Sanegbaa Su Ahi Mli

GBƆMƐI efɔɔɔ sane he jwɛŋmɔ kɛ́ amɛkɛ nanemɛi miigba sane. Saji ni amɛwieɔ he lɛ diɛŋtsɛ baa. Mɛi komɛi awiemɔ naa wa; mɛi krokomɛi hu anɔ yɛ blɛoo. Ni kɛlɛ, kɛ́ mɔ ko kɛ lɛ diɛŋtsɛ egbee wie yɛ nakai gbɛ nɔ lɛ, eŋɔɔ.

Shi kɛlɛ, kɛ́ okɛ gbɔ ko kpe lɛ, esaaa akɛ okɛ lɛ wieɔ tamɔ nɔ ni okɛ mɔ ko ni ole lɛ momo miiwie. Yɛ anɔkwale mli lɛ, yɛ maji komɛi amli lɛ, ayɛ gbɛ pɔtɛɛ ko ni atsɔɔ nɔ akɛ gbɔi jeɔ sanegbaa shishi. Be mli ni ojie bulɛ ni sa lɛ kpo lɛ, agbɛnɛ ebaanyɛ ehi akɛ okɛ sɛɛyoomɔ aaatsu nii ni okɛ lɛ awie yɛ gbɛ ni bɛ keketee tsɔ nɔ ni ejie sanegbaa su babaoo kpo.

Kɛ́ odamɔ wiemɔ kpoku lɛ nɔ ni oowie lɛ, esa akɛ okwɛ jogbaŋŋ. Kɛ́ okɛ owiemɔ lɛ shwɛ babaoo tsɔ lɛ, ebaaha bulɛ ni ayɔɔ yɛ Kristofoi akpee he kɛ hiɛdɔɔ ni yɔɔ nɔ ni okɛɔ lɛ he lɛ alaaje. Yɛ wiemɔi komɛi amli lɛ, akpaa gbɛ akɛ okɛ wiemɔi komɛi baatsu nii beni okɛ mɔ ko ni ye bo onukpa, tsɔɔlɔ, maŋ onukpa, loo fɔlɔ ko wieɔ lɛ. (Kadimɔ wiemɔi ni akɛtsu nii yɛ Bɔfoi lɛ Asaji 7:2 lɛ kɛ 13:16 lɛ.) Akɛ wiemɔi srɔtoi tsuɔ nii beni akɛ gbalashihilɛ mli hefatalɔ loo akɛ naanyo ni asumɔɔ lɛ wieɔ lɛ. Yɛ be mli ni esaaa akɛ wɔhaa wɔwiemɔ yɛ wiemɔ kpoku lɛ nɔ lɛ feɔ keketee tsɔ lɛ, esa akɛ ejie bulɛ kpo.

Shi kɛlɛ, nibii komɛi yɛ ni baanyɛ aha mɔ ko wiemɔ afee nɔ ni yɔɔ keketee loo etoiboo eŋɔɔɔ. Amɛteŋ ekome ji wiemɔ he gbɛjianɔtoo loo wiemɔ kuku kɛ nitsumɔ. Kɛ́ wielɔ ko bɔ mɔdɛŋ akɛ ebaati wiemɔi lɛ amli taakɛ akala lɛ, ekɛ naagba baa. Bei pii lɛ, wiemɔi ni aŋmalaa lɛ yɛ srɔto yɛ wiemɔi ni akɛ naabu wieɔ lɛ he. Eji anɔkwale akɛ, akwɛɔ saji ni akala nɔ afeɔ niiamlipɛimɔ ni akɛsaa he kɛha wiemɔ. Ekolɛ, wiemɔ he wolo ni akala lɛ nɔ adamɔɔ ahaa wiemɔ. Shi kɛ́ owie yɛ gbɛ ni amɛjeɔ kpo yɛ wolo lɛ nɔ, loo okane nɔ ni aŋma yɛ wiemɔ he wolo ni okwɛɔ nɔ lɛ mli lɛ, no lɛ eka shi faŋŋ akɛ owiemɔ lɛ efeeŋ tamɔ sanegbaa nɔ. Bɔni afee ni sanegbaa su ahi owiemɔ mli lɛ, wiemɔ yɛ bo diɛŋtsɛ owiemɔ mli ni otsi ohe kɛjɛ wiemɔ he gbɛjianɔtoo ni yɔɔ haŋtsii he.

