Mɛni Hewɔ Nyɔŋmɔ Ŋmɛɔ Efɔŋfeemɔ Kɛ Piŋmɔ Gbɛ?

1. Te fee tɛŋŋ efɔŋfeemɔ je shishi?

Efɔŋfeemɔ je shishi yɛ shikpɔŋ lɛ nɔ be ni Satan male klɛŋklɛŋ kwraa lɛ. Shishijee lɛ, Satan ji ŋwɛibɔfo ni eye emuu, shi “edamɔɔɔ shi shiŋŋ yɛ anɔkwale lɛ mli.” (Yohane 8:44) Nyɔŋmɔ pɛ ji mɔ ni esa akɛ ajá, shi Satan ná shwelɛ akɛ ajá lɛ moŋ. Satan laka Hawa, ni ji klɛŋklɛŋ yoo lɛ, ni ekɔne eyiŋ koni ebo lɛ moŋ toi fe Nyɔŋmɔ. Adam yafata Hawa he kɛgbo Nyɔŋmɔ nɔ toi. Piŋmɔ kɛ gbele jɛ nɔ ni Adam fee lɛ mli kɛba.​—Kanemɔ 1 Mose 3:1-6, 19.

Satan tsɔ kɛɛmɔ ni ekɛɛ Hawa akɛ egbo Nyɔŋmɔ nɔ toi lɛ nɔ etse Nyɔŋmɔ nɔyeli lɛ loo hegbɛ ni Nyɔŋmɔ yɔɔ akɛ Ofe lɛ hiɛ atua. Adesai babaoo eyafata Satan he ni amɛkpoo Nyɔŋmɔ akɛ amɛ-Nɔyelɔ. No hewɔ lɛ, Satan ebatsɔ “je lɛ nɔyelɔ.”​—Kanemɔ Yohane 14:30; 1 Yohane 5:19.

2. Ani naagba yɛ bɔ ni Nyɔŋmɔ bɔ wɔ ehã lɛ he?

Nibii fɛɛ ni Nyɔŋmɔ bɔ lɛ hi jogbaŋŋ. Nyɔŋmɔ bɔ adesai kɛ ŋwɛibɔfoi lɛ bɔ ni amɛbaanyɛ amɛbo lɛ toi kɛwula shi. (5 Mose 32:4, 5) Nyɔŋmɔ bɔ wɔ bɔ ni wɔ diɛŋtsɛ wɔbaanyɛ wɔkpɛ wɔyiŋ akɛ wɔbaafee ekpakpa loo efɔŋ. Nyɛmɔ nɛɛ hãa wɔnáa hegbɛ koni wɔkɛtsɔɔ kɛji wɔsumɔɔ Nyɔŋmɔ loo wɔsumɔɔɔ lɛ.​—Kanemɔ Yakobo 1:13-15; 1 Yohane 5:3.

3. Mɛni hewɔ Nyɔŋmɔ eŋmɛ piŋmɔ gbɛ kɛbashi ŋmɛnɛ?

Yehowa eŋmɛ enɔyeli lɛ hiɛ atua ni atse lɛ gbɛ kɛyashi be ko. Mɛni hewɔ? Bɔ ni afee ni ekɛhã ana akɛ kɛ́ ehe bɛ nɔyeli ko mli lɛ, mɛi náŋ he sɛɛ. (Jajelɔ 7:29; 8:9) Afii 6,000 ni adesai kɛye amɛhe nɔ lɛ ehã anɔkwa sane nɛɛ efee faŋŋ. Adesai nɔyelɔi nyɛko afo ta, awuiyeli, efɔŋfeemɔ, kɛ hela sɛɛ.​—Kanemɔ Yeremia 10:23; Romabii 9:17.

