NIKASEMƆ 6

Mɛɛ Hiɛnɔkamɔ Yɔɔ Kɛhã Gbohii Lɛ?

1. Mɛni ji sane kpakpa ni kɔɔ gbohii lɛ ahe?

Lazaro nyɛmimɛi yei Marta kɛ Maria efuɔ lɛ atuu be ni atee lɛ shi lɛ

Be ni Yesu yashɛ Betania ni bɛŋkɛ Yerusalem lɛ, no mli lɛ enaanyo Lazaro egbo gbii ejwɛ. Yesu kɛ Marta kɛ Maria, ni ji Lazaro nyɛmimɛi yei lɛ tee gbonyobu lɛ he. Etsɛɛɛ ni mɛi babaoo babua shi. Feemɔ miishɛɛ ni Marta kɛ Maria ná be ni Yesu tee Lazaro shi kɛba wala mli lɛ he mfoniri okwɛ.—Kanemɔ Yohane 11:21-24, 38-44.

No mli lɛ, Marta le sane kpakpa ni kɔɔ gbohii lɛ ahe lɛ momo. Ele akɛ Yehowa baatee gbohii lɛ ashi kɛba wala mli koni amɛbahi shikpɔŋ lɛ nɔ ekoŋŋ.—Kanemɔ Hiob 14:14, 15.

2. Mɛɛ shihilɛ mli gbohii lɛ yɔɔ?

Be ni abɔɔ Adam lɛ kɛ sɛɛ mli be ni egbo lɛ — Nyɔŋmɔ kɛɛ Adam akɛ: “Sũ ji bo, ni sũ mli obaaku osɛɛ kɛya.”—1 MOSE 3:19.

Akɛ shikpɔŋ sũ bɔ adesai. (1 Mose 2:7; 3:19) Wɔjeee mumɔi ni hiɛ heloo gbɔmɔtsei. Heloo kɛ lá ji wɔ, ni no hewɔ lɛ kɛ́ wɔgboi lɛ nɔ ko bɛ wɔmli ni yaa nɔ ehiɔ shi. Kɛ́ wɔgboi lɛ, wɔjwɛŋmɔ lɛ hu gboɔ, ni wɔyiŋtoi fɛɛ laajeɔ. Enɛ hewɔ lɛ, Lazaro ewieee gbo ni egbo lɛ he nɔ ko, ejaakɛ gbohii lɛ leee nɔ ko nɔ ko.—Kanemɔ Lala 146:4; Jajelɔ 9:5, 6, 10.

Ani Nyɔŋmɔ piŋɔ mɛi yɛ la mli yɛ amɛgbele sɛɛ? Akɛni Biblia lɛ tsɔɔ akɛ gbohii lɛ leee nɔ ko nɔ ko hewɔ lɛ, eyɛ faŋŋ akɛ hɛl la lɛ ji amale tsɔɔmɔ ni gbeɔ Nyɔŋmɔ he guɔ. Akɛ aaapiŋ mɛi yɛ la mli lɛ ji nihiinii kɛhã Nyɔŋmɔ.—Kanemɔ Yeremia 7:31.

Kwɛmɔ vidio ni ji Mɛɛ Shihilɛ Mli Gbohii Lɛ Yɔɔ?

3. Ani gbohii lɛ baanyɛ amɛkɛ wɔ awie?

Gbohii lɛ nyɛɛɛ awie ni asaŋ amɛnuuu nii hu. (Lala 115:17) Shi bɔfoi lɛ ekomɛi ehiii, ni ekolɛ amɛkɛ mɛi baawie oookɛɛ amɛji mɛi ni egboi lɛ. (2 Petro 2:4) Yehowa efã akɛ wɔkabi gbohii anii; eji enihiinii.—Kanemɔ 5 Mose 18:10, 11.

4. Namɛi ashi abaatee?

Nuu ko ni atee lɛ shi kɛba wala mli yɛ Paradeiso lɛ mli lɛ miikase Nyɔŋmɔ he nii. Sɛɛ mli lɛ eeye eebua kɛmiitsɔɔ mɛi krokomɛi ni atee lɛ shi lɛ nii.

Mɛi akpekpei abɔ ni yɔɔ gbohiiabui lɛ amli lɛ baaba wala mli ekoŋŋ yɛ shikpɔŋ lɛ nɔ. Abaatee mɛi komɛi ni leee Nyɔŋmɔ ni amɛfee nibii fɔji lɛ po shi.—Kanemɔ Luka 23:43; Bɔfoi 24:15.

Mɛi ni abaatee amɛ shi lɛ baaná hegbɛ kɛkase Nyɔŋmɔ he anɔkwale lɛ ní amɛbo Yesu toi kɛtsɔɔ akɛ amɛheɔ enɔ amɛyeɔ. (Kpojiemɔ 20:11-13) Mɛi ni baaba wala mli ekoŋŋ ní baafee nibii kpakpai lɛ baahi shi kɛya naanɔ yɛ shikpɔŋ lɛ nɔ.—Kanemɔ Yohane 5:28, 29.

5. Mɛni gbohiiashitee lɛ tsɔɔ wɔ yɛ Yehowa he?

Nyɔŋmɔ hã e-Bi lɛ bagbo ehã wɔ, ni no baahã atee gbohii lɛ ashi. No hewɔ lɛ, gbohiiashitee lɛ tsɔɔ wɔ akɛ Yehowa yɛ suɔmɔ ni eji drolɔ. Kɛ́ atee gbohii lɛ ashi lɛ, namɔ obaasumɔ waa akɛ ona lɛ?—Kanemɔ Yohane 3:16; Romabii 6:23.

Kɛ́ ootao ole enɛ he saji babaoo lɛ, kwɛmɔ Mɛni Wɔbaanyɛ Wɔkase Kɛjɛ Biblia Lɛ Mli? wolo lɛ yitso 6, 7, kɛ 10 lɛ.