Nɔ kroko hu ji tsakemɔ ni aaaba bɔ ni owiemɔ lɛ yaa lɛ ehaa lɛ mli. Bei pii lɛ, wiemɔi ni yɔɔ keketee lɛ kɔɔ wiemɔi ni eko nyiɛ eko sɛɛ ni gbɛ ni yɔɔ pɛpɛɛpɛ kamɔ amɛteŋ lɛ he. Yɛ daa gbi wiemɔ mli lɛ, gbɛ ni kamɔ teŋ lɛ tsakeɔ ni amiɔ sɛ̃ŋ nu yɛ gbɛi babaoo nɔ.

Eji anɔkwale akɛ, kɛ́ oowie ootsɔɔ mɛi babaoo lɛ, esa akɛ okɛ gbee walɛ afata wiemɔ ni sanegbaa su yɔɔ mli lɛ he, kɛ ekãa hu bɔni afee ni amɛjwɛŋmɔ ahi owiemɔ lɛ nɔ.

Bɔni afee ni okɛ wiemɔ ni sanegbaa su yɔɔ mli atsu nii yɛ shiɛmɔ nitsumɔ lɛ mli lɛ, esa akɛ oha efee osu akɛ obaawie jogbaŋŋ be fɛɛ be. Enɛ etsɔɔɔ akɛ esa akɛ ole woloŋ babaoo. Shi ehi akɛ ooona wiemɔ sui kpakpai ní baaha mɛi krokomɛi kɛ bulɛ abo nɔ ni okɛɔ lɛ toi. Beni enɛ yɔɔ ojwɛŋmɔ mli lɛ, susumɔ he okwɛ akɛ ani ehe miihia ni otsu otii ni nyiɛ sɛɛ nɛɛ ahe nii yɛ odaa gbi wiemɔ mli lo.

1. Tsi ohe kɛjɛ wiemɔi ni kɛ wiemɔ he mla kpakpa kpãaa gbee, loo wiemɔi ni baaha abu bo ashi mɛi ni amɛshihilɛ gbɛi teɔ shi woɔ Nyɔŋmɔ shishitoo mlai lɛ anɔ lɛ ahe. Yɛ ŋaawoo ni yɔɔ Kolosebii 3:8 lɛ kɛ gbeekpamɔ naa lɛ, tsi ohe kɛjɛ wiemɔi ni esaaa he. Yɛ gbɛ kroko nɔ lɛ, awieee ashiii wiemɔi ni akɛtsuɔ nii daa lɛ. Wiemɔi ni akɛtsuɔ nii daa gbi lɛ bɛ keketee, shi amɛkɛ wiemɔ he shishitoo mla ni akpɛlɛɔ nɔ lɛ kpãa gbee.

2. Tsi ohe kɛjɛ wiemɔ kome kɛ wiemɔi kukuji ni oootĩ mli koni ekɛ susumɔi srɔtoi ni oyɔɔ lɛ aha lɛ he. Okɛ wiemɔi ni jieɔ nɔ ni otsɔɔ lɛ mli faŋŋ lɛ atsu nii.

3. Tsi ohe kɛjɛ wiemɔi ni owie momo ni oootĩ mli lɛ he, kɛtsɔ wiemɔ ni otaoɔ owie ni oooha efee faŋŋ yɛ ojwɛŋmɔ mli lɛ nɔ; agbɛnɛ jee owiemɔ lɛ shishi.

4. Tsi ohe kɛjɛ wiemɔi babaoo ní okɛaatsimɔ susumɔi kpakpai lɛ anɔ lɛ he. Ha efee osu akɛ obaawie otii ni ehe hiaa ni akai lɛ ahe yɛ faŋŋ mli, yɛ wiemɔi kukuji amli.

5. Wiemɔ kɛ su ni tsɔɔ bulɛ ni oyɔɔ kɛha mɛi krokomɛi.