Te Oweku Lɛ Baafee Tɛŋŋ Aná Miishɛɛ?

1. Mɛni hewɔ dani miishɛɛ baahi weku ko mli lɛ, ja nuu lɛ kɛ yoo lɛ ebote gbãla mli yɛ kusum naa loo yɛ nɔ ni amralo lɛ najiaŋdamɔlɔ kwɛɔ nɔ lɛ naa?

Sane kpakpa lɛ jɛ Yehowa, miishɛɛ Nyɔŋmɔ lɛ, ni sumɔɔ ni miishɛɛ ahi wekui amli lɛ ŋɔɔ. (1 Timoteo 1:11) Lɛ eto gbalashihilɛ shishi. Ja nuu lɛ kɛ yoo lɛ ebote gbãla mli yɛ kusum naa loo yɛ nɔ ni amralo lɛ najiaŋdamɔlɔ kwɛɔ nɔ lɛ naa dani miishɛɛ baahi amɛweku lɛ mli, ejaakɛ no hãa weku lɛ feɔ shweshweeshwe kɛhã bii atsɔsemɔ. Kɛ́ maŋ lɛ mla biɔ ni mɛi kɛ amɛgbalashihilɛ awo mla shishi lɛ, esa akɛ Kristofoi aye nɔ.​—Kanemɔ Luka 2:1, 4, 5.

Te Nyɔŋmɔ buɔ gbalashihilɛ ehãa tɛŋŋ? Eesumɔ ni nuu lɛ kɛ yoo lɛ ahi shi akɛ wu kɛ ŋa daa. Yehowa miisumɔ ni wumɛi kɛ ŋamɛi aye amɛhe anɔkwa. (Hebribii 13:4) Enyɛɔ gbalatsemɔ. (Maleaki 2:16) Shi eŋmɛɔ Kristofoi gbɛ ni amɛtse gbãla ni amɛkɛ mɔ kroko ahi shi kɛ́ amɛhefatalɔ lɛ bɔ ajwamaŋ.​—Kanemɔ Mateo 19:3-6, 9.

2. Te esa akɛ wu kɛ ŋa kɛ amɛhe aye ahã tɛŋŋ?

Yehowa bɔ nuu kɛ yoo koni amɛye amɛbua amɛhe yɛ gbalashihilɛ mli. (1 Mose 2:18) Akɛni wu lɛ ji weku lɛ yitso hewɔ lɛ, lɛ ji mɔ titri ni sɔ̃ kã enɔ akɛ ehã eweku lɛ amɛheloonaa hiamɔ nii, ni etsɔɔ amɛ Nyɔŋmɔ he nii. Esa akɛ esumɔ eŋa lɛ ni ekɛ ehe ashã afɔle ehã lɛ. Esa akɛ wumɛi kɛ ŋamɛi asumɔ amɛhe, ni amɛjie bulɛ kpo amɛtsɔɔ amɛhe. Akɛni wumɛi kɛ ŋamɛi fɛɛ yeee emuu hewɔ lɛ, esa akɛ amɛkɛ tɔmɔi akekee amɛhe, ni no titri baahã miishɛɛ ahi amɛgbalashihilɛ lɛ mli.​—Kanemɔ Efesobii 4:31, 32; 5:22-25, 33; 1 Petro 3:7.

3. Kɛ́ miishɛɛ bɛ nyɛgbãla lɛ mli lɛ, ani esa akɛ oshi ohefatalɔ lɛ?

Kɛ́ nyɛkɛ naagbai miikpe yɛ nyɛgbãla lɛ mli lɛ, esa akɛ nyɛ fɛɛ nyɛbɔ mɔdɛŋ nyɛjie suɔmɔ kpo nyɛtsɔɔ nyɛhe. (1 Korintobii 13:4, 5) Nyɔŋmɔ Wiemɔ lɛ ejieee yi akɛ kɛ́ mɔ ko kɛ naagbai miikpe yɛ egbalashihilɛ mli lɛ, etse ehe kɛje ehefatalɔ lɛ he.​—Kanemɔ 1 Korintobii 7:10-13.

4. Bii, mɛni Nyɔŋmɔ taoɔ ni nyɛná?

Yehowa miitao ni nyɛná miishɛɛ. Ekɛ gbɛtsɔɔmɔi ni hi fe fɛɛ ni baahã nyɛná miishɛɛ yɛ nyɛblahiiaŋ kɛ nyɛblayeiaŋ lɛ hãa nyɛ. Eetao ni nyɛná nilee kɛ niiashikpamɔ ni nyɛfɔlɔi yɔɔ lɛ he sɛɛ. (Kolosebii 3:20) Agbɛnɛ hu, Yehowa ji nyɛ-Bɔlɔ, ni eesumɔ ni nyɛfee lɛ kɛ e-Bi lɛ suɔmɔnaa nii koni nyɛná miishɛɛ.​—Kanemɔ Jajelɔ 11:9–12:1; Mateo 19:13-15; 21:15, 16.

5. Fɔlɔi, te nyɛbii lɛ baafee tɛŋŋ amɛná miishɛɛ?

Esa akɛ nyɛtsu nii waa koni nyɛná niyenii, shihilɛhe, kɛ atadei nyɛhã nyɛbii lɛ. (1 Timoteo 5:8) Shi bɔ ni afee ni nyɛbii lɛ aná miishɛɛ lɛ, ehe miihia hu ni nyɛtsɔɔ amɛ ni amɛsumɔ Nyɔŋmɔ, ni amɛkase nii kɛjɛ eŋɔɔ. (Efesobii 6:4) Nɔkwɛmɔnɔ ni nyɛfeɔ kɛtsɔɔ akɛ nyɛsumɔɔ Nyɔŋmɔ lɛ baanyɛ aná nyɛbii lɛ atsui nɔ hewalɛ waa. Kɛ́ nyɛjɛ Nyɔŋmɔ Wiemɔ lɛ mli nyɛtsɔɔ nyɛbii lɛ nii lɛ, no baanyɛ ahã amɛsusu nii ahe yɛ gbɛ kpakpa nɔ.​—Kanemɔ 5 Mose 6:4-7; Abɛi 22:6.

Kɛ́ nyɛwo nyɛbii lɛ hewalɛ ni nyɛjie amɛyi lɛ, amɛnáa he sɛɛ waa. Jajemɔ kɛ tsɔsemɔ hu he miihia amɛ. Tsɔsemɔ ni tamɔ nɛkɛ lɛ baabu amɛhe kɛje nifeemɔi ni hãŋ amɛná miishɛɛ lɛ ahe. (Abɛi 22:15) Kɛ̃lɛ, esaaa akɛ nyɛkɛ yiwalɛ tsɔseɔ amɛ.​—Kanemɔ Kolosebii 3:21.

Yehowa Odasefoi feɔ woji babaoo ni ato he gbɛjianɔ koni eye ebua fɔlɔi kɛ gbekɛbii. Ajɛɔ Biblia lɛ mli aŋmalaa woji nɛɛ.​—Kanemɔ Lala 19:7, 11.