Adesa nɔyeli he baaa sɛɛnamɔ, shi Nyɔŋmɔ nɔyeli lɛ he baa sɛɛnamɔ kɛhãa mɛi ni kpɛlɛɔ nɔ lɛ. (Yesaia 48:17, 18) Etsɛŋ, Yehowa baakpãtã adesa nɔyelii fɛɛ ahiɛ. Mɛi ni kpɛlɛɔ Nyɔŋmɔ nɔyeli lɛ nɔ lɛ pɛ baahi shikpɔŋ lɛ nɔ.​—Yesaia 11:9; Kanemɔ Daniel 2:44.

Kwɛmɔ vidio ni ji Mɛni Hewɔ Nyɔŋmɔ Ŋmɛɔ Piŋmɔ Gbɛ?

4. Mɛɛ hegbɛ wɔná yɛ Nyɔŋmɔ tsuishitoo lɛ hewɔ?

Satan tsɔɔ akɛ adesai sɔmɔɔ Yehowa yɛ nibii kpakpai ni amɛnáa lɛ pɛ ahewɔ. Ani obaasumɔ ni ohã ana akɛ eji amalelɔ? Obaanyɛ ofee nakai! Nyɔŋmɔ tsui shi ni eto lɛ hãa wɔ fɛɛ wɔnáa hegbɛ koni wɔkɛtsɔɔ kɛji wɔkpɛlɛɔ Nyɔŋmɔ nɔyeli lɛ nɔ loo wɔkpɛlɛɔ adesa nɔyeli nɔ. Bɔ ni wɔhiɔ shi wɔhãa lɛ tsɔɔ nɔ ni wɔkpɛlɛɔ nɔ.​—Kanemɔ Hiob 1:8-12; Abɛi 27:11.

5. Te wɔbaafee tɛŋŋ wɔkpɛlɛ Nyɔŋmɔ nɔ akɛ wɔ-Nɔyelɔ?

Kɛ́ wɔtao anɔkwa jamɔ ni atsɔɔ yɛ e-Wiemɔ ni ji Biblia lɛ mli, ni wɔhi shi yɛ naa lɛ, no tsɔɔ akɛ wɔkpɛlɛɔ Nyɔŋmɔ nɔ akɛ wɔ-Nɔyelɔ. (Yohane 4:23) Tamɔ bɔ ni Yesu fee lɛ, kɛ́ wɔkɛ wɔhe wooo maŋkwramɔŋ saji amli ni wɔwuuu ta lɛ, no tsɔɔ akɛ wɔkpoɔ Satan akɛ wɔnɔyelɔ.​—Kanemɔ Yohane 17:14.

Satan kɛ hewalɛ ni eyɔɔ lɛ tsuɔ nii kɛwoɔ nifeemɔi gbohii ni yeɔ mɔ awui ahe hewalɛ. Kɛ́ wɔkpoo nakai nifeemɔi lɛ, ekolɛ wɔnanemɛi kɛ wɔwekumɛi lɛ ekomɛi baaye wɔhe fɛo, loo amɛbaate shi amɛwo wɔ. (1 Petro 4:3, 4) No hewɔ lɛ, esa akɛ wɔkpɛ wɔyiŋ. Ani wɔkɛ mɛi ni sumɔɔ Nyɔŋmɔ baabɔ? Ani wɔbaaye emlai ni nilee yɔɔ mli ni tsɔɔ akɛ esumɔɔ wɔ lɛ anɔ? Kɛ́ wɔfee nakai lɛ, wɔhãa anaa akɛ nɔ ni Satan wie akɛ mɔ ko boŋ Nyɔŋmɔ toi yɛ shihilɛi ni mli wawai amli lɛ ji amale.​—Kanemɔ 1 Korintobii 6:9, 10; 15:33.

Nyɔŋmɔ sumɔɔ adesai, ni no hãa wɔnaa faŋŋ akɛ bɔ fɛɛ bɔ ni fee lɛ, efɔŋfeemɔ kɛ piŋmɔ sɛɛ baafo. Mɛi ni kɛ amɛnifeemɔi tsɔɔ akɛ amɛheɔ enɛ amɛyeɔ lɛ baahi shikpɔŋ lɛ nɔ kɛya naanɔ.​—Kanemɔ Yohane 3:16.