FÃ 8

Kwa Apasa Jamɔ; Okɛ Ohe Awo Anɔkwa Jamɔ Mli

1. Mɛɛ nihalamɔ kã gbɔmɛi ahiɛ ŋmɛnɛ yɛ jamɔ gbɛfaŋ?

YESU kɛɛ akɛ: “Mɔ ni bɛ migbɛfaŋ lɛ, shi ete ewo mi.” (Mateo 12:30) Kɛ́ wɔbɛ Yehowa gbɛfaŋ lɛ, no lɛ wɔyɛ Satan gbɛfaŋ. Mɛi babaoo susuɔ akɛ amɛmiisɔmɔ Nyɔŋmɔ yɛ gbɛ ni saa ehiɛ nɔ, shi Biblia lɛ kɛɔ akɛ Satan “shishiuɔ jeŋ muu lɛ fɛɛ.” (Kpojiemɔ 12:9) Mɛi akpekpei abɔ heɔ yeɔ akɛ amɛmiijá Nyɔŋmɔ, shi amɛmiisɔmɔ Satan Abonsam diɛŋtsɛ! Nihalamɔ ko kã gbɔmɛi ahiɛ ŋmɛnɛ: No ji akɛ, esa akɛ amɛsɔmɔ Yehowa, ni ji “Nyɔŋmɔ anɔkwafo” lɛ, loo Satan, ni ji “malemɔ tsɛ” lɛ.—Lala 31:6; Yohane 8:44.

Tsi Ohe Kwraa Kɛjɛ Apasa Jamɔ He

2. Mɛni ji gbɛ kome ni Satan tsɔɔ nɔ ebɔɔ mɔdɛŋ ni etsĩ gbɔmɛi anaa koni amɛkajá Yehowa?

² Yiŋ ní akpɛɔ akɛ aaasɔmɔ Yehowa lɛ ji nihalamɔ ni nilee yɔɔ mli, nihalamɔ ni kɛ Nyɔŋmɔ nɔkpɛlɛmɔ baa. Shi Satan naaa mɔ fɛɛ mɔ ní sɔmɔɔ Nyɔŋmɔ lɛ he miishɛɛ; ekɛ haomɔi kɛ naagbai baa mɛi ni sɔmɔɔ Nyɔŋmɔ lɛ anɔ. Gbɛ kome ni etsɔɔ nɔ efeɔ enɛ ji hefɛoyeli loo shitee-kɛ-woo ní ehaa ejɛɔ mɛi krokomɛi, kɛ nanemɛi kɛ weku mli bii po aŋɔɔ kɛbaa amɛnɔ lɛ. Yesu bɔ kɔkɔ akɛ: “Mɔ diɛŋtsɛ shia teŋ bii aaatsɔmɔ ehenyɛlɔi.”—Mateo 10:36.

3. Kɛ́ oweku lɛ loo onanemɛi teɔ shi woɔ jamɔ ní ojáa Nyɔŋmɔ lɛ, mɛni obaafee?

³ Kɛ́ nakai nɔ ko ba onɔ lɛ, te obaafee onii yɛ he oha tɛŋŋ? Mɛi pii le akɛ gbɛ ni amɛtsɔɔ nɔ amɛjáa Nyɔŋmɔ lɛ ejaaa, shi kɛlɛ amɛshashaoɔ shi akɛ amɛaatsi amɛhe kɛjɛ he. Amɛsusuɔ akɛ kɛ́ amɛfee nakai lɛ, belɛ amɛyeee amɛweku lɛ anɔkwa. Ani nilee yɛ enɛ mli? Kɛ́ oná ole akɛ oweku lɛ mli bii ni bɛŋkɛ bo kpaakpa lɛ kɛ tsofai fɔji tsuɔ nii lɛ, ani obɔŋ amɛ kɔkɔ akɛ tsofai nɛɛ baaye amɛ awui? Oyafataŋ amɛhe ní nyɛkɛ tsofai fɔji nɛɛ atsu nii, aloo obaafee nakai?

