɛ shishijee tɔŋŋ akɛ “enɛ kɔɔ mihe.” Beni ofee enɛ lɛ, yaa nɔ owie ekɛ nitsumɔ lɛ he yɛ be mli ni owieɔ sane oti fɛɛ sane oti he yɛ owiemɔ lɛ mli kɛ agbɛnɛ hu enaamuu lɛ mli.

Kɛ́ okɛmiito nɔ ko he lɛ, kwɛmɔ ni ofee lɛ yɛ gbɛ ni kɛ Biblia shishitoo mlai kpãa gbee nɔ. Mɛni enɛ tsɔɔ? Etsɔɔ akɛ ní ofee lɛ yɛ suɔmɔ gbɛ nɔ, ní ojie mɔbɔnalɛ kpo. (1 Pet. 3:8; 1 Yoh. 4:8) Beni bɔfo Paulo tsuɔ naagbai ni naa wa he nii yɛ Tesalonika lɛ po lɛ, ekwɛ koni ema enyɛmimɛi hii kɛ yei Kristofoi ni yɔɔ jɛmɛ lɛ amumɔŋ nɔyaa he jwɛŋmɔ kpakpa lɛ nɔ mi. Ejie hekɛnɔfɔɔ hu kpo akɛ, yɛ sane ni amɛsusuɔ he lɛ mli lɛ, amɛbaasumɔ ni amɛfee nɔ ni ja. (1 Tes. 4:1-12) Mɛɛ nɔkwɛmɔnɔ kpakpa ni sa kasemɔ nɛ!

Ani owiemɔ lɛ yiŋtoo ji ni ekanya mɛi ni amɛkɛ amɛhe awo shiɛmɔ nitsumɔ lɛ mli ni amɛtsɔɔ mɛi krokomɛi sanekpakpa lɛ he nii? Tswaa miishɛɛ kɛ hiɛsɔɔ kɛha nakai hegbɛ lɛ oma shi. Shi kɛlɛ, beni ofeɔ nakai lɛ, ha ni ehi ojwɛŋmɔ mli akɛ esoro aŋkroaŋkroi anyɛmɔi yɛ bɔ ni anyɛɔ akɛ he woɔ enɛ mli lɛ mli, ni Biblia lɛ susuɔ enɛ he. (Mat. 13:23) Okɛ fɔyeli henumɔi akagba onyɛmimɛi lɛ anaa. Hebribii 10:24 woɔ wɔ hewalɛ ni “wɔhiɛ adɔ suɔmɔ kɛ nitsumɔi kpakpai ahe.” Kɛ́ wɔwo hewalɛ yɛ suɔmɔ mli lɛ, nitsumɔi ni damɔ henumɔ kpakpa nɔ lɛ baanyiɛ sɛɛ. Yɛ nɔ najiaŋ ni oootsɔɔ mɔ ko toiboo ni efee lɛ, yɔsemɔ akɛ nɔ ni Yehowa taoɔ ji ni wɔwo hewalɛ ni ‘abo hemɔkɛyeli lɛ toi.’ (Rom. 16:26) Akɛni enɛ yɔɔ wɔjwɛŋmɔ mli hewɔ lɛ, wɔtaoɔ ni wɔwaje wɔhemɔkɛyeli lɛ—wɔ diɛŋtsɛ wɔhemɔkɛyeli lɛ kɛ wɔnyɛmimɛi lɛ hu anɔ̃.

