NIKASEMƆ 10
Te Obaafee Tɛŋŋ Ona Anɔkwa Jamɔ Lɛ?
1. Ani anɔkwa jamɔ kome pɛ yɔɔ?
“Nyɛkwɛa nyɛhe nɔ jogbaŋŋ yɛ amale gbalɔi lɛ ahe.”—MATEO 7:15.
Yesu tsɔɔ esɛɛnyiɛlɔi lɛ jamɔ kome pɛ, no ji anɔkwa jamɔ lɛ. Etamɔ gbɛ ni kɛ mɔ yaa naanɔ wala mli. Yesu kɛɛ akɛ: “Mɛi fioo ji mɛi ni naa” nakai gbɛ lɛ. (Mateo 7:14) Jamɔ pɛ ni Nyɔŋmɔ kpɛlɛɔ nɔ ji nɔ ni damɔ e-Wiemɔ lɛ, ni ji Biblia lɛ nɔ. Anɔkwa jálɔi fɛɛ hiɛ hemɔkɛyeli kome.—Kanemɔ Yohane 4:23, 24; 14:6; Efesobii 4:4, 5.
Kwɛmɔ vidio ni ji Ani Nyɔŋmɔ Kpɛlɛɔ Jamɔi Fɛɛ Nɔ?
2. Mɛni Yesu wie yɛ amale Kristofoi ahe?
“Amɛjajeɔ yɛ faŋŋ akɛ amɛle Nyɔŋmɔ, shi amɛkɛ amɛnitsumɔi tsɔɔ akɛ amɛje esɛɛ.”—TITO 1:16.
Yesu bɔ kɔkɔ akɛ amale gbalɔi baato amale Kristojamɔ shishi. Amɛfeɔ amɛnii oookɛɛ anɔkwa jálɔi. Amɛsɔlemɔŋbii lɛ tsɛɔ amɛhe Kristofoi. Shi obaanyɛ ona mɛi tuuntu ni amɛji. Yɛ mɛɛ gbɛ nɔ? Anɔkwa jamɔ pɛ mli anaa anɔkwa Kristofoi yɛ, ni amɛsui kɛ amɛnifeemɔi hãa anaa faŋŋ akɛ amɛji Kristofoi lɛɛlɛŋ.—Kanemɔ Mateo 7:13-23.
3. Te obaafee tɛŋŋ ona anɔkwa jálɔi lɛ?
Naa nibii enumɔ ni hãa ayɔseɔ amɛ:
Anɔkwa jálɔi buɔ Biblia lɛ akɛ eji Nyɔŋmɔ Wiemɔ. Amɛbɔɔ mɔdɛŋ akɛ amɛbaahi shi yɛ shishitoo mlai ni yɔɔ mli lɛ anaa. No hewɔ lɛ, esoro anɔkwa jamɔ yɛ jamɔ ni damɔ adesai asusumɔi anɔ lɛ he. (Mateo 15:7-9) Anɔkwa jálɔi hiɔ shi yɛ nibii ni amɛshiɛɔ lɛ anaa.—Kanemɔ Yohane 17:17; 2 Timoteo 3:16, 17.
Yesu sɛɛnyiɛlɔi anɔkwafoi lɛ woɔ Nyɔŋmɔ gbɛ́i ni ji Yehowa lɛ hiɛ nyam. Yesu hã mɛi le Nyɔŋmɔ gbɛ́i lɛ, ni ekɛwo gbɛ́i lɛ hiɛ nyam. Eye ebua mɛi ni amɛle Nyɔŋmɔ, ni etsɔɔ amɛ ni amɛsɔle koni atse Nyɔŋmɔ gbɛ́i lɛ he. (Mateo 6:9) Mɛɛ jamɔ hãa mɛi leɔ Nyɔŋmɔ gbɛ́i lɛ yɛ he ni oyɔɔ lɛ?—Kanemɔ Yohane 17:26; Romabii 10:13, 14.
Anɔkwa Kristofoi shiɛɔ Nyɔŋmɔ Maŋtsɛyeli lɛ. Nyɔŋmɔ tsu Yesu koni ebashiɛ Maŋtsɛyeli lɛ he sane kpakpa lɛ. Nyɔŋmɔ Maŋtsɛyeli lɛ pɛ baanyɛ atsu adesai anaagbai ahe nii. Yesu tee nɔ ewie he aahu kɛyashi egbo. (Luka 4:43; 8:1; 23:42, 43) Ewie akɛ esɛɛnyiɛlɔi lɛ baashiɛ Nyɔŋmɔ Maŋtsɛyeli lɛ. Kɛ́ mɔ ko ba ni ekɛ bo bawie Nyɔŋmɔ Maŋtsɛyeli lɛ he lɛ, mɛɛ jamɔ mli ekã shi faŋŋ akɛ eyɔɔ?—Kanemɔ Mateo 24:14.
Yesu sɛɛnyiɛlɔi lɛ fataaa je lɛ he. Obaanyɛ oyɔse amɛ ejaakɛ amɛkɛ amɛhe wooo pɔlitis loo maŋ saji amli. (Yohane 17:16; 18:36) Agbɛnɛ hu, amɛkaseee je lɛŋ nifeemɔi kɛ sui gbohii lɛ.—Kanemɔ Yakobo 4:4.
Anɔkwa Kristofoi sumɔɔ amɛhe waa. Nyɔŋmɔ Wiemɔ lɛ tsɔɔ amɛ akɛ amɛkɛ bulɛ ahã mɛi ni jɛ maji srɔtoi fɛɛ anɔ. Bei pii lɛ, amale jamɔi fiɔ tai asɛɛ, shi anɔkwa jálɔi efeee nakai. (Mika 4:1-3) Yɛ no najiaŋ lɛ, anɔkwa Kristofoi jɛɔ amɛsuɔmɔ mli amɛkɛ amɛbe kɛ amɛnibii yeɔ amɛbuaa mɛi ni amɛshɛjeɔ amɛmii.—Kanemɔ Yohane 13:34, 35; 1 Yohane 4:20.
4. Ani obaanyɛ oyɔse anɔkwa jamɔ lɛ?
Mɛɛ jamɔ hãa etsɔɔmɔi fɛɛ damɔɔ Nyɔŋmɔ Wiemɔ lɛ nɔ, ekɛ bulɛ hãa Nyɔŋmɔ gbɛ́i lɛ, ni etsɔɔ akɛ Nyɔŋmɔ Maŋtsɛyeli lɛ pɛ baatsu adesai anaagbai ahe nii? Mɛɛ jamɔ kuu sumɔɔ amɛhe ni amɛwuuu ta? Te osusuɔ tɛŋŋ?—Kanemɔ 1 Yohane 3:10-12.