4. Mɛni Yoshua kɛ Israelbii lɛ wie yɛ jamɔ he yɛ egbii lɛ amli?

⁴ Yoshua wo Israelbii lɛ hewalɛ ní amɛŋmɛɛ amɛ blematsɛmɛi lɛ ajamɔ mli nifeemɔi kɛ blema saji ní ejaaa lɛ ahe kwraa. Ekɛɛ akɛ: “Agbɛnɛ nyɛshea Yehowa gbeyei, ní nyɛjie nyɛyitsoŋ nyɛsɔmɔ lɛ yɛ anɔkwale mli, ní nyɛkwa nyɔŋmɔi ni nyɛtsɛmɛi lɛ sɔmɔ yɛ faa lɛ sɛɛ kɛ Mizraim lɛ, ní nyɛsɔmɔa Yehowa.” (Yoshua 24:14) Yoshua ye Nyɔŋmɔ anɔkwa, ni Yehowa jɔɔ lɛ jogbaŋŋ diɛŋtsɛ. Kɛ́ wɔye Yehowa anɔkwa lɛ, wɔ hu ebaajɔɔ wɔ.—2 Samuel 22:26.

Jamɔ Mli Tsɔɔmɔi—Anɔkwale kɛ Amale

Triniti Lɛ: Jamɔi pii tsɔɔ akɛ Nyɔŋmɔ lɛ, Triniti ni. Amɛkɛɔ akɛ “Tsɛ lɛ ji Nyɔŋmɔ, Bi lɛ [Yesu] ji Nyɔŋmɔ, ni Mumɔ Krɔŋkrɔŋ lɛ ji Nyɔŋmɔ, ni kɛlɛ jeee Nyɔŋmɔi etɛ yɔɔ shi moŋ Nyɔŋmɔ kome.”

Biblia lɛ etsĩii wiemɔ ni ji “Triniti” lɛ po tã, nakai nɔŋŋ hu etsɔɔɔ akɛ Yehowa ji mɛi etɛ ni yɔɔ mɔ kome mli. Yehowa kome pɛ ji Nyɔŋmɔ. Klɛŋklɛŋ Korintobii 8:6 lɛ kɛɔ akɛ: “Kɛlɛ wɔ lɛ, Nyɔŋmɔ kome pɛ wɔyɔɔ, [Tsɛ, NW] lɛ.” Yehowa ji Mɔ ni Nɔ Kwɔ Fe Fɛɛ. Yesu jeee Nyɔŋmɔ, shi moŋ eji “Nyɔŋmɔ bi.” (1 Yohane 4:15) Nakai nɔŋŋ mumɔ krɔŋkrɔŋ lɛ hu jeee Nyɔŋmɔ. Mumɔ krɔŋkrɔŋ lɛ jeee mɔ diɛŋtsɛ po. Eji Nyɔŋmɔ nitsumɔ hewalɛ.—Bɔfoi lɛ Asaji 1:8; Efesobii 5:18.
Susuma Lɛ: Jamɔi pii tsɔɔ akɛ susuma lɛ ji nɔ ko ni yɔɔ mɔ mli ní enyɛŋ egbo kɔkɔɔkɔ. Biblia lɛ tsɔɔ akɛ susuma lɛ ji gbɔmɔ lɛ, ni yɛ anɔkwale mli lɛ, gbɔmɔ baanyɛ agbo.—1 Mose 2:7; Ezekiel 18:4.
Hɛl La: Apasa jamɔi tsɔɔ akɛ apiŋɔ mɛi fɔji lɛ asusumai kɛyaa naanɔ yɛ hɛl la mli. Biblia lɛ kɛɔ akɛ gbohii lɛ, “amɛleee nɔ ko nɔ ko.” (Jajelɔ 9:5) Biblia lɛ tsɔɔ hu akɛ “Nyɔŋmɔ lɛ, suɔmɔ ji lɛ.” (1 Yohane 4:8) Yehowa, Nyɔŋmɔ ni yɔɔ suɔmɔ lɛ, piŋ mɛi krokomɛi yɛ la mli kɔkɔɔkɔ.

Akrabatsa: Mɛni Biblia lɛ tsɔɔ yɛ Triniti lɛ, susuma, kɛ hɛl la he?

Shɛrɛmɔ Nibii ni Akɛtsuɔ Nii yɛ Apasa Jamɔ Mli lɛ Fɛɛ Oshwie

5. Mɛni hewɔ esa akɛ wɔshɛrɛ ŋkunyaayeli nibii wɔshwie lɛ?

⁵ Wɔhe ní wɔɔtsi kwraa kɛjɛ apasa jamɔ he lɛ hu tsɔɔ akɛ esa akɛ wɔkpata ashwaifeemɔ nibii ni wɔyɔɔ, tamɔ ŋkunyaayeli nibii, sɛbɛi, ashwaifeemɔ, wao gai kɛ nineshi gai, kɛ nibii ni tamɔ enɛɛmɛi ni wɔyɔɔ lɛ fɛɛ hiɛ. Enɛ he miihia ejaakɛ etsɔɔ akɛ wɔkɛ wɔhiɛ fɔ̃ɔ Yehowa nɔ kwraa kɛmɔɔ shi.