Ní Oooye Obua Mɛi Krokomɛi ni Amɛna Oti Lɛ. Beni oyeɔ mɛi krokomɛi odase lɛ, kwɛmɔ ni oma sɛɛnamɔ ni yɔɔ sanekpakpa lɛ he lɛ nɔ mi. Nakai ni ooofee lɛ biɔ ni osusu nɔ ni yɔɔ gbɔmɛi ni yɔɔ oshikpɔŋkuku lɛ mli lɛ ajwɛŋmɔ mli lɛ he. Te ooofee tɛŋŋ ole enɛ? Bó redio loo tɛlivishiŋ nɔ adafitswai atoi. Kanemɔ adafitswaa woji lɛ klɛŋklɛŋ baafai lɛ. Agbɛnɛ hu bɔɔ mɔdɛŋ ni ogbala gbɔmɛi owo sanegbaa lɛ mli, ni obo toi beni amɛwieɔ lɛ. Obaana akɛ ekolɛ amɛmiihao yɛ naagba ko ni gbaa amɛnaa lɛ hewɔ—nitsumɔ ni eje mɔ dɛŋ, tsũ nyɔmɔwoo, hela, wekunyo ko gbele, awuiyeli mli oshara, jalɛ sane ni maŋ onukpa ko yeee, gbalamlitsemɔ, gbekɛbii atsɔsemɔ, kɛ ekrokomɛi ni fata he. Ani Biblia lɛ baanyɛ aye abua amɛ? Hɛɛ ebaanyɛ.

Kɛ́ oje sanegbaa shishi lɛ, eka shi faŋŋ akɛ oyɛ sane ko yɛ ojwɛŋmɔ mli. Shi kɛlɛ, kɛ́ mɔ lɛ tsɔɔ akɛ eyɛ sane kroko ko he miishɛɛ waa lɛ, no lɛ kaashashao shi ni nyɛgba no moŋ he sane kɛji obaanyɛ, loo kɛɛmɔ akɛ obaaku osɛɛ koni okɛ saji ni baaye abua abaha lɛ. Eji anɔkwale akɛ wɔtsiɔ wɔhe kɛjɛɔ ‘nibii ni kɔɔɔ wɔhe lɛ ni wɔkɛ wɔhe aaawo mli lɛ he,’ shi wɔkɛ miishɛɛ gbaa mɛi ŋaawoo ni anyɛɔ atsuɔ he nii, ní Biblia lɛ kɛhaa lɛ. (2 Tes. 3:11) Eka shi faŋŋ akɛ, nɔ ni mɛi baaná he miishɛɛ waa ji Biblia mli ŋaawoo ni saa amɛ diɛŋtsɛ amɛshihilɛi ahe.

Kɛ́ gbɔmɛi enaaa bɔ ni wɔshɛɛ sane lɛ saa amɛhe diɛŋtsɛ lɛ, no lɛ ekolɛ amɛbaafo sanegbaa lɛ sɛɛ amrɔ nɔŋŋ. Kɛ́ amɛha wɔwie po lɛ, akɛni wɔhaaa sɛɛnamɔ ni yɔɔ sane lɛ mli lɛ aje kpo faŋŋ hewɔ lɛ, ebaatsɔɔ akɛ wɔshɛɛ sane lɛ nyɛŋ aná amɛshihilɛi anɔ hewalɛ tsɔ̃. Yɛ gbɛ kroko nɔ lɛ kɛ́ wɔha sɛɛnamɔ ni yɔɔ shɛɛ sane lɛ mli lɛ fee faŋŋ lɛ, wɔ sanegbaa lɛ baanyɛ afee tsakemɔ ko yɛ mɛi lɛ ashihilɛ mli.

Kɛ́ oofee Biblia mli nikasemɔ lɛ, yaa nɔ oma ekɛ nitsumɔ nɔ mi. (Abɛi 4:7) Ye obua nikaselɔi lɛ ni amɛnu Ŋmalɛ mli ŋaawoo, shishitoo mlai, kɛ nɔkwɛmɔnii ní tsɔɔ amɛ bɔ ni anyiɛɔ Yehowa gbɛ̀i anɔ lɛ shishi. Maa sɛɛnamɔi ni jɛɔ enɛ feemɔ mli kɛbaa lɛ nɔ mi. (Yes. 48:17, 18) Enɛ baaye abua nikaselɔi lɛ ni amɛfee tsakemɔi ni he hiaa lɛ yɛ amɛshihilɛi amli. Tswaa suɔmɔ kɛha Yehowa kɛ shwelɛ akɛ amɛaasa ehiɛ lɛ owo amɛmli, ni oha kanyamɔ ni aaana akɛ akɛ ŋaawoo ni jɛ Nyɔŋmɔ Wiemɔ lɛ mli lɛ aaatsu nii lɛ ajɛ mligbɛ.