6. Mɛni mra be mli Kristofoi lɛ fee yɛ amɛ ŋkunyaayeli woji lɛ ahe?

⁶ Susumɔ nɔ ni mra be mli Kristofoi komɛi fee beni amɛkpɛ amɛyiŋ akɛ amɛkɛ amɛhe baawo anɔkwa jamɔ mli lɛ he okwɛ. Biblia lɛ kɛɔ akɛ: “Ŋkunyaayelɔi lɛ hu ateŋ mɛi babaoo ba ni amɛkɛ amɛwoji lɛ babua shi ni amɛshã yɛ mɛi fɛɛ hiɛ.”—Bɔfoi lɛ Asaji 19:19.

7. Kɛ́ daimonioi miihao wɔ lɛ, mɛni wɔbaanyɛ wɔfee?

⁷ Ekolɛ daimonioi lɛ baahao mɛi ni ebɔi Yehowa sɔɔmɔ, ní tsutsu ko lɛ amɛkɛ amɛhe wo ayɛkpɛmɔ, ŋkunyaayeli, loo ashwaifeemɔi amli tɛ̃ɛ lɛ. Kɛ́ nakai nɔ ko miiba onɔ lɛ, bóo otsɛ́ Yehowa waa yɛ sɔlemɔ mli, ní okɛ egbɛi lɛ atsu nii. Ebaaye ebua bo.—Abɛi 18:10; Yakobo 4:7.

8. Te Kristofoi buɔ wɔji, amagai, kɛ mfonirii ni akɛtsuɔ nii yɛ apasa jamɔ mli lɛ amɛhaa tɛŋŋ?

⁸ Esaaa akɛ mɛi ni miisumɔ ní amɛsɔmɔ Yehowa lɛ kɛ wɔŋ, amaga, loo mfoniri ko ni ji apasa jamɔ fã lɛ eko toɔ loo amɛkɛtsuɔ nii. Anɔkwa Kristofoi ‘nyiɛɔ yɛ hemɔkɛyeli naa, shi jeee ninamɔ naa.’ (2 Korintobii 5:7) Amɛboɔ Nyɔŋmɔ mla ni guɔ amaga kɛ nitsumɔ yɛ jamɔ mli lɛ toi.—2 Mose 20:4, 5.

Okɛ Yehowa Webii lɛ Abɔ

Yoo ko kɛ ebi yoo fioo ko efee ekome kɛmiihoo nii

9. Mɛɛ ŋaawoo Biblia lɛ kɛhaa yɛ nilelɔ ni mɔ ko aaatsɔ lɛ he?

⁹ Biblia lɛ kɛɔ akɛ: “Mɔ ni kɛ nilelɔi nyiɛɔ lɛ, eeetsɔ nilelɔ.” (Abɛi 13:20) Kɛ́ wɔmiitao ni wɔtsɔmɔ nilelɔi lɛ, no lɛ esa akɛ wɔkɛ Yehowa Odasefoi anyiɛ, loo abɔ. Amɛji gbɔmɛi ni nyiɛ gbɛ ni kɛ mɔ yaa wala mli lɛ nɔ lɛ.—Mateo 7:14.

10. Yehowa Odasefoi baanyɛ aye abua bo ni osɔmɔ Nyɔŋmɔ yɛ mɛɛ gbɛ nɔ?

¹⁰ Odasefoi susuɔ gbɔmɛi ahe diɛŋtsɛ. Amɛnitsumɔ ji ni amɛye amɛbua mɛi ni yɔɔ jalɛ tsuii lɛ ní amɛnu Biblia mli anɔkwalei ni kɛ mɔ yaa naanɔ wala mli lɛ ashishi. Amɛbaanyɛ amɛye amɛbua bo kɛtsɔ Biblia lɛ ni amɛkɛ bo baakase, ní amɛheŋ bo nɔ ko kwraa lɛ nɔ. Amɛbaaha osanebimɔi lɛ ahetoo, ni amɛbaatsɔɔ bo gbɛ ni oootsɔ nɔ ni okɛ Biblia mli nilee atsu nii yɛ oshihilɛ mli.—Yohane 17:3.

11. Kristofoi akpeei baanyɛ aye abua bo yɛ mɛɛ gbɛ nɔ?

¹¹ Kɛ́ otee amɛkpeei ni amɛfɔɔ yaa yɛ Maŋtsɛyeli Asa lɛ nɔ lɛ shishi lɛ, ebaaha okase Yehowa gbɛ̀i ahe saji babaoo. Ebaawo bo hewalɛ yɛ suɔmɔ ni oná akɛ okɛ ohe baawo anɔkwa jamɔ mli lɛ gbɛfaŋ. Ni obaaná tsɔsemɔ hu koni bo hu onyɛ oye obua mɛi krokomɛi ní amɛkase Biblia mli anɔkwalei lɛ.—Hebribii 10:24, 25.

Aafee asafoŋ kpee yɛ Maŋtsɛyeli Asa ko nɔ

12. Sɔlemɔ baanyɛ aye abua bo ní osɔmɔ Nyɔŋmɔ yɛ mɛɛ gbɛ nɔ?

¹² Yɛ be mli ni okaseɔ Yehowa suɔmɔnaa nii kɛ eyiŋtoo he nii babaoo lɛ, eka shi faŋŋ akɛ hiɛsɔɔ ni oyɔɔ kɛha egbɛ̀i ní suɔmɔ yɔɔ mli lɛ mli baawa. Esa akɛ oha suɔmɔ ni oyɔɔ akɛ obaafee nɔ ni sa ehiɛ, ní otsi ohe kɛjɛ nibii ni esaaa ehiɛ lɛ ahe lɛ hu ada. Kaimɔ akɛ obaanyɛ oya Yehowa ŋɔɔ yɛ sɔlemɔ mli koni obi lɛ ni eye ebua bo ni ofee nɔ ni ja, koni otsi ohe kwraa kɛjɛ efɔŋ he.—1 Korintobii 6:9, 10; Filipibii 4:6.

Weku ko efee ekome kɛmiikane Biblia lɛ — Te obaafee tɛŋŋ okɛ ohe awo anɔkwa jamɔ mli lɛ?

13. Obaanyɛ oha Yehowa tsui anya kɛ miishɛɛ yɛ mɛɛ gbɛ nɔ?

¹³ Yɛ be ko sɛɛ, beni oyaa nɔ odaa yɛ mumɔŋ lɛ, ŋwanejee ko bɛ he akɛ obaana akɛ ehe miihia ni otsɔ Yehowa Odasefonyo ni ejɔɔ ehe nɔ ni abaptisi lɛ. Kɛ́ obafata Yehowa webii asafo lɛ he lɛ, obaaha Yehowa tsui anya waa kɛ miishɛɛ. (Abɛi 27:11) No baaha ofata gbɔmɛi ni yɔɔ miishɛɛ, ni Nyɔŋmɔ wieɔ amɛhe nɛkɛ lɛ ahe, akɛ: “Mahi amɛmli, ni manyiɛ yɛ amɛteŋ, ni matsɔ amɛ-Nyɔŋmɔ, ni amɛ hu amɛaatsɔ mimaŋ.”—2 Korintobii 6:16.

Yoo ko Ye Ehe Kɛjɛ Daimonioi Adɛŋ

Gbi ko gbɛkɛ beni mikɛ miwu kamɔ shi yɛ saa mli ní wɔwɔ lɛ, minu gbee ko ni miitsɛ migbɛi shii etɛ sɔŋŋ. Kɛkɛ ni mina akɛ tsũ lɛ sɛndo lɛ mli gba enyɔ, ni nɔ ko kokroo ko ni miitso tamɔ la jɛ sɛndo lɛ mli ebagbee mimusu nɔ. Yɛ anɔkwale mli lɛ, miwu enaaa nibii ni tee nɔ nɛɛ eko kwraa. Shi kɛlɛ, minu he akɛ la lɛ miishã mi waa diɛŋtsɛ, ni enɛ he nyɔji abɔ.

Nyɔji ekpaa sɛɛ lɛ, gbee lɛ batsɛ mi ekoŋŋ. Amrɔ nɔŋŋ kɛkɛ ni efee tamɔ nɔ ni shia muu lɛ fɛɛ ma nu ní mli kwɔ waa mli. Onufu agbo ko je kpo kɛjɛ nu lɛ mli ni ebabala minine he. Mibɔ mɔdɛŋ ni makpɔ lɛ yɛ minine he, shi minyɛɛɛ. Mitsui fã waa. Kɛkɛ ni nu lɛ kɛ onufu lɛ fɛɛ laaje trukaa, ni nɔ ko fɔ̃ mi kɛtee ŋwɛi kɛbatswa shikpɔŋ. Nɔ̃ nyɔ minɔ ŋmɛlɛtswai babaoo. Kɛkɛ ni gbee lɛ kɛɛ mi akɛ miku misɛɛ kɛya mumɔi asɔlemɔtsu ko ni yɔɔ akrowa lɛ, ní atsáa mɔ yɛ mli lɛ mli. Beni mibi mumɔ lɛ egbɛi lɛ, etsɔɔ mi gbɛi ko ni shishinumɔ ji “mɔ ni yɔɔ nii babaoo, shi ebɛ bi.” Ewo mi shi akɛ ebaaha maná nii waa kɛtsɔ helatsamɔ hewalɛi anɔ.

Helatsɛmɛi jɛɔ hei ni bɛŋkɛ kɛ hei ni yɔɔ shɔŋŋ amɛbaa miŋɔɔ. Dani amɛbaashɛ mishia lɛ, amɛpueɔ yɛ mishwishwɛ krɛdɛɛ ko mli. No sɛɛ lɛ, kɛ́ mɔ lɛ bashɛ shi lɛ, mikɛ midɛŋ tswaa edɛŋ waa, ni ajieɔ hela ní yeɔ lɛ lɛ loo enaagba lɛ kɛ enaa tsabaa lɛ atsɔɔ mi amrɔ nɔŋŋ. Mumɔ lɛ hu kɛɔ mi shika falɛ ní esa akɛ gbɔmɛi lɛ awo.

Shika kɛ nikeenii babaoo diɛŋtsɛ bɔi baa, yɛ bɔ ni helatsamɔi lɛ mɔɔ shi lɛ hewɔ. Mibatsɔ “mɔ ni yɔɔ nii babaoo,” shi mibale nɔ ni “mɔ ni bɛ bi” lɛ hu shishinumɔ ji. Be fɛɛ be ni mafɔ́ lɛ, kɛkɛ lɛ mɔ tuuntu ni mifɔ esɛɛ lɛ egbo. Enɛ hao mi waa diɛŋtsɛ. Yɛ afii 12 ní mikɛsɔmɔ mumɔ nɛɛ mli fɛɛ lɛ, mibii lɛ ateŋ mɛi ekpaa sɔŋŋ gboi.

Mije shishi misɔle mibi Nyɔŋmɔ ni eye ebua mi. Misɔle waa diɛŋtsɛ. Gbi ko lɛ, Yehowa Odasefoi batswa mishinaa lɛ. Eyɛ mli akɛ mifɔɔ amɛ shwiemɔ moŋ, shi nakai gbi lɛ, mikpɛ miyiŋ akɛ mabo amɛ toi. Yɛ sanegbaa ni nyiɛ sɛɛ lɛ mli lɛ, mibaná mile akɛ daimonio ji mɔ ni misɔmɔɔ lɛ! Mikpɛ miyiŋ akɛ makpa mumɔi atsɛmɔ nifeemɔi kwraa.

Beni mikɛɛ daimonio lɛ enɛ lɛ, ebɔ mi kɔkɔ waa yɛ miyiŋkpɛɛ nɛɛ he. Shi kɛlɛ, mikɛɛ lɛ akɛ: “Mikɛ bo efo tako mli kwraa.”

Mishã ŋkunyaayeli nibii ni mikɛtsuɔ nii lɛ fɛɛ. Mikɛ Odasefoi lɛ kase Biblia lɛ, ni mibatsɔ Yehowa tsulɔ, ni abaptisi mi yɛ afi 1973 lɛ mli. Amrɔ nɛɛ miyɛ bii enumɔ ní yɔɔ gbɔmɔtsoŋ hewalɛ kpakpa. Miwu hu batsɔ Odasefonyo ní abaptisi lɛ.—Taakɛ Josephine Ikezu gba lɛ.

Akrabatsa: Te yoo ko fee tɛŋŋ eye ehe kɛjɛ daimonioi lɛ adɛŋ lɛ?